Yoga Vasistha · Verses 6.53-2

tripañcāśaḥ sargaḥ

śrībhagavānuvāca /
arjuna tvaṃ na hantā tvamabhimānamalaṃ tyaja /
jarāmaraṇanirmuktaḥ svayamātmāsi śāśvataḥ

yasya nāhaṃkṛto bhāvo buddhiryasya na lipyate /
hatvāpi sa imām̐llokānna hanti na nibadhyate

yaiva saṃjāyate saṃvidantaḥ sevānubhūyate /
ayaṃ so'hamidaṃ tanma ityantaḥ saṃvidaṃ tyaja

anayaiva ca yukto'smi naṣṭo'smīti ca bhārata /
abhitaḥ sukhaduḥkhābhyāmavaśaḥ paritapyase

svātmāṃśaiḥ kriyamāṇāni guṇaiḥ karmāṇi bhāgaśaḥ /
ahaṃkāravimūḍhātmā kartāhamiti manyate

cakṣuḥ paśyatu karṇaśca śrṛṇotu tvakspṛśatvidam /
rasanā ca rasaṃ yātu kātra ko'hamiti sthitiḥ

kalanākarmaṇi rate manasyapi mahātmanaḥ /
na kaścidatrāhamiti kleśabhāge ka eva te

bahubhiḥ samavāyena yatkṛtaṃ tatra bhārata /
eko'bhimānaduḥkhena hāsyāyaiva hṛiṃ gṛhyate

kāyena manasā buddhyā kevalairindriyairapi /
yoginaḥ karma kurvanti saṅgaṃ tyaktvātmaśuddhaye

ahantvaviṣacūrṇena yeṣāṃ kāyo na māritaḥ /
kurvanto'pi haranto'pi na ca te nirviṣūcikāḥ

na kvacidrājate kāyo mamatāmedhyadūṣitaḥ /
prājño'pyatibahujño'pi duḥśīla iva mānavaḥ

nirmamo nirahaṃkāraḥ samaduḥkhasukhaḥ kṣamī /
yaḥ sa kāryamakāryaṃ vā kurvannapi na lipyate

idaṃ ca te pāṇḍusuta svakarma kṣātramuttamam /
api krūramatiśreyaḥ sukhāyaivodayāya ca

api kutsitamapyanyadapyadharmamayakramam /
śreṣṭhaṃ te svaṃ yathā karma tathehāmṛtavānbhava

mūrkhasyāpi svakarmaiva śreyase kimu sanmateḥ /
matirgaladahaṃkārā patitāpi na lipyate

yogasthaḥ kuru karmāṇi saṅgaṃ tyaktvā dhanaṃjaya /
niḥsaṅgastvaṃ yathāprāptakarmavānna nibadhyase

śāntabrahmavapurbhūtvā karma brahmamayaṃ kuru /
brahmārpaṇasamācāro brahmaiva bhavasi kṣaṇāt

īśvarārpitasarvārtha īśvarātmā nirāmayaḥ /
īśvaraḥ sarvabhūtātmā bhava bhūṣitabhūtalaḥ

saṃnyastasarvasaṃkalpaḥ samaḥ śāntamanā muniḥ /
saṃnyāsayogayuktātmā kurvanmuktamatirbhava

arjuna uvāca /
saṅgatyāgasya bhagavaṃstathā brahmārpaṇasya ca /
īśvarārpaṇarūpasya saṃnyāsasya ca sarvaśaḥ

tathā jñānasya yogasya vibhāgaḥ kīdṛśaḥ prabho /
krameṇa kathayaitanme mahāmohanivṛttaye

śrībhagavānuvāca /
sarvasaṃkalpasaṃśāntau praśāntaghanavāsanam /
na kiṃcidbhāvanākāraṃ yattadbrahma paraṃ viduḥ

tadudyogaṃ vidurjñānaṃ yogaṃ ca kṛtabuddhayaḥ /
brahma sarvaṃ jagadahaṃ ceti brahmārpaṇaṃ viduḥ

antaḥśūnyaṃ bahiḥśūnyaṃ pāṣāṇahṛdayopamam /
śāntamākāśakośācchaṃ na dṛśyaṃ na dṛśaḥ param

tata īṣadyadutthānamīṣadanyatayoditam /
sa jagatpratibhāso'yamākāśamiva śūnyatā

bhāvo'hamiti ko'pyeṣa pratyekamuditaściteḥ /
koṭikoṭyaṃśakalitaḥ ka ivainaṃ prati grahaḥ

apṛthagbhūta evaiṣa pṛthagbhūta iva sthitaḥ /
pṛthaktvaṃ hi na paryanto nāhamityavagacchati

yathehāhaṃ tathehāsti ghaṭādīhāpi markaṭaḥ /
svamīhaivaṃ tathāmbhodhiḥ kimahaṃtāṃ prati grahaḥ

vikalpabhede sphurite saṃvitsāramayātmani /
vaicitryeṇa vicitrepi kimekatve'pi no grahaḥ

iti jñātavibhāgasya buddhau tasya parikṣayaḥ /
karmaṇāṃ yaḥ phalatyāgastaṃ saṃnyāsaṃ vidurbudhāḥ

tyāgaḥ saṃkalpajālānāmasaṃsaṅgaḥ sa kathyate /
samastakalanājālasyeśvaratvaikabhāvanā

galitadvaitanirbhāsametadeveśvarārpaṇam /
abodhavaśato bhedo nāmnaivaiṣāṃ cidātmani

bodhātmā kila śabdārtho jagadekaṃ na saṃśayaḥ /
ahamāśā jagadahaṃ svamahaṃ karma cāpyaham

kālo'hamahamadvaitaṃ dvaitaṃ cāhamahaṃ jagat /
manmanā bhava madbhakto madyājī māṃ namaskuru /
māmevaiṣyasi yuktvaivamātmānaṃ matparāyaṇaḥ

arjuna uvāca /
dve rūpe tava deveśa paraṃ cāparameva ca /
kīdṛśaṃ tatkadā rūpaṃ tiṣṭhāmyāśritya siddhaye

śrībhagavānuvāca /
sāmānyaṃ paramaṃ caiva dve rūpe viddhi me'nagha /
pāṇyādiyuktaṃ sāmānyaṃ śaṅkhacakragadādharam

paraṃ rūpamanādyantaṃ yanmamaikamanāmayam /
brahmātmaparamātmādiśabdenaitadudīryate

yāvadapratibuddhastvamanātmajñatayā sthitaḥ /
tāvaccaturbhujākāradevapūjāparo bhava

tatkramātsaṃprabuddhastvaṃ tato jñāsyasi tatparam /
mama rūpamanādyantaṃ yena bhūyo na jāyate

yadi vā vedyavijñāto bhāvastadarimardana /
tanmamātmānamātmānamātmanaścāśu saṃśraya

idaṃ cāhamidaṃ cāhamiti yatpravadāmyaham /
tadetadātmatattvaṃ tu tubhyaṃ hyupadiśāmyaham

manye sādhuvibuddhosi pade viśrāntavānasi /
saṃkalpairavamukto'si satyaikātmamayo bhava

sarvabhūtasthamātmānaṃ sarvabhūtāni cātmani /
paśya tvaṃ yogayuktātmā sarvatra samadarśanaḥ

sarvabhūtasthamātmānaṃ bhajatyekatvamātmanaḥ /
sarvathā vartamāno'pi na sa bhūyo'bhijāyate

ekatvaṃ sarvaśabdārtha ekaśabdārtha ātmanaḥ /
ātmāpi ca na sannāsadgato yasyāśu tasya tat

trailokyacetasāmantarāloko yaḥ prakāśakaḥ /
anubhūtimupārūḍhaḥ so'hamātmeti niścayaḥ

trailokyapayasāmantaryo rasānubhavaḥ sthitaḥ /
gavyānāmabdhijānāṃ ca so'yamātmeti bhārata

antaḥ sarvaśarīrāṇāṃ yaḥ sūkṣmonubhavaḥ sthitaḥ /
mukto'nubhavanīyena so'yamātmāsti sarvagaḥ

samagrapayasāmantaryathā ghṛtamiva sthitam /
tathā sarvapadārthānāṃ dehānāṃ saṃsthitaḥ paraḥ

sarvāmbhonidhiratnānāṃ sabāhyābhyantare yathā /
tejastathāsmi dehānāmasaṃsthita iva sthitaḥ

yathā kumbhasahasrāṇāṃ sabāhyābhyantare nabhaḥ /
jagattrayaśarīrāṇāṃ tathātmāhamavasthitaḥ

muktāphalaśataughānāṃ tantuḥ protavapuryathā /
tathāyaṃ dehalakṣāṇāṃ sthita ātmāstyalakṣitaḥ

brahmādau tṛṇaparyante padārthanikurambake /
sattāsāmānyametadyattamātmānamajaṃ viduḥ

tadīṣatsphuritākāraṃ brahma brahmaiva tiṣṭhati /
ahantādi jagattādi krameṇa bhramakāriṇā

ātmaivedaṃ jagadrūpaṃ hanyate hanti vātra kim /
śubhāśubhairjagadduḥkhaiḥ kimasyārjuna lipyate

pratibimbeṣvivādarśasamaṃ sākṣivadāsthitam /
naśyatsu na vinaśyantaṃ yaḥ paśyati sa paśyati

idaṃ cāhamidaṃ neti itīdaṃ kathyate mayā /
evamātmāsmi sarvātmā māmevaṃ viddhi pāṇḍava

imāḥ sarvāḥ pravartante sargapralayavikriyāḥ /
ātmanyahaṃtācittasthāḥ payaḥspandā ivāmbudhau

yathopalatvaṃ śailānāṃ dārutvaṃ ca mahīruhām /
taraṅgāṇāṃ jalatvaṃ ca padārthānāṃ tathātmatā

sarvabhūtasthamātmānaṃ sarvabhūtāni cātmani /
yaḥ paśyati tathātmānamakartāraṃ sa paśyati

nānākāravikāreṣu taraṅgeṣu yathā payaḥ /
kaṭakādiṣu vā hema bhūteṣvātmā tathā'rjuna

nānātaraṅgavṛndāni yathā lolāni vāriṇi /
kaṭakādīni vā hemni bhūtānyevaṃ parātmani

padārthajātaṃ bhūtāni bṛhadbrahma ca bhārata /
ekamevākhilaṃ viddhi pṛthaktvaṃ na manāgapi

kiṃ tadbhāvavikārāṇāṃ gamyamasti jagattraye /
kva te vāpi jagatkiṃ vā kiṃ mudhā parimuhyasi

iti śrutvā'bhayaṃ tvantarbhāvayitvā suniścitam /
jīvanmuktāścarantīha santaḥ samarasāśayāḥ

nirmānamohā jitasaṅgadoṣā
adhyātmanityā vinivṛttakāmāḥ /
dvandvairvimuktāḥ sukhaduḥkhasajñai-
rgacchantyamūḍhāḥ padamavyayaṃ tat

ityārṣe śrīvāsiṣṭhamahārāmāyaṇe vālmī० de० mo० nirvāṇaprakaraṇe pū० arjunopākhyāne arjunopadeśo nāma tripañcāśaḥ sargaḥ