Yoga Vasistha · Chapter 6.24

caturviṃśaḥ sargaḥ

śrīvasiṣṭha uvāca /
mametyuktavato maṅkirvinipatya sa pādayoḥ /
uvācānandapūrṇākṣamidaṃ mārge vahanvacaḥ

maṅkiruvāca /
bhagavanbhūriśo bhrāntā diśo daśa dṛśo yathā /
mayā na tu punaḥ sādhurlabdhaḥ saṃśayanāśakṛt

samastadehasārāṇāṃ sārasyādya phalaṃ mayā /
khinnosmi bhagavanpaśyandaśāḥ saṃsāradoṣadāḥ

punarjātaṃ punarnaṣṭaṃ sukhaduḥkhabhramaḥ sadā /
avaśyaṃbhāviparyantaduḥkhatvātsakalānyapi

sukhānyevātiduḥkhāni varaṃ duḥkhānyato mune /
dṛḍhaduḥkhavadantatvādduḥkhayanti sukhāni mām

tathā rāma yathā duḥkhameva me sukhatāṃ gatam /
vayodaśanalomāntraiḥ saha jarjaratāṃ gatam

uccaiḥpade pātaparā buddhirnādhyavasāyinī /
supravālaṃ kusaṃkalpādgahanaṃ na prakāśate

manaḥ pippalapalyūlairiva kugrāmakoṭaram /
vāsanāṅgavahairgṛdhrairnityaṃ pāpīyasī sthitiḥ

kaṇṭakadrumavallīva karālakuṭilā matiḥ /
āyurāyāsaśālinyā yāminyeva tamondhayā

akṣīvānāgatālokaṃ kṣīṇaṃ saṃtatacintayā /
na kiṃcidrasamādatte naṣṭaivāpi na naśyati

na puṣpitā na phalitā tṛṣṇā śuṣkalateva naḥ /
karma karmaṇi nirmagnaṃ vāsanākhyamakarmaṇe

jīvitaṃ ca jane jīrṇaṃ naivottīrṇo bhavārṇavaḥ /
dinānudinamucchūnā bhogāśā bhayadāyinī

pūrṇāpūrṇātmani kṣīṇāḥ śvabhrakaṇṭakavṛkṣavat /
cintājvaravikāriṇyo lakṣmyāḥ khalu mahāpadaḥ

saṃpannamakṣataṃ sāpi vipralambhena jṛmbhate /
antaḥ sphuritaratnehaṃ bhāsvaraṃ vāndhakoṭaram

kallolakalilaṃ śūnyaṃ cetaḥ śuṣkābdhidurbhagam /
māmindriyārthaikaparaṃ na spṛśanti vivekinaḥ

sakaṇṭakamamedhyasthaṃ śleṣmātakamiva drumam /
asadeva mahārambhaṃ caladarjunavātavat

mano maraṇamaprāptaṃ śūnyaṃ duḥkhāya valgati /
śāstrasajjanasaṃparkacandratārakadhāriṇī

ahaṃbhāvollasadyakṣā kṣīṇā nājñānayāminī /
ajñānadhvāntamattebhasiṃhaḥ karmatṛṇānalaḥ

udito na vikārārko vāsanārajanīkṣayaḥ /
avastu vastuvadbuddhaṃ mattaścittamataṃgajaḥ

indriyāṇi nikṛntanti na jāne kiṃ bhaviṣyati /
śāstradṛṣṭirapi prājñairnāśritā taraṇāya yā

sāpyadṛṣṭirivāndhyāya vāsanāveśakāriṇī /
tadevamatisaṃmohe yatkāryamiha dāruṇe /
udarkaśreyase tāta tanme kathaya pṛcchate

śāmyanti mohamihikāḥ śaradīva sādhau
prāpte bhavanti vimalāśca tathākhilāśāḥ /
satyeti vāgbhavatu sādhujanopagītā
madbodhanena bhavatā bhavaśāntidena

ityārṣe śrīvāsiṣṭhamahārāmāyaṇe vālmīkīye de० mo० nirvāṇaprakaraṇe uttarārdhe maṅkyu० maṅkivairāgyaṃ nāma caturviṃśaḥ sargaḥ