Yoga Vasistha · Verses 6.23-2

trayoviṃśaḥ sargaḥ

śrīvasiṣṭha uvāca /
athāsau vāyasaśreṣṭho jijñāsārthamidaṃ mayā /
bhūyaḥ pṛṣṭo mahābāho kalpavṛkṣalatāgrake

caratāṃ jagataḥ kośe vyavahāravatāmapi /
kathaṃ vihagarājendra dehaṃ mṛtyurna bādhate

bhuśuṇḍa uvāca /
jānannapi hi sarvajña brahmañjijñāsayeva mām /
pṛcchasi prabhavo nityaṃ bhṛtyaṃ vācālayanti hi

tathāpi yatpṛcchasi māṃ tatte prakathayāmyaham /
ājñācaraṇamevāhurmukhyamārādhanaṃ satām

doṣamuktāphalaprotā vāsanātantusaṃtatiḥ /
hṛdi na grathitā yasya mṛtyustaṃ na jighāṃsati

niḥśvāsavṛkṣakrakacāḥ sarvadehalatāghuṇāḥ /
ādhayo yaṃ na bhindanti mṛtyustaṃ na jighāṃsati

śarīratarusarpaughāścintārpitaśiraḥphaṇāḥ /
āśā yaṃ na dahantyantarmṛtyustaṃ na jighāṃsati

rāgadveṣaviṣāpūraḥ svamanobilamandiraḥ /
lobhavyālo na bhuṅkte yaṃ mṛtyustaṃ na jighāṃsati

pītāśeṣavivekāmbuḥ śarīrāmbhodhivāḍavaḥ /
na nirdahati yaṃ kopastaṃ mṛtyurna jighāṃsati

yantraṃ tilānāṃ kaṭhinaṃ rāśimugramivākulam /
yaṃ pīḍayati nānaṅgastaṃ mṛtyurna jighāṃsati

ekasminnirmale yena pade paramapāvane /
saṃśritā cittaviśrāntistaṃ mṛtyurna jighāṃsati

vapuḥkhaṇḍābhipatitaṃ śākhāmṛgamivoditam /
na cañcalaṃ mano yasya taṃ mṛtyurna jighāṃsati

ete brahmanmahādoṣāḥ saṃsāravyādhihetavaḥ /
manāgapi na lumpanti cittamekaṃ samāhitam

ādhivyādhisamutthāni calitāni mahābhrameḥ /
na vilumpanti duḥkhāni cittamekaṃ samāhitam

nāstameti na codeti na saṃsmṛtirna vismṛtiḥ /
na suptaṃ na ca jāgratsyāccittaṃ yasya samāhitam

andhīkṛtahṛdākāśāḥ kāmakopavikārajāḥ /
cintā na parihiṃsanti cittaṃ yasya samāhitam

na dadāti na cādatte na jahāti na yācate /
kurvadeva ca kāryāṇi cittaṃ yasya samāhitam

ye durarthā durārambhā durguṇā durudāhṛtāḥ /
duṣkramāste na kṛntanti cittaṃ yasya samāhitam

ābhānti vipulārthāni mahānti guṇavanti ca /
sarvāṇyevānudhāvanti cittaṃ yasya samāhitam

yadudarkahitaṃ satyamanapāyi gatabhramam /
durīhitadṛśonmuktaṃ tatparaṃ kārayenmanaḥ

yadadṛṣṭamaśuddhena cittavaidhuryadāyinā /
anekatvapiśācena tatparaṃ kārayenmanaḥ

ādau madhye tathānte ca cirāya paramocitam /
yaccāru madhuraṃ pathyaṃ tatparaṃ kārayenmanaḥ

yadanantaṃ manaḥpathyaṃ tathyamādyantamadhyagam /
samastasādhubhirjuṣṭaṃ tatparaṃ kārayenmanaḥ

yadbuddheḥ paramālokamādyaṃ yadamṛtaṃ param /
yadanuttamasaubhāgyaṃ tatparaṃ kārayenmanaḥ

sāmarāsuragandharve savidyādharakinnare /
sasurastrīgaṇe svarge na kiṃcitsusthiraṃ śubham

satarau sanarādhīśe saparvatapuravraje /
sāmbudhau bhūtale tāta na kiṃcicchobhanaṃ sthiram

sanāge sāsuravyūhe sāsurastrīgaṇe tathā /
samasta eva pātāle na kiṃcicchobhanaṃ sthiram

sasvarge sasurāloke sapātāle sadiktaṭe /
jagatyasmiṃstu sarvasminna kiṃcicchobhanaṃ sthiram

ādhivyādhivilolāsu duḥkhaughavalitāsu ca /
kriyāsunityatucchāsu na kiṃcitsusthiraṃ śubham

taralīkṛtacittāsu hṛdayānandinīṣu ca /
cintāsu dhīvikārāsu nakiṃcitsusthiraṃ śubham

hṛtkṣīrodakasaṃspandamandareṣu caleṣvapi /
svasaṃkalpavikalpeṣu na kiṃcitsusthiraṃ śubham

anāratāgamāpāyaparāsvasiśirāsvapi /
citrākārāsu ceṣṭāsu na kiṃcitsusthiraṃ śubham

na varamekamahītalarājatā
na ca varaṃ vibudhāmararūpatā /
na ca varaṃ dharaṇītalanāgatā
sthitimupaiti hi yatra satāṃ manaḥ

na varamākulaśāstravicāraṇaṃ
na ca varaṃ parakāryavivecanam /
na varamagryakathākramavarṇanaṃ
sthitimupaiti hi yatra satāṃ manaḥ

na varamādhimayaṃ cirajīvitaṃ
na ca varaṃ maraṇaṃ dṛḍhamūḍhatā /
na ca varaṃ narako na ca viṣṭapaṃ
sthitimupaiti hi na kvacidāśayaḥ

iti vividhajagatkramāḥ samastāḥ
khalu matimūḍhatayā narasya ramyāḥ /
calatarakalanāhite padārthe
kathamupayānti cirasthitiṃ mahāntaḥ

ityārṣe śrīvāsiṣṭhamahārāmāyaṇe vālmīkīye de० nirvāṇa० pū० bhuśuṃḍo० samādhānasaṃkalpanirākaraṇaṃ nāma trayoviṃśaḥ sargaḥ