Yoga Vasistha · Chapter 6.155

pañcapañcāśadadhikaśatatamaḥ sargaḥ

agniruvāca /
ityākarṇyātha sa vyādhastadā tasminvanāntare /
āsīccitrakṛtākāra iva vismayamantharaḥ

na viśaśrāma ceto'sya svābhyāsena vinā pade /
āsīdudbhrānta iva sa prohyamāna ivārṇave

ārūḍha iva vā cakre cakreṇa tapasā hṛtaḥ /
nakreṇeva samākrāntaḥ parākramavivarjitaḥ

kimetatsyādutānyatsyānnirvāṇamiti saṃśayāt /
nādhyagacchadasau śāntiṃ mūrkho yauvanavāniva

avidyākṛtamevedaṃ dṛśyamityeva cintayan /
avidyā jagadityeṣā nāyāti nipuṇaṃ hṛdi

kiyadantamidaṃ dṛśyaṃ syātpaśyāmyetadāditaḥ /
dūratordhvapramāṇena tapolabdhaśarīrakaḥ

bhāvābhāvātmano nityamasyānte sthīyate sukham /
tasmādākāśamapyasti yatra no tatra yāmyaham

iti nirṇīya hṛdaye mūrkha eva babhūva saḥ /
gataṃ tādṛśamapyuktaṃ vinābhyāsena bhasmani

tatastataḥ prabhṛtyeva tenaiva munibhiḥ saha /
lubdhakatvaṃ parityajya tapaścaritumudyataḥ

tasmiñjagati tairbhāvaistaiḥ samaṃ nivasansadā /
bahūnyabdasahasrāṇi cakāra sumahattapaḥ

tapaḥ kurvankadācitsa punaḥ papraccha taṃ munim /
kadā syādātmaviśrāntirmametyāha munistataḥ

muniruvāca /
jñānaṃ tadupadiṣṭaṃ te jīrṇadārvalpakāgnivat /
saṃsthitaṃ hṛdaye kiṃtu dāhyamākramya nocitam

nābhyāsena vinā jñāne śive viśrāntavānasi /
abhyāsena tu kālena bhṛśaṃ viśrāntimeṣyasi

bhaviṣyadidamātmīyamathākarṇaya nirṇayam /
mama varṇayataḥ karṇabhūṣaṇaṃ bhūtalādbhutam

saṃstutānavabuddhātmā jñānasāratayānayā /
dolāyamānasaṃvittvaṃ na mūrkho na ca paṇḍitaḥ

avidyārūpamābhogi kiṃpramāṇamidaṃ jagat /
syādityātmavikalpena tapastvaṃ kartumudyataḥ

itthaṃ tapastvayā ghoraṃ kāryaṃ yugaśataṃ pṛthu /
parameṣṭhī tatastuṣṭastvāmupaiṣyati sāmaraḥ

mārgayiṣyasi tasya tvaṃ varadasya varaṃ vara /
idamuddāmadaurātmyānnijaṃ saṃdehasaṃśayam

devāyaṃ dṛśyarūpe'smindṛṣṭe'vidyābhrame sati /
kvacidādarśavannāsti pratibimbamalojjhitaḥ

cidvyomadarpaṇasyāsya paramāṇvākṛterapi /
antasthasyaiva vā yatra tatredaṃ pratibimbati

tasmātkiyadanantaṃ syādidaṃ dṛśyamanarthakṛt /
tasya pāre kiyadvā syādākāśaṃ dṛśyameva tat

evamarthamahaṃ jñātumimaṃ saṃprārthaye varam /
śrṛṇu deveśvarāvighnaṃ tathaivāśu prayaccha me

iyaṃ svacchandamṛtyurme nīrogā'stu tanuściram /
gāruḍena ca vegena saṃyutā vyomagāminī

pratināḍīkameṣā tu vṛddhiṃ gacchatu yojanam /
krameṇa jagato bāhye bhavatvākāśarūpiṇī

sākāśasyāsya dṛśyasya labheya parameśvara /
antamitthamanantasya paramo'stviti me varaḥ

iti sādho tvayā prokte devadevo varaṃ prabhuḥ /
evamastu tavetyuktvā yāsyatyantardhimīśvaraḥ

gate tasminmahādeve devaiḥ saha divaspatau /
tapasā te kṛśo dehaścandrakāntirbhaviṣyati

māmāpṛcchannamaskṛtya tasminneva kṣaṇe tataḥ /
plutimeṣyati sa vyomni cittasthārthadidṛkṣayā

dvitīya iva śītāṃśurdvitīya iva bhāskaraḥ /
dvitīya iva vaurvāgniścandrārkaspardhayotthitaḥ

tato garuḍavegena dṛśyasya nabhasastathā /
antaṃ prāptuṃ vahanvegājjagataḥ saritāmiva

jagatonte tato'jasraṃ tato vardhiṣyate vapuḥ /
kalpāntamattārṇavavanniṣpārāmbarapūraṇam

drakṣyasyatha mahāvyonni vardhamāno bṛhadvapuḥ /
sargānnirargalādhāranirantagaganakramāt

paramārthamahākāśaśūnyatāvātacakrakān /
svabhāvadravatoddeśāccidarṇavataraṅgakān

saṃviddhane yathā svapne purādyā bhānti khātmakāḥ /
tathā tadā tavaiṣyanti sargavargā nirargalāḥ

visphuranti mahāvyomni parṇaughāḥ kṣubhitānilaiḥ /
tathā sargānanantāṃstvaṃ drakṣyasyakṣīṇaniścayaḥ

sabhāsatyekṣaṇarucāṃ yathā jālaṃ sadapyasat /
jagadātma tathākāśasaṃvidāṃ khe sadapyasat

sarvorvījanadṛṣṭānāṃ lagnānāmindumaṇḍale /
yādṛgjālaṃ jagattādṛksthite'nanyatvamātmanaḥ

punaḥ sargaḥ punarvyoma punaḥ sargaḥ punarnabhaḥ /
ityevaṃ paśyataste'tra dīrghakālaḥ prayāsyati

atha dīrgheṇa kālena prasphuransargaparṇake /
udvegameṣyasi vyomni mahāmahimani svayam

udvegameṣyasi tatastapaso'nubhavatphalam /
nirdekṣyasi tadā dehamanantāmbarapūrakam

kimidaṃ kuśarīraṃ me bhārabhūtamiva sthitam /
mervādibhūbhṛtāṃ lakṣamapi yasmiṃstṛṇāyate

deho mamāpramāṇo'yaṃ vyāptaṃ vyoma mayākhilam /
pūrayāmi khamadyāpi bhāvi naivopagamyate

avidyā bata ghoreyamanantā ca pramīyate /
mīyate na ca kenāpi brahmajñānaṃ samaṃ vinā

tamimaṃ saṃtyajāmyeva dehamāvivṛtāntaram /
nānena kiṃcidāpnomi sādhusacchāstrasaṃgamam

anantāpāraparyantaṃ nirālambāmbarāspadam /
kiṃ nāmedaṃ śarīraṃ me suduṣprāpārthasaṃgamam

iti saṃcintya taṃ dehaṃ dhāraṇāṃ prāṇarecanīm /
kṛtvā tyakṣyasi saṃbhuktātphalācchuṣkaṃ yathā khagaḥ

kṛtvā dehaparityāgaṃ jīvaḥ prāṇasamanvitaḥ /
vyomni sthāsyati te tasminvātātsūkṣmo'pi vātavat /
chinnapakṣo mahāmeruriva dehaḥ patiṣyati /
tatra bhūlokaśailādi sarvaṃ cūrṇīkariṣyati

śuṣkā bhagavatī dehaṃ tattadā bhakṣayiṣyati /
samātṛmaṇḍalā tena nirdoṣā bhūrbhaviṣyati

ityātmodantamakhilaṃ śrutavānasi suvrata /
tapastālīvane kṛtvā yathecchasi tathā kuru

vyādha uvāca /
aho nu bhagavanduḥkhaṃ paribhoktavyamakṣayam /
mayā vyarthamanarthāya yadarthena durarthitam

vidyate kiṃ vibho kācidyuktiḥ saiṣā sthitirvara /
anyathā bhavitavyo'rtho yadi nāsti taducyatām

muniruvāca /
avaśyaṃbhavitavyo'rtho na kadācana kenacit /
vidhātumanyathā śakyastanna kṣarati yatnataḥ

vāmāvāmaśiraḥpādaviparyayavidhau yathā /
puṃso na vidyate śaktistathā bhāvyanyathāsthitau

jyotiḥśāstrārthavijñānairiha bhāvyarthavedanam /
bhavatyanyadapūrvaṃ tu na kiṃcana kadācana

jayanti karmāṇi hi vedanāni
yaiḥ prākṛtairadyatanānyupetya /
śarīradāhairapi nirvikārasaṃvinnayairbrahmatayaiva suptam

ityārṣe śrīvāsiṣṭhamahā० vā० de० mo० ni० u० a० vi० śa० bhāvisaṃpattivarṇanaṃ nāma pañcapañcāśadadhikaśatatamaḥ sargaḥ