Yoga Vasistha · Chapter 6.156

ṣaṭpañcāśadadhikaśatatamaḥ sargaḥ

vyādha uvāca /
anantaraṃ he bhagavanvitatākāśavāsinaḥ /
kiṃbhaviṣyati me tatra dehe'dhaḥpātini kṣitau

muniruvāca /
śūṇuṣvāvahitastasmindehe tava parikṣate /
kiṃ bhaviṣyati bhavyātmastasminparamakāmbare

dehe tasminparibhraṣṭe jīvastu prāṇasaṃyutaḥ /
bhaviṣyatyambare vātalavo vyātatarūpiṇi

tasminvātalave ceto dṛśyaṃ hṛtsthaṃ sthitaṃ puraḥ /
sphāraṃ drakṣyati bhūpīṭhaṃ bhavānsvapne jagadyathā

mahattvāccittavṛttestu jīvo drakṣyati te tataḥ /
rājāhamasmi bhūpīṭha iti saṃkalpitārthabhāk

tatrāsya sahasaivāśu pratibhodeṣyati svayam /
ahamasmi nṛpaḥ śrīmānsindhurnāmnātimānitaḥ

aṣṭavarṣāya me rājyaṃ gate pitari kānanam /
bhuvaścatuḥsamudrāyāḥ pitrā dattamupāgatam

sīmānte bhūpatiḥ śatrurvidūratha iti śrutaḥ /
vidyate yaḥ prayatnena vinā nāma na jīyate

idaṃ me kurvato rājyaṃ saṃvatsaraśataṃ gatam /
aho bhṛtyakalatraughaiḥ saha bhuktaṃ mayā sukham

kaṣṭameṣa pravṛddho me sīmāntavasudhādhipaḥ /
anena saha saṃgrāmo dāruṇaḥ samupasthitaḥ

iti cintayatastatra vidūrathamahībhujā /
bhaviṣyati mahadyuddhaṃ caturaṅgabalakṣayi

mahatā tena yuddhena haniṣyasi vidūratham /
karavālalatālūnajaṅghaṃ tvaṃ viratho'pi san

catuḥsāgaraparyante bhūtale bhūpatistataḥ /
bhaviṣyasi bhayākrāntadikpālādṛtaśāsanaḥ

sa tvaṃ sindhurbhavanprāptasakalāvanimaṇḍalaḥ /
paṇḍitairmantribhiḥ sārdhaṃ kariṣyasi kathā imāḥ

mantrī vadiṣyati /
atyāścaryamidaṃ deva yadevaṃ sa vidūrathaḥ /
devena vijito yuddhe nītaśca yamasādanam

tvaṃ vakṣyasi /
bhoḥ sādho sadhanasyāsya kalpāntārṇavaraṃhasaḥ /
vairī vidūratho rājā kimarthaṃ vada duḥsahaḥ

mantrī vadiṣyati /
līlā nāmāsya bhāryāsti tayātitapasārjitā /
mātā sarasvatīdevī jagaddhātrī nirañjanā

gṛhītāyāḥ sutātvena sāsyā bhuvanabhāvinī /
saṃsādhayati kāryāṇi mokṣādīnyapi helayā

vareṇa śabdamātreṇa jagadapyajagatkṣaṇāt /
karoti sā bhavannāśe tasyāḥ kaiva kadarthanā

sindhurvadiṣyati /
tvayā vai yuktaṃ kathitaṃ yadyevaṃ tadvidūrathaḥ /
aśakyo jetumāścarya etasya samare vadhaḥ

tadevaṃ saṃprasādena bhagavatyā samanvitaḥ /
kimityasminraṇe tasmiñjayaṃ rājā na labdhavān

mantrī vadiṣyati /
tena saṃprārthitā devī sarvakālamakhedinā /
mokṣo'stu mama saṃsārāditi tāmarasekṣaṇa

tayā tena vibho tasya sa evāvandhyasaṃvidā /
saṃpāditastena tadāśrita ājau parājayaḥ

sindhurvadiṣyati /
yadyevaṃ tanmayā devī sadaivaiṣā prapūjyate /
mokṣaṃ kimiti me naiṣā dadāti parameśvarī

mantrī vadiṣyati /
eṣā hi jñaptirāste'ntaḥ sarvasya hṛdaye sadā /
saṃvidrūpā bhagavatī saiva proktā sarasvatī

yena yena yathātmīyā prārthyate svayameva sā /
prayacchati tathaivāśu tasmāccidanubhūyate

na prārthitaiṣā bhavatā mokṣārthamarimardana /
prārthitaiva tvayā saṃvidātmīyā śatruśāntaye

sindhurvadiṣyati /
na prārthitā mayā kasmādanenaiṣā sarasvatī /
saṃvicchuddhā mayā kasmātprārthitā neha muktaye

madāśayagatāpyeṣā jñaptiṃ dattvā sarasvatī /
manmokṣāya kimityaṅga sadrūpāpi na ceṣṭate

mantrī vadiṣyati /
aśubhaḥ prāktano'bhyāsastavāsti ripughātinaḥ /
tenaiṣā muktaye natvā tvayā na prārthitā vibho

yaccittastanmayo janturbhavatītyājagatsthiteḥ /
ābālameva saṃsiddhaṃ kartuṃ śaknoti ko'nyathā

yadeva yenāmalayāmalātma
saṃvedyate'bhyāsamayaṃ vidāntaḥ /
sarvopamardena tadeva so'ṅga
sadastvasadvāstu bhavatyavighnam

ityārṣe śrīvāsiṣṭhamahārāmāyaṇe vā० de० mo० ni० u० a० śa० sindhusaṃbodhanaṃ nāma ṣaṭpañcāśadadhikaśatatamaḥ sargaḥ