Yoga Vasistha · Chapter 4.28

aṣṭāviṃśaḥ sargaḥ

śrīvasiṣṭha uvāca /
ityuktvā bhagavāndevāṃstatraivāntardhimāyayau /
velāvanitaṭe śabdaṃ kṛtvevāmbutaraṅgakaḥ

surāstvākarṇya tadvākyaṃ jagmuḥ svābhimatāṃ diśam /
kamalāmodamādāya vanamālāmivānilāḥ

dināni katicitsveṣu kānteṣu sthirakāntiṣu /
dvirephā iva padmeṣu mandireṣu viśaśramuḥ

kaṃcitkālaṃ samāsādya svātmodayakaraṃ śubham /
cakrurdundubhinirghoṣaṃ pralayābhraravopamam

atha daityairmamāvyomni taiḥ pātālatale sthitaiḥ /
kālakṣepakaraṃ ghoraṃ punaryuddhamavartata

vavurasiśaraśaktimudgaraughā
musalagadāparaśūgracakraśaṅkhāḥ /
aśanigiriśilāhutāśavṛkṣā
ahigaruḍādimukhāni cāyudhāni

māyākṛtāyudhamahāmbughanapravāhā
kṣiprāvahā pratidiśaṃ kila nirjagāma /
pāṣāṇaparvatamahīruhalakṣavṛkṣa-
kṣubdhāmbupūraghanaghoṣavatī nadī drāk

madhyapravāhavahadulmukaśūlaśaila-
prāsāsikuntaśaratomaramudgaraughā
gaṅgopamāmbuvalitāmaramandireṇa
sarvāsu dikṣvaśanivarṣanikarṣaṇena

pṛthvyādidāruṇaśarīramapi prahāra-
dānagrahā gahanarāśiśarīrakeva /
māyopaśāmyati surāsurasiddhasannā
māyākṛtiḥ punarudeti nacaiva saiva

śailopamāyudhavighaṭṭitabhūdharāṇi
raktāmbupūraparipūrṇamahārṇavāni /
daivāsurendraśavaśailavirūḍhakunta-
tālīvanāni kakubhāṃ vadanāni cāsan

udgīrṇakuntaśaraśaktigadāsicakra-
helānigīrṇasuradānavamuktaśailā /
kāṣollasatkrakacadantanakhāgramālā
jīvānvitā hyapatadāyasasiṃhasṛṣṭiḥ

ujjvālalocanaviṣajvalanātapaugha-
digdāhadarśitayugāntadineśasenā /
uḍḍīyamānaparidīrghamahāmahīdhra-
magnābdhivadviṣadharāvalirullalāsa

unnādavajramakarotkarakarkaśāntaḥ-
kṣubdhābdhivīcivalayairvalitācalendraiḥ /
āsījjagatsakalameva susaṃkaṭāṅga-
māvṛttibhirvividhahetinadīpravāhaiḥ

śailāstraśastragaruḍācalacālitocca-
nāgaṃ mahāsuragaṇāṅgaṇamantarikṣam /
āsītkṣaṇaṃ jaladhibhiḥ kṣaṇamagnipūraiḥ
pūrṇaṃ kṣaṇaṃ dinakaraiḥ kṣaṇamandhakāraiḥ

garuḍaguḍaguḍākulāntarikṣa-
pravisṛtahetihutāśaparvataughaiḥ /
jagadabhavadasahyakalpakāle
jvalitasurālayabhūtalāntarālam

udapatannasurāvasudhātalā-
dgaganamadritaṭādiva pakṣiṇaḥ /
atibalādapatanvibudhā bhuvi
pralayacālitaśailaśilā iva

śarīrarūḍhonnatahetivṛkṣa-
vanāvalīlagnamahāgnidāhāḥ /
surāsurāḥ prāpurathāmbarāntaḥ
kalpānilāndolitaśailaśobhām

surāsurādrīndraśarīramuktai
raktapravāhairabhito bhramadbhiḥ /
babhāra pūrṇaṃ parito'mbaro'dreḥ
saṃdhyākaraughakṣatamaṅga gaṅgām

girivarṣaṇamambuvarṣaṇaṃ
vividhogrāyudhavarṣaṇaṃ tathā /
viṣamāśanivarṣaṇaṃ ca te
samamanyonyamathāgnivarṣaṇam

anayannayamārgakovidā
dalitāśeṣagirīndrabhittayaḥ /
sasṛjuśca samaṃ samantataḥ
karikumbheṣviva puṇyavarṣaṇam

devāsurāḥ samarasaṃbhramamākulāste
anyonyamaṅgadalanākulahetihastāḥ /
nāgendraḍimbhapṛtanāpṛthupīṭhapeṣaiḥ
kīrṇaśriyo nabhasi babhramurakṣipantaḥ

chinnaiḥ śiraḥkarabhujorubharairbhramadbhi-
rākāśakāṣṭhaśalabhairaśivaistadānīm /
āsījjagajjaṭharamabhrabharairivograi-
rābhāskarasthagitadiktaṭaśailajālam

raṭadbhaṭāsphoṭakaṭisphuṭadbhiḥ
samīritairhetikalāsitaughaiḥ /
parasparāghātahataiḥ patadbhi-
rjagāma śīrṇā dalaśo dharitrī

anyonyamāyudhaśilācalavṛkṣavarṣai-
rmerupramāṇakaṭhināṅganigharṣaṇaiśca /
āsīdraṇaṃ caṭacaṭāsphuṭadantarikṣaṃ
kalpakṣayāntamiva bhīmabharogranādaiḥ

mattānilakṣubdhajalānalārka-
daladvayaṃ dīrghasurāsuraugham /
brahmāṇḍamākhaṇḍitakuḍyakoṇa-
sakālakalpāntakarālamāsīt

bhrāntairbhṛśaṃ bharitadiktaṭamadrikūṭai-
rātmapramāṇaghanahetihatai raṇadbhiḥ
kūjadbhirārtibhirivograguhoccavātaiḥ
krandadbhirāpatitasiṃharavairadabhraiḥ

māyānadījaladhiyodhaghanāgnidāhai-
rvṛkṣaiḥ surāsuraśavairacalaiḥ śiloccaiḥ /
bhrānteḥ śarāsiśitaśaktigadāstraśastrai-
rvātāvakīrṇavanaparṇavadantarantaḥ

adrīndrapakṣaparimāṇagamākṣamokta-
durvārahastibaladāruṇadehakairdrāk /
āsītpatadbhaṭaśarīragirīndravāta-
vibhraṣṭadevapurapūrṇajalārṇavaugham

ghanaghuṃghumapūritāntarikṣā
kṣatajakṣālitabhūdharā dharā ca /
rudhirahradavṛttivartinī vā
bhuvanābhogaguhā tadākulābhūt

anantadṛkprasṛtavikārakāriṇī
kṣayodayonmukhasukhaduḥkhaśaṃsinī /
raṇakriyāsurasuraghaṭṭasaṃkaṭā
tadābhavatkhalu sadṛśīha saṃsṛteḥ

ityārṣe śrīvāsiṣṭhamahyarāmāyaṇe vā० de० mo० sthitiprakaraṇe dāmavyālakaṭapunaryuddhavarṇanaṃ nāmāṣṭāviṃśaḥ sargaḥ