Yoga Vasistha · Chapter 4.29

ekonatriṃśaḥ sargaḥ

śrīvasiṣṭha uvāca /
evaṃprāyākulārambhairasurairasuhāribhiḥ /
sahasā hṛtasaṃrabdhairārabdhaḥ sumahān raṇaḥ

māyayātha vivādena sandhinā vigraheṇa ca /
palāyanena dhairyeṇa cchannagopāyanena ca

kārpaṇyenāstrayuddhena svāntardhānaiśca bhūriśaḥ /
dhṛtaḥ sa saṃgaro devaistriṃśadvarṣāṇi pañcakam

varṣāṇi divasānmāsāndaśāṣṭau sapta pañca ca /
varṣāṇi peturvṛkṣāgnihetyekāśanibhūbhṛtām

etāvatā tu kālena dṛḍhābhyāsādahaṃkṛteḥ /
dāmādayo'hamityāsthāṃ jagṛhurgrastacetasaḥ

naikaṭyātiśayādyadvaddarpaṇaṃ bimbavadbhavet /
abhyāsātiśayāttadvatte sāhaṃkāratāṃ gatāḥ

yadvaddūragataṃ vastu nādarśe pratibimbati /
padārthavāsanā tadvadanabhyāsānna jāyate

yadā dāmādayo jātā ahaṃkārātmavāsanāḥ /
tadā me jīvitaṃ me'rtha iti dainyamupāgatāḥ

bhavavāsanayā grastā mohavāsanayā tataḥ /
āśāpāśanibaddhāste tataḥ kṛpaṇatāṃ gatāḥ

mugdheva hyanahaṃkārairmamatvamupakalpitam /
rajjvāṃ bhujaṅgatvamiva dāmavyālakaṭaistataḥ

āpādamastako dehaḥ kathaṃ me bhavatu sthiraḥ /
mameti tṛṣṇākṛpaṇā dīnatāṃ te samāyayuḥ

sthiro bhavatu me dehaḥ sukhāyāstu dhanaṃ mama /
iti baddhadhiyāṃ teṣāṃ dhairyamantarddhimāyayau

savāsanatvādvapuṣāmalpasattvātsuradviṣām /
yā tu prahāraparatā mārjitevāśu sābhavat

kathaṃ surā jagatyasminbhavāma iti cintayā /
vivaśā dīnatāṃ jagmuḥ padmā iva nirambhasaḥ

teṣāṃ yoṣānnapānena svāhaṃkṛtimatāṃ ratiḥ /
babhūva bhāvabhāvasthā bhīṣaṇā bhavabhājinī

atha tasminraṇe bhītyā sāpekṣatvamupāyayuḥ /
mattebhaghanasaṃrabdhe vane hariṇakā iva

mariṣyāmo mariṣyāma iti cintāhatāśayāḥ /
mandaṃ mandaṃ kila bhremuḥ kupitairāvaṇe raṇe

śarīraikārthināṃ teṣāṃ bhītānāṃ maraṇādapi /
alpasattvatayā mūrghni kṛtameva paraiḥ padam

atha pramlānasattvāste hantumagragataṃ bhaṭam /
na śekurindhane kṣīṇe havirdagdhumivāgnayaḥ

vibudhānāṃ praharatāṃ maśakatvamupāgatāḥ /
kṣatavikṣatasaṃghātāstasthuḥ sāmānyasadbhaṭāḥ

bahunātra kimuktena maraṇādbhītacetasaḥ /
daityā deveṣu valagatsu dudruvuḥ samarājirāt

teṣu dravatsu bhīteṣu sarvato dānavādiṣu /
dāmavyālakaṭākhyeṣu vikhyāteṣu surālaye

taddaityasainyaṃ nyapatadvidrutaṃ khāditastataḥ /
kalpāntapavanodbhūtaṃ tārājālamivābhitaḥ

amarācalakuñjeṣu śikharāṇāṃ śikhāsu ca /
taṭeṣu vārirāśīnāṃ payodapaṭaleṣu ca

sāgarāvartagarteṣu śvabhreṣūdyatsaritsu ca /
jaṅgaleṣu diganteṣu jvalatsu vipineṣu ca

tadvāṇocchinnadeśeṣu grāmeṣu nagareṣu ca /
aṭavīṣūgrapakṣāsu marubhūmidavāgniṣu

lokālokācalānteṣu parvateṣu hradeṣu ca /
āndhradvaviḍakāśmīrapārasīkapureṣu ca

nānāmbhodhitaraṅgāsu gaṅgājalaghaṭāsu ca /
dvīpāntareṣu jāleṣu jambūkhaṇḍalatāsu ca

sarvataḥ parvatākārāḥ patitāste surārayaḥ /
visphoṭitāṅgacaraṇā vibhinnakarabāhavaḥ

śākhālagnāntratantrīkā muktaraktabharacchaṭāḥ /
vyastaśekharamūrdhāno niṣkrāntāḥ kupitekṣaṇāḥ

sāyudhā balamāyeṣucchinnakaṅkaṭahetayaḥ /
dūrāpātaviparyastapatannānāyudhāṃśukāḥ

kaṇṭhalambiśirastrāṇacaṭatkārograbhītayaḥ /
śikhāśataśilāprotā dehabhāgavilambinaḥ

śālmalyugradṛḍhāpātakaṭatkaṇṭakasaṃkaṭāḥ /
suśilāphalakāsphālaśatadhāśīrṇamastakāḥ

sarvaṃ eva sakalāyudhaśastra-
pātamātrasamanantarameva /
dikṣu nāśamagamannasurendrāḥ
pāṃsavo'mbudanidhau payasīva

ityārṣe śrīvāsiṣṭhamahārāmāyaṇe vā० de० mo० sthitiprakaraṇe dāmavyālakaṭopākhyāne asuraparibhraṃśo nāmaikonatriṃśaḥ sargaḥ