Yoga Vasistha · Chapter 3.20

śrīdevyuvāca /
sa te bhartādya saṃpanno dvijo bhūpatvamāgataḥ /
yā sāvarundhatī nāma brāhmaṇī sā tvamaṅgane

ihemau kuruto rājyaṃ tau bhavantau sudampatī /
cakravākāviva navau bhuvi jātau śivāviva

eṣa te kathitaḥ sarvaḥ prāktanaḥ saṃsṛtikramaḥ /
bhrāntimātrakamākāśamevaṃ jīvasvarūpadhṛk

bhramādasmāccidākāśe bhramo'yaṃ pratibimbitaḥ /
asatya eva vā satyo bhavatorbhavabhaṅgadaḥ

tasmādbhāntimayaḥ kaḥ syātkovā bhrāntyujjhito bhavet
sargo nirargalānarthabodhānnānyo vijṛmbhate

śrīvasiṣṭha uvāca /
ityākarṇya ciraṃ cāru vismayotphullalocanā /
bhūtvovāca vaco līlā līlālasapadākṣaram

līlovāca /
devi bhostvadvaco mithyā kathaṃ saṃpannamīdṛśam /
kva viprajīvaḥ svagṛhe kveme vayamiha sthitāḥ

tādṛglokāntaraṃ sā bhūste śailāstā diśo daśa /
kathaṃ bhānti gṛhasyāntarmadbhartā yeṣvavasthitaḥ

matta airāvato baddhaḥ sarṣapasyeva koṭare /
maśakena kṛtaṃ yuddhaṃ siṃhaughairaṇukoṭare

padmākṣe sthāpito merurnigīrṇo bhṛṅgasūnunā /
svapnābdagarjitaṃ śrutvā citraṃ nṛtyanti barhiṇaḥ

asamaṃjasamevaitadyathā sarveśvareśvari /
tathā gṛhāntaḥ pṛthivī śailāścetyasamañjasam

yathāvadetaddeveśi kathayāmalayā dhiyā /
prasādānugṛhīte hi nodvijante mahaujasaḥ

śrīdevyuvāca /
nāhaṃ mithyā vadāmīdaṃ yathāvacchṛṇu sundari /
bhedanaṃ niyatīnāṃ hi kriyate nāsmadādibhiḥ

vibhidyamānāmanyena sthāpayāmyahameva yām /
maryādāṃ tāṃ mayā bhinnāṃ ko'paraḥ pālayiṣyati

sagrāmadvijajīvātmā tasminneva svasadmani /
vyomnyevedaṃ mahārāṣṭraṃ vyomātmaiva prapaśyati

prāktanī sā smṛtirluptā yuvayoruditānyathā /
svapne jāgratsmṛtiryadvadetanmaraṇamaṅgane

yathā svapne tribhuvanaṃ saṃkalpe trijagadyathā /
yathā kathārthasaṃgrāmo marubhūmau jalaṃ yathā

tasya brāhmaṇagehasya saśailavanapattanā /
iyamantaḥ sthitā bhūmiḥ saṃkalpādarśayoriva

asatyaiveyamābhāti satyeva ghanasargatā /
tasmātsatyāvabhāsasya cidvyomnaḥ kośakoṭare

asatyādyatsamutpannaṃ smṛtyā nāma tadapyasat /
mṛgatṛṣṇātaraṅgiṇyāṃ taraṅgo'pi na sadyataḥ

idaṃ tvadīyaṃ sadanaṃ tadgehākāśakośagam /
viddhi māṃ tvāṃ ca sarvaṃ ca taccidvyomaiva kevalam

svapnasaṃbhramasaṃkalpasvānubhūtiparamparāḥ /
pramāṇānyatra mukhyāni saṃbodhāya pradīpavat

sthito brāhmaṇagehāntardvijajīvastadambare /
sasamudravanā pṛthvī sthitābja iva ṣaṭpadaḥ

tasyāḥ kasmiṃścidekasminpelave koṇakoṭare /
idaṃ pattanadehādi keśoṇḍraka ivāmbare

tasminnasminpure tanvi tadeva sadanaṃ sthitam /
tasmātkiṃ trasareṇvantarjagadvṛndamiva sthitam

paramāṇau paramāṇau santi vatse cidātmani /
antarantarjagantīti kiṃtvetannāma śaṅkyate

līlovāca /
aṣṭame divase vipraḥ sa mṛtaḥ parameśvari /
gato varṣagaṇo'smākaṃ mātaḥ kathamidaṃ bhavet

śrīdevyuvāca /
deśadairghyaṃ yathā nāsti kāladairghyaṃ tathāṅgane /
nāstyeveti yathānyāyaṃ kathyamānaṃ mayā śṛṇu

yathaitatpratibhāmātraṃ jagatsargāvabhāsanam /
tathaitatpratibhāmātraṃ kṣaṇakalpāvabhāsanam

kṣaṇakalpaṃ jagatsarvaṃ tvattāmattātmajanmanām /
yathāvatpratibhāsasya vakṣye kramamimaṃ śṛṇu

anubhūya kṣaṇaṃ jīvo mithyāmaraṇamūrcchanam /
vismṛtya prāktanaṃ bhāvamanyaṃ paśyati suvrate

tadevonmeṣamātreṇa vyomnyeva vyomarūpyapi /
ādheyo'yamihādhāre sthito'hamiti cetati

hastapādādimāndeho mamāyamiti paśyati /
yadeva cetati vapustadevedaṃ sa paśyati

etasyāhaṃ pituḥ putro varṣāṇyetāni santi me /
ime me bāndhavā ramyā mamedaṃ ramyamāspadam

jāto'hamabhavaṃ bālo vṛddhiṃ yāto'hamīdṛśaḥ /
bāndhavāścāsya me sarve tathaiva vicarantyamī

cittākāśaghanaikatvātsve'pyanye'pi bhavanti te /
evaṃ nāmodite'pyasya citte saṃsārakhaṇḍake

na kiṃcidapyabhyuditaṃ sthitaṃ vyomaiva nirmalam /
svapne draṣṭari yadvaccittadvaddṛśye cideva sā

sarvagaikatayā yasmātsā svapne dṛṣṭadarśanā /
yathā svapne tathodeti paralokadṛgādibhiḥ

paraloke yathodeti tathaivehābhyudeti sā /
tatsvapnaparalokeha lokānāmasatāṃ satām

na manāgapi bhedo'sti vīcīnāmiva vāriṇi /
ato jātamidaṃ viśvamajātatvādanāśi ca

svarūpatvāttu nāstyeva yacca bhāti cideva sā /
yathaiva cetyanirhīṇā paramavyomarūpiṇī

sacetyāpi tathaivaiṣā paramavyomarūpiṇī /
tasmāccetyamato nānyadvīcitvādīva vāritaḥ

vīcitvaṃ ca rase nāsti śaśaśṛṅgavadeva hi /
saiva cetyamivāpannā svabhāvādacyutāpyalam

tasmānnāstyeva dṛśyo'rthaḥ kuto'to draṣṭṛdṛśyadhīḥ /
nimiṣeṇaiva jīvasya mṛtimohādanantaram

trijagaddṛśyasargaśrīḥ pratibhāmupagacchati /
yathādeśaṃ yathākālaṃ yathārambhaṃ yathākramam

yathotpādaṃ yathāmātṛ yathāpitṛ yathaurasam /
yathāvayo yathāsaṃvidyathāsthānaṃ yathehitam

yathābandhu yathābhṛtyaṃ yathehāstamayodayam /
ajāta eva jāto'hamiti cetati cidvapuḥ

deśakālakriyādravyamanobuddhīndriyādi ca /
jhaṭityeva mṛterante vapuḥ paśyati yauvane

eṣā mātā pitā hyeṣa bālo'bhūvamahaṃ tviti /
nānubhūto'nubhūto vā yaḥ syātsmṛtimayaḥ kramaḥ

paścādudetyasau tasya puṣpasyeva phalodayaḥ /
nimiṣeṇaiva me kalpo gata ityanubhūyate

rātrirdvādaśavarṣāṇi hariścandre tathā hyabhūt /
kāntāvirahiṇāmekaṃ vāsaraṃ vatsarāyate

mṛto jāto'hamanyo me piteti svapnatāsviva /
abhuktasyaiva bhogasya bhuktadhīrupajāyate

bhukte'pyabhuktadhīrdṛṣṭamityalaṅkitavādiṣu /
śūnyamākīrṇatāmeti tulyaṃ vyasanamutsavaiḥ /
vipralambho'pi lābhaśca madasvapnādisaṃvidi

taikṣṇyaṃ yathā maricabījakaṇe sthitaṃ svaṃ
stambheṣu cāracitaputrakajālamantaḥ /
dṛśyaṃ tvananyadidamevamaje'sti śāntaṃ
tasyāstibandhanavimokṣadṛśaḥ kutaḥ kāḥ

ityārṣe śrīvāsiṣṭhamahārāmāyaṇe vālmīkīye utpattiprakaraṇe līlopākhyāne paramārthavarṇanaṃ nāma viṃśaḥ sargaḥ