Yoga Vasistha · Chapter 3.19

śrīdevyuvāca /
vittaveṣavayaḥkarmavidyāvibhavaceṣṭitaiḥ /
vasiṣṭhasyaiva sadṛśo natu vāsiṣṭhaceṣṭitaḥ

vasiṣṭha iti nāmnāsau tasyābhūdindusundarī /
nāmnā tvarundhatī bhāryā bhūmivyomanyarundhatī

vittaveṣavayaḥkarmavidyāvibhavaceṣṭitaiḥ /
samaiva sāpyarundhatyā natu cetanasattayā

akṛtrimapremarasā vilāsālasagāminī /
sāsya saṃsārasarvasvamāsītkumudahāsinī

sa viprastasya śailasya sānau saralaśādvale /
kadācidupaviṣṭaḥ sandadarśādho mahīpatim

samagraparivāreṇa yāntamākheṭakecchayā /
mahatā sainyaghoṣeṇa meroriva bibhitsayā

cāmaraiḥ kīrṇacandrāṃśupatākābhirlatāvanam /
kurvāṇaṃ khaṃ sitacchatramaṇḍalai rūpyakuṭṭimam

aśvapādūsvanatkṣmājareṇupūrāvṛtāmbaram /
hāstikottambhitakaravātāṭṭālakagopitam

mahākalakalāvartadravaddigbhūtamaṇḍalam /
kacatkāñcanamāṇikyahārakeyūramaṇḍalam

tamālokya mahīpālamidaṃ cintitavānasau /
aho nu ramyā nṛpatā sarvasaubhāgyabhāsitā

padātirathahastyaśvapatākācchatracāmaraiḥ /
kadā syāṃ daśadikkuñjapūrako'haṃ mahīpatiḥ

kadā me vāyavaḥ kundamakarandasugandhayaḥ /
pāsyantyantaḥpurastrīṇāṃ surataśramasīkarān

karpūreṇa purandhrīṇāṃ pūrṇena yaśasā diśām /
indūdayāvadātāni kadā kuryāṃ mukhānyaham

itthaṃ tataḥprabhṛtyeṣa vipraḥ saṃkalpavānabhūt /
svadharmanirato nityaṃ yāvajjīvamatandritaḥ

himāśanirivāmbhojaṃ jarjarīkartumādṛtā /
jale jarjaritevātha jarā dvijamupāyayau

āsannamaraṇasyātha bhāryā mlānimupāyayau /
tasya śāmyati puṣpartau lateva grīṣmabhītitaḥ

māmathārādhitavatī sā tatastvamivāṅganā /
amaratvaṃ suduṣprāpaṃ buddhvemaṃ sāvṛṇodvaram

devi svamaṇḍapādeva jīvo bharturmṛtasya me /
māyāsīdityatastasyāḥ sa evāṅgīkṛto mayā

atha kālavaśādvipraḥ sa pañcatvamupāyayau /
tasminneva gṛhākāśe jīvākāśatayā sthitaḥ

saṃpannaḥ prāktanānalpasaṃkalpavaśataḥ svayam /
ākāśavapurevaiṣa patiḥ paramaśaktimān

prabhāvajitabhūpīṭhaḥ pratāpākrāntaviṣṭapaḥ /
kṛpāpālitapātālastrilokavijayī nṛpaḥ

kalpāgnirarivṛkṣāṇāṃ strīṇāṃ makaraketanaḥ /
merurviṣayavāyūnāṃ sādhvabjānāṃ divākaraḥ

ādarśaḥ sarvaśāstrāṇāmarthināṃ kalpapādapaḥ /
pādapīṭhaṃ dvijāgryāṇāṃ rākādharmāmṛtatviṣaḥ

svagṛhābhyantarākāśe cittākāśamayātmani /
tasmindvije śavībhūte bhūtākāśaśarīriṇi

sā tasya brāhmaṇī bhāryā śokenātyantakarśitā /
śuṣkeva māṣaśimbīkā hṛdayena dvidhābhavat

bhartrā saha śavībhūtā dehamutsṛjya dūrataḥ /
ātivāhikadehena bhartāraṃ samupāyayau

nadīnikhātamiva taṃ bhartāramanusṛtya sā /
ājagāma viśokatvaṃ sā vāsantīva mañjarī

tatrāsya viprasya gṛhāṇi santi bhūsthāvarādīni dhanāni santi /
adyāṣṭamaṃ vāsaramāptamṛtyorjīvo girigrāmakakandarasthaḥ

ityārṣe śrīvāsiṣṭhamahārāmāyaṇe vālmīkīye utpattiprakaraṇe līlo० brāhmaṇamaraṇaṃ nāmaikonaviṃśaḥ sargaḥ