Yoga Vasistha · Chapter 2.5

śrīvasiṣṭha uvāca /
pravṛttireva prathamaṃ yathāśāstravihāriṇām /
prabheva varṇabhedānāṃ sādhanī sarvakarmaṇām

manasā vāñchate yacca yathāśāstraṃ na karmaṇā /
sādhyate mattalīlāsau mohanī nārthasādhanī

yathā saṃyatate yena tathā tenānubhūyate /
svakarmaiveti cāste'nyā vyatiriktā na daivadṛk

ucchāstraṃ śāstritaṃ ceti dvividhaṃ pauruṣaṃ smṛtam /
tatrocchāstramanarthāya paramārthāya śāstritam

dvau huḍāviva yudhyete puruṣārthau samāsamau /
prāktanaścaihikaścaiva śāmyatyatrālpavīryavān

ataḥ puruṣayatnena yatitavyaṃ yathā tathā /
puṃsā tantreṇa sadyogādyenāśvadyatano jayet

dvau huḍāviva yudhyete puruṣārthau samāsamau /
ātmīyaścānyadīyaśca jayatyatibalastayoḥ

anarthaḥ prāpyate yatra śāstritādapi pauruṣāt /
anarthakartṛ balavattatra jñeyaṃ svapauruṣam

paraṃ pauruṣamāśritya dantairdantānvicūrṇayan /
śubhenā'śubhamudyuktaṃ prāktanaṃ pauruṣaṃ jayet

prāktanaḥ puruṣārtho'sau māṃ niyojayatīti dhīḥ /
balādadhaspadīkāryā pratyakṣādadhikā na sā

tāvattāvatprayatnena yatitavyaṃ supauruṣam /
prāktanaṃ pauruṣaṃ yāvadaśubhaṃ śāmyati svayam

doṣaḥ śāmyatyasaṃdehaṃ prāktano'dyatanairguṇaiḥ /
dṛṣṭānto'tra hyastanasya doṣasyādya guṇaiḥ kṣayaḥ

asaddaivamadhaḥkṛtvā nityamudriktayā dhiyā /
saṃsārottaraṇaṃ bhūtyai yatetā''dhātumātmani

na gantavyamanudyogaiḥ sāmyaṃ puruṣagardabhaiḥ /
udyogastu yathāśāstraṃ lokadvitayasiddhaye

saṃsārakuharādasmānnirgantavyaṃ svayaṃ balāt /
pauruṣaṃ yatnamāśritya hariṇevāripañjarāt

pratyahaṃ pratyavekṣeta dehaṃ naśvaramātmanaḥ /
saṃtyajetpaśubhistulyaṃ śrayetsatpuruṣocitam

kiṃcitkāntānnapānādikalilaṃ komalaṃ gṛhe /
vraṇe kīṭa ivāsvādya vayaḥ kāryaṃ na bhasmasāt

śubhena pauruṣeṇāśu śubhamāsādyate phalam /
aśubhenāśubhaṃ nityaṃ daivaṃ nāma na kiṃcana

pratyakṣamānamutsṛjya yo'numānamupaityasau /
svabhujābhyāmimau sarpāviti prekṣya palāyate

daivaṃ saṃprerayati māmiti dagdhadhiyāṃ mukham /
adṛṣṭaśreṣṭhadṛṣṭīnāṃ dṛṣṭvā lakṣmīrnivartate

tasmātpuruṣayatnena vivekaṃ pūrvamāśrayet /
ātmajñānamahārthāni śāstrāṇi pravicārayet

citte cintayatāmarthaṃ yathāśāstraṃ nijehitaiḥ /
asaṃsādhayatāmeva mūḍhānāṃ dhigdurīpsitam

pauruṣaṃ ca navānantaṃ na yatnamabhivācchyate /
na yatnenāpi mahatā prāpyate ratnamaśmataḥ

yathā ghaṭaḥ parimito yathā parimitaḥ paṭaḥ /
niyataḥ parimāṇasthaḥ puruṣārthastathaiva ca

sa ca sacchāstrasatsaṅgasadācārairnijaṃ phalam /
dadātīti svabhāvo'yamanyathā nārthasiddhaye

svarūpaṃ pauruṣasyaitadevaṃ vyavaharannaraḥ /
yāti niṣphalayatnatvaṃ na kadācana kaścana

dainyadāridryaduḥkhārtā apyanye puruṣottamāḥ /
pauruṣeṇaiva yatnena yātā devendratulyatām

ābālyādalamabhyastaiḥ śāstrasatsaṅgamādibhiḥ /
guṇaiḥ puruṣayatnena svārthaḥ saṃprāpyate yataḥ

iti pratyakṣato dṛṣṭamanubhūtaṃ śrutaṃ kṛtam /
daivāttamiti manyante ye hatāste kubuddhayaḥ

ālasyaṃ yadi na bhavejjagatyanarthaḥ
ko na syādbahudhanako bahuśruto vā /
ālasyādiyamavaniḥ sasāgarāntā
saṃpūrṇā narapaśubhiśca nirdhanaiśca

bālye gate'viratakalpitakelilole
dordaṇḍamaṇḍitavayaḥprabhṛti prayatnāt /
satsaṅgamaiḥ padapadārthaviśuddhabuddhiḥ
kuryānnaraḥ svaguṇadoṣavicāraṇāni

vālmīkiruvāca /
ityuktavatyatha munau divaso jagāma
sāyaṃtanāya vidhaye'stamino jagāma /
snātuṃ sabhā kṛtanamaskaraṇā jagāma
śyāmākṣaye ravikareṇa sahājagāma

ityārṣe śrīvāsiṣṭhamahārāmāyaṇe vālmīkīye mumukṣuvyavahāraprakaraṇe pauruṣasthāpanaṃ nāma pañcamaḥ sargaḥ