Yoga Vasistha · Chapter 2.14

caturdaśaḥ sargaḥ

śrīvasiṣṭha uvāca /
śāstrāvabodhāmalayā dhiyā paramapūtayā /
kartavyaḥ kāraṇajñena vicāro'niśamātmanaḥ

vicārāttīkṣṇatāmetya dhīḥ paśyati paraṃ padam /
dīrghasaṃsārarogasya vicāro hi mahauṣadham

āpadvanamanantehāparipallavitākṛti /
vicārakrakacacchinnaṃ naiva bhūyaḥ prarohati

mohena bandhunāśeṣu saṃkaṭeṣu śameṣu ca /
sarvaṃ vyāptaṃ mahāprājña vicāro hi satāṃ gatiḥ

na vicāraṃ vinā kaścidupāyo'sti vipaścitām /
vicārādaśubhaṃ tyaktvā śubhamāyāti dhīḥ satām

balaṃ buddhiśca tejaśca pratipattiḥ kriyāphalam /
phalantyetāni sarvāṇi vicāreṇaiva dhīmatām

yuktāyuktamahādīpamabhivāñchitasādhakam /
sphāraṃ vicāramāśritya saṃsārajaladhiṃ taret

ālūnahṛdayāmbhojānmahāmohamataṅgajān /
vidārayati śuddhātmā vicāro nāma kesarī

mūḍhāḥ kālavaśeneha yadgatāḥ paramaṃ padam /
tadvicārapradīpasya vijṛmbhitamanuttamam

rājyāni saṃpadaḥ sphārā bhogo mokṣaśca śāśvataḥ /
vicārakalpavṛkṣasya phalānyetāni rāghava

yā vivekavikāsinyo matayo mahatāmiha /
na tā vipadi majjanti tumbakānīva vāriṇi

vicārodayakāriṇyā dhiyā vyavaharanti ye /
phalānāmatyudārāṇāṃ bhājanaṃ hi bhavanti te

mūrkhahṛtkānanasthānāmāśāprathamarodhinām /
avicārakarañjānāṃ mañjaryo duḥkharītayaḥ

kajjalakṣodamalinā madirāmadadharmiṇī /
avicāramayī nidrā yātu te rāghava kṣayam

mahāpadatidīrgheṣu sadvicāraparo naraḥ /
na nimajjati moheṣu tejorāśistamaḥsviva

mānase sarasi svacche vicārakamalotkaraḥ /
nūnaṃ vikasito yasya himavāniva bhāti saḥ

vicāravikalā yasya matirmāndyamupeyuṣaḥ /
tasyodetyaśaniścandrānmudhā yakṣaḥ śiśoriva

duḥkhakhaṇḍakamasthūlaṃ vipannavalatāmadhuḥ /
rāma dūre parityājyo nirviveko narādhamaḥ

ye kecana durārambhā durācārā durādhayaḥ /
avicāreṇa te bhānti vetālāstamasā yathā

avicāriṇamekāntavanadrumasadharmakam /
akṣamaṃ sādhukāryeṣu dūre kuru raghūdvaha

viviktaṃ hi mano jantorāśāvaivaśyavarjitam /
parāṃ nirvṛtimabhyeti pūrṇacandra ivātmani

vivekitoditā dehe sarvaṃ śītalayatyalam /
alaṃkaroti cātyantaṃ jyotsneva bhuvanaṃ yathā

paramārthapatākāyā dhiyo dhavalacāmaram /
vicāro rājate janto rajanyāmiva candramāḥ

vicāracāravo jīvā bhāsayanto diśo daśa /
bhānti bhāskaravannūnaṃ bhūyo bhavabhayāpahāḥ

bālasya svamanomohakalpitaḥ prāṇahārakaḥ /
rātrau nabhasi vetālo vicāreṇa vilīyate

sarvaṃ eva jagadbhāvā avicāreṇa cāravaḥ /
avidyamānasadbhāvā vicāraviśarāravaḥ

puṃso nijamanomohakalpito'nalpaduḥkhadaḥ /
saṃsāraciravetālo vicāreṇa vilīyate

samaṃ sukhaṃ nirābādhamanantamanapāśrayam /
viddhīmaṃ kevalībhāvaṃ vicāroccataroḥ phalam

acalasthititodārā prakaṭābhogatejasā /
tena niṣkāmatodeti śītatevendunoditā

svavicāramahauṣadhyā sādhuścittaniṣaṇṇayā /
tayottamatvapradayā nābhivāñchati nojjhati

tatpadālambanaṃ cetaḥ sphāramābhāsamāgatam /
nāstameti na codeti khamivātitatāntaram

na dadāti na cādatte na connamati śāmyati /
kevalaṃ sākṣivatpaśyañjagadābhogi tiṣṭhati

na ca śāmyati nāpyantarnāpi bāhye'vatiṣṭhati /
na ca naiṣkarmyamādatte na ca karmaṇi majjati

upekṣate gataṃ vastu saṃprāptamanuvartate /
na kṣubdho na ca vā'kṣubdho bhāti pūrṇa ivārṇavaḥ

evaṃ pūrṇena manasā mahātmāno mahāśayāḥ /
jīvanmuktā jagatyasminviharantīha yoginaḥ

uṣitvā suciraṃ kālaṃ dhīrāste yāvadīpsitam /
te tamante parityajya yānti kevalatāṃ tatām

ko'haṃ kasya ca saṃsāra ityāpadyapi dhīmatā /
cintanīyaṃ prayatnena sapratīkāramātmanā

kāryasaṃkaṭasaṃdehaṃ rājā jānāti rāghava /
niṣphalaṃ saphalaṃ vāpi vicāreṇaiva nānyathā

vedavedāntasriddhāntasthitayaḥ sthitikāraṇam /
nirṇīyante vicāreṇa dīpena ca bhuvo niśi

anaṣṭamandhakāreṣu bahutejaḥsvajihmitam /
paśyatyapi vyavahitaṃ vicāraścārulocanam

vivekāndho hi jātyandhaḥ śocyaḥ sarvasya durmatiḥ /
divyacakṣurvivekātmā jayatyakhilavastuṣu

paramātmamayī mānyā mahānandaikasādhinī /
kṣaṇamekaṃ parityājyā na vicāracamatkṛtiḥ

vicāracārupuruṣo mahatāmapi rocate /
paripakvacamatkāraṃ sahakāraphalaṃ yathā

vicārakāntamatayo nānekeṣu punaḥpunaḥ /
luṭhanti duḥkhaśvabhreṣu jñātādhvagatayo narāḥ

naca rauti tathā rogī nānarthaśatajarjaraḥ /
avicāravinaṣṭātmā yathā'jñaḥ pariroditi

varaṃ kardamamekatvaṃ malakīṭakatā varam /
varamandhaguhāhitvaṃ na narasyāvicāritā

sarvānarthanijāvāsaṃ sarvasādhutiraskṛtam / /
sarvadausthityasīmāntamavicāraṃ parityajet

nityaṃ vicārayuktena bhavitavyaṃ mahātmanā /
tathāndhakūpe patatāṃ vicāro hyavalambanam

svayamevātmanātmānamavaṣṭabhya vicārataḥ /
saṃsāramohajaladhestārayetsvamanomṛgam

ko'haṃ kathamayaṃ doṣaḥ saṃsārākhya upāgataḥ /
nyāyeneti parāmarśo vicāra iti kathyate

andhāndhamohasudhanaṃ ciraṃ duḥkhāya kevalam /
kṛtaṃ śilāyā hṛdayaṃ durmateścāvicāriṇaḥ

bhāvābhāvagrahotsargadṛśāmiha hi rāghava /
na vicārādṛte tattvaṃ jñāyate sādhu kiṃcana

vicārājjñāyate tattvaṃ tattvādviśrāntirātmani /
ato manasi śāntatvaṃ sarvaduḥkhaparikṣayaḥ

saphalatā phalate bhuvi karmaṇāṃ
prakaṭatāṃ kila gacchati uttamām /
sphuṭavicāradṛśaiva vicāritā
śamavate bhavate ca virocatām

ityārṣe śrīvāsiṣṭhamahārāmāyaṇe vālmīkīye mumukṣuvyavahāraprakaraṇe vicāranirūpaṇaṃ nāma caturdaśaḥ sargaḥ