Yoga Vasistha · Chapter 2.13

trayodaśaḥ sargaḥ

śrīvasiṣṭha uvāca /
etāṃ dṛṣṭimavaṣṭabhya dṛṣṭātmānaḥ subuddhayaḥ /
vicarantīha saṃsāre mahānto'bhyuditā iva

na śocanti na vāñchanti na yācante śubhāśubham /
sarvameva ca kurvanti na kurvantīha kiṃcana

svacchamevāvatiṣṭhante svacchaṃ kurvanti yānti hi /
heyopādeyatāpakṣarahitāḥ svātmani sthitāḥ

āyānti ca na cāyānti prayānti ca na yānti ca /
kurvantyapi na kurvanti na vadanti vadanti ca

ye kecana samārambhā yāśca kāścana dṛṣṭayaḥ /
heyopādeyatastāstāḥ kṣīyante'dhigate pade

parityaktasamastehaṃ manomadhuravṛttimat /
sarvataḥ sukhamabhyeti candrabimba iva sthitam

api nirmananārambhamavyastākhilakautukam /
ātmanyeva na mātyantarindāviva rasāyanam

na karotīndrajālāni nānudhāvati vāsanām /
bālacāpalamutsṛjya pūrvameva virājate

evaṃvidhā hi vṛttaya ātmatattvāvalokanāllabhyante
nānyathā

tasmādvicāreṇātmaivānveṣṭavya upāsanīyo jñātavyo
yāvajjīvaṃ puruṣeṇa netaraditi

svānubhūteśca śāstrasya guroścaivaikavākyatā /
yasyābhyāsena tenātmā santatenāvalokyate

avahelitaśāstrārthairavajñātamahājanaiḥ /
kaṣṭāmapyāpadaṃ prāpto na mūḍhaiḥ samatāmiyāt

na vyādhirna viṣaṃ nāpattathā nādhiśca bhūtale /
khedāya svaśarīrasthaṃ maurkhyamekaṃ yathā nṛṇām

kiṃcitsaṃskṛtabuddhīnāṃ śrutaṃ śāstramidaṃ yathā /
maurkhyāpahaṃ tathā śāstramanyadasti na kiṃcana

idaṃ śrāvyaṃ sukhakaraṃ yathā dṛṣṭāntasundaram /
aviruddhamaśeṣeṇa śāstraṃ vākyārthabandhunā

āpado yā duruttārā yāśca tucchāḥ kuyonayaḥ /
tāstā maurkhyātprasūyante khadirādiva kaṇṭakāḥ

varaṃ śarāvahastasya cāṇḍālāgāravīthiṣu /
bhikṣārthamaṭanaṃ rāma na maurkhyahatajīvitam

varaṃ ghorāndhakūpeṣu koṭareṣveva bhūruhām /
andhakīṭatvamekānte na maurkhyamatiduḥkhadam

imamālokamāsādya mokṣopāyamayaṃ janaḥ /
andhatāmeti na punaḥ kaścinmohatamasyapi

tāvannayati saṃkocaṃ tṛṣṇā vai mānavāmbujam /
yāvadvivekasūryasya noditā vimalā prabhā

saṃsāraduḥkhamokṣārthe mādṛśaiḥ saha bandhubhiḥ /
svarūpamātmano jñātvā guruśāstrapramāṇataḥ

jīvanmuktāścarantīha yathā hariharādayaḥ /
yathā brahmarṣayaścānye tathā vihara rāghava

anantānīha duḥkhāni sukhaṃ tṛṇalavopamam /
nātaḥ sukheṣu badhnīyāddṛṣṭiṃ duḥkhānubandhiṣu

yadanantamanāyāsaṃ tatpadaṃ sārasiddhaye /
sādhanīyaṃ prayatnena puruṣeṇa vijānatā

ta eva puruṣārthasya bhājanaṃ puruṣottamāḥ /
anuttamapadālambi mano yeṣāṃ gatajvaram

saṃbhogāśanamātreṇa rājyādiṣu sukheṣu ye /
saṃtuṣṭā duṣṭamanaso viddhi tānandhadardurān

ye śaṭheṣu duranteṣu duṣkṛtārambhaśāliṣu /
dviṣatsu mitrarūpeṣu bhaktā vai bhogabhogiṣu

te yānti durgamāddurgaṃ duḥkhādduḥkhaṃ bhayādbhayam /
narakānnarakaṃ mūḍhā mohamantharabuddhayaḥ

parasparavināśokteḥ śreyaḥstho na kadācana /
sukhaduḥkhadaśe rāma taḍitprasarabhaṅgure

ye viraktā mahātmānaḥ suviviktā bhavādṛśāḥ /
puruṣānviddhi tānvandyānbhogamokṣaikabhājanān

vivekaṃ paramāśritya vairāgyābhyāsayogataḥ /
saṃsārasaritaṃ ghorāmimāmāpadamuttaret

na svaptavyaṃ ca saṃsāramāyāsviha vijānatā /
viṣamūrcchanasaṃmohadāyinīṣu vivekinā

saṃsāramimamāsādya yastiṣṭhatyavahelayā /
jvalitasya gṛhasyoccaiḥ śete tārṇasya saṃstare

yatprāpya na nivartante yadāsādya na śocati /
tatpadaṃ śemuṣīlabhyamastyevātra na saṃśayaḥ

nāsti cettadvicāreṇa doṣaḥ ko bhavatāṃ bhavet /
asti cettatsamuttīrṇā bhaviṣyatha bhavārṇavāt

pravṛttiḥ puruṣasyeha mokṣopāyavicāraṇe /
yadā bhavatyāśu tadā mokṣabhāgī sa ucyate

anapāyi nirāśaṅkaṃ svāsthyaṃ vigatavibhramam /
na vinā kevalībhāvādvidyate bhuvanatraye

tatprāptāvuttamaprāptau na kleśa upajāyate /
na dhanānyupakurvanti na mitrāṇi na bāndhavāḥ

na hastapādacalanaṃ na deśāntarasaṃgamaḥ /
na kāyakleśavaidhuryaṃ na tīrthāyatanāśrayāḥ

puruṣārthaikasādhyena vāsanaikārthakarmaṇā /
kevalaṃ tanmanomātrajayenāsādyate padam

vivekamātrasādhyaṃ tadvicāraikāntaniścayam /
tyajatā duḥkhajālāni nareṇaitadavāpyate

sukhasevyāsanasthena tadvicārayatā svayam /
na śocyate padaṃ prāpya na sa bhūyo hi jāyate

tatsamastasukhāsārasīmāntaṃ sādhavo viduḥ /
tadanuttamaniṣpandaṃ paramāhū rasāyanam

kṣayitvātsarvabhāvānāṃ svargamānuṣyayordvayoḥ /
sukhaṃ nāstyeva salilaṃ mṛgatṛṣṇāsvivaitayoḥ

ato manojayaścintyaḥ śamasaṃtoṣasādhanaḥ /
anantasamasaṃyogastasmādānanda āpyate

tiṣṭhatā gacchatā caiva patatā bhramatā tathā /
rakṣasā dānavenāpi devena puruṣeṇa vā

manaḥ praśamanodbhūttaṃ tatprāpyaṃ paramaṃ sukham /
vikāsiśamapuṣpasya vivekoccataroḥ phalam

vyavahārapareṇāpi kāryavṛndamavindatā /
bhānunevāmbarasthena nojjhyate na ca vāñchayate

manaḥpraśāntamatyacchaṃ viśrāntaṃ vigatabhramam /
anīhaṃ vigatābhīṣṭaṃ nābhivāñchati nojjhati

mokṣadvāre dvārapālānimāñchraṇu yathākramam /
yeṣāmekatamāsaktyā mokṣadvāraṃ praviśyate/

sukhadoṣadaśādīrghā saṃsāramarumaṇḍalī /
jantoḥ śītalatāmeti śītaraśmeḥ samaprabhā

śamenāsādyate śreyaḥ śamo hi paramaṃ padam /
śamaḥ śivaḥ śamaḥ śānti śamo bhrāntinivāraṇam

puṃsaḥ praśamatṛptasya śītalācchatarātmanaḥ /
śamabhūṣitacittasya śatrurapyeti mitratām

śamacandramasā yeṣāmāśayaḥ samalaṃkṛtaḥ /
kṣīrodānāmivodeti teṣāṃ paramaśuddhatā

hṛtkuśeśayakośeṣu yeṣāṃ śamakuśeśayam /
satāṃ vikasitaṃ te hi dvihṛtpadmāḥ samā hareḥ

śamaśrīḥ śobhate yeṣāṃ mukhendāvakalaṅkite /
te kulīnendavo vandyāḥ saundaryavijitendriyāḥ

trailokyodaravartinyo nānandāya tathā śriyaḥ /
sāmrājyasaṃpatpratimā yathā śamavibhūtayaḥ

yāni duḥkhāni yā tṛṣṇā duḥsahā ye durādhayaḥ /
tatsarvaṃ śāntacetaḥsu tamo'rkeṣviva naśyati

mano hi sarvabhūtānāṃ prasādamadhigacchati /
na tathendoryathā śānte jane janitakautukam

śamaśālini sauhārdavati sarveṣu jantuṣu /
sujane paramaṃ tattvaṃ svayameva prasīdati

mātarīva paraṃ yānti viṣamāṇi mṛdūni ca /
viśvāsamiha bhūtāni sarvāṇi śamaśālini

na rasāyanapānena na lakṣmyāliṅganena ca /
tathā sukhamavāpnoti śamenāntaryathā manaḥ

sarvādhivyādhicalitaṃ krāntaṃ tṛṣṇāvaratrayā /
manaḥ śamāmṛtāsekaiḥ samāśvāsaya rāghava

yatkaroṣi yadaśnāsi śamaśītalayā dhiyā /
tatrātisvadate svādu netarattāta mānase

śamāmṛtarasācchannaṃ mano yāmeti nirvṛtim /
chinnānyapi tayāṅgāni manye rohanti rāghava

na piśācā na rakṣāṃsi na daityā na ca śatravaḥ /
na ca vyāghrabhujaṅgā vā dviṣanti śamaśālinam

susaṃnaddhasamastāṅgaṃ praśamāmṛtavarmaṇā /
vedhayanti na duḥkhāni śarā vajraśilāmiva

na tathā śobhate rājā apyantaḥpurasaṃsthitaḥ /
samayā svacchayā buddhyā yathopaśamaśīlayā

prāṇātpriyataraṃ dṛṣṭvā tuṣṭimeti na vai janaḥ /
yāmāyāti janaḥ śāntimavalokya śamāśayam

samayā śamaśālinyā vṛttyā yaḥ sādhu vartate /
abhinanditayā loke jīvatīha sa netaraḥ

anuddhatamanāḥ śāntaḥ sādhuḥ karma karoti yat /
tatsarvamabhinandanti tasyemā bhūtajātayaḥ

śrutvā spṛṣṭvā ca dṛṣṭvā ca bhuktvā ghrātvā śubhāśubham /
na hṛṣyati glāyati yaḥ sa śānta iti kathyate

yaḥ samaḥ sarvabhūteṣu bhāvi kāṅkṣati nojjhati /
jitvendriyāṇi yatnena sa śānta iti kathyate

spṛṣṭvā'vadātayā buddhyā yathaivāntastathā bahiḥ /
dṛśyante yatra kāryāṇi sa śānta iti kathyate

tuṣārakarabimbābhaṃ mano yasya nirākulam /
maraṇotsavayuddheṣu sa śānta iti kathyate

sthito'pi na sthita iva na hṛṣyati na kupyati /
yaḥ suṣuptasamaḥ svasthaḥ sa śānta iti kathyate

amṛtasyandasubhagā yasya sarvajanaṃ prati /
dṛṣṭiḥ prasarati prītā sa śānta iti kathyate

yo'ntaḥ śītalatāṃ yāto yo bhāveṣu na majjati /
vyavahārī na saṃmūḍhaḥ sa śānta iti kathyate

apyāpatsu durantāsu kalpānteṣu mahatsvapi /
tucche'haṃ na mano yasya sa śānta iti kathyate

ākāśasadṛśī yasya puṃsaḥ saṃvyavahāriṇaḥ /
kalaṅkameti na matiḥ sa śānta iti kathyate

tapasviṣu bahujñeṣu yājakeṣu nṛpeṣu ca /
balavatsu guṇāḍhyeṣu śamavāneva rājate

śamasaṃsaktamanasāṃ mahatāṃ guṇaśālinām /
udeti nirvṛtiścittājjyotsneva sitarociṣaḥ

sīmānto guṇapūgānāṃ pauruṣaikāntabhūṣaṇam /
saṃkaṭeṣu bhayasthāne śamaḥ śrīmānvirājate

śamamamṛtamahāryamāryaguptaṃ
paramavalambya paraṃ padaṃ prayātāḥ /
raghutanaya yathā mahānubhāvāḥ
kramamanupālaya siddhaye tameva

ityārṣe śrīvāsiṣṭhamahārāmāyaṇe vālmīkīye mumukṣuvyavahāraprakaraṇe śamanirūpaṇaṃ nāma trayodaśaḥ sargaḥ