Yoga Vasistha · Chapter 2.15

pañcadaśaḥ sargaḥ

śrīvasiṣṭha uvāca /
saṃtoṣo hi paraṃ śreyaḥ saṃtoṣaḥ sukhamucyate
saṃtuṣṭaḥ paramabhyeti viśrāmamarisūdana

saṃtoṣaiśvaryasukhināṃ ciraviśrāntacetasām /
sāmrājyamapi śāntānāṃ jarattṛṇalavāyate

saṃtoṣaśālinī buddhī rāma saṃsāravṛttiṣu /
viṣamāsvapyanudvignā na kadācana hīyate

saṃtoṣāmṛtapānena ye śāntāstṛptimāgatāḥ /
bhogaśrīratulā teṣāmeṣā prativiṣāyate

na tathā sukhayantyetāḥ pīyūṣarasavīcayaḥ /
yathātimadhurāsvādaḥ saṃtoṣo doṣanāśanaḥ

aprāptavāñchāmutsṛjya saṃprāpte samatāṃ gataḥ /
adṛṣṭakhedākhedo yaḥ sa saṃtuṣṭa ihocyate

ātmanātmani saṃtoṣaṃ yāvadyāti na mānasam /
udbhavantyāpadastāvallatā iva manobilāt

saṃtoṣaśītalaṃ cetaḥ śuddhavijñānadṛṣṭibhiḥ /
bhṛśaṃ vikāsamāyāti sūryāṃśubhirivāmbujam

āśāvaivaśyavivaśe citte saṃtoṣavarjite /
mlāne vakramivādarśe na jñānaṃ pratibimbati

ajñānaghanayāminyā saṃkocaṃ na narāmbujam /
yātyasāvudito yasya nityaṃ saṃtoṣabhāskaraḥ

akiṃcano'pyasau jantuḥ sāmrājyasukhamaśnute /
ādhivyādhivinirmuktaṃ saṃtuṣṭaṃ yasya mānasam

nābhivāñchatyasaṃprāptaṃ prāptaṃ bhuṃkte yathākramam /
yaḥ susaumyasamācāraḥ saṃtuṣṭa iti kathyate

saṃtuṣṭiparatṛptasya mahataḥ pūrṇacetasaḥ /
kṣīrābdheriva śuddhasya mukhe lakṣmīrvirājate

pūrṇatāmalamāśritya svātmanyevātmanā svayam /
pauruṣeṇa prayatnena tṛṣṇāṃ sarvatra varjayet

saṃtoṣā'mṛtapūrṇasya śāntaśītalayā dhiyā /
svayaṃ sthairyaṃ mano yāti śītāṃśoriva śāśvatam

saṃtoṣapuṣṭamanasaṃ bhṛtyā iva maharddhayaḥ /
rājānamupatiṣṭhanti kiṃkaratvamupāgatāḥ

ātmanaivātmani svasthe saṃtuṣṭe puruṣe sthite /
praśāmyantyādhayaḥ sarve prāvṛṣīvāśu pāṃśavaḥ

nityaṃ śītalayā rāma kulaṅkaparibhinnayā /
puruṣaḥ śuddhayā vṛttyā bhāti pūrṇatayenduvat

samatāsundaraṃ vakraṃ puruṣasyāvalokayan /
toṣameti yathā loko na tathā dhanasaṃcayaiḥ

samatayā matayā guṇaśālināṃ
puruṣarāḍiha yaḥ samalaṃkṛtaḥ /
tamamalaṃ praṇamanti nabhaścarā
api mahāmunayo raghunandana

ityārṣe śrīvāsiṣṭhamahārāmāyaṇe vālmīkīye mumukṣuvyavahāraprakaraṇe saṃtoṣanirūpaṇaṃ nāma pañcadaśaḥ sargaḥ