Viṣvaksenasaṃhitā · Chapter 9

iti śrīpāñcarātre viṣvaksenasaṃhitāyāṃ prathameṣṭakāvidhirnāmāṣṭamo 'dhyāyaḥ
navamo 'dhyāyaḥ
navamo 'dhyāyaḥ viṣvaksenaḥ---
athātaḥ saṃpravakṣyāmi bālasyānavidhiṃ param /
prathamaṃ ca dvitīyaṃ ca (?) saṃkṣepācchṛṇu nārada

mahāvimānābhimukhaṃ nātidūrasamīpagam /
prāsādasyāgrataḥ kuryāt devasya taruṇālayam

mahāgehābhimukho (gehamukhaṃ yadvā?) pūrvadvāre tu kalpayet /
prāsādābhimukhābhāve dakṣiṇe caiva kalpayet

uttare vā muniśreṣṭha someśānāntare 'tha vā /
īśāne vāpyabhāve tu kalpayettaruṇālayam

rāṣṭravṛddhikaraṃ pūrve dhanadhānyasukhapradam /
grāmarāṣṭrasya vṛddhiḥ syāddakṣiṇe munisattama

brahmaṛddhikaraṃ some putrapautrasukhāvaham /
durbhikṣabhayanāśārthaṃ someśānāntare mune

īśāne tu bhavettasmin(ttacca?)grāmāyatanaṛddhikṛt /
prāsāde paścimadvāre bālasthānaṃ tu paścime

dakṣiṇādikramaṃ tasmin (?) sarvaṃ pūrvavadācaret /
mūlasthānasya deśaṃ ca gṛhītvā tadanantaram

prathamaṃ syānmuniśreṣṭha kalpayettaruṇālayam /
iṣṭakābhirmṛdā vāpi kārayecchāstracoditam

ṣaṭpañcasaptahastaṃ vā navahastamathāpi vā /
saṃjñātvā sādhakastasmin yajamānecchayā kuru (?)

garbhamānatribhāgaikaṃ dvāramāṃna praśasyate /
dvāravistāramānasya dviguṇaṃ tu tathocchritam

kūṭākāraṃ tu vā kuryāt maṇḍapākārameva vā /
kārayet bālagehaṃ tu ācāryaḥ śilpibhiḥ saha

ādyeṣṭakāvidhānādi kārayediha pūrvavat /
maṇḍapaṃ cāgrataḥ kṛtvā saprākāraṃ surakṣitam

garbhanyāsaṃ tu kuryācca ratnanyāsaṃ tu neṣyate /
pīṭhaṃ kṛtvā tu tanmadhye kāṣṭhairvā ceṣṭakai(?)stathā

mṛdā vā sudṛḍhaṃ snigdhaṃ kāṣṭhāsanasamanvitam /
ekahastocchritāṃ vediṃ sāṣṭapatraṃ sakarṇikam

kṛtvaivaṃ bālagehaṃ tu sādhakecchānurūpataḥ /
evaṃ kṛtvā vidhānena taruṇālayamuttamam