Viṣvaksenasaṃhitā · Chapter 8

iti śrīpāñcarātre viṣvaksenasaṃhitāyāṃ svapnavidhirnāma saptamo 'dhyāyaḥ ||
aṣṭamo 'dhyāyaḥ
aṣṭamo 'dhyāyaḥ
kṣīrābdheruttare pāre tapasyantaṃ hiraṇyamayam /
nārado vāhinīnāthaṃ viṣṇorlīlācale muniḥ

dṛṣṭvā praṇamya saṃpūjya viṣṇubhaktibalātkṛtaḥ /
papraccha bhagavān bhakteriva mūrtimavasthitam

pūrvaṃ tu paramātmādimūrtīnāṃ lakṣaṇaṃ tathā /
mantrāṇāṃ lakṣaṇaṃ caiva chandāṃsi ca ṛṣīṃstathā

evamādīni cānyāni sadmādīni yathākramam /
vaktumarhasi senāpa yadyanugrahabhāgaham

viṣvaksenaḥ---
śṛṇu devamuniśreṣṭha yat praṣṭu(pṛṣṭa?)makhilaṃ tvayā /
vakṣyāmyahamaśeṣeṇa kramādavahito bhava

śrutimūlamidaṃ tantraṃ pramāṇaṃ kalpasūtravat /
pramāṇamidamevaikamāgameṣvapyavasthitam

āyurārogyadaṃ nṝṇāṃ kīrtiśrīputra(ṣṭi?)vadhanam /
pāpakṣayaṃ mahāpuṇyaṃ yogasādhanameva ca

tasmāttatrottaraṃ bhāgaṃ nityamṛddhiśubhapradam /
ādyeṣṭakāvidhānādi sarvakāmapradaṃ sadā

athātaḥsaṃpravakṣyāmi iṣṭakālakṣṇaṃ param /
karṣaṇaṃ ca gavāṃ vāsaṃ(so?)bhūmiśuddhistathaiva ca

pūrvameva mayā proktaṃ(ktāḥ)tantre 'smin pūrvabhāgake /
aṅkurārpaṇapūrvaṃ tu pūrvarātre 'dhivāsayet

pūrvavanmaṇḍapaṃ kṛtvā gomayenānulepayet /
aṣṭadroṇasamāyuktaṃ śālibhiḥsamalaṃkṛtam

sādhitāḥ pūrvarātre tu catasraḥ prathameṣṭakāḥ /
śilāmayā mṛṇmayā vā kuryāllakṣaṇasaṃyutāḥ

śilā doṣavinirmuktāḥ vistāradviguṇāyatāḥ /
suvistāreṣṭakāḥ proktāḥ ṣaṭpañcacaturaṅgulāḥ

uttamādikramādetāḥ vistāradviguṇāyatāḥ /
vistārārdhadhanaṃ proktaṃ iṣṭakāstu pramāṇataḥ

pañcagavyena saṃprokṣya paristīrya kuśaistathā /
puṇyāhaṃ vācayitvā tu prokṣayecca kuśāmbhasā

haimaiḥ kautukasūtraṃ tu bandhayenmūlavidyayā /
vastraiḥ pratyekamācchādya tadagre sthāpayedbudhaḥ

kalaśān sthāpayet paścāt savastrān sāpidhānakān /
madhyukumbhaṃ ca sudṛḍhaṃ pañcaratnasamanvitam

mūlamantreṇa kumbhaṃ tu sādhayet sādhakottamaḥ /
vidyeśvarasamāyuktān pūrayet kalaśān kramāt

vārāhaṃ nārasiṃhaṃ ca śrīdharaṃ hayaśīrṣakam /
jāmadagnyaṃ ca rāmaṃ ca vāmanaṃ vāsudevakam

evaṃ vidyeśvarān proktān kramāt kumbheṣu pūjayet /
vārāhe muktakaṃ nyasya nārasiṃhe pravālakam

marakataṃ śrīdhare nyasya vaiḍūryaṃ hayaśīrṣake /
indranīlaṃ nya sedrāme māṇikyaṃ vāmanaiṛte

vāmane puṣyarāgaṃ ca śaṅkhaṃ vai vāsudevake /
eṣāmalābhe sauvarṇaṃ tadalābhe tu mauktikam

sakūrcaṃ sādhayedvidvān sarvālaṃkāraśobhitam /
prabhāte pūjayitvātha sthapatiṃ takṣakaiḥ saha

sthāpako mantrayogyastu sthapatiḥ karmayogyakaḥ /
sādhakaśceṣṭakāstatra snāpayenmūlavidyayā

tato gandhādinābhyarcya daivajñaṃ pūjayettataḥ /
ācāryaṃ pūjayettatra hemavastrāṅgulīyakaiḥ

takṣakaṃ pūjayitvātha iṣṭakādhānamārabhet /
dvārasya dakṣiṇe pārśve sthānametat pracakṣate

sumuhūrte nyasedvidvān iṣṭakāḥ paritaḥ kramāt /
vinyasecca caturdikṣu vāsudevādividyayā

paścācchilpinamalaṃkṛtya vastrahemāṅgulīyakaiḥ /
tenaiva saha saṃsthāpya iṣṭakāśca caturdiśi

teṣāṃ madhye tathā garte pūrayedudakena tu /
śubhaṃ vai dakṣiṇāvartaṃ vāmāvartamaśobhanam

vāmāvarte tathā kuryāt mūlena śatamāhutīḥ /
tadaiva navaratnāni vinyasedanupūrvaśaḥ

vajramauktikavaiḍūryaśaṅkhasphaṭikapuṣyakam /
candrakāntaṃ mahānīlaṃ māṇikyaṃ ca kramānnyaset

gajadante 'thavā śaṅkhe valmīke karkaṭālaye /
vṛṣaśṛṅge hrade nadyāṃ nīrthe vai parvate tathā

samudre ca mṛdaṃ gṛhya pūrayedavaṭaṃ tathā /
puṇyāhaṃ vācayitvā tu brāhmaṇānatha bhojayet

etadvimāne prathame sarvametadatandritaḥ /
maṇḍape ratnahīnaṃ syāt ratnahīnaṃ tu vaprake(?)

evaṃ kṛtaṃ cenmedhāvī(?) sarvasaṃpat samṛddhidam /
yadyevaṃ na kṛtaṃ cettat piśācādi samāviśet

kartuḥ kārayituścāpi mahān doṣo bhaviṣyati /
tasmāt sarvaprayatnena vidhānoktaṃ samācaret

yaḥ pūrvamārabhet karma takṣakaiḥ sthāpakaiḥ saha /
yajamānumatyā ca karṣaṇādi mahāmune

jīrṇasyoddharaṇaṃ vāpi citrādikamathāpi vā /
tenaiva kārayedvidvān nānyena tu kadācana

taikṣṇa(takṣṇā?)mānādi nirvṛttaṃ takṣṇaiva punaruddhṛtam (?) /
takṣaṇai(takṣake?)naiva kāryaṃ syāditi śāstrasya niścayaḥ

tasmāt sarvaprayatnena sthāpakaistakṣakairnyaset /
mohādvā yadi vā lobhāt sthāpakāttakṣakādṛte

yaḥ kārayīta kuryādvā rājarāṣṭraṃ vināśayet /
evaṃ parīkṣya bahudhā matimān sādhakottamaḥ

praśāntamānaso bhūtvā kurvītādyeṣṭakāvidhim /
prathameṣṭakāvasāne tu prāsādaṃ cārabhet kramāt