Viṣvaksenasaṃhitā · Chapter 7

iti śrīpāñcarātre viṣvaksenasaṃhitāyāṃ mṛtsaṃskāravidhirnāma ṣaṣṭho 'dhyāyaḥ
saptamo 'dhyāyaḥ
saptamo 'dhyāyaḥ viṣvaksenaḥ---
ataḥ paraṃ pravakṣyāmi svapnādhyāyaṃ śacīpate /
viviktena paraṃ guhyaṃ kramācchṛṇu śacīpate

svapnastu prathame yāme saṃvatsaravipākadaḥ /
dvitīye cāṣṭamāse tu tribhirmāsaistriyāmake

aruṇodayavedālāyāṃ daśāhena phalaṃ bhavet /
ata ūrdhvaṃ pravakṣyāmi puṇyāpuṇyaṃ tu vai śṛṇu

ārohaṇe govṛṣakuñjarāṇaṃ prāsādaśailāgravanaspatīnām /
viṣṭānulepo kathitaḥ svapneṣvagamyāgamanaṃ praśastam

yastu paśyati svapnānte rājānaṃ kuñjaraṃ hayam /
suvarṇaṃ vṛṣabhaṃ gāvaṃ(gāṃ vā?)kuṭumbaṃ tasya vardhate

kṣīriṇaṃ phalinaṃ vṛkṣaṃ ekākī yo 'dhirohati /
tatrastho yadi budhyeta dhanaṃ śīghramavāpnuyāt

prāsādastho 'pi yo bhuṅkte samudraṃ tarate tu yaḥ /
api dāsakule jātaḥ so 'pi rājā bhaviṣyati

dīpamannaṃ phalaṃ padmaṃ kanyāṃ chatraṃ dhvajaṃ tathā /
svapnānte yo labhenmantraṃ sa śriyaṃ yāyitaṃ dhruvam

mānuṣāṇi tu māṃsāni svapnānte yastu bhakṣayet /
haritāni supakvāni śṛṇu vakṣyāmi tatphalam

pādabhakṣe śataṃ lābhaḥ sahasraṃ bāhubhakṣaṇe /
rājyaṃ śatasahasraṃ vā śiraso bhakṣaṇe labhet

upānahau tu chatraṃ ca labdhvā yaḥ pratibudhyati /
asiṃvānirmalaṃ tīkṣṇaṃ tasyādhvānaṃ(?)vinirdiśet

nāvamārohayedyastu nadīścāpi samuttaret /
pravāsaṃ nirdiśettasya śīghraṃ ca punarāgamam

dantā yasya viśīryante svapnānte tu patanti vā /
dhanāni nāśayettasya pīḍā vāpi śarai raṇe

abhyañjate yastailena payasā tu ghṛtena vā /
snehena vā (yaḥ?)tathānyena vyādhiṃ tasya vinirdiśet

abhidravanti yaṃ svapne śṛṅgiṇo daṃṣṭriṇo 'pi vā /
vānaro vā varāho vā bhavedrājakulādbhayam

raktāmbaradharā nārī raktagandhānulepanā /
avagṛhṇanti(hṇāti?)yaṃ svapne brahmahatyāṃ vinirdiśet

śuklāmbaradharā nārī śuklagandhānulepanā /
avagṛhṇanti(hṇati?)yaṃ svapne tasya śrīḥ sarvatomukhī

ādityamaṇḍalaṃ svapne candraṃ vā yadi paśyati /
vyādhito mucyate rogādarogaḥ śriyamāpnuyāt

baḍabāṃ krakarīṃ krauñcīṃ labdhvā yaḥ pratibudhyati /
krośādāhṛtya labhate bhāryāṃ sa priyavādinīm

nigalairyastu mucyeta bāhupāśaistathaiva ca /
putro vā jāyate tatra pratiṣṭhāṃ vā vinirdiśet

yastu śvetena sarpeṇa daśyate dakṣiṇe śubhe(kare?) /
sahasraṃ labhate vittaṃ saṃpūrṇe daśame 'hani

antraistu veṣṭitaṃ svapne grāmaṃ nāgarameva vā /
grāme maṇḍalarājendro nagare vādhipo bhavet

rudhiraṃ pibati svapne surāṃ vāpi kadācana /
brāhmaṇo labhate vidyāmitaraśca(stu?)dhanaṃ labhet

kṣīraṃ ca pibati svapne saphenaṃ dohane gavām /
somapānaṃ bhavettasya ante ca kratumedinīm(?)

dadhi dṛṣṭvā bhavetprītiḥ godhūmaṃ ca dhanāgamaḥ /
yavairājyāgamaṃ vidyāt siddhārthakeṣu ca (tathā?)

yastu madhye taṭākasya bhuñjīta madhupāyasam /
niṣaṇṇaṃ padminīpatre taṃ vidyāddharaṇīpatim

liṅgamabhyarcya taṃ(tad?)dṛṣṭvā devānapi viśeṣataḥ /
vyavahāre jayastasya(jayaṃ caiva?)dhanaṃ ca vipulaṃ bhavet

puṣpite puṣpitaṃ vidyāt phalite buddhiruttamā /
dhūmāyantamapāyaṃ taṃ prajvalantaṃ śriyāvaham (?)

āsane śayane yāne śarīre vāhane gṛhe /
jvalamāne vibudhyeta tasya śrīḥ sarvatomukhī

devatāśca dvijā gāvaḥ pitaro liṅginastathā /
yadvadanti naraṃ svapne tattathaiva vinirdiśet

sarvāṇi śuklānyabhinanditāni kārpāsabhasmāsthisa(ka?)takravarjam /
sarvāṇi kṛṣṇāni na śobhanāni gohastidevadvijavājivarjam