Viṣvaksenasaṃhitā · Chapter 6

evaṃ saṃsthāpanaṃ proktaṃ saṃkṣepācchūlamuttamam (?) //
iti śrīpāñcarātre viṣvaksenasaṃhitāyāṃ śūlasthāpana- vidhirnāma pañcamo 'dhyāyaḥ ||
ṣaṣṭho 'dhyāyaḥ
ṣaṣṭho 'dhyāyaḥ viṣvaksenaḥ---
mṛtsaṃskāramatho vakṣye śṛṇuṣvaika manādhunā (!) /
pakvāpakve(kvā?)dvidhā proktā bhūsurādīnanukramāt

sarvalokā na śaṃsanti pratimāṃ dagdhamṛṇmayīm /
apakvā pratimā śastā saiva kāryā vicakṣaṇaiḥ

sudhayā naiva kuryādvā nāśmacūrṇaiḥ kadācana /
mṛdaiva mṛṇmayaṃ kuryāt yathāvarṇānurūpataḥ

brāhmaṇasya sitā mṛdvai kṣatriyasyāruṇā smṛtā /
viśāṃ pītā bhavenmṛdvai kṛṣṇā śūdrasya kīrtitā

mṛdaṃ varṇānupūrvyeṇa gṛhṇīyāt kṣetrasaṃbhavām /
dadhisarpiḥpayobhiśca atasīsnehasaṃyutaiḥ

śarkarā(rāṃ?)lohapāṣāṇaiḥ cūrṇaṃ kṛtvā tu pūrvaśaḥ /
samabhāgāni cūrṇāni mṛttikāyāṃ niyojayet

khādireṇa kaṣāyeṇa arjunena ca peṣayet /
śrīveṣṭakaṃ sajjarasaṃ kuṅkumaṃ koṣṭhameva ca

kunduruśca rasā hyete sarve sarvarasānvitāḥ /
nadīsaṅgamatīreṣu puṇyodyāneṣu vai punaḥ

ādāya mṛttikāṃ tatra snehacūrṇasamāyutām /
māsaṃ paryuṣitaṃ kṛtvā kārayet pratimāṃ tataḥ

trirātraṃ peṣitā(coṣitā?)sā tu śilāmayasamā bhavet /
mṛtsaṃskāraṃ mayā proktaṃ tenaiva pratimāṃ kramāt

kārayet sudṛḍhaṃ samyak śāstradṛṣṭyā ca śilpinā /
sāṅgopāṅgasamāyuktāṃ pratimāṃ sumanoramām

navāmbaraṃ tu susnigdhaṃ pratimopari veṣṭayet /
tasyopari likhet snigadhaṃ varṇānukramaṇena tu

atastatsaṃpravakṣyāmi varṇānukramaṇa kramāt /
śvetaṃ pītaṃ tathā raktaṃ haritaṃ kṛṣṇameva ca

pañcavarṇā ime proktāḥ pṛthivyādyadhidevatāḥ /
uttamā dhātujā proktā madhyamā vṛkṣasaṃbhavā

saṃyogajāvarā jñeyā trividho varṇasaṃgrahaḥ /
varṇaṃ cāpyanuvarṇaṃ ca saṃkaraṃ ca tathaiva ca

trividho varṇasaṃyogaḥ śāstre 'sminnucyate mayā /
varṇā ityucyate śuddhā rājavārtādinākarot(?)

anāka(kā?)reṣu ye varṇāḥ prāyaḥśuddhivivarjitāḥ /
anuvarṇā ime proktāḥ saṃkarān kathayāmyaham

śuklo raktaśca kṛṣṇaśca nīlaśceti caturvidhaḥ /
śaṅkhagokṣīravarṇābhaḥ śukla ityabhidhīyate

haritaścaiva pītaśca pītavarṇo dvidhā bhavet /
manaḥśilā harītālo haritaḥ saṃprakīrtitaḥ

haridrākuṅkumābhastu pīta ityabhidhīyate /
tatastu śyāmavarṇaśca kṛṣṇavarṇo dvidhā mataḥ

dūrvāmarakatābhastu indranīlanibho 'paraḥ /
śuklena miśrito rakto harirityabhisaṃjñitaḥ

śuklena miśritaḥ pīto gaura ityabhidhīyate /
raktena miśritamapi kapilaṃ paribhāśitam

śuklena miśritaḥ kṛṣṇo dhūmra ityabhisaṃjñitaḥ /
pītena miritaḥ kṛṣṇa kāla ityabhisaṃjñitaḥ

pītakṛṣṇayutaḥśuklo gaura ityabhidhīyate /
pītaraktayutaḥśuklaḥ karburaḥ samudāhṛtaḥ

pītakṛṣṇayuto varṇo harivarṇaḥ prakīrtitaḥ /
evaṃ saṃkarato varṇaḥ tatkālaṃ sthīyate dṛḍham

yannibhā kathitā mūrtiḥ tannibhaṃ varṇayojanam /
adṛṣṭadeśasaṃbhūtā madhyamā kālasaṃbhavā

evaṃ varṇavibhāgastu kramaśaḥ parikīrtitaḥ /
vāsudevaṃ saṃkarṣaṇaṃ pradyumnaṃ caniruddhakam

kalau yuge śacīnātha śyāmavarṇena kārayet /
tadbimbaṃ śubhadaṃ ṛddhiṃ(viddhi?)rājarāṣṭravivardhanam

tasmātsarvaprayatnena kalau śyāmena kāreyat /
anyathāśubhamāpnoti rājarāṣṭravināśakṛt