Viṣvaksenasaṃhitā · Chapter 38

iti śrīpāñcarātre viṣvaksenasaṃhitāyāṃ dīkṣāśakunavistāro nāma saptatriṃśo 'dhyāyaḥ ||
aṣṭatriṃśo 'dhyāyaḥ
viṣvaksenaḥ---
athātaḥ saṃpravakṣyāmi jalasaṃprokṣaṇaṃ param /
rahasyaṃ paramaṃ guhyaṃ sarvapāpapraṇāśanam

tava snehāt pravakṣyāmi tridaśerapi durlabham /
sadya eva tu kartavyaṃ prāyaścittaṃ tu nārada

na tithirna ca nakṣatraṃ kālavelā na vidyate /
duḥsthitaṃ susthitaṃ vāpi devabimbaṃ na cālayet

śilābimbaṃ tathā lauhaṃ bimbaṃ vā caikaberakam /
daivādvā mānuṣādvāpi mohādvā munisattama

cālayedyadi tadbimbaṃ prāyaścittaṃ viśeṣataḥ /
kārayenmuniśārdūla sarvasaṃpatsukhāvaham

prāsādakaraṇe kāle navakarmakṛte sati /
citrakarmakṛte vāpi citrakārādi saṃspṛśet

spṛśyate vā nikṛṣṭaistu devaścaṇḍālapātakaiḥ /
pīṭhe śvabhrasthite kāle calite pūrvavat kṛte

candanādīni puṣpāṇi tathā sarvauṣadhīni ca /
kuśapallavadūrvāśca pūrayitvā tadūrdhvataḥ

yojayet pañcagavyena prāṅmukhaḥ sakuśodakam /
arcayitvārghyagandhādyaiḥ sāṅmūlaṃ samuccaran

ācchādya navavastreṇa dadyādbhūtabaliṃ tataḥ /
devatāyatanagrāmanagareṣvapi pallike

sthāpanāspadamāsādya śodhanaṃ pañcagavyakaiḥ /
tatra madhye khanet śvabhraṃ mūlamantramudīrayan

aṅguṣṭhodaramāvartya tridhā sūtreṇa veṣṭayet /
tenaiva bhrāmayenmadhye sthāpya tatrāvaṭaṃ khanet

hastamātramadhastācca ṣaḍaṅgulasamanvitam /
saṃprokṣya pañcagavyena tatra ratnādikaṃ nyaset

śeṣaṃ dhyātvā tadūrdhve tu abhyarcyārghyādibhiḥ kramāt /
vāsasācchādya digbandhamācaredastramuccaran

saṃspṛśca gavyakumbhābhyāṃ dhyātvā mūlaṃ japedguruḥ /
prabhātāyāṃ tu śarvaryāṃ kṛtvā snānādikīṃ kriyām

kumbhasthaṃ nṛhariṃ pūjya japāntaṃ pūrvavartmanā /
puṇyāhavācanaṃ kṛtvā muhūrte śobhane guruḥ

padmapatrāva(vṛ?)tu kumbhaṃ śvabhre tāreṇa vinyaset /
paritaḥ sarvadhānyena pūrayitvā caśalaṃ (?) yathā

pañcagavyaṃ samuddhṛtya ghaṭasthaṃ kalaśaṃ laban(?) /
tenaiva pūrayet kumbhaṃ śvabhrasthaṃ mūlamuccaran

samabhyarcyārghyapuṣpādyaiḥ pūrayenmṛdbhirāhṛtaiḥ /
śaṃsūktaṃ bhadrasūktaṃ ca svastisūktaṃ ca pākkṛte(?)

etat sādhāraṇaṃ proktaṃ bahuberaikaberayoḥ /
sarvalakṣaṇasaṃpannamaṅgayuktaṃ dvijottamam

padavākyapramāṇajñaṃ devayajña vratasthitam /
evaṃ lakṣaṇasaṃyuktamācāryaṃ tantrapāragam

jñātvā tenaiva kartavyaṃ jalasaṃprokṣaṇaṃ śubham /
prāsādāgre munireṣṭha kuryānmaṇḍapamuttamam

dakṣiṇe 'pyathavā kuryāt uttare vā mahāmune /
aiśāne vātra matimān yathālābhaṃ sudikṣu ca

caturaśraṃ sukhaṃ samyak vistārāyāmatādṛśam(-taḥ samam?) /
karaṣoḍaśakaṃ vāpi hastaṃ pañcadaśaṃ tu vā

stambhaṣoḍaśasaṃyuktaṃ caturdvārasamanvitam /
iṣṭakādārupāṣāṇaiḥ kṛtāṃ samyaksuvedikām

hastamātrasamāyuktaṃ dhvajāśāmukhatoraṇam /
darbhamālāparivṛtaṃ puṣpamālyairalaṃkṛtam

phalapallavamālādyairdhūpadīpasamanvitam /
śālisaṃcayasaṃpūrṇaṃ prāgudakpravaṇaṃ śubham

vitānenordhvamācchādya nānāvastrairalaṃkṛtam /
chatracāmarasaṃyuktaṃ muktādāmai(!) ralaṃkṛtam

dhvajairnānārvidheścitrairdīpamālāvirājitam /
varṣavātairna cākrāntaṃ pālikābhiralaṃkṛtam

etasya maṇḍapasyāgra'pyattare vā yathākramam /
īśāne vā muniśreṣṭha kuryāt snapanamaṇḍapam

hastadvayapramāṇena visatārāyāmatādṛśam (-taḥ samam?) /
maṇḍapasyaiśapūrve tu snapanārthaṃ suvedikām

hastocchrayāṃ tadardhāṃ vā hyuttare śvabhrasaṃyutām /
dhārāyugvedikāṃ kuryāt paścime kalaśān nyaset

snapanaṃ kārayedevaṃ ekāśītikrameṇa tu /
ekaberavidhānaṃ cet mūlārcāyāṃ prayojayet

karmārcāyāṃ tu kartavyaṃ bahuberavidhau sati /
snapanaṃ vidhivat kṛtvā tataḥ karma samārabhet

pītavastraistu śuklairvā veṣṭayeddevapīṭhakam /
tato 'smin maṇḍape dvāri kalaśāṃstoraṇadhvajān

gandhapuṣpaiḥ samabhyarcya svanāmnaiva pṛthakpṛthak /
tato maṇḍapavedyāṃ ca nikṣipecchālisaṃcayam

śālimadhye likhet padmamaṣṭapatraṃ sakarṇikam /
sauvarṇaṃ rājataṃ vāpi tāmraṃ vā mṛṇmayaṃ tu vā

droṇadvayena saṃpūrṇaṃ nimnoṣaṃ (nirdeṣaṃ?) kalaśaṃ śubham /
vastrapūtajalaiḥ pūrṇaṃ sakūrcaṃ sāpidhānam

sasūtraṃ vastrayugmena veṣṭitaṃ ratnasaṃyutam /
aṣṭaśaktisamāyuktaṃ sauvarṇāyudhapañcayuk

tatkumbhaṃ praṇavenaiva śālipadme tu vinyaset /
tataḥ padmadaleṣvaṣṭakalaśān parito nyaset

pūrvavattoyasaṃpūrṇān sahiraṇyān savastrakān /
sāpidhānān sakūrcāṃśca mukhe cāśvatthapallavān

arcayedgandhapuṣpaiśca dīpairanyaiḥ pavitrakaiḥ /
pūjayenmūlamantreṇa tattanmūrtimanusmaran

viṣṇuṃ caiva mahāviṣṇuṃ sadāviṣṇuṃ ca madhyame /
vāsudevāniruddhāntaṃ(?)nyaset pūrvādidikṣu ca

nyasecchriyādiśāntyantamāgneyādividikṣu ca /
evaṃ nyasya vidhānena gandhapuṣpādibhiryajet

etānapi samabhyarcya homakarma samārabhet /
pūrvādi cottarāntaṃ tu kuṇḍāni parikalpayet

vāsudevaṃ yajet pūrvaṃ kuṇḍe tu caturaśrake /
ardhacandrāgnikuṇḍe tu yāmye saṃkarṣaṇaṃ yajet

vāruṇyāṃ vartule kuṇḍe pradyumnaṃ tu yajedbudhaḥ /
uttare 'bje trikoṇe vā aniruddhaṃ yajet prabhum

pālāśaṃ khādiraṃ vāpi bailvamaudumbaraṃ tathā /
aṣṭottaraśataṃ hutvā pṛthakpūrvāditaḥ kramāt

samidājyacarūn lājaiḥ juhuyurmūrtipāḥ pṛthak /
evaṃ homaṃ praśaṃsanti ekahomena cāpyalam

kārayeccaturaśre tu juhuyāttadvidhānataḥ /
vaiṣṇavīkaraṇārthāya kuṇḍaṃ pūrvavadācaret

tatkuṇḍe muniśārdūla ācāryo homamācaret /
samidājyena caruṇā juhuyāttu punaḥ punaḥ

samidho mūlamantreṇa praṇavenājyameva ca /
caruṃ puruṣasūktena pratyekaṃ ṣoḍaśāhutīḥ

evaṃ hutvā vidhānena punarājyena homayet /
pauruṣeṇa ca sūktena juhuyādviṣṇubhaktitaḥ

tato nārāyaṇaṃ sūkta sṛṣṭyādipratipādakam /
samyagjñātvā muniśreṣṭha kālyāṃ tu juhuyāt kramāt

pañcopaniṣadairmantraiḥ juhuyāttu punaḥ punaḥ /
pūrvavacchāntihomaṃ tu kārayecca vidhānataḥ

evaṃ hutvā muniśreṣṭha kautukaṃ bandhayeddharim /
pūrvoktena vidhānena pūjayeddhavirantakam

dvādaśākṣaramantreṇa mūrtimantreṇa caiva hi /
kṣaumasūtreṇa vā tatra kārpāsaṃ vā mahāmune

prokṣayenmūlamantreṇa tatsūtraṃ tu punaḥ punaḥ /
rātrau mahotsavaṃ kuryāt śaṅkhatūryādinisvanaiḥ

kautukaṃ samalaṃkṛtya taṇḍulopari nārada /
paścādgrāmaṃ paribhramya mahādīpasamūhayuk

bandhayet kautukaṃ paścāt pūrvoktena vidhānataḥ /
rātrau homaḥ prakartavyaḥ jalasaṃprokṣaṇaṃ divā

na kuryāt prokṣaṇaṃ rātrau na divā homamācaret /
tasmāt sarvaprayatnena rātrau homaṃ prakalpayet

prabhāte sumuhūrte tu jalasaṃprokṣaṇaṃ kramāt /
prokṣayettu vidhānena bimbādyāvaraṇāntikam

āvāhayettato devaṃ nārāyaṇamanāmayam /
śaṅkhacakradharaṃ devaṃ pītavāsasamacyutam

sarvābharaṇasaṃyuktaṃ vanamālāvirājitam /
rājāvartamaṇiprakhyaṃ hārakeyūrabhūṣitam

śrīvatsavakṣasaṃ cāru makarākṛtikuṇḍalam /
kambugrīvaṃ mahābāhuṃ kiñcitprahasitānanam

evaṃ dhyātvā mahāviṣṇuṃ garuḍopari saṃsthitam /
saha dvādaśabhiścaiva mūrtibhirdaśabhistathā

lokapālaistathādityai rudrairvasubhireva ca /
ṛṣibhiścāraṇaiḥ siddhaiḥ kiṃnarairapsaro gaṇaiḥ

evaṃ dhyātvā mahāviṣṇuṃ nārāyaṇamanāmayam /
tattanmantreṇa saṃsthāpya prokṣayedgandhavāriṇā

śeṣodakena matimān prokṣayet parivārakam /
praṇavādisvamantraistu parivārānaśeṣataḥ

pūrvādikalaśān gṛhya mahāpīṭhe 'bhiṣecayet /
tataḥ puruṣasūktena pūjayet puruṣottamam

havirnivedayet paścāt pūrvoktena vidhānataḥ /
caṇḍādibhyo baliṃ dadyāddikṣu caiva vidikṣu ca

balibimbasamāyuktaṃ balibhramaṇamācaret /
evaṃ baliṃ kramāt kuryāt śaṅkhatūryādisaṃyutam

pradakṣiṇaṃ tataḥ kuryāt praṇipatya kṣamāpayet /
ācāryadakṣiṇāṃ datvā brāhmaṇān bhojayettataḥ

hotṝṃścaiva susaṃpūjya ācāryaṃ pūjayet punaḥ /
hārakeyūrasaṃyuktaṃ kaṭisūtrāṅgulīyakaiḥ

vividhāni ca vastrāṇi ācāryāya nivedayet /
dakṣiṇāṃ cottamāṃ dadyāt gāṃ ca datvā payasvinīm

ardhaṃ vāpi dhanaṃ deyaṃ mūrtipānāṃ hitaiṣiṇām /
pādonaṃ sādhakānāṃ ca dīkṣitānāṃ tadardhakam

annadānaṃ ca sarveṣāṃ dadyāddevasamīpataḥ /
pavitrāropaṇepyevaṃ dakṣiṇāṃ dāpayenmune

iti samyak samākhyātaḥ jalasaṃprokṣaṇakramaḥ /
etadvicārya kartavyaṃ(?)pañcarātraviśāradaiḥ