Viṣvaksenasaṃhitā · Chapter 37

iti śrīpāñcarātre viṣvaksenasaṃhitāyāṃ [jīrṇoddhārādividhirnāma] ṣaṭtriṃśo 'dhyāyaḥ ||
saptatriṃśo 'dhyāyaḥ
nāradaḥ---
namaste 'stu jagannātha viṣṇupāriṣadeśvara /
viṣvaksena namaste 'stu namaste viśvakarmaṇe

tvatto 'dhītaṃ mayā tantraṃ pañcarātrārṇavāmṛtam /
dīkṣāśakunavistāro na tvayā kiñcidīritaḥ

tatsarvaṃ śrotumicchāmi prabrūhi bhagavan mama /
iti vijñāpito devo viṣvakseno mahātmanā

pratyuvāca mahajejāḥ praṇamya garuḍadhvajam /
viṣvaksenaḥ---
śruṇu nārada tattvena mahāvidyāṃ purātanīm

mayā pṛṣṭaḥ purā prāha mahāviṣṇurjaganmayaḥ /
sādhakānāṃ hitārthāya catuḥṣaṣṭiprabhedataḥ

śakunāni jagannāthaḥ tān sarvān prabravīmi te /
vighneśaḥ prathamaḥ prokto gāṅgeyo mūṣikādhvajaḥ

taṃ pūjayitvā vidhivat praṇamya prārthayen mune /
tasmin prasanne vighneśe sarvadevanamaskṛte

sarvārthasiddhirbhavati nātra kāryā vicāraṇā /
sa eva nāyakasteṣāṃ śakunānāṃ gaṇeśvaraḥ

tasmāt sarvaprayatnena pūjayedvighnanāyakam /
pūjākramaṃ pravakṣyāmi saṃkṣepeṇa mahāmune

āvāhayecchucau deśe sulipte suvicitrite /
svāsane darbhasaṃkīrṇe kusumairupaśobhite

gāyatryā cāsanaṃ dadyāt praṇamya gaṇanāyakam /
arghyaṃ pādyaṃ tathācāmaṃ madhuparkaṃ tathaiva ca

snānaṃ vastropavītaṃ ca bhūṣaṇaṃ gandhapuṣpakam /
dhūpadīpaṃ (-pau?) nivedyādi stotraṃ rajamukhaṃ smaran

kṛtvā pūjāṃ gaṇeśasya praṇamya prārthayet prabhum /
gāyatryā caiva tatsarvaṃ kuryāttantravicakṣaṇaḥ

evaṃ pūjya tataḥ paścāt gandhapuṣpādibhiḥ punaḥ /
pustakaṃ pūjajitvā tu yathāvadvijitendriyaḥ

ālikhet pustakaṃ sarvaṃ śakunāni yathākramam /
nāradaḥ--
kathaṃ deva nimittāni likhyate pustake naraiḥ

etadācakṣva bhagavan saṃśayo me mahānasau /
viṣvaksenaḥ---
evameva mayā pṛṣṭaḥ provāca bhagavān yathā

tathaivātra pravakṣyāmi śṛṇuṣva munipuṅgava /
vighnarāja (-jo?) mahārātiḥ mahiṣaḥ śukapītakaḥ

kabandhaṃ na nadī caiva bṛhajjālī tathaiva ca /
puruṣaśca mṛgaścaiva mārjāro devagaustathā

devāgāro rathaścaiva jvaraḥ kalpadrumastathā /
vyāghraprāsādarakṣāṃsita mṛgo grāhastathaiva ca

makaro vṛścikaścaiva puṣkalā(-rā?)vartakastathā /
matsyayugmaṃ ca śyenaṃ ca śrīvṛkṣe ca sarasvatī

vānaraṃ ca (-raśca?) mahācakraṃ vṛkaśaṅkhakapiñjalāḥ /
aṅkuśaṃ lokamātaṅga ṛkṣāśvaṃ rājahaṃsakam

dhūmacāmarasiṃhāśca pūrṇariktaghaṭau kramāt /
padminīkākacandrāśca dhvajaśūlau ca darpaṇam

nagno dīpaśca vidhavā maṅgalāpitṛbhūstathā /
kūrmaḥ kālīmahādurgār(-ge?)sarparājajaradgavau

nṛpabrahmaharīśān vai ete śakunasūcakāḥ /
ekaikasya bhavecchākhā eka eva prakīrtitaḥ

tān sarvān kramaśo vakṣye yathāvattān nibodha me /
vighneśamāditastatra tataḥ ślokaṃ pravakṣyate

vighneśo dṛśyate yatra sādhakendreṇa dhīmatā /
prārthitasya tu tāṃ siddhiṃ tacchiṣyāyādiśedguruḥ

śatrunāśaṃ tathaivāgraṃ rājapūjā ca dṛśyate /
dhanalābhor'thalābhaśca abhayaṃ ca bhaviṣyati

kāyakleśaṃ tathā rogaṃ sarvatra bhayameva ca /
dṛśyate yatra mahiṣaṃ tatra vyādhirbhaviṣyati

vidyāsukhaṃ mahājyotirdṛśyate śukapītakam /
āyuśca labhate yasmāt bandhūnāṃ ca sukhaṃ bhavet

lambānanaṃ (kabandhaṃ tu ?) yathādṛṣṭaṃ viyogaṃ bandhubhiḥ saha /
yujyate bhayamanyupagraṃ piśāyebhyastathaiva ca

dṛśyate yatra kāverī vipadaṃ ca vinaśyati /
sukhaṃ bhavati sarvatra bahuvrīhirbhaviṣyati

vṛddhirbhavati sasyānāṃ rājā ca vijayī bhavet /
āyurārogyadaṃ nṝṇāṃ roganāśo bhaviṣyati

dṛśyate tu bṛhajjālī mukharogaṃ vinirdiśet /
kṛṣṇakuṣṭhaśarīre(?)tu gṛhanāśamathāpi vā

puruṣaśca (-ṣe ca ?) mṛge dṛṣṭe brahmavarcastapoyutaḥ(?) /
abhipretārthasiddhiṃ ca śubhaṃ caiva vinirdiśet

mārjārā yatra dṛśyante bandhunāśaṃ viyogitā /
dadhikṣīraghṛtādīnāṃ nāśo bhavati nānyathā

devagaurdṛśyate yatra śatrubhyo bhayamādiśet /
sahavāsaṃ ca putrāṇāṃ mātṝṇāṃ ca vināśanam (?)

devālaye 'tha dṛṣṭe vai vidyāvṛddhistathā bhavet /
putralābhor'thalābhaśca bhaviṣyati na saṃśayaḥ

vimānaṃ dṛśyate yatra rājyalābho nṛpasya tu /
śudrabrāhmaṇavaiśyānāṃ lābhaḥ sarvo bhaviṣyati

jvare dṛṣṭe jvaraṃ brūyādaṅgahāniḥ kṣudhārtatā /
hṛttāpa arthanāśaśca bhaviṣyati na saṃśayaḥ

kalpadrume 'tha dṛṣṭe vai rājyena sadṛśaṃ sukham /
brāhmaṇasya śriyaṃ brūyādīpsitārthaṃ bhaviṣyati

vyāghre dṛṣṭe bhayaṃ ghoraṃ gavādīnāṃ vinirdiśet /
rājato bhayamatyugraṃ puruṣasya na saṃśayaḥ

prāsādo dṛśyate yatra putrapautraiḥ sukhī bhavet /
dhanadhānyasamṛddhiśca bhavettatra na saṃśayaḥ

niśācare ca vai dṛṣṭe ghoraṃ nṝṇāṃ bhayaṃ bhavet /
brāhmaṇānāṃ gavāṃ caiva vadhaṃ brūyurasaṃśayaḥ

kṛśṇe mṛge 'tha dṛṣṭe vai yajñakalyāṇamādiśet /
rāṣṭraśānti kuṭumbasya kīrtiṃ vātha vinirdiśet

śiṃśumāre 'tha dṛṣṭe vai maraṇaṃ ca bhayāvaham /
ajagomahiṣādīnāṃ vyādhiṃ cārtiṃ vinirdiśet

makare dṛśyamāne tu strībhogaṃ labhate dhruvam /
ārogayamannalābhaśca labhate nātra saṃśayaḥ

vṛściko dṛśyate yatra viṣeṇa maraṇaṃ bhavet /
hṛttāpamātmapīḍā ca bhāryākalahameva ca

puṣkalā(-rā?)vartake dṛṣṭe mahadvṛddhirbhaviṣyati /
vṛddhirbhavati sasyānāṃ subhikṣaṃ kṣetrameva ca

kīrtiṃ vṛddhiṃ jayaṃ caiva vindate paramaṃ sukham /
balavṛddhiṃ subhikṣaṃ ca matsyayugmaṃ vinirdiśet

śyenastu dṛśte yatra śastreṇa maraṇaṃ bhavet /
palāyanaṃ kuṭumbasya śatrubhirbhayamādiśet

nidhanaṃ labhate sastu (yastu ?) sadā lābhavinirgagatam /
puṣkalaṃ dhanadhānyaṃ ca vaṃśavṛddhirbhaviṣyati

kṛkalāso bhavedyatra brāhmaṇaiśca viruddhyate /
varṇasya saṃkaraṃ brūyāt tvagdoṣaṃ ca vinirdiśet

śrutalābhaṃ ca vā vṛddhiṃ kīrtilābhaṃ ca śāśvatam /
vyavahāre jayaṃ caiva sarasvatyāṃ vinirdiśet

kuṭumbasya ca daurbalyaṃ varṇasaṃkarameva ca /
vānaro dṛśyate yatra mṛgebhyo bhayameva ca

cakre tu vijayaṃ nityaṃ rājyalābhamavāpsyati /
vyādhidurbhikṣanāśaṃ ca śatrunāśaṃ vinirdiśet

taskarebhyo bhayaṃ nityaṃ vṛke dṛṣṭe na saṃśayaḥ /
kṣutpīḍāṃ rājapīḍāṃ ca rāṣṭrasya ca vinirdiśet

bhayanāśaṃ śrinayaṃ caiva puṣkalārthaṃ tathaiva ca /
strīlābhaṃ vastralābhaṃ ca pāñcajanye vinirdiśet

piṅgalā(?) dṛśyate yatra śatrubhirmaraṇaṃ bhavet /
rāṣṭrasya kalahaṃ brūyāt viṣaṃ bhavati nānyathā

hastilābhastathā rājño aṅkuśe tu vinirdiśet /
samare vijayaṃ teṣāṃ puṣkalārthaṃ vinirdiśet

varāho dṛśyate yatra sasyanāśaṃ vinirdiśet /
śastrakṣayaṃ punaḥ paśyet arthanāśaṃ bhayaṃ tu vā

putralābhaṃ śriyaṃ caiva rājyalābhaṃ tathaiva ca /
sphuṭamairāvate dṛṣṭe rājyalābhaṃ tu nirdiśet

ṛkṣarāje 'tha vai dṛṣṭe kṣetranāśo bhaveddhruvam /
sthānanāśo bhavettatra śatruvṛddhiṃ ca nirdiśet

grāme śāntirmanastuṣṭirmaṅgalāyatanaṃ bhavet /
āyurārogyamaiśvaryamarthe(-śve?)na tu vinirdiśet

rājahaṃso (-se?) bhavennityaṃ rājyalābho jayāya tu /
āyuraiśvaryavṛddhiśca puṣkalākīrtireva ca

dhūme bandhuvināśaśca vidyutā maraṇaṃ bhavet /
niṣādebhyo bhayaṃ caiva vaidhavyaṃ ca bhaviṣyati

cāmare caiva dṛṣṭe tu grāmanāśo bhaviṣyati /
anāvṛṣṭiśca rājyasya ativṛṣṭirathāpi vā

siṃhe dṛṣṭe bhaveccaiva arthalābhaṃ ca nirdiśet /
sadvṛddhiṃ sarvajantūnāṃ putrapautravivardhanam

putrapautravivṛddhiṃ ca puṣkalāṃ śriyamāpnuyāt /
pūrṇakumbhe tu vai dṛṣṭe puruṣāṇāṃ na saṃśayaḥ

śatrūṇāṃ vṛddhisaṃyuktaṃ dhanadhānyavināśanam /
riktakumbhe tu vai dṛṣṭe bhavatyeva na saṃśayaḥ

dhanalābhaṃ tathāvāptiḥ(?) putralābhastathaiva ca /
labhate sarvalābhaṃ ca puṣkariṇyāḥ pradarśane

cintitārthā vinaśyanti āyuraiśvaryanāśanam /
yasmin kāle tu saṃpaśyet duṣṭakākaṃ sudurmanāḥ

śatrukṣayaṃ dhanāvāptiṃ samare vijayaṃ tathā /
āyurārogyasaṃprāptiṃ pūrṇacandrasya darśanāt

vijayaṃ śatrunāśaśca dhanadhānyasukhāvaham /
āyurārogyadaṃ nṝṇāṃ uttamadhvajadarśanāt

śatruvṛddhiṃ dhanacchedaṃ sarogaṃ sasyanāśanam /
saṃpaśyan śūlarājānaṃ nātra kāryā vicāraṇā

ārogśyaṃ balamaiśvaryaṃ kīrtiṃ vidyādhanāgamam /
labhate nāsti sandeho darpaṇasya ca darśanāt

lābhahāniryaśo hānirāyurhānistathaiva ca /
sarvahānirbhavatyeva nagnasyaiva ca darśanāt

cittārthaṃ labhate tatra śubhaṃ vāpyaśubhaṃ tu vā /
śatrukṣayaṃ ca bhavati pradīpaṃ yastu paśyati

arthahānirmanastāpaḥ gṛhe duścaritaṃ bhavet /
vidhavādarśanaṃ yasya bhavatyatra na saṃśayaḥ

arthalābho manastuṣṭiḥ gṛhe saṃpadbhaviṣyati /
cintitārthaṃ labhettatra sumaṅgalyāḥ pradarśane

śmaśānaṃ dṛśyate yatra grāmanāśaṃ dhanakṣayam /
bandhudevaviyogaṃ ca sarvate bhayameva vā

abhayaṃ sarvatattveṣu kūrmarāpajapradarśanāt /
rājyaṃ śriyaṃ ca saṃprāpya kṣemārogyayuto bhavet

śatruvṛddhirdhanacchedaḥ vyādhirdurbhikṣavardhanam /
cintitaṃ naśyate(!) tatra mahākālīpradarśanāt

vijayaṃ cārthalābhaṃ ca kīrtiśrīvardhanaṃ tathā /
putrapautravivṛddhiśca durge dṛṣṭe na saṃśayaḥ

vyādhiṃ pravāsaṃ maraṇaṃ vipatsyati na saṃśayaḥ /
pañcāsyapannagaṃ paśyet pāpibhiścābhibhūyate

vyādhināśo(?) mahadduḥkhaṃ kuṭumbasya vināśanam /
ālokite mahāpāpe gardabhe syānna saṃśayaḥ

jaradgavaṃ prapaśyetā narāḥ śokārṇavaṃ punaḥ /
vrajanti vyādhinā pīḍā kalahaṃ ca gṛhe bhavet

cakravartinamāyāntaṃ avalokya janādhipam /
śriyaṃ prāpnoti putrāṃśca puṣṭiṃ ca labhate naraḥ

caturmukhaṃ samālokya brahmāṇaṃ kamalāsanam /
sarvādhipatyamāpne vaṃśavṛddhiśca jāyate

viṣṇumālokya deveśaṃ śaṅkhacakragadādharam /
sarvādhipatyamāsthāya sthitiṃ ca labhate naraḥ

rudramālokya bhūteśaṃ śūlapāṇimumāpatim /
śatrusainyaṃ mahajjitvā modate saha bandhubhiḥ

ete ślokā mayoddiṣṭāḥ śakunānāṃ viśeṣataḥ /
etāṃstu pustake likhya vivekaṃ sumanoramam

ekapatre tathaikaikaṃ ślokaṃ saṃlikhya vāgyataḥ /
sūtreṇa sūtrayitvā tu puṣpādibhirathārcayet

anujñāpya tato devaṃ vighneśaṃ gaṇanāyakam /
ānīya tu tataḥ śiṣyān baddhanetrān yathākramam

teṣāṃ haste tu puṣpāṇi nidhāya ca samāhitaḥ /
ādāya pustakaṃ paścāt praṇavena samāhitaḥ

śiṣyahaste nidhāyātha namaskṛtvā prasādya ca /
prārthayecca sa tenātha vighnarājāgnisaṃbhavam

namaste 'stu jagannātha lambodara gajānana /
saṃśaye 'smin mahābāho saṃtyaṃ saṃdarśayasva naḥ

satyaṃ hi bhavatāmāhuḥ manuyastattvadarśinaḥ /
iti vijñāpya deveśaṃ śiṣyaṃ brūyāttataḥ param

visraṃsayitvā sūtraṃ tu patraṃ gṛhṇīṣva pustake /
ityuktastu tataḥ śiṣyaḥ srasayitvā tu sūtrakam

gṛhṇīyāt patramekaṃ tu hastaprāptaṃ yadṛcchayā /
ācāryastu tato tetrabandhanaṃ pravimucya ca

dehi patramiti bruyāt śiṣyaṃ prati samāhitaḥ /
śiṣyastu patraṃ dadyācca guruhaste mahāmune

gurustu vācayet patramasaṃmūḍhena cetasā /
taduktaṃ vidhivajjñātvā śubhaṃ vā yadi vāśubham

tataḥ śiṣyaṃ pratibrūyādyathoktaṃ sarvameva tu /
pratiśiṣyaṃ tathā kṛtvā jñātvā karma śubhāśubham

dīkṣayecchiṣyamācāryastatparaṃ lakṣaṇānvitam /
etat pustakamādāya sūtrayitvā vicakṣaṇaḥ

anyeṣāmapi bhaktānāmanena vidhinā punaḥ /
pūjayitvā gaṇeśaṃ tu pustakaṃ ca yathākramam

śubhāśubhavidhiṃ prājñaḥ prabrūyāddeśikottamaḥ /
na nāstikānāṃ saṃpaśyet nābhaktānāṃ kadācana

na nindakānāṃ sarveṣāṃ anācārajuṣāmapi /
durvṛttānāṃ ca sarveṣāṃ bāhyadīkṣājuṣāmapi

asaṃbhāṣyeṇa paśyecca na vijñāte kadācana /
śiṣyāṇāṃ vanitānāṃ tu bhaktānāmapi sarvadā

saṃśayāviṣṭacetānāṃ kṛpaṇānāṃ gurau sadā /
ajihmakānāṃ bhaktānāṃ deyametadyathātatham

anuktaguṇayuktānāṃ yadi paśyettu (dadyāttu?) deśikaḥ /
devatāśca prakupyante(!) na tathyaṃ ca bhaviṣyati

iti vijñāya sarvaṃ tu prapaśyecchakunāni tu /
śakunānte tato vighnanāyakaṃ pūjayet kramāt

pustakaṃ pūjayet paścāt gandhapuṣpādibhiḥ punaḥ /
ācāryaṃ pūjayet paścāt sarvasvaṃ vādharmeva vā

yathāvittānusāreṇa(!) pūjayedgurupūjanam /
udvāsayettato devamākāśe gaṇanāyakam