Viṣvaksenasaṃhitā · Chapter 39

iti śrīpāñcarātre viṣvaksenasaṃhitāyāṃ pīṭhacalanādinimitta- prokṣaṇavidhirnāmāṣṭatriṃśo 'dhyāyaḥ ||
ekonacatvāriṃśo 'dhyāyaḥ
viṣvaksenaḥ---
ataḥ paraṃ pravakṣyāmi prāyaścittavidhiṃ param /
pūjanādiṣu sarvāsu kriyāsu munisattama

prātaḥ sandhyārcanāhīne madhyāhne dviguṇaṃ caret /
prātarmadhyāhnayorhīne sāyāhne triguṇaṃ caret

ekāhamarcanāhīne upavāsavrataṃ caret /
kalaśairnavabhiḥ snāpya pūrvoktena vidhānataḥ

puṇyāhaṃ vācayettatra bhojyā vai brāhmaṇāstrayaḥ /
arcayitvā yathānyāyaṃ pūrvoktena vidhānataḥ

dvitīye dviguṇaṃ caiva tṛtīye triguṇaṃ caret /
evameva tu kartavyaṃ dvādaśāhāntameva ca

pakṣahīnaṃ bhavettasmin snāpayedadhamottamam /
brāhmaṇān bhojayettatra viprān dvādaśaṃ pāyasaiḥ

māsahīnaṃ bhavettatra vāstuhomena saṃyutam /
adhamottamamārgeṇa snapanaṃ kārayeddhareḥ

puṇyāhaṃ vācayettatra pūjayet pūrvavat kramāt /
brāhmaṇān bhojayettatra śiṣṭān pañcadaśādhikān

etat krameṇa kṛtvā tu trimāsāntaṃ viśeṣataḥ /
trimāsādīni ṣaṇmāsādarvāk pūjāvilopane

saṃmārjyāntarbahirgehaṃ prakṣālya vidhivattadā /
dhūpayitvāgarudhūpena puṇyāhaṃ tatra kārayet

uttamottamamārgaṃ vā hyekāśītikrameṇa vā /
snāpayeddevadeveśaṃ yathāvittānusārataḥ(!)

brāhmaṇān bhojapettatra pūrvavaddhomamācaret /
mahāhavirnivedyātha pūjayet puruṣottamam

tataḥ paraṃ trivarṣāt prāk snapaṃna cottamottamam /
snāpayenmuniśārdūla pūrvoktena vidhānataḥ

brāhmaṇān bhojayettatra yathāvittānusārataḥ(!) /
tadūrdhvaṃ dvādaśādarvāk prāyaścittaṃ vidhīyate

praṇavena nirīkṣyātha garbhagehaṃ tu sādhakaḥ /
pañcagavyaṃ kramāt kṛtvā garbhāgāraṃ vidhodhayet

uttamottamamārgaṃ vāpyathavā madhyamaṃ tu vā /
snāpayeddevadeveśaṃ yathāvibhavavistaram

brāhmaṇān bhojayettatra yathāvittānusārataḥ(!) /
śāntihomaṃ krāmat kṛtvā pūrvavat pūjayetaddharim

ata ūrdhvaṃ muniśreṣṭha prāyaścitaṃ vidhīyate /
jalasaṃprokṣaṇaṃ kuryāt puṇyāhoktipuraḥsaram

brāhmaṇān bhojayettatra tena śāntirbhaviṣyati /
pūjāṅgadravyahīnaṃ cet arghyādihavirantakam

hīnairdravyaistu deveśamarcayeddviguṇaṃ punaḥ /
aṣṭākṣareṇa mantreṇa devāgre tu śataṃ japet

taddoṣaparihārārthaṃ prāyaścittamidaṃ bhavet /
prāyaścittaṃ kramāt kuryāt taddravyeṇa dine dine

etat saṃkṣepataḥ proktaṃ pūjālope tu nārada /
ālaye patite tatra bālasthānaṃ tu kārayet

deveśaṃ vidhivat sthāpya pūjayettu dine dine /
ālayaṃ pūrvavat kṛtvā prokṣaṇaṃ kārayettataḥ

bhinnālaye tu tatsthāne śailaṃ vā dāru yojayet /
iṣṭakāsudhayāyuktaṃ navakarmāṇi kārayet

citrābhāsālaye tatra citrakarma samācaret /
snapanaṃ tatra kurvīta mūrtihomaṃ ca kārayet

brāhmaṇān viṣṇubhaktāścaṃ bhojanaṃ kārayettataḥ /
mahāhavirnivedyātha pūjayet puruṣottamam

dahane tu pravakṣyāmi prāyaścittavidhikramam /
prāsādaṃ maṇḍapaṃ vātha prākāraṃ gopuraṃ tathā

prāsādābhyantaraṃ vāpi pacanālayameva vā /
vinodamaṇḍapaṃ caiva yāgamaṇḍapameva vā

puṣpasthāne jalasthāne cānyasminnitareṣu ca /
pramādādagnidagdhaṃ cet samyagutpādya pūrvavat

snapanaṃ tu trirātrāt prāk kārayedadhamottamam /
brāhmaṇān bhojayettatra puṇyāhaṃ caiva kārayet

nārāyaṇopaniṣadaṃ paṭhettantrottarakramāt(?) /
aṣṭākṣareṇa juhuyādājyena śatamāhutīḥ

yadi dagdhaṃ vimānaṃ cet kevalaṃ(-lā?)pratimā punaḥ /
dagdhasya caikadeśaṃ cet samyagutpādya pūrvavat

snapanaṃ cottamaṃ kuryāt adhamottamameva vā /
snāpayeddevadeveśaṃ pūjayet pūrvavat kramāt

vimānaṃ bahudagdhaṃ cet bālasthānaṃ prakalpayet /
navagehaṃ kramāt kṛtvā śeṣakarmāṇi kārayet

nāradaḥ---
ukto me bhavatā doṣaḥ sthānasya tu viśeṣataḥ /
atyadbhutānāṃ sarveṣāṃ doṣānme brūhyaśeṣataḥ

ālaye devadevasya ye doṣāḥ prabhavanti vai /
haviṣāṃ caiva ye doṣāḥ tathopakaraṇeṣu ca

viṣvaksenaḥ---
sādhu pṛṣṭaṃ tvayā deva vaktavyaṃ ca mayādhunā /
ālaye devadevasya ye doṣāstān bravīmi te

valmīkadarśane caiva tathā sarpasya darśane /
anyeṣāṃ caiva jantūnāṃ saviṣāṇāṃ munīśvara

madhupralambane caiva buddhipūrvāgnipātane /
vaidyudaśanipāte ca ulkāpāte tathaiva ca

pramādāt pratimā vāpi dvidhā caiva bhevadyadi /
ulūkavāsane caiva vṛkṣāṇāṃ ca samudbhave

vimānasya ca bhede ca sarveṣāṃ ca vināśakṛt(?) /
keśakīṭādipāte ca jalajānāṃ nipātane

anyeṣāṃ caiva jantūnāṃ vinipāte haviḥṣu ca /
garbhāgāre tathā viṣṇoḥ upahāre tathaiva ca

maṇḍape devadevasya prathamāvaraṇe 'thavā /
dvitīye vā tṛtīye vā balipīṭheṣu sarvaśaḥ

agnisthāne jalasthāne puṣpasthāne tathaiva ca /
āsthānamaṇḍape caiva tathālaṃkāramaṇḍape

līlāsthāneṣu cānyeṣu gavāṃ sthāne tathaiva ca /
śithilīnāṃ samudbhāve doṣān vakṣye munīśvara

valmīkadarśane vyādhiḥ mṛtyuḥ sarpasya darśane /
anāvṛṣṭirmadhoścaiva durbhikṣamitareṣvapi

śithilī(śilīndhra?) darśane caiva pratimāyāṃ hareryadi /
rājā mṛtyumavāpnoti rājyabhraṃśamathāpi vā

vyādhiṃ vā mahādāpnoti śatrubhirvā parābhavam /
putradāraviyogaṃ vā labhate nātra saṃśayaḥ

grāmāṇāṃ nagarāṇāṃ ca deśasya ca balasya ca /
vināśamāpnuyāt samyak sadyo vā syādupalpavaḥ

pīṭhe garbhagṛhe caiva upahāre tathaiva ca /
amātyamantriṇāṃ doṣāḥ prakṛtīnāṃ tathaiva ca

sthānāntareṣu sarvatra śithilīnāṃ tu darśane /
rāṣṭre doṣā bhaviṣyanti dubhikṣavyādhisaṃbhavāḥ

śunai(śvabhir?)vā vānarairvāpi gṛdhraiśca kṛmikīṭakaiḥ /
piṅgalairvāyasaiścaiva pakṣibhiḥ kukkuṭādibhiḥ

tathānyaistādṛśairbhūtaiḥ pratimā spṛśyate yadi /
sthānanāśamavāpnoti grāmasyānarthameva ca

prāyaścittaṃ pravakṣyāmi valmīkādeśca darśane /
tadapi pratimāyāṃ cedyātrāṃ kṛtvā yathāvidhi

taddeśaṃ śodhayitvā tu yāvatsamyagbhaveddṛḍham /
pūrvavat kalpayitvā tu punaḥsaṃsthāpayet kramāt

jalasaṃprokṣaṇaṃ vāpi kuryānmantrīṃ vicakṣaṇaḥ /
dūṣitaṃ cetaradbimbaṃ jantubhiḥ sparśane sati

mārjayitvā kuśairdarbhaiḥ puṇyāhaṃ tatra kārayet /
snapanaṃ kārayet paścāt karmārcāyāṃ yathāvidhi

juhuyāt pañcamantraistu pratyekaṃ śatamāhutīḥ /
tataśca śithilījāte pīṭhe garbhagṛhepi vā

śodhayitvā tu taṃ deśaṃ dṛḍhīkṛtya prayatnataḥ /
snapanaṃ vidhivat kṛtvā caikāśītikrameṇa tu

śāntihomaṃ tataḥ kṛtvā puṇyāhenaiva śuddhyati /
vimāne madhunotpanne prākāre 'bhyantare 'pi vā

prakṣālya pañcagavyena bahirantaḥ samantataḥ /
snapanaṃ cāpi kṛtvā tu puṇyāhenaiva śuddhyati

anuktānāṃ tu sarveṣāṃ prāyaścitaṃ vidhīyate /
uttamaṃ madhyamaṃ vāpi adhamottamameva vā

snāpayeddevadeveśaṃ pūjayedvidhipūrvakam /
śāntihomaṃ tataḥ kṛtvā puṇyāhenaiva śuddhyati

nṛttagītaṃ ca vādyaṃ ca kārayeddevasannidhau /
tadante pūjayitvā tu japenmūrtiṃ yathākramam

brāhmaṇāna bhojayitvā tu vaiṣṇavāṃśca viśeṣataḥ /
alaṃkāravidhiṃ kṛtvā naivedyaṃ ca mahāhaviḥ

nityadīpavināśe tu prāyaścittaṃ vidhīyate /
kapilājyaṃ śarāve tu sthāpayitvāstramantrataḥ

dīpayitvā muniśreṣṭha dīpamudrāṃ pradarśayet /
nityāgnau samidājyena caruṇā hūyate pṛthak

śataṃ vāpi tadardhaṃ vā tasyārdhaṃ vāhutīḥ kramāt /
kārayenmūrtimantreṇa pratyekaṃ juhuyāt kramāt

havirādyeṣa sarveṣu keśakīṭādipātane /
evameva tu kartavyaṃ prāyaścittaṃ tu nārada

śuddhasnānaṃ purā kṛtvā tadbimbaṃ parameṣṭhinā /
adhamottamamārgeṇa snapanaṃ kārayet kramāt

pañcopaniṣadairmantraiḥ pratyekaṃ śatamāhutīḥ /
puṇyāhaṃ vācayitvā tu tena śāntirbhaviṣyati

deveśaṃ pūjayet paścāt pūrvoktena vidhānataḥ /
ācāryaṃ pūjayet paścāt yathā tuṣṭo bhaviṣyati

ihopayuktadravyāṇi ācāryāya nivedayet /
prāyaścittaṃ pravakṣyāmi maraṇe devatālaye

caṇḍālapatitādīnāṃ maraṇe vartite sati /
garbhāgāre 'thavā cārdhamaṇḍape vā munīśvara

prāsādasthitapīṭhāgre tathābhyantaramaṇḍape /
khātvā caiva dhanurmātraṃ taṃ deśamaśilā tu cet

saṃpūrya saikatairmṛdbhiḥ kṣālayitvā tu vāriṇā /
ālayaṃ pañcagavyena bahirantaśca śodhayet

samidājyena caruṇā pratyekaṃ tu sahasrakam /
aṣṭadikṣu yathānyāyaṃ juhuyānmūlamantrataḥ

brāhmaṇān bhojayet paścāt prāsādasya samantataḥ /
puṇyāhaṃ vācayettatra kārayedadhamottamam

snāpeyadvidhivat samyagyathāvittānusārataḥ(!) /
etadardhaṃ tu śūdrasya maraṇe kārayedbudhaḥ

tadardhaṃ tu dvijātīnāṃ maraṇe devatālaye /
maṇḍape gopure teṣāṃ maraṇe vartite sati

bhūśuddhiṃ pūrvavat kṛtvā puṇyāhaṃ caiva kārayet /
homamekaṃ tu kartavyamālayasyottare budhaḥ

śilāmayaṃ cettadgehaṃ garbhāgārādi nārada /
kapilāgomayaṃ grāhyaṃ mūlamantreṇa mantravit

garbhāgārādi sarvatra vāyumantreṇa lepayet /
saṃprokṣya pañcagavyena śeṣa pūrvavadācaret

bhūgupte cāgnidagdhe ca jalāviṣṭe nirāspade /
mantreśaṃ(-śe?)ciralupte ca punaḥ sthāpanamācaret

tasmādūrdhvaṃ tu vidhivat bimbasthāpanamārabhet /
aṅgahīnasya berasya aṅgahīnaṃ (?)bhavedyadi

suvarṇena tadaṅgaṃ tu kṛtvā sandhāpayeddaḍham /
evaṃ kṛtvā vidhānena punaḥ sthāpanamārabhet

jalavāsavidhānena pūrvavaccheṣamācaret /
athavātra muniśreṣṭha jalasaṃprokṣaṇa tu vā

kārayeddevadevasya tena śāntirbhaviṣyati /
santyājyaṃ dārujaṃ bimbaṃ sandheyaṃ mṛṇmayaṃ bhavet

chinne bhinne tathā vaktre mūlārcāyāṃ pramādataḥ /
kalpayitvā tu deveśe bālasthānakrameṇa tu

yuktyā yuktiviśeṣeṇa śilpibhiḥ kārayeddṛḍham /
kṛtvā varṇairalaṃkāraṃ pratiṣṭhāṃ punarārabhet

sauvarṇapratimāyāṃ tu chinne bhinne ca vaktrake /
drāvayitvā sakṛt siktaṃ kṛtvā saṃsthāpayet punaḥ

tatastu bahudhā bhinnaṃ tāmraṃ cāpsu vinikṣipet /
ekadhā ca dvidhā bhinnaṃ tāmreṇaiva tu yojayet

tatsarvaṃ pūrvavat kṛtvā bimbaṃ kuryānnavaṃ śubham /
tāmrabimbaṃ tu saṃsthāpya nityaṃ pūjā pravartate

bimbaṃ sulakṣaṇopetaṃ rājataṃ saṃbhavedyadi /
jalādhivāsanādīni tasmin kāryāṇi sarvaśaḥ

tāmrabimbagatāṃ śaktiṃ rājate sthāpya yatnataḥ /
tāmrabimbaṃ parityajya rājataṃ sthāpayet kramāt

tathaiva rājataṃ tyaktvā sauvarṇaṃ sthāpayet kramāt /
kadācidapi na tyājyaṃ sauvarṇaṃ bhūtimicchatā

svadharmayuktajātibhyo durvṛtte 'pi tathā dvija /
mukhya eva sadā vipra tathaivottamaberakam

sauvarṇameva sarveṣāṃ mukhyabimbaṃ praśasyate /
saṃsthāpya svasya sthāne tu pūjayettu dine dine

brahmasthāne sthitaṃ bimbaṃ karmārcāṃ na tu cālayet /
calanaṃ tu bhavettasmin rājyasya calanaṃ bhavet

tatsthānaṃ nidhanaṃ yāti grāmasya nidhanaṃ bhavet /
tasmāt sarvaprayatnena uktakāle tu cālayet

ayane viṣuve caiva saṃkrāntyāṃ grahaṇe tathā /
prātaḥsandhyārcana(-ne?) snānavelāyāṃ munisattama

snānabimbavihīne tu calanaṃ tu samācaret /
dvitīyāvaraṇādbāhye karmārcāṃ na tu cālayet

pramādādvāpi mohādvā calanaṃ cenmunīśvara /
jalasaṃprokṣaṇaṃ kṛtvā supuṇyāhapuraḥsaram

adhamottamamārgeṇa snāpayedberamuttamam /
ekaberavidhāne tu prāyaścittaṃ vidhīyate

snapanaṃ sthāvarārcāyāṃ kartavyaṃ vidhivat sadā /
prāsādaṃ tu navaṃ kṛtvā pañcagavyena śodhayet

adhamottamamārgeṇa snāpayet puruṣottamam /
evameva tu kartavyaṃ ṣaṅviṃśadvatsarāntakam

ata ūrdhvaṃ pravakṣyāmi jalasaṃprokṣaṇaṃ kramāt (?) /
tasmāttenaiva śuddhiḥ syāt sarvaśāntirbhaviṣyati

aṅgahīnaṃ bhavedbimbaṃ punarutpādya pūrvavat /
saṃsthāpya vidhivat pūrvaṃ punaḥ sthāpanamācaret

nāradaḥ---
senāpate mahāprājña snapanasya prasīda me /
aśāstrīye mahādoṣān sarvān me brūhyaśeṣataḥ

yairdeṣaiḥ snapanodbhūtai rājarāṣṭraṃ vinaśyati /
paśavaśca prajāścaiva sasyādinidhanāni ca

viṣvaksenaḥ---
snapanasya pravakṣyāmi mahādoṣān munīśvara /
śalabhairgandhaduṣṭaistu duṣṭāḥ syuḥ sarvamānavāḥ

sādhite kalaśe bhinne taddravyaiḥ pūrayet punaḥ /
ūnaiśca kalaśairūnavibhavāḥ sarvamānavāḥ

kṛmikīṭapataṅgādidravyeṣu patane yadi /
tatsarvaṃ varjayennityaṃ viṣṇuyāgeṣu sarvaśaḥ

varjitaistu sadā dravyaiḥ deveśasyārcanaṃ yadi /
ṣaṣṭirvarṣasahasrāṇi narakaṃ pratipadyate

keśayuktaṃ tu yaddravyaṃ nipāte (nipated?) viṣṇumūrdhani /
mūrdhābhiṣiktaṃ rājānaṃ nāśayennātra saṃśayaḥ

anyeṣvapi ca duṣṭeṣu patiteṣu mahāmune /
etadeva phalaṃ prāha svayaṃ nārāyaṇaḥ prabhuḥ

paryuṣitairna cāmbhābhiḥ kalaśeṣu prapūrayet /
yadi lobhena gṛhṇīyāt kākayoniśataṃ vrajet

purāṇasarpiṣā devaṃ snāpayedyadi lobhataḥ /
gṛdhrayoniśataṃ gacchet tadante sūkaro bhavet

mahiṣājyena deveśaṃ snāpayedyadi mohataḥ /
gṛdhrayoniśataṃ gacchet tadante kukkuṭo bhavet

snāpayitvānyathājyena kṛkalāsaśataṃ vrajet /
dadhiyuktaṃ tu yat kṣīraṃ snāpayedyadi lobhataḥ

daridro mānuṣo loke janmaścāja(ajajanma?)śataṃ vrajet /
rasadravyaṃ ca vanyaistu niyujyānmākṣikaṃ naraḥ

yadi tatpūjito vipra vṛṣajanmaśataṃ vrajet /
kṛmikīṭapataṅgānāṃ dravyeṣu patite (patanaṃ?) yadi

tatsarvaṃ varjayennityaṃ viṣṇuyāgeṣu sarvaśaḥ /
dṛśyate sādhitaṃ caiva taddravyaṃ tu parityajet

tān sarvānna spṛśedyastu kalaśe sādhite punaḥ /
tathā vai dṛśyate cāpi tato 'nyāni ca vinyaset

śvānakukkuṭacaṇḍālaiḥ sādhite(?)dṛśyate punaḥ /
parityajya tato 'nyāṃśca sādhayet kalaśān punaḥ

udakyāntyajairvāpi sādhite(?)dṛśyate punaḥ /
parityajya tato vidvān punaścānyaṃ tu vinyaset

duṣṭairhi vīkṣitaṃ caiva pādaspṛṣṭaṃ ca yadbhavet /
rājānaṃ rājamātraṃ ca yajamānamathāpi vā

nāśayet saparīvāraṃ sapaśudravyasaṃcayam /
sāmātyaṃ sapuraṃ rāṣṭraṃ duṣṭadravyābhiṣecane

vyādhayaśca bhavantyugrā anāvṛṣṭistathaiva ca /
bhūtavetālarakṣāṃsi piśācoragadānavāḥ

bādhante hyaniśaṃ hyete rājānaṃ rāṣṭrameva ca /
āḍhakaṃ vā tadardhaṃ vā tannyūnaṃ parivarjayet

snehadravyāṇi sarvāṇi sādhako mantravittamaḥ /
vastrasūtravihīne tu toraṇādibhireva vā

nṛttagītādibhirvāpi gandhapuṣpādibhistathā /
alaṃkāra(-raiḥ?)vihīnaṃ vā devadevasya śāṅrgiṇaḥ

yasmin rāṣṭre muniśreṣṭha snapanaṃ syāt kadācana /
tadrāṣṭraṃ corabhūyiṣṭhaṃ śatrubhiścaiva hanyate

tasmāt sarvaprayatnena yathāśāstraṃ yathākramam /
snapanaṃ kārayedviṣṇoḥ bhūtimicchan parāṃ gatim

doṣāṇāṃ ca praśamanaṃ vyādhīnāṃ caiva sarvaśaḥ /
grahāṇāṃ śāntaye caiva śatrūṇāṃ ca jayāya ca

āyurārogyavṛddhyarthaṃ putrapautravivṛddhaye /
kāmānāṃ caiva sarveṣāṃ vṛddhaye sarvavarṇinām

vidhihīnaṃ kriyāhīnaṃ dravyahīnaṃ tathaiva ca /
mānahīnaṃ tu yaddravyaṃ pūjāhīnaṃ ca yadguroḥ

kālātītaṃ prajāhīnaṃ kartṛdeśeṣu sarvaśaḥ /
ābhicāraṃ(ro?) bhavet sadyo grāmasya nagarasya ca

evaṃ yathoktasnapanaṃ kārayedyastu mānavaḥ /
mucyate pātakaiḥ sarveḥ padmapatramivāmbhasā

godhnaḥ pitṛdhno mātṛdhno bhrūṇahā gurutalyagaḥ /
surāpaḥ svarṇahārī ca paradārābhimarśakaḥ

ete cānye ca mucyante pāpebhyaḥ snapanena vai /
snapane hyadhikaṃ puṇyaṃ vidyate munisattama

aśvamedhasahasraṃ tu yatkuryāt kāyaśodhanam /
snapanena tu tadviṣṇoḥ labhate nātra saṃśayaḥ

dhvajasthāne pravakṣyāmi prāyaścitaṃ tu nārada /
apramāṇapaṭaṃ citraṃ vaiṇavaṃ daṇḍameva vā

anuktādhikahīnaṃ ca prayatnena vivarjayet /
varjitena kṛtaṃ cettanniṣphalaṃ syānna saṃśayaḥ

dhvajādhivāsane kāle kumbhe cāvāhya vāhane /
tatkumbhapatane caiva calane bhedane tathā

pratimāparikumbhe ca tadgrāmaśca vinaśyati /
snapanaṃ tatra kartavyaṃ deveśasyādhamettamam

śāntihomaṃ tataḥ kṛtvā grāmadoṣanikṛntanam /
punarutpādayet kumbhaṃ saṃsthāpya vidhipūrvakam

dhvaje lakṣaṇahīne tu garuḍe vā viśeṣataḥ /
kartṛbhartṛvināśaḥ syāt tatrastho narakaṃ vrajet

kṣipraṃ tyaktvā dhvajaṃ tatra ācāryeṇa samāhitaḥ /
dhvajamutthāpayet sadyaḥ sarvalakṣaṇasaṃyutam

pūrvoktavidhinā samyak śeṣaṃ karma samārabhet /
grāmapradakṣiṇe kāle patite vātakopite

durbhikṣaṃ vartate tatra kartāro vyādhipīḍitāḥ /
taddoṣaparihārāya snapanaṃ cādhamottamam

puṇyāhaṃ vācayettatra brāhmaṇānāṃ ca bhojanam /
kārayenmuniśārdūla śeṣa pūrvavadācaret

ācāryaṃ pūjayet paścāt yathāśāstroktamārgataḥ(-kam?) /
patanādbhedane caiva dhvajaṃ tyaktvā tu tatkṣaṇāt

snapanaṃ cottamaṃ kṛtvā devadevasya cakriṇaḥ /
vāstuhomaṃ tataḥ kṛtvā puṇyāhaṃ vācayettataḥ

utpādya coddharet samyak dhvajaṃ lakṣaṇasaṃyutam /
grāmapradakṣiṇe kāle balihīnaṃ bhavedyadi

sa grāmo nidhanaṃ yāti tatrastho narakaṃ vrajet /
taddoṣaparihārāya prāyaścittaṃ vidhīyate

snāpayeddevadeveśaṃ pañcāśat kalaśaiḥ(?) krāmat /
pūjayitvā tato devaṃ punargrāmaṃ paribhramet

balidānasamāyuktaṃ paścādutthāpayet khagam(-ddhvajam?) /
kevalaṃ balidānaṃ tu kārayeddundubhiryutam

etasminneva kāle tu velādīni na vīkṣayet /
vidhivaddhvajamutthāpya śeṣaṃ pūrvavadācaret

dhvajotthāpanakāle tu calane gagane tataḥ /
kartāro vyādhimṛcchanti nairdhanyamapi sarvaśaḥ

taddoṣaparihārāya snapanaṃ cādhamottamam /
puṇyāhaṃ vācayitvā tu tasya doṣaḥ praśāmyati

patanādbhūpatiścaiva tadgrāmaṃ ca vinaśyati /
dhvajasya patane caiva prāyaścittaṃ pravakṣyate

snapanaṃ devadevasya vidhinā cādhamottamam /
puṇyāhaṃ vācayitvā tu brāhmaṇānatha bhojayet

saṃsthāpya vidhivat paścāt pūjayedvidhinā tataḥ /
patanodbhedane caiva punarutpādayeddhvajam

sthāpane nipatettatra tadrāṣṭraṃ ca vinaśyati /
snapanaṃ cottamaṃ kuryāt utsavaṃ ca vidhānataḥ

śāntiṃ kṛtvā vidhānena puṇyāhaṃ vācayettataḥ /
corairapahṛte caiva tadrāṣṭraṃ ca vinaśyati

snapanaṃ cottamaṃ kṛtvā śāntihomapuraḥsaram /
balibhramaṇakāle tu nitye vā cotsave tu vā

dravyasya patane caiva gandhapuṣpādikasya ca /
śānti kṛtvā vidhānena pañcopaniṣadaiḥ kramāt

punarutpādayeddravyaṃ gandhādyaṃ sakalaṃ kramāt /
dravyābhāve tu caruṇā cākṣatairvā baliṃ dadet

saṃspṛṣṭe durjanādīnāṃ śūdrādyaiścānyajātibhiḥ /
śāntihomaṃ tu kṛtvaiva maṅgalāni ca darśayet

balibhramadhakāle tu prāyaścittaṃ vidhīyate /
anālocya pradāne tu bimbahīne tu vā mune

sabaligrāmarājñośca rogavṛddhirbhaviṣyati /
taddoṣaparihārāya prāyaścittaṃ vidhīyate

adhamottamamārgeṇa snāpayedbalikautukam /
śāntihomaṃ kramāt kṛtvā bhojyā vai brāhṛmaṇāstrayaḥ

balibimbasya patane yāne vā bhūgate 'pi vā /
tadgrāmaṃ nidhanaṃ yāti kartā bhartā tathaiva ca

ālaye tu nayeddevaṃ snapanaṃ cādhamottamam /
śāntihomaṃ ca kṛtvā tu mahāpūjāpuraḥsaram

puṇyāhaṃ vācayettatra brāhmaṇāṃścaiva toṣayet /
grāme vā nagare vāpi śeṣakarma samācaret

patanenāṅgahīne ca rājārāṣṭraṃ ca naśyati /
annabimbe 'thavā puṣpe śaktimudvāsayet kramāt

karmārcāyāṃ nyasecchaktiṃ snapanaṃ cottamaṃ bhavet /
śāntihomaṃ caturdikṣu kuryāt pañcamantrakaiḥ(?)

anyabimbe samāvāhya śeṣakarma samācaret /
sandhānaṃ pūrvavat kṛtvā pūrvalakṣaṇasaṃyutam

sthāpitaṃ pūrvavat kṛtvā asmin kālādi neṣyate /
tacchaktiṃ yojayedbimbe śeṣakarma samācaret

sthānake cāsane caiva śayane baliberake /
patane cāṅgahīne ca prāyaścittaṃ tu pūrvavat

utsavārambhadivase kalpite ṛtvijai(?)rapi /
taistaireva tu kartavyāḥ kriyāḥ sarvāvasānakam (?)

madhye tu yojayedanyān mohāttu munisattama /
tāḥ kriyā niṣphalāyānti tasmācchāntiṃ tu kārayet

prāyaścittaṃ tu kartavyaṃ tasya doṣāpunattaye /
pūrveṇa ṛtvijenāpi kuryāt karmāvasānakam

adhamottamamārgaṃ vā pañcāśadvā (?) munīśvara /
pañcaviṃśatibhirvāpi kalaśaiḥ snāpayeddharim

puṇyāhaṃ vācayettatra śāntihomaṃ ca kārayet /
vyādhigraste mṛte vāpi śāstrahīne 'nyadūṣite(?)

pratiṣṭhākarmaṇi tathā cotsave paramārthinam /
yojayedanyamevaṃ cedācāryaṃ tantrapāragam

yāgāgnau caiva vicchinne utsave vartite sati /
tadrāṣṭraṃ ca vinaśyanti(?) kartāro vyādhipīḍitāḥ

taddoṣaparihārāya snapanaṃ cādhamottamam /
saṃprārthya devadeveśaṃ mahāhavipuraḥsaram

mathitvāgniṃ samutpādya laukikāgnimathāpi vā /
vaiṣṇavīkaraṇairyuktaṃ supuṇyāhapuraḥsaram

evaṃ tu kārayedvidvāṃstaddoṣasya nikṛntanam /
yogeśasyārcanāhīne cotsave yāgamaṇḍape

madhye kumbhagate deve hyutsave tu viśeṣataḥ /
niṣphalaḥ sa ca yāgastu kartāro vyādhipīḍitāḥ

tasmāttatphalasiddhyarthaṃ snapanaṃ cādhamottamam /
kārayecchāntihomaṃ tu juhuyācchatamāhutīḥ

puṇyāhaṃ vācayitvā tu tasya doṣaḥ praśāmyati /
yāgeśakumbhe vicale parikumbhe 'thavā punaḥ

bhedane patane vedyāṃ prāyaścittaṃ tu pūrvavat /
aṣṭamaṅgalahīne tu pūjājīne tu tatra ca

maṅgalaṃ tu vinaśyeta kartāro vyādhipīḍitāḥ /
maṅgalātmānamabhyarcya deveśaṃ vidhipūrvakam

śāntihomaṃ tataḥ kṛtvā puṇyāhaṃ vācayettataḥ /
utsave nityapūjāyāṃ vilope homakarmaṇi

tatrasthā narakaṃ yānti tasmādvṛddhirna jāyate /
taddoṣaparihārāya prāyaścittaṃ tu pūrvavat

nityapūjāvasāne tu homaṃ kuryāttathotsave /
homānte tu baliṃ kuryādyathāvidhipuraḥsaram(!)

nityotsavasya hīne vā balidānasya cobhayoḥ /
juhuyānmūlamantreṇa nityāgnau śatamāhutīḥ

etaddvikālahīne tu tadūrdhvaṃ snapanaṃ tathā /
hutvāṣṭākṣaramantreṇa paścānnityaṃ samācaret

nityotsavasya hīnena yadi syāttu mahotsavaḥ /
snāpayet pañcagavyena baliberamanuttamam

snapanaṃ kārayet paścāt pañcaviṃśatibhiḥ kramāt /
alaṃkāraṃ kramāt kṛtvā pūjayeddhavirantakam

nityotsavavidhānena prāsāde balimācaret /
prātarmadhyapradoṣeṣu balibhramaṇamācaret

atha madhyāhnahīne ca kārayedbalikarmaṇi /
ekakālaṃ bhavettasmin balikarma tu cenmune

utsavo niṣphalastatra grāmanāśo bhaveddhruvam /
tasmāttatphalasiddhyarthaṃ dvikālaṃ balimācaret

dvikālaṃ tu muniśreṣṭha balidānaṃ tu kārayet /
pūrvakālabalimadhyakālikā (?) rātrikālabali sapradakṣiṇam(?)

bhūtarākṣasapiśācapannagānāṃ (?) nāśada (-kā?) raṇamidaṃ balibhramam(?) /
yo mohādekasandhyāyāṃ baliṃ nikṣipya(?)nārada

taddoṣaparihārāya prāyaścittaṃ vidhīyate /
adhamottamamārgeṇa snapanaṃ kārayeddhareḥ

brāhmaṇān bhojayet paścāt mahāhavipuraḥsaram /
puṇyāhaṃ vācayet paścāt pūrvavaddhomamācaret

tatkālocite paścāt balidānaṃ samācaret /
aṅkurārpaṇapātraṃ tu naṣṭaṃ patitameva vā

aspṛśyaiḥ sparśitaṃ vāti punarutpādayet kramāt /
śyāme rakte prarūḍhe vā daṇḍe(?) mūṣikabhakṣite

juhuyāt pañcamantraistu pratyekaṃ samidādibhiḥ /
aṣṭottaraśataṃ hutvā viṣṇumantreṇa mantravit

uddeśyadivase tīrthamakṛtaṃ cettu nārada /
daivikairmānuṣairvighnaiḥ punarutsavamārabhet

vyatyāso divasairdravyaiḥ balidāne kṛte yadi /
juhuyānmūlamantreṇa sarpiṣā śatamāhutīḥ

digdevatānāṃ tu vyatyāso vartate cenmahotsave /
krameṇa kārayet paścāt pūrvavaddhomapūrvakam

ekāhamekakālaṃ vā balidānaṃ tu cotsave /
vighnitaṃ cet pravakṣyāmi prāyaścittaṃ tu nārada

juhuyānmūlamantreṇa taddravyeṇa śatāhutīḥ /
dviguṇaṃ kārayet paścādvighnite hyekakālike

pūrvadravyeṇa pūrvaṃ tu pūrvarātrasya pūrvavat /
kṛtvā tu vidhivat sarvaṃ paścāt paścātmakaṃ(?)kramāt

vighnitaṃ cedahorātraṃ kārayedapare 'hani /
kalpiyitvātathā rātriṃ (-trau?)tadbaliṃ cāpi kārayet

paribhramaṃ tu dviguṇaṃ homaṃ caiva tu kārayet /
ekāhādadhikaṃ caiva vighnitaścenmahotsavaḥ

aṅkurārpaṇapūrvaṃ tu tatsarvaṃ punarārabhet /
tattīrthaṃ vighnitaṃ cettu kuryāttadaparehani

snapanaṃ vidhivat kṛtvā tatra homaṃ tu pūrvavat /
kṛtvaivaṃ vidhivat sarvaṃ śeṣaṃ pūrvavadācaret

pratiṣṭhāyāṃ pravakṣyāmi prāyaścittaṃ munīśvara /
pramāṇarahitaṃ bimbaṃ vastrālaṃkārayośca vā

ā(a?)sthāne vāmuhūrte vā sthāpanaṃ tu na kārayet /
sthāpanaṃ cenmahāmohāt kartā bhartā vinaśyati

taddoṣaparihārāya prāyaścittaṃ vidhīyate /
yātrāṃ kṛtvā vidhānena punaḥ sthāpanamārabhet

jalādhivāsanādūrdhvaṃ sthāpanāt prāṅmunīśvara /
vighnitā cetkriyā madhye prāyaścittaṃ vidhīyate

brāhmaṇānāmanujñāṃ tu labdhvā paścāt parehani /
pañcopaniṣadairmantraiḥ hutvājyena śataṃ śatam

samāpya vidhivaccheṣaṃ sthāpayet puruṣottamam /
tathaiva kārayet sarvaṃ rakṣitaṃ ceddinatrayam

kalaśaṃ pūrṇakumbhaṃ vā maṅgalāṣṭakameva vā /
aspṛśyasparśitaṃ vāpi bhinnaṃ vā mantrasāditam

anyaṃ pūrvavadutpādya sthāpayet pūrvavat kramāt /
uddhṛtaṃ brahmakumbhaṃ tu dūṣitaṃ patitaṃ tu vā

kumbhamanyaṃ tathā kṛtvā saṃskṛtya vidhivadbudhaḥ /
pañcopaniṣadairmantraiḥ praṇavena tathaiva ca

ājyena juhuyāttatra pratyekaṃ śatamāhutīḥ /
kṛtvā puṇyāhanirghoṣaṃ sthāpayet pūrvavat kramāt

mantrahīnaṃ kriyāhīnaṃ dravyahīnaṃ tathālayam /
vyatyāsaḥ kālahīnaṃ ca sphālitaṃ cādbhutaṃ tathā

eteṣāṃ cāpyanuktānāṃ prāyaścittaṃ vidhīyate /
juhuyānmūlamantreṇa ghṛtena śatamāhutīḥ

āśaucaṃ vāthavā vyādhirmṛtyurvā vidyate yadi /
ācāryasya tu tatkāle vakṣye saṃsthāpanakramam

adīkṣitaṃ vā viprendra vaiṣṇavaṃ vedapāragam /
snāpyālaṃkāritaṃ śuddhaṃ tenaiva sthāpayedbudhaḥ

pauruṣeṇa tu sūktena praṇavena tataḥ param /
tatastu mūlamantrābhyāṃ muhūrte sthāpayedbudhaḥ

tataścācāryamanvīkṣya daśāhāt prāk prayatnataḥ /
tenaiva kārayet sarvaṃ mantranyāsādi pūrvavat

tataḥ prabhṛti devasya caturthyā(?)snānameva ca /
ācāryaṃ pūjayet paścāt puṣkalena dhanena ca

ācāryadakṣiṇāhīne prāyaścittena pūjayet /
devasya sthāpanādūrdhvaṃ caturthe 'hani nārada

snapanaṃ cārcanaṃ tasminnakṛtaṃ cettu nārada /
tadūrdhvaṃ dvādaśāhādarvāk prāyaścittaṃ vidhīyate

snapanaṃ cottamaṃ vā syādadhamottamameva vā /
snapanaṃ kārayitvādau brāhmaṇānāṃ ca bhojanam

pañcopaniṣadairbhantrairhutvājyena śataṃ śatam /
yathāvittānusāreṇa(!) snapanaṃ vātha kārayet

yathāvitaṃ tu deveśaṃ pūjayettu dine dine /
pūjānte dakṣiṇāṃ dadyādahanyahani nārada

sādhakānāṃ hitārthāya rājarāṣṭrahitāya ca /
tasmātsarvaprayatnena dakṣiṇāṃ dāpayet sadā

dakṣiṇāhīnametaccet sarvaṃ niṣphalameva ca /
ācāryadakṣiṇāhīne prāyaścittaṃ vidhīyate

adhamottamamārgeṇa deveśaṃ snāpayettataḥ /
brāhmaṇān bhojayet paścāt puṇyāhaṃ vācayettataḥ

pūrvoktena vidhānena pūjayet puruṣottamam /
ācāryaṃ pūjayet paścādyathāvittānusārataḥ(!)

tasmāt sarvaprayatnena dakṣiṇānamuttamam /
sruksruvaṃ (-vau?) maṇḍape caiva kuṇḍamaṇḍalatoraṇam

vedikādi muniśreṣṭha kuryāccedapramāṇataḥ /
pramādānmūlamantreṇa mūlayukśatamāhutīḥ

juhuyādvaiṣṇavāgno tu ācāryo 'nalamadhyame /
pratyekaṃ samidājyena caruṇāpi mahāmune

vaiṣṇavīkaraṇāttasmiṃstena śāntirbhaviṣyati /
hareratipriyakaraṃ tasmāt karma samācaret

bālasthānasya vakṣyāmi prāyaścittaṃ tu nārada /
mūlāgārārcanābimbaṃ bālāgāre na pūjayet

bālasthānārcanābimbaṃ mūlasthāne tu pūjayet /
pūjayedvarjyabimbaṃ tu yadi lobhācca mantravit

tatpūjā niṣphalaṃ yāti kartā bhartā vinaśyati /
yo mohādarcayedbimbaṃ prāyaścittaṃ vidhīyate

snāpayedarcanābimbamadhamottamamārgataḥ /
madhyamaṃ vā muniśreṣṭha taddoṣasya nikṛntanam

brāhmaṇān bhojayet paścāt vaiṣṇavān vedapāragān /
śāntihomaṃ kramāt kṛtvā puṇyāhaṃ vācayettataḥ

mūlāyāmarcakaḥ samyak bālasadmani pūjayet /
bālagehārcakastasmin mūlasthāne na pūjayet

pūjayedyadi saṃmohāt niṣphalaṃ syānna saṃśayaḥ /
tadgrāmaṃ nidhanaṃ yāti dharmamārgo vinaśyati

tasmāt sarvaprayatnena mūlāgāre na pūjayet /
lobhānmohāttu deveśaṃ pūjayedyadi nārada

tatpūjāphalasiddhyarthaṃ prāyaścittaṃ vidhīyate /
jalasaṃprokṣaṇaṃ kṛtvā supuṇyāhapuraḥsaram

mūlādhivāsanaṃ kṛtvā maṇḍape cādhivāsanam /
adhamottamamārgaṃ vā kārayenmunisattama

brāhmaṇān bhojayet paścāt yathāvittānusārataḥ (!) /
pūjayedbālagehe tu yāvanmūlapraveśanam

evaṃ cāpi na kṛtvā tu vartate kālalaṅghanam /
snapanaṃ mūrtihomaṃ ca maṇḍape cādhivāsanam

kṛtvā tu vidhivat samyak sthāpayedvidhivat kramāt /
ūrdhvaṃ tu vatsarāt kālo gataṃ cedvakṣyate 'dhunā

vinā jalādhivāsaṃ ca sarvaṃ pūrvavadācaret /
pratiṣṭhāyāḥ kriyāḥ kṛtvā ......prārthayeddharim

corairapahṛtaḥsa (-hṛtā cet?) tu pratimā taruṇālaye /
bimbamanyaṃ samutpādya lohajaṃ sumanoharam

jalādhivāsanaṃ kṛtvā maṇḍape cādhivāsanam /
mūrtihomaṃ tathā śāntiṃ snapanaṃ cādhamottamam

kṛtvā puṇyāhaghoṣaṃ ca sthāpayedbālasadmani /
pūrvasaṃskṛtabimbaṃ cejjalavāsaṃ vinā bhavet

bālasthānaṃ samāpyaivaṃ tantrasaṃkaraṇaṃ śṛṇu /
vāstusāṅkaryamevaṃ vai vakṣyāmi kramayogataḥ

pañcarātraṃ tathā śaivaṃ vaikhānasamiti tridhā /
tattacchāstroktamārgeṇa vāstusaṃgrahaṇādayaḥ

tathā tathaiva kartavyāḥ prāsādapratimādayaḥ /
kṛtvā tu vidhivat samyak sthāpanādikrameṇa hi

teṣāṃ vāstau tu sāṃkaryādrāṣṭranāśo dhanakṣayaḥ /
tasmātsarvaprayatnena varjayedvāstusaṃkaram

atra kiñci (kaści?) dviśeṣo 'sti vakṣyāmi śṛṇu suvrata /
karṣaṇādikṛtaṃ pūrvaṃ vaikhānasavidhānataḥ

pañcarātreṇa śāstreṇa sthāpayet puruṣottamam /
śaivavaikhānasābhyāṃ tu vidhinā vāstusaṃgraham

taddeśe sthāpayeddevaṃ sāttvatena vidhānataḥ /
grāmarājānusāreṇa brāhmaṇānāmanujñayā

vidyate yadi vāñchā cet pañcarātreṇa vārcanam /
tacchāstreṇoktamārgeṇa sthāpitaṃ pūjitaṃ purā

śaivavaikhānasābhyāṃ ca arcayenna kadācana /
vaikhānasasya śaivasyāvaidikatvānmunīśvara

śaivaṃ vekhānasaṃ cāpi asaumyaṃ tadudāhṛtam /
saumyaṃ tu sāttvataṃ caiva tasmātsaumyaṃ viśiṣyate

tatra sāttvatamārgeṇa pūjayet puruṣottamam /
śaivavaikhānasābhyāṃ tu rodrapūjāgnirogakṛt

saumyaṃ tu sāttvataṃ tantraṃ tacchāstravidhimācaret /
daivādvā mānuṣādvāpi lobhānmohāt pramādataḥ

sthāpite raudramārgeṇa pūjyamāne dine dine /
hitvā raudravidhānaṃ tu sarveṣāṃ hitakāmyayā

grāmavṛddhikaraṃ puṇyaṃ rājabhūsuravardhanam /
tasmāt sarvaprayatnena hitvā raudraṃ tu tatkṣaṇāt

sthāpayet sāttvatenātha vidhinā pūjayeddharim /
tasmāt sarvaprayatnena na kuryāttantrasaṃkaram

sāttvaṃtaṃ pañcarātrākhyaṃ sākṣadviṣṇumukhācchrutam /
anuṣṭheyaṃ dvijaśreṣṭhairvaiṣṇavairvedapāragaiḥ

pañcarātraṃ mahājñānaṃ dharmakāmārthamokṣadam /
śaivaṃ ca śambhunā proktaṃ śuddhaṃ laiṅgamiti dvidhā

nānuṣṭheyaṃ dvijaśreṣṭhaiḥ parārthe munisattama /
ātmārthe muni(dvija?)varyastu pūjayecchuddhamuttamam

dine dine muniśreṣṭha laiṅgikaṃ na smaredbudhaḥ /
vaikhānasahitārthāya śāstraṃ bhārgavanirmitam

nānuṣṭheyaṃ dvijaśreṣṭhairātmanor'the parasya ca /
pratilomahitārthāya pūjayet puruṣottamam

sā pūjā śūdravṛddhyarthā dvijānāṃ śaktihānikṛt /
dine dine muniśreṣṭha nātra kāryā vicāraṇā

tatpūjāvaidikatvācca nānuṣṭheyā dvijottamaiḥ /
nāradaḥ---
vaikhānasā iti proktāḥ ke te cātra vivakṣitāḥ

vānaprasthā dvidhā kiṃ te sūtā vā kiṃ vivakṣitāḥ /
viṣvaksenaḥ---
brahmaṇyāṃ kṣatriyājyātāḥ sūtā vaikhānasāstathā

sūtakāśca rathakārāśca tathā paurāṇikā iti /
paryāyavācakāḥ śabdāḥ pratilomeṣu pūjitāḥ

ete vaikhānasā proktāḥ bhārgavāgamapūjakāḥ /
pratilomahitārthāya bhṛguṇā tantramīritam

manvādidharmaśāstreṣu vānaprasthāśramaḥ kramāt /
saṃproktastu muniśreṣṭha iti śāstrasya niścayaḥ

eteṣāṃ saṃkaraṃ tatra varjyamāhurmanīṣiṇaḥ /
tantrasaṃkaradoṣeṇa sarvaṃ naśyatyasaṃśayaḥ

rājñā sarvaprayatnena jagadrakṣaṇakāṃkṣiṇā /
saṃkaraḥ parihartavyo rājarāṣṭrasukhāya ca

yaddaivatyaṃ kṛtaṃ kṣetraṃ vidhinā karṣaṇādinā /
tadanyadaivataṃ vipra manasāpi na kalpayet

yadi vā sthāpyate mohāddaṇḍyo vadhyaḥsa pāpabhāk /
sa kartā saṃkarasyāpi rājño rāṣṭrasya tasya hi

pañcarātraṃ tu śaivaṃ vai vaikhānasavidhānakam /
teṣāṃ vāstvādisāṃkaryāt kiñcideva viśeṣakam

sāttvataṃ sarvavṛddhyarthaṃ śaivaṃ sarvavināśakṛt /
vaikhānasamanarthārthaṃ tasmāttatparivarjayet

asthānasthāpitāḥ kecit svasthāna [pari?]varjitāḥ /
devatādvayakopena sarvaṃ naśyatyasaṃśayaḥ

saṃkaro dvividhaḥ proktaḥ sarvaprāṇivināśanaḥ /
jātisaṃkaraṇaṃ caiva tantrasaṃkaraṇaṃ tathā

jātisaṃkaraṇenaiva jagaccaṇḍālatāṃ vrajet /
tantrasaṃkaraṇenaiva rājārāṣṭraṃ vinaśyati

rāṣṭraṃ śarīraṃ rājastu rājā jīvaḥ sa ucyate /
rāṣṭrakṣaye kṣayo rājñaḥ tasmādrakṣyaṃ dvayaṃ budhaiḥ

caṇḍālatvaṃ gate loke vedāḥ sarve tirohitāḥ /
tirohiteṣu vedeṣu yajñādikratavastathā

ekavarṇaṃ jagatsarvaṃ vastu niśceṣṭakaṃ bhavet (?) /
jātisaṃkaradoṣeṇa dvijānāṃ maraṇaṃ bhavet

tasmāt sarvaprayatnena sāṃkaryaṃ parivarjayet /
devadevātparaṃ nānyattadāyattā hi siddhayaḥ

iti cintyaiva bhūtānāṃ vayaṃ devamupāsmahe /
sarvadevamayo viṣṇurbhagavān bhūtabhāvanaḥ

sarvaprāṇihitārthāya nānyaivaiko 'pi dṛśyate /
brahmā rudraśca śakraśca vasavo varuṇastathā

yakṣagandharvasiddhaśca bhūtavetālarākṣasāḥ /
śaktayaśca tathā cānyāḥ sarvāḥ viṣṇuvibhūtayaḥ

tāśca sarvāḥ prasīdanti purā cārthārthināṃ nṛṇām /
pūjyamāne tu satataṃ tattatpūjāvidhānataḥ

sarvaprāṇihitārthāya munibhiḥ karuṇātmabhiḥ /
kṛtāni tattadyogyāni śāstrāṇi munipuṅgava

vaidikaṃ tāntrikaṃ caiva tathā vaidikatāntrikam /
trividhaṃ karma saṃproktaṃ pañcarātrārṇavāmṛtam (?)

vaidikaṃ brāhmaṇānāṃ tu rājñāṃ vaidikatāntrikam /
tāntrikaṃ vaiśyaśūdrāṇāṃ sarveṣāṃ tāntrikaṃ tu vā

bhārgaveṇoktadharmeṇa pratilomādi kārayet /
aśrīkaramasaumyaṃ tadabrāhmaṇaparigraham

avaidikatvāttattantraṃ vaikhānasamathādhamam /
saṃkaraḥ parihartavyo brāhmaṇaiśca jagaddhitaiḥ

vāstau bimbasya pūjāyāṃ pūjakasya ca saṃkaraḥ /
sarvathā parihartavyo prāyaścittaiḥ pṛthagvidhau(-dhaiḥ?)

nāradaḥ---
prāyaścittaṃ samācakṣva bimbasaṃkaraṇādiṣu /
yatkṛtvā sarvadoṣāśca naśyantyaśubhahetavaḥ

viṣvaksenaḥ---
na tithirna ca nakṣatraṃ kālavelā na vidyate /
saṃkaraṃ tayajyate kṣipraṃ sarvaprāṇihitāya vai

sadya eva tu kartavyā saṃkarasya tu niṣkṛtiḥ /
niṣkṛtyāharahaḥ(?)paścāt rājarāṣṭrasuvṛddhikṛt

grāmasya nagarasyāpi sarvasaṃpatsukhāvaham /
tasmāt sarvaprayatnena kṣipraṃ śāntiṃ samācaret

yattantreṇa samārabdhaṃ tattantreṇaiva kārayet /
anyathā cenmahādoṣo rājarāṣṭravināśakṛt

tasmāt sarvaprayatnena na kuryāttantrasaṃkaram /
ekāhamarcanāhīne svakalpoktavidhānataḥ

ekāśītikramāt kṛtvā snapanaṃ sādhakottamaḥ /
śāntihomaṃ kramāt kṛtvā snapanaṃ sādhakottamaḥ

śāntihomaṃ kramāt kṛtvā vāstuhomaṃ tathaiva ca /
brāhmaṇān bhojayet paścādaṣṭottaraśataṃ kramāt

tasyārdhaṃ vā tadardhaṃ vā yathāvittānusārataḥ(!) /
caturmūrtividhiṃ smṛtvā pañcamūrtividhi tyajet(?)

parivārāṇi sarvāṇi pūrvavat sthāpayet kramāt /
tattvanyāsaṃ kramāt kṛtvā sṛṣṭinyāsaṃ tathaiva ca

mūlamantreṇa matimān mūlamūrtimanusmaran /
pūjayet satataṃ paścāt pūrvoktena vidhānataḥ

mahāhavirnivedyātha kārayedgurupūjanam /
pūjālope 'pi cettatra punastenaiva pūjayet

tatra sāttvatamārgeṇa pūjyamāne dine dine /
tantrāntareṇa deveśaṃ kadācinna tu pūjayet

pūjayedyadi saṃmohānniṣphalaṃ syānnaṃ saṃśayaḥ /
tatpūjāharahaḥ paścāttadgrāmasya vināśakṛt

tasmāt sarvaprayatnena pūjayettaddvijottama /
pūrvaṃ karmārcanādīnāṃ śuddhasnānaṃ tu kārayet

jalasaṃprokṣaṇādīni mūlārcāyāṃ niyojayet /
snapanādīni karmāṇi karmārcāyāṃ niyojayet

utsavaṃ kārayettasmin balihomapuraḥsaram /
ekāhaṃ vā tryahaṃ vātha saptāhaṃ vā munīśvara

kārayedutsavaṃ tatra yathāśaktyānurūpataḥ (!) /
etat krameṇa kartavyaṃ dvādaśābdāntameva ca

ekābde rakṣasāṃ sthānaṃ (vāsaḥ?) tasmācchāntiṃ tu kāreyat /
dvyabde ca yakṣavāsastu tryabde bhūtasaṃkulam

caturabde piśācānāṃ pañcābde dānavālayam /
pañcavarṣamatīte tu nivāso brahmarakṣasām

tasmāt sarvaprayatnena kṣipraṃ śāntiṃ tu kārayet /
dvādaśābdāt purā kuryāt jalasaṃprokṣaṇena tu

evameva tu kartavyaṃ viṃśadvarṣāntameva tu /
ataḥ paraṃ pravakṣyāmi prāyaścittaṃ tu nārada

jalasaṃprokṣaṇaṃ kuryājjalavāsapuraḥsaram /
brāhmaṇān bhojayet paścānmahāhavipuraḥsaram

ṣaṭtriṃśadvatsarādarvāk tāvattenaiva kārayet /
ṣaṭtriṃśadvatsarādūrdhvaṃ prāyaścittaṃ vidhīyate

pañcagavyaṃ kramāt kṛtvā garbhāgāraṃ viśodhayet /
puṇyāhaṃ vācayitvā tu brāhmaṇānāmanujñayā

jalādhivāsanādīni pūrvoktenaiva kārayet /
godānaṃ bhūmidānaṃ ca hiraṇyaṃ vastrameva ca

sarvadānaṃ tataḥ kuryāt brāhmaṇebhyo yathākramam /
evaṃ tadvardhayitvā tu pañcāśadvatsarāntakam

pañcāśadvatsarādūrdhvāṃ prāyaścittaṃ vidhīyate /
jalādhivāsanādīni punaḥ sthāpanamārabhet

brāhmaṇān bhojayettatra śeṣaṃ pūrvavadācaret /
etat krameṇa kartavyaṃ śatavarṣāntameva ca

saṃvatsaraśatādūrdhvaṃ śūnyasthānaṃ bhaveddhruvam /
tadgrāmaṃ nidhanaṃ yāti tatrasthā narakaṃ vrajet(?)

tadgrāmaṃ nidhanaṃ yāti tasmācchāntiṃ tu kārayet /
śāntiṃ kṛtvā vidhānena pañcarātreṇa pūjayet

pūjālope 'pi cettasmin punastenaiva pūjayet /
tasmāt sarvaprayatnena kṣipraṃ śāntiṃ samācaret