વિષ્વક્સેનસંહિતા · અધ્યાય 37

ઇતિ શ્રીપાઞ્ચરાત્રે વિષ્વક્સેનસંહિતાયાં [જીર્ણોદ્ધારાદિવિધિર્નામ] ષટ્ત્રિંશો ઽધ્યાયઃ ॥
સપ્તત્રિંશો ઽધ્યાયઃ
નારદઃ---
નમસ્તે ઽસ્તુ જગન્નાથ વિષ્ણુપારિષદેશ્વર ।
વિષ્વક્સેન નમસ્તે ઽસ્તુ નમસ્તે વિશ્વકર્મણે

ત્વત્તો ઽધીતં મયા તન્ત્રં પઞ્ચરાત્રાર્ણવામૃતમ્ ।
દીક્ષાશકુનવિસ્તારો ન ત્વયા કિઞ્ચિદીરિતઃ

તત્સર્વં શ્રોતુમિચ્છામિ પ્રબ્રૂહિ ભગવન્ મમ ।
ઇતિ વિજ્ઞાપિતો દેવો વિષ્વક્સેનો મહાત્મના

પ્રત્યુવાચ મહજેજાઃ પ્રણમ્ય ગરુડધ્વજમ્ ।
વિષ્વક્સેનઃ---
શ્રુણુ નારદ તત્ત્વેન મહાવિદ્યાં પુરાતનીમ્

મયા પૃષ્ટઃ પુરા પ્રાહ મહાવિષ્ણુર્જગન્મયઃ ।
સાધકાનાં હિતાર્થાય ચતુઃષષ્ટિપ્રભેદતઃ

શકુનાનિ જગન્નાથઃ તાન્ સર્વાન્ પ્રબ્રવીમિ તે ।
વિઘ્નેશઃ પ્રથમઃ પ્રોક્તો ગાઙ્ગેયો મૂષિકાધ્વજઃ

તં પૂજયિત્વા વિધિવત્ પ્રણમ્ય પ્રાર્થયેન્ મુને ।
તસ્મિન્ પ્રસન્ને વિઘ્નેશે સર્વદેવનમસ્કૃતે

સર્વાર્થસિદ્ધિર્ભવતિ નાત્ર કાર્યા વિચારણા ।
સ એવ નાયકસ્તેષાં શકુનાનાં ગણેશ્વરઃ

તસ્માત્ સર્વપ્રયત્નેન પૂજયેદ્વિઘ્નનાયકમ્ ।
પૂજાક્રમં પ્રવક્ષ્યામિ સંક્ષેપેણ મહામુને

આવાહયેચ્છુચૌ દેશે સુલિપ્તે સુવિચિત્રિતે ।
સ્વાસને દર્ભસંકીર્ણે કુસુમૈરુપશોભિતે

ગાયત્ર્યા ચાસનં દદ્યાત્ પ્રણમ્ય ગણનાયકમ્ ।
અર્ઘ્યં પાદ્યં તથાચામં મધુપર્કં તથૈવ ચ

સ્નાનં વસ્ત્રોપવીતં ચ ભૂષણં ગન્ધપુષ્પકમ્ ।
ધૂપદીપં (-પૌ?) નિવેદ્યાદિ સ્તોત્રં રજમુખં સ્મરન્

કૃત્વા પૂજાં ગણેશસ્ય પ્રણમ્ય પ્રાર્થયેત્ પ્રભુમ્ ।
ગાયત્ર્યા ચૈવ તત્સર્વં કુર્યાત્તન્ત્રવિચક્ષણઃ

એવં પૂજ્ય તતઃ પશ્ચાત્ ગન્ધપુષ્પાદિભિઃ પુનઃ ।
પુસ્તકં પૂજજિત્વા તુ યથાવદ્વિજિતેન્દ્રિયઃ

આલિખેત્ પુસ્તકં સર્વં શકુનાનિ યથાક્રમમ્ ।
નારદઃ--
કથં દેવ નિમિત્તાનિ લિખ્યતે પુસ્તકે નરૈઃ

એતદાચક્ષ્વ ભગવન્ સંશયો મે મહાનસૌ ।
વિષ્વક્સેનઃ---
એવમેવ મયા પૃષ્ટઃ પ્રોવાચ ભગવાન્ યથા

તથૈવાત્ર પ્રવક્ષ્યામિ શૃણુષ્વ મુનિપુઙ્ગવ ।
વિઘ્નરાજ (-જો?) મહારાતિઃ મહિષઃ શુકપીતકઃ

કબન્ધં ન નદી ચૈવ બૃહજ્જાલી તથૈવ ચ ।
પુરુષશ્ચ મૃગશ્ચૈવ માર્જારો દેવગૌસ્તથા

દેવાગારો રથશ્ચૈવ જ્વરઃ કલ્પદ્રુમસ્તથા ।
વ્યાઘ્રપ્રાસાદરક્ષાંસિત મૃગો ગ્રાહસ્તથૈવ ચ

મકરો વૃશ્ચિકશ્ચૈવ પુષ્કલા(-રા?)વર્તકસ્તથા ।
મત્સ્યયુગ્મં ચ શ્યેનં ચ શ્રીવૃક્ષે ચ સરસ્વતી

વાનરં ચ (-રશ્ચ?) મહાચક્રં વૃકશઙ્ખકપિઞ્જલાઃ ।
અઙ્કુશં લોકમાતઙ્ગ ઋક્ષાશ્વં રાજહંસકમ્

ધૂમચામરસિંહાશ્ચ પૂર્ણરિક્તઘટૌ ક્રમાત્ ।
પદ્મિનીકાકચન્દ્રાશ્ચ ધ્વજશૂલૌ ચ દર્પણમ્

નગ્નો દીપશ્ચ વિધવા મઙ્ગલાપિતૃભૂસ્તથા ।
કૂર્મઃ કાલીમહાદુર્ગાર્(-ગે?)સર્પરાજજરદ્ગવૌ

નૃપબ્રહ્મહરીશાન્ વૈ એતે શકુનસૂચકાઃ ।
એકૈકસ્ય ભવેચ્છાખા એક એવ પ્રકીર્તિતઃ

તાન્ સર્વાન્ ક્રમશો વક્ષ્યે યથાવત્તાન્ નિબોધ મે ।
વિઘ્નેશમાદિતસ્તત્ર તતઃ શ્લોકં પ્રવક્ષ્યતે

વિઘ્નેશો દૃશ્યતે યત્ર સાધકેન્દ્રેણ ધીમતા ।
પ્રાર્થિતસ્ય તુ તાં સિદ્ધિં તચ્છિષ્યાયાદિશેદ્ગુરુઃ

શત્રુનાશં તથૈવાગ્રં રાજપૂજા ચ દૃશ્યતે ।
ધનલાભોર્ઽથલાભશ્ચ અભયં ચ ભવિષ્યતિ

કાયક્લેશં તથા રોગં સર્વત્ર ભયમેવ ચ ।
દૃશ્યતે યત્ર મહિષં તત્ર વ્યાધિર્ભવિષ્યતિ

વિદ્યાસુખં મહાજ્યોતિર્દૃશ્યતે શુકપીતકમ્ ।
આયુશ્ચ લભતે યસ્માત્ બન્ધૂનાં ચ સુખં ભવેત્

લમ્બાનનં (કબન્ધં તુ ?) યથાદૃષ્ટં વિયોગં બન્ધુભિઃ સહ ।
યુજ્યતે ભયમન્યુપગ્રં પિશાયેભ્યસ્તથૈવ ચ

દૃશ્યતે યત્ર કાવેરી વિપદં ચ વિનશ્યતિ ।
સુખં ભવતિ સર્વત્ર બહુવ્રીહિર્ભવિષ્યતિ

વૃદ્ધિર્ભવતિ સસ્યાનાં રાજા ચ વિજયી ભવેત્ ।
આયુરારોગ્યદં નૄણાં રોગનાશો ભવિષ્યતિ

દૃશ્યતે તુ બૃહજ્જાલી મુખરોગં વિનિર્દિશેત્ ।
કૃષ્ણકુષ્ઠશરીરે(?)તુ ગૃહનાશમથાપિ વા

પુરુષશ્ચ (-ષે ચ ?) મૃગે દૃષ્ટે બ્રહ્મવર્ચસ્તપોયુતઃ(?) ।
અભિપ્રેતાર્થસિદ્ધિં ચ શુભં ચૈવ વિનિર્દિશેત્

માર્જારા યત્ર દૃશ્યન્તે બન્ધુનાશં વિયોગિતા ।
દધિક્ષીરઘૃતાદીનાં નાશો ભવતિ નાન્યથા

દેવગૌર્દૃશ્યતે યત્ર શત્રુભ્યો ભયમાદિશેત્ ।
સહવાસં ચ પુત્રાણાં માતૄણાં ચ વિનાશનમ્ (?)

દેવાલયે ઽથ દૃષ્ટે વૈ વિદ્યાવૃદ્ધિસ્તથા ભવેત્ ।
પુત્રલાભોર્ઽથલાભશ્ચ ભવિષ્યતિ ન સંશયઃ

વિમાનં દૃશ્યતે યત્ર રાજ્યલાભો નૃપસ્ય તુ ।
શુદ્રબ્રાહ્મણવૈશ્યાનાં લાભઃ સર્વો ભવિષ્યતિ

જ્વરે દૃષ્ટે જ્વરં બ્રૂયાદઙ્ગહાનિઃ ક્ષુધાર્તતા ।
હૃત્તાપ અર્થનાશશ્ચ ભવિષ્યતિ ન સંશયઃ

કલ્પદ્રુમે ઽથ દૃષ્ટે વૈ રાજ્યેન સદૃશં સુખમ્ ।
બ્રાહ્મણસ્ય શ્રિયં બ્રૂયાદીપ્સિતાર્થં ભવિષ્યતિ

વ્યાઘ્રે દૃષ્ટે ભયં ઘોરં ગવાદીનાં વિનિર્દિશેત્ ।
રાજતો ભયમત્યુગ્રં પુરુષસ્ય ન સંશયઃ

પ્રાસાદો દૃશ્યતે યત્ર પુત્રપૌત્રૈઃ સુખી ભવેત્ ।
ધનધાન્યસમૃદ્ધિશ્ચ ભવેત્તત્ર ન સંશયઃ

નિશાચરે ચ વૈ દૃષ્ટે ઘોરં નૄણાં ભયં ભવેત્ ।
બ્રાહ્મણાનાં ગવાં ચૈવ વધં બ્રૂયુરસંશયઃ

કૃશ્ણે મૃગે ઽથ દૃષ્ટે વૈ યજ્ઞકલ્યાણમાદિશેત્ ।
રાષ્ટ્રશાન્તિ કુટુમ્બસ્ય કીર્તિં વાથ વિનિર્દિશેત્

શિંશુમારે ઽથ દૃષ્ટે વૈ મરણં ચ ભયાવહમ્ ।
અજગોમહિષાદીનાં વ્યાધિં ચાર્તિં વિનિર્દિશેત્

મકરે દૃશ્યમાને તુ સ્ત્રીભોગં લભતે ધ્રુવમ્ ।
આરોગયમન્નલાભશ્ચ લભતે નાત્ર સંશયઃ

વૃશ્ચિકો દૃશ્યતે યત્ર વિષેણ મરણં ભવેત્ ।
હૃત્તાપમાત્મપીડા ચ ભાર્યાકલહમેવ ચ

પુષ્કલા(-રા?)વર્તકે દૃષ્ટે મહદ્વૃદ્ધિર્ભવિષ્યતિ ।
વૃદ્ધિર્ભવતિ સસ્યાનાં સુભિક્ષં ક્ષેત્રમેવ ચ

કીર્તિં વૃદ્ધિં જયં ચૈવ વિન્દતે પરમં સુખમ્ ।
બલવૃદ્ધિં સુભિક્ષં ચ મત્સ્યયુગ્મં વિનિર્દિશેત્

શ્યેનસ્તુ દૃશ્તે યત્ર શસ્ત્રેણ મરણં ભવેત્ ।
પલાયનં કુટુમ્બસ્ય શત્રુભિર્ભયમાદિશેત્

નિધનં લભતે સસ્તુ (યસ્તુ ?) સદા લાભવિનિર્ગગતમ્ ।
પુષ્કલં ધનધાન્યં ચ વંશવૃદ્ધિર્ભવિષ્યતિ

કૃકલાસો ભવેદ્યત્ર બ્રાહ્મણૈશ્ચ વિરુદ્ધ્યતે ।
વર્ણસ્ય સંકરં બ્રૂયાત્ ત્વગ્દોષં ચ વિનિર્દિશેત્

શ્રુતલાભં ચ વા વૃદ્ધિં કીર્તિલાભં ચ શાશ્વતમ્ ।
વ્યવહારે જયં ચૈવ સરસ્વત્યાં વિનિર્દિશેત્

કુટુમ્બસ્ય ચ દૌર્બલ્યં વર્ણસંકરમેવ ચ ।
વાનરો દૃશ્યતે યત્ર મૃગેભ્યો ભયમેવ ચ

ચક્રે તુ વિજયં નિત્યં રાજ્યલાભમવાપ્સ્યતિ ।
વ્યાધિદુર્ભિક્ષનાશં ચ શત્રુનાશં વિનિર્દિશેત્

તસ્કરેભ્યો ભયં નિત્યં વૃકે દૃષ્ટે ન સંશયઃ ।
ક્ષુત્પીડાં રાજપીડાં ચ રાષ્ટ્રસ્ય ચ વિનિર્દિશેત્

ભયનાશં શ્રિનયં ચૈવ પુષ્કલાર્થં તથૈવ ચ ।
સ્ત્રીલાભં વસ્ત્રલાભં ચ પાઞ્ચજન્યે વિનિર્દિશેત્

પિઙ્ગલા(?) દૃશ્યતે યત્ર શત્રુભિર્મરણં ભવેત્ ।
રાષ્ટ્રસ્ય કલહં બ્રૂયાત્ વિષં ભવતિ નાન્યથા

હસ્તિલાભસ્તથા રાજ્ઞો અઙ્કુશે તુ વિનિર્દિશેત્ ।
સમરે વિજયં તેષાં પુષ્કલાર્થં વિનિર્દિશેત્

વરાહો દૃશ્યતે યત્ર સસ્યનાશં વિનિર્દિશેત્ ।
શસ્ત્રક્ષયં પુનઃ પશ્યેત્ અર્થનાશં ભયં તુ વા

પુત્રલાભં શ્રિયં ચૈવ રાજ્યલાભં તથૈવ ચ ।
સ્ફુટમૈરાવતે દૃષ્ટે રાજ્યલાભં તુ નિર્દિશેત્

ઋક્ષરાજે ઽથ વૈ દૃષ્ટે ક્ષેત્રનાશો ભવેદ્ધ્રુવમ્ ।
સ્થાનનાશો ભવેત્તત્ર શત્રુવૃદ્ધિં ચ નિર્દિશેત્

ગ્રામે શાન્તિર્મનસ્તુષ્ટિર્મઙ્ગલાયતનં ભવેત્ ।
આયુરારોગ્યમૈશ્વર્યમર્થે(-શ્વે?)ન તુ વિનિર્દિશેત્

રાજહંસો (-સે?) ભવેન્નિત્યં રાજ્યલાભો જયાય તુ ।
આયુરૈશ્વર્યવૃદ્ધિશ્ચ પુષ્કલાકીર્તિરેવ ચ

ધૂમે બન્ધુવિનાશશ્ચ વિદ્યુતા મરણં ભવેત્ ।
નિષાદેભ્યો ભયં ચૈવ વૈધવ્યં ચ ભવિષ્યતિ

ચામરે ચૈવ દૃષ્ટે તુ ગ્રામનાશો ભવિષ્યતિ ।
અનાવૃષ્ટિશ્ચ રાજ્યસ્ય અતિવૃષ્ટિરથાપિ વા

સિંહે દૃષ્ટે ભવેચ્ચૈવ અર્થલાભં ચ નિર્દિશેત્ ।
સદ્વૃદ્ધિં સર્વજન્તૂનાં પુત્રપૌત્રવિવર્ધનમ્

પુત્રપૌત્રવિવૃદ્ધિં ચ પુષ્કલાં શ્રિયમાપ્નુયાત્ ।
પૂર્ણકુમ્ભે તુ વૈ દૃષ્ટે પુરુષાણાં ન સંશયઃ

શત્રૂણાં વૃદ્ધિસંયુક્તં ધનધાન્યવિનાશનમ્ ।
રિક્તકુમ્ભે તુ વૈ દૃષ્ટે ભવત્યેવ ન સંશયઃ

ધનલાભં તથાવાપ્તિઃ(?) પુત્રલાભસ્તથૈવ ચ ।
લભતે સર્વલાભં ચ પુષ્કરિણ્યાઃ પ્રદર્શને

ચિન્તિતાર્થા વિનશ્યન્તિ આયુરૈશ્વર્યનાશનમ્ ।
યસ્મિન્ કાલે તુ સંપશ્યેત્ દુષ્ટકાકં સુદુર્મનાઃ

શત્રુક્ષયં ધનાવાપ્તિં સમરે વિજયં તથા ।
આયુરારોગ્યસંપ્રાપ્તિં પૂર્ણચન્દ્રસ્ય દર્શનાત્

વિજયં શત્રુનાશશ્ચ ધનધાન્યસુખાવહમ્ ।
આયુરારોગ્યદં નૄણાં ઉત્તમધ્વજદર્શનાત્

શત્રુવૃદ્ધિં ધનચ્છેદં સરોગં સસ્યનાશનમ્ ।
સંપશ્યન્ શૂલરાજાનં નાત્ર કાર્યા વિચારણા

આરોગ્શ્યં બલમૈશ્વર્યં કીર્તિં વિદ્યાધનાગમમ્ ।
લભતે નાસ્તિ સન્દેહો દર્પણસ્ય ચ દર્શનાત્

લાભહાનિર્યશો હાનિરાયુર્હાનિસ્તથૈવ ચ ।
સર્વહાનિર્ભવત્યેવ નગ્નસ્યૈવ ચ દર્શનાત્

ચિત્તાર્થં લભતે તત્ર શુભં વાપ્યશુભં તુ વા ।
શત્રુક્ષયં ચ ભવતિ પ્રદીપં યસ્તુ પશ્યતિ

અર્થહાનિર્મનસ્તાપઃ ગૃહે દુશ્ચરિતં ભવેત્ ।
વિધવાદર્શનં યસ્ય ભવત્યત્ર ન સંશયઃ

અર્થલાભો મનસ્તુષ્ટિઃ ગૃહે સંપદ્ભવિષ્યતિ ।
ચિન્તિતાર્થં લભેત્તત્ર સુમઙ્ગલ્યાઃ પ્રદર્શને

શ્મશાનં દૃશ્યતે યત્ર ગ્રામનાશં ધનક્ષયમ્ ।
બન્ધુદેવવિયોગં ચ સર્વતે ભયમેવ વા

અભયં સર્વતત્ત્વેષુ કૂર્મરાપજપ્રદર્શનાત્ ।
રાજ્યં શ્રિયં ચ સંપ્રાપ્ય ક્ષેમારોગ્યયુતો ભવેત્

શત્રુવૃદ્ધિર્ધનચ્છેદઃ વ્યાધિર્દુર્ભિક્ષવર્ધનમ્ ।
ચિન્તિતં નશ્યતે(!) તત્ર મહાકાલીપ્રદર્શનાત્

વિજયં ચાર્થલાભં ચ કીર્તિશ્રીવર્ધનં તથા ।
પુત્રપૌત્રવિવૃદ્ધિશ્ચ દુર્ગે દૃષ્ટે ન સંશયઃ

વ્યાધિં પ્રવાસં મરણં વિપત્સ્યતિ ન સંશયઃ ।
પઞ્ચાસ્યપન્નગં પશ્યેત્ પાપિભિશ્ચાભિભૂયતે

વ્યાધિનાશો(?) મહદ્દુઃખં કુટુમ્બસ્ય વિનાશનમ્ ।
આલોકિતે મહાપાપે ગર્દભે સ્યાન્ન સંશયઃ

જરદ્ગવં પ્રપશ્યેતા નરાઃ શોકાર્ણવં પુનઃ ।
વ્રજન્તિ વ્યાધિના પીડા કલહં ચ ગૃહે ભવેત્

ચક્રવર્તિનમાયાન્તં અવલોક્ય જનાધિપમ્ ।
શ્રિયં પ્રાપ્નોતિ પુત્રાંશ્ચ પુષ્ટિં ચ લભતે નરઃ

ચતુર્મુખં સમાલોક્ય બ્રહ્માણં કમલાસનમ્ ।
સર્વાધિપત્યમાપ્ને વંશવૃદ્ધિશ્ચ જાયતે

વિષ્ણુમાલોક્ય દેવેશં શઙ્ખચક્રગદાધરમ્ ।
સર્વાધિપત્યમાસ્થાય સ્થિતિં ચ લભતે નરઃ

રુદ્રમાલોક્ય ભૂતેશં શૂલપાણિમુમાપતિમ્ ।
શત્રુસૈન્યં મહજ્જિત્વા મોદતે સહ બન્ધુભિઃ

એતે શ્લોકા મયોદ્દિષ્ટાઃ શકુનાનાં વિશેષતઃ ।
એતાંસ્તુ પુસ્તકે લિખ્ય વિવેકં સુમનોરમમ્

એકપત્રે તથૈકૈકં શ્લોકં સંલિખ્ય વાગ્યતઃ ।
સૂત્રેણ સૂત્રયિત્વા તુ પુષ્પાદિભિરથાર્ચયેત્

અનુજ્ઞાપ્ય તતો દેવં વિઘ્નેશં ગણનાયકમ્ ।
આનીય તુ તતઃ શિષ્યાન્ બદ્ધનેત્રાન્ યથાક્રમમ્

તેષાં હસ્તે તુ પુષ્પાણિ નિધાય ચ સમાહિતઃ ।
આદાય પુસ્તકં પશ્ચાત્ પ્રણવેન સમાહિતઃ

શિષ્યહસ્તે નિધાયાથ નમસ્કૃત્વા પ્રસાદ્ય ચ ।
પ્રાર્થયેચ્ચ સ તેનાથ વિઘ્નરાજાગ્નિસંભવમ્

નમસ્તે ઽસ્તુ જગન્નાથ લમ્બોદર ગજાનન ।
સંશયે ઽસ્મિન્ મહાબાહો સંત્યં સંદર્શયસ્વ નઃ

સત્યં હિ ભવતામાહુઃ મનુયસ્તત્ત્વદર્શિનઃ ।
ઇતિ વિજ્ઞાપ્ય દેવેશં શિષ્યં બ્રૂયાત્તતઃ પરમ્

વિસ્રંસયિત્વા સૂત્રં તુ પત્રં ગૃહ્ણીષ્વ પુસ્તકે ।
ઇત્યુક્તસ્તુ તતઃ શિષ્યઃ સ્રસયિત્વા તુ સૂત્રકમ્

ગૃહ્ણીયાત્ પત્રમેકં તુ હસ્તપ્રાપ્તં યદૃચ્છયા ।
આચાર્યસ્તુ તતો તેત્રબન્ધનં પ્રવિમુચ્ય ચ

દેહિ પત્રમિતિ બ્રુયાત્ શિષ્યં પ્રતિ સમાહિતઃ ।
શિષ્યસ્તુ પત્રં દદ્યાચ્ચ ગુરુહસ્તે મહામુને

ગુરુસ્તુ વાચયેત્ પત્રમસંમૂઢેન ચેતસા ।
તદુક્તં વિધિવજ્જ્ઞાત્વા શુભં વા યદિ વાશુભમ્

તતઃ શિષ્યં પ્રતિબ્રૂયાદ્યથોક્તં સર્વમેવ તુ ।
પ્રતિશિષ્યં તથા કૃત્વા જ્ઞાત્વા કર્મ શુભાશુભમ્

દીક્ષયેચ્છિષ્યમાચાર્યસ્તત્પરં લક્ષણાન્વિતમ્ ।
એતત્ પુસ્તકમાદાય સૂત્રયિત્વા વિચક્ષણઃ

અન્યેષામપિ ભક્તાનામનેન વિધિના પુનઃ ।
પૂજયિત્વા ગણેશં તુ પુસ્તકં ચ યથાક્રમમ્

શુભાશુભવિધિં પ્રાજ્ઞઃ પ્રબ્રૂયાદ્દેશિકોત્તમઃ ।
ન નાસ્તિકાનાં સંપશ્યેત્ નાભક્તાનાં કદાચન

ન નિન્દકાનાં સર્વેષાં અનાચારજુષામપિ ।
દુર્વૃત્તાનાં ચ સર્વેષાં બાહ્યદીક્ષાજુષામપિ

અસંભાષ્યેણ પશ્યેચ્ચ ન વિજ્ઞાતે કદાચન ।
શિષ્યાણાં વનિતાનાં તુ ભક્તાનામપિ સર્વદા

સંશયાવિષ્ટચેતાનાં કૃપણાનાં ગુરૌ સદા ।
અજિહ્મકાનાં ભક્તાનાં દેયમેતદ્યથાતથમ્

અનુક્તગુણયુક્તાનાં યદિ પશ્યેત્તુ (દદ્યાત્તુ?) દેશિકઃ ।
દેવતાશ્ચ પ્રકુપ્યન્તે(!) ન તથ્યં ચ ભવિષ્યતિ

ઇતિ વિજ્ઞાય સર્વં તુ પ્રપશ્યેચ્છકુનાનિ તુ ।
શકુનાન્તે તતો વિઘ્નનાયકં પૂજયેત્ ક્રમાત્

પુસ્તકં પૂજયેત્ પશ્ચાત્ ગન્ધપુષ્પાદિભિઃ પુનઃ ।
આચાર્યં પૂજયેત્ પશ્ચાત્ સર્વસ્વં વાધર્મેવ વા

યથાવિત્તાનુસારેણ(!) પૂજયેદ્ગુરુપૂજનમ્ ।
ઉદ્વાસયેત્તતો દેવમાકાશે ગણનાયકમ્