Viṣvaksenasaṃhitā · Chapter 32

iti śrīpañcarātre viṣvaksenasaṃhitāyāṃ [maṇḍalādividhirnāma] ekatriṃśo 'dhyāyaḥ ||
dvātriṃśo 'dhyāyaḥ
viṣvaksenaḥ---
athātaḥ saṃpravakṣyāmi hetirājasya lakṣaṇam /
śṛṇu nārada guhyena(?) uttamādi krameṇa tu

sahasrāraṃ mahācakraṃ śatāraṃ vārdhameva vā /
ṣoḍaśāraṃ tu vā cakraṃ dvādaśāramathāpi vā

kārayenmuniśārdūla sauvarṇādikrameṇa tu /
svarṇena rajatenāpi tāmralohena vā mune

kārayeddhetirājānamuttamādhamamadhyataḥ /
uttamaṃ hetirājasya lakṣaṇaṃ prathamaṃ śṛṇu

aṅguṣṭhāṅgulamānena dvādaśāṅgulamāyatam /
bhrāmayeccakrarūpeṇa vistārāyāmatādṛśam

athavātra muniśreṣṭha mānamārgaṃ vidhīyate /
grāmarājānukūlena nakṣatreṇaiva kārayet

śilpaśāstānurūpeṇa kārayecchilpavittamaiḥ /
ṣaḍdigvātha caturdigvā likhejjvālāgnirūpiṇām

cakreṇa dviguṇīkṛtya daṇḍākārāyataṃ bhevat /
ṣaḍaṅgulaṃ tu tannāhaṃ padmamaṣṭāṅgulocchrayam

viṃśatyaṅgulamānaṃ tat pādāyataṃ kramāt sadā /
karṇikāṃ dvādaśāṅgulyā kārayet sumanoramām

kārayeccakramadhye tu śaktiṃ tadvaiṣṇavaṃ mahat /
suvṛttāntargataṃ dhyātvā tattanmūrtyanusārataḥ

raviragniśca rudraśca brahmāviṣṇustathaiva ca /
kālaśca baḍabāgnistu śikhāyāmagnireva ca

kālarūpastu daṇḍe ca jyotiścakraṃ tu tatprabhā(?) /
aṣṭaśaktisamopetaṃ cakraṃ taṃ devamākṛtim

evaṃ tu hetirājasya lakṣaṇaṃ kathitaṃ mayā /
madhyamaṃ hetirājasya lakṣaṇaṃ śṛṇu suvrata

daśāṅgulasamopetaṃ bhrāmayeccakravat kramāt /
cakradaṇḍāyataṃ samyak aṣṭāṅgulamudāhṛtam

caturaṅgulanāhaṃ tatpadmaṃ pañcāṅgulocchrayam /
padmasya pādavistāraṃ tataḥ pañcadaśāṅgulam

pādānurūpataḥ kṛtvā karṇikāṃ munisattama /
evaṃ tu madhyamaṃ proktaṃ śeṣaṃ pūrvavadācaret

aṣṭāṅgulasya vistāraṃ bhrāmayeccakrarūpakam /
caturaṅgulamāyāmaṃ gadārūpaṃ tu kārayet

triyaṅgulaṃ tu nāhaṃ tatpādotsedhaṃ tathā bhavet /
caturdaśāṅgulaṃ padmaṃ pādavistārameva ca

karṇikāparimāṇaṃ yat kārayedanurūpataḥ /
pūrvavat kārayedvāpi daṇḍākārasya lakṣaṇam

madhyamādhamacakre 'smin nālaṃ kartṛvaśāt kuru /
uttamādikramaṃ proktaṃ śeṣaṃ sādhāraṇaṃ bhavet

bhaktanāṃ darśanārthaṃ yat cakraṃ tu sumanoramam /
tathaiva kārayedvidvān hetirājasya lakṣaṇam

sauvarṇaṃ rājataṃ cettu karmārcādi mahāmune /
balyarthaṃ hetirājānaṃ tāmrairvāpyatha kārayet

miśralohena vā kuryāt śāstradṛṣṭena nārada /
balyutsavaṃ tathārtharṃ(-cā?) tu snapanārthaṃ mahāmune

cakramūrtiriha proktā sarvasaṃpatsukhāvahā /
athavā balibereṇa kārayettantravittamaḥ

divā bimbena kartavyaṃ rātrau cakreṇa kārayet(?) /
cakrābhāve dvisandhyāyāṃ balibereṇa kārayet

evaṃ saṃkṣepataḥ proktaṃ sarvaṃ vaktuṃ na śakyate /
pavitrārohaṇe caiva puṣpayāge samantataḥ

tathā dīkṣāvasāne tu supratiṣṭhātmapūjane /
evameva tu kartavyaṃ cakraṃ bhūmau tu maṇḍalam

daṇḍākāraṃ vinā tasmin niśi cūrṇena pūja(-ra?)yet /
prathamaṃ cakramadhye tu dvitīyaṃ cāru(-ra?) madhyame

tṛtīyaṃ tu nyaseddhīmān bahirvalayameva tu /
evaṃ cūrṇairalaṃkṛtya cakramaṇḍalamuttamam

neṣyate 'smin mahāviṣṇurmadhyamāntargato harim /
tatastu paritoṣa dhīṃ kārayettālamātrataḥ

kundendudhavalākāraṃ taṇḍulairubhayatra tu /
dvārāṇi tālamātreṇa kārayeccaturo diśi