Viṣvaksenasaṃhitā · Chapter 30

sa yāti viṣṇusālokyaṃ kramāt pāriṣadeśvaraḥ //
iti śrīpāñcārātre viṣvaksenasaṃhitāyāṃ śrīrāmajanmotsava- vidhirnāma ekonatriṃśo 'dhyāyaḥ
triṃśo 'dhyāyaḥ
viṣvaksenaḥ---
athātaḥ saṃpravakṣyāmi kṛṣṇajanmadinotsavam /
sarvalokahitārthāya saṃbhūtaṃ yādave kule

devakyāṃ vasudevasya devānāṃ hitakāmyayā /
śrāvaṇe kṛṣṇapakṣe ca rohiṇyāmaṣṭame tithau

aṅkurārpaṇapūrvaṃ tu saptapañcadine 'thavā /
madhyarātre tu pūrve tu kṛṣṇabimbamanuttamam

navanītanaṭaṃ vāpi sarpanṛttamathāpi vā /
caturbhujaṃ vāpi tathā pūjayettaddine mune

prāsādapūrvabhāge tu maṇḍapaṃ caturaśrakam /
vitānadhvajasaṃyuktaṃ darbhamālāsamāvṛtam

puṣpamālyairalaṃkṛtya muktādāmai(?)ralaṃkṛtam /
indrādīśānaparyantaṃ mārjanaṃ praṇavena tu

prokṣayedgandhatoyena dvādaśākṣaravidyayā /
gomayena samālipya pūrvādikramayogataḥ

pradīpaṃ ca caturdikṣu dīpayet sādhakaḥ kramāt /
pālikābhiralaṃkṛtya maṇḍapasya samantataḥ

maṇḍapasya ca madhye tu catuṣpādāsanaṃ nyaset /
tatrordhve chādanaṃ kuryāt sitapuṣpaṃ vinikṣipet

arcayedgandhapuṣpaistu dharmādikramayogataḥ /
bimbaṃ tu sthāpayettatra brāhmaṇaiḥ svastivācya ca

kautukaṃ bandhayitvā tu brāhmaṇanāmanujñayā /
aṅguṣṭhānāmikābhyāṃ tu dvādaśākṣaravidyayā

mukhavāsaṃ tato dadyāt tālavṛntaiśca vījayet /
chatracāmarasaṃyuktaṃ nṛttagītasamanvitam

vīṇāveṇusamāyuktaṃ kautukaṃ bandhayeddhareḥ /
śaṅkhadundubhisaṃyuktaṃ svastivācanapūrvakam

pādukādvayasaṃyuktaṃ śayane saṃniveśayet /
pūrvavacchayanaṃ kalpya tanmadhye devamānayet

dakṣiṇe balabhadraṃ ca paścāttatrādhivāsayet /
aṣṭākṣareṇa digbandhaṃ kārayet sādhakottamaḥ

tathaiva vinyaseddevaṃ viṣṇumantreṇa sādhakaḥ /
pādyārghyācamanīyaṃ ca gandhapuṣpaṃ tathaiva ca

puṇyāhaṃ vācayettatra vaiṣṇavairvedapāragaiḥ /
ācāryaḥ śuklavāsāstu śuklayajñopavītavān

ūrdhvapuṇḍradharaścaiva sapavitrakarastathā /
ājānupādau prakṣālya dvirdvirācamanīyakam(?)

devasya dakṣiṇe pārśve uttarābhimukhāsane /
prāṇāyāmatrayaṃ kṛtvā sṛṣṭinyāsaṃ tathaiva ca

tathaiva devaṃ vinyasya mantramaṣṭākṣaraṃ mune /
sauvarṇādighaṭaṃ gṛhya śuddhatoyena mantravit

tatpātraṃ kṣālayet paścāt viṣṇugāyatriyā mune /
toyapūrṇaṃ sugandhaṃ ca sūtravastrasamanvitam

dhānyarāśau vinikṣipya tasya madhye mahāmune /
mūlaberāttato devaṃ dhyāyannārāyāṇaṃ prabhum

śyāmalaṃ bālavapuṣaṃ kṛṣṇaberamunasmaran /
tattoyaṃ pratimāmūrdhni secayenmūlavidyayā

kṛtāñjalipuṭo bhūtvā namaskṛtya punaḥ punaḥ /
śayane śāyayitvā tu taṃ devaṃ mūlavidyayā

tathaiva balabhadraṃ ca śāyayettasya mantrataḥ /
vastrairācchādayeddevaṃ sitapuṣpaiḥ samarcayet

tato nārāyaṇaṃ sūktamuccaret sādhakottamaḥ /
śaṅkhadundubhisaṃyuktaṃ vedādhyayanasaṃyutam

vīṇāveṇusamāyuktaṃ jhallarīmaddalairyutam /
vārasairandhrisaṃyuktamācāryo mantramuccaran

śaṅkhādighoṣasaṃyuktaṃ tato devaṃ samuddharet /
gandhapuṣpaṃ vinikṣipya namaskṛtya punaḥ punaḥ

śrīramājyena saṃyuktaṃ bhalabhadrāya dāpayet /
vaiṣṇavebhyaḥ sadasyānāṃ sarveṣāṃ ca pradāpayet

kṣīraṃ dadhighṛtaṃ caiva pradadyādbalakṛṣṇayo /
kadalīpanasaṃ caiva jambvādiphalameva ca

tadante devadevasya dāpayenmūlavidyayā /
tailaṃ ca rajanīcūrṇaṃ tāvubhau mūrdhni secayet

śeṣaṃ ca vaiṣṇavebhyastu dadyāt sarvamathāpi vā /
śaṅkhadundubhinirghoṣaiḥ tūryaveṇusamanvitaiḥ

nṛttagītasamāyuktaṃ brāhmaṇaiḥ svastivācanam /
rāmakṛṣṇo tu saṃsthāpya cāsane puṣpasaṃyute

arghyapādyādinābhyarcya homakarma samācaret /
nityāgnau vātha pūrvasmin kārayedvā mahāmune

vaiṣṇavāgnau tu juhuyāt samidājyacarūṇi ca /
mūlamantreṇa mantrajñaḥ pañcaviṃśatisaṃkhyayā

pratyekaṃ tu muniśreṣṭha paścācchāntiṃ samācaret /
madhunā payasā dadhnā hūyatena(?) ghṛtena ca

tathaiva juhuyānmantraiḥ pūrṇāhutimathācaret /
homānte devadeveśaṃ snāpayedvidhicoditam

kṛṣṇagandhena kāṣṭhane uśīraiścandanena ca /
rajanīdvayacūrṇena punaḥ kṛṣṇatilaistathā

siddhārthasarṣapaiścaiva sarvadhānyāni sādhakaḥ /
cūrṇokṛtya muniśreṣṭha snapanānte 'bhiṣecayet

tatastu rajanīcūrṇaṃ snāpayeddevamūrdhani /
puṣpaṃ datvā namaskṛtya maṅgalālāpanaṃ kuru

śuddhasnānaṃ tataḥ kṛtvā gandhatoyena sādhakaḥ /
vastrābharaṇamālyaiśca kṛtvā gandhānulepanam

arcayedvidhivaddevaṃ gandhapuṣpādibhistathā /
alaṃkṛtya tato devaṃ nīrājanasamanvitam

godānaṃ bhūmidānaṃ ca hiraṇyaṃ vastrabhūṣaṇam /
sarvadānaṃ tato dadyāt brāhmaṇebhyo yathākramam

tadante vaiṣṇavān pūjya bhojanācchādanādibhiḥ /
tāmbūlaṃ vātha sarveṣāṃ yathāvittānusārataḥ(?)

hiraṇyaṃ vātha vastraṃ vā gāvo vā dhānyameva vā /
ācāryāya pradātavyamatisaṃpattikāraṇam

dānasyānantaraṃ devamarghyapādyādinārcayet /
pāyasaṃ kṛsaraṃ gaulyaṃ śuddhānnaṃ ca pṛthak pṛthak

kadalīpanasairyuktaṃ deveśāya nivedayet /
pānīyācamanīyaṃ ca dadyāddevāya bhaktitaḥ

bhojyāsanaṃ vyapohyāśu devaṃ bhogāsane nayet /
devasyācamanaṃ dadyānmukhavāsaṃ pradāpayet

pūrvamālāṃ visṛjyātha cānmālāṃ tu dāpayet /
devadevamalaṃkṛtya mukhavāsaṃ punardadet

nṛttagītasamāyuktaṃ vīṇāveṇusamanvitam /
devāgāraṃ paribhramya garbhagehe nayeddharim

prabhātāyāṃ tu śarvaryāmutsavaṃ kārayettataḥ /
grāme vā nagare vāpi mārgaśuddhiṃ ca kārayet

śibikāṃ vā rathaṃ vāpi kuñjaraṃ vā hayaṃ tu vā /
vastrapuṣpairalaṃkṛtya mālyaiśca vividhairapi

evaṃ devamalaṃkṛtya sthāpayedyānamadhyame /
grāmapradakṣiṇaṃ kṛtvā geyanṛttādisaṃyutam

paṭahaistālasaṃyuktaṃ kṛtvā grāmaṃ paribhramet /
tailaiścandranasaṃyuktaṃ rajanīcūrṇameva ca

dāpayedvaiṣṇavānāṃ tu sadasyānāṃ viśeṣataḥ /
punaḥ pradakṣiṇaṃ kṛtvā devālayamanuttamam

vidhivat snapanaṃ kṛtvā devadevaṃ sanātanam /
mahāhavirnivedyātha garbhāgāre nayeddharim

iti saṃkṣepataḥ proktaḥ kṛṣṇajanmadinotsavaḥ /
sarvapāpakṣayakaraḥ sarvayajñaphalapradaḥ