Viṣvaksenasaṃhitā · Chapter 26

etatte kathitaṃ samyagaṅkurāṇāṃ suvistaram //
iti śrīpāñcarātre viṣvaksenasaṃhitāyāṃ aṅkurrāpaṇavidhirnāma pañcaviṃśodhyāyaḥ ||
ṣaḍviṃśo 'dhyāyaḥ
viṣvaksenaḥ---
ataḥ paraṃ pravakṣyāmi dhvajotthāpanamuttamam /
yenopasargā(?)naśyanti sarvasaṃpatsukhāvaham

adhvajo viṣṇuyāgastu niṣphalaḥ syānna saṃśayaḥ /
tīrthasnānadināt pūrvaṃ saptaviṃśatike 'hani

ekaviṃśatike vā syāt(vāpi?) dhvajotthāpanamācaret /
athavārambhadivase sadyaḥ kālodbhavo bhavet

ārohaṇaṃ divā kuryāt ketorniśyaṅkurārpaṇam /
ekatra divase yāge na dhvajoddhāra iṣyate

aṅkurārpaṇapūrvaṃ tu dvitīyaṃ parikīrtitam /
gopura(-rā?) sthānayārmadhye dhvajapīṭhaṃ prakalpayet

athavā balipīṭhasya vainateyasya vā punaḥ /
hastamātraṃ parityajya balipīṭhasya cāntare

kalpayeddhvajapīṭhaṃ tu mānaṃ tasya pracakṣate(?) /
tasyārdhaṃ vāpyapohyaiva dhvajapīṭhaṃ prakalpayet

caturhastaṃ tadardhaṃ vā vistārāyāmataḥ samam /
hastocchrāyaṃ dvihastaṃ vā sthāpya stambhasya madhyataḥ

ekahastaṃ tathā bhūmau gartaṃ pīṭhādadhaḥ śubham /
stambhasya paritaḥ kuryāt mekhalātritayaṃ budhaḥ

vṛttaṃ vā caturaśraṃ vā ṣoḍaśāṣṭāśrameva vā /
antarādi tadutsedhamaṅgulīnāṃ yathākramam

mekhalocchrāyamāyāmamekaikaṃ caturaṅgulam /
tālamātraṃ visṛjyaiva vedikāyāṃ samantataḥ

paścāttu mekhalāḥ samyak kārayenmantravittamaḥ /
mekhalānāmathordhve tu vṛttavediṃ samācaret

caturaṅgulamutsedhaṃ tadūrdhve 'bjadalaṃ(padmakaṃ?)likhet /
ṣoḍaśadvādaśaṃ vāpi cāṣṭapatramathāpi vā

dvyaṅgulaṃ tu ghanaṃ jñeyaṃ karṇikāsahitaṃ mune /
tryaṅgulaṃ tu tadutsedhaṃ dvyaṅgulaṃ tadghanaṃ bhavet

iti padmadalaṃ (-vidhiḥ?) prokta uttamādhamamadhyataḥ /
stambhasya paritaḥ kuryāt sarvālaṃkārasaṃyutam

evamuktaprakāreṇa dhvajapīṭhaṃ prakalpayet /
pūrvaṃ vāpyathavā paścāt kalpayet pīṭhamuttamam

anyathā yadi cedvedimanarthamaśubhāvaham /
tasmāt sarvaprayatnena kārayedvidhicoditam

dhvajastambhaṃ pravakṣyāmi viviktena mahāmune /
candanaṃ campakaṃ vāpi bilvamarjunameva ca

tekavṛkṣaṃ ca khadiraṃ sālaṃ tindukameva ca /
campakaṃ cāṣṭakaṃ caiva kramukaṃ nālikerakam

tālaṃ veṇuṃ tathaivātra saṃbhavena tu kārayet /
śatatālārdhamardhaṃ ca mukhyamadhyādhamaṃ kramāt

aśītitālamicchanti kecittasyārdhameva vā /
gopurākṛtitulyaṃ syāt stambhamadhyardhameva vā

stambhapramāṇamathavā tulyamadhyardhameva vā /
prāsādena samucchrāyaṃ suṣirādivivarjitam

triṃśadaṅgulanāhaṃ tu mūladaṇḍasya nārada /
madhyamaṃ cāṣṭaviṃśat(?)tadagraṃ ṣaḍviṃśakaṃ bhavet

sacchidrayantratriyate hyadhastādgaruḍālayam /
lohaṃ dārumayaṃ vāpi garuḍaṃ tatra yojayet

devābhimukhamāsīnamalpakāyaṃ kṛtāñjalim /
ṣoḍaśāṅgulakaṃ vāpi dvādaśāṅgulakaṃ tathā

aṣṭāṅgulamatha jñātvā kalpayedgaruḍaṃ mune /
tathā vā phalakaṃ (-kāṃ?)kṛtvā yathākāmaṃ munīśvara

tanmadhye garuḍaṃ likhya svasthāne vinatāsutam /
yojayitvā tataḥ kheśaṃ sthāpayet svasvamantrataḥ

vedikopari mantrajñaḥ suprapāṃ parikalpayet /
darbhamālāsamāyuktaṃ muktādāmasamanvitam

prapāyāṃ pūrvabhāgādi patākāstatra yojayet /
daśahastaṃ saptahastaṃ pañcahastamathāpi vā

anyāmaṣṭakarāṃ yaṣṭiṃ stambhe yantreṣu yojayet /
paṭasya lakṣaṇaṃ tasmin viśeṣaṃ kathaya mi te

śṛṇuṣvāvahito bhūtvā sarvasaṃpatsukhāvaham /
dvādaśaṃ(!)daśahastaṃ vā navasaptapaṭaṃ bhavet

āyāmamiti saṃproktaṃ vistāramadhunocyate /
ṣaṭsaptatālavistāraṃ dvā[ra]vistāramucyate

pucchāyāmaṃ dvitālaṃ syāttatsamaṃ śira ucyate /
śirasā tu samau jñeyau bhūjau tasyārdhameva vā

bhujadvayavihīnaṃ vā paṭametadviśiṣyate /
kṣudraprāsādarūpaṃ cet navasaptapaṭaṃ bhavet

navahastācca nū(nyū?)naṃ vai mahāgehe tu neṣyate /
yo mohāt kurute tasmin kriyā bhavati niṣphalā

ālikhedgaruḍaṃ tatra suvarṇābhaṃ suvarcasam /
dhruvadṛggalanābhyantaṃ garuḍetsedhamiṣyate

navatālaparicchinnaṃ mānonmānapramāṇataḥ /
kiñcidāyatavṛttākṣaṃ raktākṣaṃ nīlanāsikam

utkuñcitaṃ vāmapādaṃ dakṣiṇaṃ pṛṣṭhataḥ sthitam /
gagane gamanārambhaṃ pakṣavikṣepaṇānvitam

puṣpāñjalipuṭopetaṃ raudraṃ ca vinatāsutam /
nāgābharaṇasaṃvītaṃ smitāsyaṃ kanakāṅgadam

karaṇḍamakuṭaṃ nīlavāsasaṃ priyadarśanam /
suraktapāṇyaṅghritalaṃ daṃṣṭrābhyāmujjvalānanam

ananto vāmakaṭako yajñasūtraṃ tu vāsukiḥ /
takṣakaḥ kaṭisūtraṃ tu hāraḥ karkoṭakastathā

padmo dakṣiṇakarṇe tu mahāpadmastu vāmataḥ /
śaṅkhaḥ śiraḥ pradeśe tu gulikastu bhujāntare

etairaṣṭoragairādyairbhūṣitaṃ bhujagottamaiḥ /
anantagulikau viprau raktau vahnisamudbhavau

vāsukiḥ śaṅkhapālaśca pītau candrodbhavau nṛpau /
mahākṣa(-bja?) takṣakau veśyau śuklau vārisamudbhavau

padmakarkoṭakau śūdrau kṛṣṇau vāyusamudbhavau /
likhitvā garuḍaṃ tatra chatraṃ copari kalpayet

atho 'mṛtasya kalaśaṃ padmaṃ caivātra saṃlikhet /
tābhyāmubhayataḥ kuryāt dīpau dvau śubhadarśanau

citrābhāsapratiṣṭhāṃ tu kārayenmantravittamaḥ /
chāyādhivāsanaṃ kuryāt jalaṃ saṃhṛtya deśikaḥ

śāyayitvā tato vedyāṃ saṃhṛtyotpādya tattvataḥ /
dhānyarāśiṃ vinikṣipya vedimadhye samantataḥ

vedikākalaśeṣvaṣṭāvanantādīn prapūjayet /
śaṅkhādimaṅgalānāṃ tu vinyaset paritaḥ kramāt

pūrve śaṅkhaṃ niyuñjīta āgneye cakrameva ca /
yāmye tu vinyaset ketuṃ śriyaṃ vai nairṛte tathā

darpaṇaṃ vāruṇe bhāge vṛṣabhaṃ vāyugocare /
some tu matsyayugmaṃ tu kumbhamīśānagocare

evaṃ tu maṅgalān(?)nyasya pūrvādikramayogataḥ /
pūjayet kalaśeṣvaṣṭamaṅgalāni yathākramam

vāsobhirveṣṭiteṣveṣu nikṣiptakanakeṣu ca /
vāsāṃsi madhye saṃstīrya garuḍaṃ tatra śāyayet

pratyaggrīvaṃ tato vastraiḥ saṃcchādya patageśvaram /
tasya dakṣiṇataḥ kumbhaṃ vinyasettaṇḍulopari

vāripūrṇaṃ susaṃvītaṃ sadaśenāhatena tu /
śuklenāmbarayugmena mṛdunā suśubhena ca

saratnaṃ hemasaṃyuktaṃ sāpidhānaṃ sakūrcakam /
tasminnāvāhayeddevaṃ garuḍaṃ vinatāsutam

āvāhanavidhiṃ samyak pravakṣyāmi mahāmune /
sauvarṇaṃ rājataṃ pātraṃ tāmraṃ mṛṇmayameva vā

āḍhakena tu saṃpūrṇaṃ payobhirvāribhistu vā /
tatpātre devamāvāhya ākāśānmantravittamaḥ

ehyehi khagarājendra vainateya mahābala /
sāṃnidhyaṃ pārṣadaiḥ sārdhaṃ kuru tubhyaṃ namo namaḥ

tatpātrapatitaṃ devamānayet kumbhatoyake /
mūlamantreṇa mantrajñastanmantramadhunocyate

oṃ namo 'ṣṭakulanāgabhūṣaṇāya vainateyāya nāgaśoṇitadigdhāṅgāya suparṇāya saptapātālavāsine pakṣirājāya bhagavadvāhanāya garuḍāya trailokyakṣobhaṇāya brahmādicaturakṣarānusārāya(?)yugāntabījāya māturarthe(?) śokanāśāya hanahana(?)vighnanāśāya svāhā |
anena tu svamantreṇa stutvā tu vihageśvaram /
sāṃnidhyaṃ kalpayettatra pakṣirājasya sarvadā

evamāhūya garuḍaṃ dhvajamudrāṃ pradarśayet /
vāmasyopari saṃsthāpya dakṣiṇaṃ tu karaṃ samam

aṅguṣṭhaṃ cālayettatra dhvajamudrāṃ pradarśayet /
evaṃ mudrāṃ prakurvīta garuḍaṃ sarpabhūṣaṇam

gandhādibhiḥ samabhyarcya dhūpadīpāntameva hi /
tataḥ paṭagataṃ bimbaṃ śayānaṃ garuḍasya tu

layamārgeṇa saṃhṛtya punarutpādayet kramāt /
pṛthivyādini tattvāni bījādīne yathākramam

savācakāni vinyasya mantradehaṃ prakalpayet /
sakalīkaraṇaṃ kṛtvā dhyānamārgeṇa deśikaḥ

kumbhasthitena toyena prokṣayettaṃ svavidyayā /
pūrvādikalaśasthādbhiranantādīn svanāmabhiḥ

praṇavādinamontaiśca kuśaiḥ saṃprokṣayet kramāt /
sāṃnidhyaṃ prārthayitvā tu yāvadyāgāvasānakam

tataḥ saṃpūjayet sarvairupacāraiḥ khageśvaram /
ghṛtāplutaṃ tu mudgānnaṃ naivedyaṃ parikalpayet

mukhavāsaṃ pradāyātha homakarma samārabhet /
sthaṇḍilaṃ tu caturdikṣu kṛtvā tatra vidhānataḥ

vaiṣṇavāgniṃ nidhāyātra homakarma samārabhet /
samidājyena caruṇā pratyekaṃ śatamaṣṭa ca

āhutīrjuhuyurviprāścatvāraḥ samameva tu /
dīkṣitā eva juhuyuḥ sottarīyāḥ svalaṃkṛtāḥ

catasro mūrtayaḥ proktāḥ pakṣirājasya deśikaiḥ /
svāhāntaṃ juhuyuḥ sarve mūrtipāḥ mūrtibhāvitāḥ

evaṃ samāpya homaṃ tu spṛśeyuste khageśvaram /
pādayorjaṭhare cāsye mūrdhni caiva yathākramam

athavā mūlamantreṇa homamekaṃ tu vā mune /
prācīṃ diśaṃ samāsādya kārayettantravittamaḥ

vinā homaṃ tu vā kuryādgaruḍasthāpanaṃ mune /
dhvajādanyatra kartavyaṃ caturhemaṃ yathākramam

evaṃ samāpya homaṃ tu sthāpanaṃ garuḍasya ca /
athavāsmin muniśreṣṭha adhivāsanamuttamam

pravakṣyāmi samāsena supuṇyāhapuraḥsaram /
puṇyāhaṃ kārayitvā tu brāhmaṇaiḥ saha mantravit

bandhayet kautukaṃ paścādvainateyasya mantrataḥ /
vedikopari dhānyaiśca pūrayedbhārasaṃmitaiḥ

aṣṭapatraṃ likhet padmaṃ vastreṇācchādayet punaḥ /
tadardhaṃ taṇḍulaṃ caiva tasyārdhaṃ tilameva ca

vedikāyāṃ tu saṃstīrya vastrairācchādayet punaḥ /
raktapuṣpaṃ tu saṃstīrya gandhapuṣpaiḥ samarcayet

tatraiva śāyayeddevaṃ pūrvoktena vidhānataḥ /
arcayedgaruḍaṃ tatra dhūpadīpāntameva hi

devasya dakṣiṇe pārśve sthāpayet kumbhamuttamam /
tasminnāvāhayet kumbhe vainateyaṃ mahābalam

ākāśāt patitaṃ kheśaṃ dhvajarūpe hi saṃsthitam /
ehi kheśa mahābāho vainateya mahābala

sāṃnidhyaṃ kuru pakṣīśa prasīdātra namo 'stu te /
anenāvāhayitvā tu mantreṇaiva tu deśikaḥ

gandhapuṣpādibhirdravyaiḥ vīśaṃ kumbhe tator'cayet /
tatastu kalaśānaṣṭau kumbhasya parito nyaset

indrādīśānaparyantamindrādīṃśca kramānnyaset /
kalaśeṣvarcayitvā tu lokeśān gandhapuṣpakaiḥ

tadbāhye vinyasedaṣṭamaṅgalān(!) paritastathā /
arcayitvā tato homaṃ prācyāṃ ca sthaṇḍile kramāt

samidājyacarūn samyag aṣṭottaraśataṃ pṛthak /
juhuyādvainateyasya mūlamantreṇa deśikaḥ

praṇavaṃ pūrvamuccārya namaskāraṃ tataḥ kramāt /
caturviṃśatikaṃ paścāt vyañjanaṃ tu tṛtīyakam

svareṇādyena saṃyuktamūnatriṃśattathaiva ca /
ṣoḍaśaṃ coccaret paścāt svareṇaikādaśena ca

vainateyapadaṃ paścāt caturthyanta samanvitam /
svāhākārasamāyuktaṃ mūlamantraṃ vidurbudhāḥ

homaṃ samāpya vidhivat kumbhādāvāhayet paṭe /
taṃ paṭaṃ prokṣayitvā tu haṃsaḥ śuciṣadi tyṛcā

mūlamantreṇa cāvāhya garuḍaṃ sarpabhūṣaṇam /
tadrātrau vidhivat prokṣya pūjayedgandhapuṣpakaiḥ

saktukhaṇḍarasopetaṃ(-taiḥ?) mudgānnaiśca gulaudanaiḥ /
bhakṣyaiśca vividhaiścānyaiḥ pūjayettaṃ khageśvaram

mukhavāsaṃ tato dadyāt stutimantreṇa toṣayet /
pūrvādīśānaparyantamindrādīṃścaiva pūjayet

neṣyate 'smin muniśreṣṭha pralayādikriyākramaḥ /
dviprakāro mayā prokto adhivāsavidhikramaḥ

ācāryecchānurūpeṇa kārayedekadhātra tu /
tatastu devatāhvānaṃ svasvamantreṇa tanniśi

kārayenmuniśārdūla jagatsaṃrakṣaṇārthakam /
prāsādasyāgrabhāge tu garuḍābhimukhaṃ yathā

droṇadvayena saṃpūrṇaṃ satoyaṃ raktavarṇakam /
trisūtraṃ tantunāveṣṭya pañcaratnaiḥ sapallavaiḥ

kūrcadvayasamāyuktaṃ raktamālyairalaṃkṛtam /
vastrayugmena saṃveṣṭya gandhapuṣpaistu pūritam

evaṃ lakṣaṇasaṃyukte kumbhe cāvāhayedbudhaḥ /
indramagniṃ yamaṃ caiva nirṛtiṃ varuṇaṃ tathā

vāyuṃ somaṃ tatheśānaṃ candrādityamarudgaṇān /
vasūnaṣṭa tathā rudrānekādaśa vināyakam

kārtikeyaṃ vīrabhadraṃ dvādaśādityasaṃjñakān /
tryakṣaṃ pañcamukhaṃ devaṃ nīlakaṇṭhamumāpatim

bhūteśāṃśca tathā sarvān sagaṇānāhvayettataḥ /
mātṝścaiva tathā durgāṃ jyeṣṭhāṃ caiva sarasvatīm

kāntiṃ śāntiṃ śuciṃ mudrāmumāṃ lakṣmīṃ tathaiva ca /
sagaṇaiḥ parivāraiśca tān nayet kumbhatoyake

tatastvāvāhayeddevān kumudādīṃśca nārada /
teṣāṃ ca parivārāṇi prayatnenānayed ghaṭe

indrādīśānaparyantamāvahet kumbhatoyake /
kuṃbhatoyasthadevānāmarcanaṃ gandhapuṣpakaiḥ

dhūpadīpaiḥ samāpyevaṃ ghaṇṭāśabdasamanvitam /
havirnivedayet paścāt sarvadevapriyārthakam

anyathākṛtatulyaṃ syāt mahān doṣo bhaviṣyati /
tadgrāmanāśakṛdvāpi tatrastho narakaṃ vrajet

tasmāt sarvaprayatnena tatkumbhe pārṣadān nyaset /
maṇḍape caindrabhāge tu caturhastapramāṇataḥ

gomayena samālipya śālinā vedimācaret /
aṣṭadroṇaṃ tadardhaṃ vā tasyārdhaṃ vārdhameva vā

pūrayet sthaṇḍile madhye cāṣṭapatrābjamālikhet /
navavastreṇa saṃchādya padmaṃ praṇavamuccaran

dakṣiṇādikrameṇaiva śāyayeddakṣiṇāśiraḥ /
tanmadhye bherikāṃ nyasya navaṃ lakṣaṇasaṃyutam

uttaryoṣṇīṣasaṃyukta ācāryo mantravittamaḥ /
paścimābhimukho bhūtvā tāṃ bherīṃ pūjayet kramāt

gandhādibhiḥ samabhyarcya hariṃ smṛtvādimantrataḥ /
yāvadrātra(-trya?)vasānaṃ tu tāvattanniśi tāḍayet

paścāt pañcamahāśabdaṃ nṛttagītasamanvitam /
uttaryoṣṇīṣasaṃyukto yāmalācāryataḥ kramāt

kārayet sarvapārṣadyān vainateyādikān kramāt /
evaṃ saṃghoṣayitvā tu yāmalācāryasaṃyutam

rātrāntakaṃ(ārātryantaṃ?)viśeṣeṇa sarvadevapriyārthakam /
kuryāt pañcamahāśabdaṃ sadā śubhavivardhanam

grāmarājñośca vṛddhiḥ syāt tathaiva nagarādiṣu /
tasmāt sarvaprayatnena bherīṃ tāṃ niśi tāḍayet

anyathā cenmahādoṣo rāṣṭrabhraṃśo bhaveddhruvam /
tadgrāmaṃ nidhanaṃ yati vyādhibhiḥ pīḍanaṃ dhruvam

evaṃ kṛtvā vidhānena dhvajotsavamathācaret /
tataḥ prabhāte vimale śaṅkhabherīravākulam

sarvālaṃkārasaṃyuktaṃ kṛtvā grāmaṃ paribhramet /
paribhramaṇavelāyāṃ baliṃ kuryāt samāhitaḥ

salājaṃ rajanīcūrṇaṃ kṣīraṃ dadhisamanvitam /
pūrvamindrādilakṣmyantān devāṃstatraiva pūjayet

nālikeraphalaṃ caiva pañcadravyasamanvitam /
balyannametaiḥ saṃyojya balidānaṃ tu cotsave

krameṇa kārayet paścāt pūrvavaddhomapūrvakam /
dhvajotthānaṃ divā kuryādrātrāvāhanameva ca

sa (tad?)dhvaje devatāhvānaṃ madhyāhne tu viśeṣataḥ /
ārohaṇaṃ divā kuryāt ketorniśyaṅkurārpaṇam

haviṣā balidānaṃ tu kṛtvā dvārāgrapīṭhayoḥ /
madhye hastasamāṃ vediṃ madhye devān samarcayet

āramya balidānaṃ tu kuryādgrāmādivāstuṣu /
indrādi brahmaparyantaṃ digvidikṣu kramānnyaset

tatkumbhe devamāvāhya tattoyena samarcayet /
pūrvādindrādilakṣmyantān devāṃstatra supūjayet

tatastu gaṇasaṃyuktaṃ kṛtvā grāmādivāstuṣu /
kumudādīṃśca devāṃśca pūjayettānanukramāt

ācāryo dhautavāsāstu uttarābhimukhaḥ sthitaḥ /
gandhapuṣpādinābhyarcya aindrādyaiśāntakādiṣu

teṣāṃ nāma samuccārya baliṃ dadyādvicakṣaṇaḥ /
yāvadyāgāvasānaṃ tu tiṣṭhanti balidevatāḥ

atra kaścidviśeṣo 'sti devatānāṃ balikrame /
dhvajārohaṇakāle vai cotsaveṣu viśeṣataḥ

yāgāvasānaṃ yāvattu tāvadaindrādikān mune /
yāvallakṣmyavasānaṃ tu madhyāhne kramayogataḥ

pūjayedgandhapuṣpādyairhaviṣā vedimadhyame /
baliṃ dadyādyathālabdhaṃ madhyāhne rātriṣu kramāt

teṣāṃ tu balikāryāṇi viṣṇoḥ prītikaraṃ śubham /
aṅkurotsavakālānte utsavārthaṃ mahāmune

kārayedyāgasiddhyarthaṃ yāgamaṇḍapapūjanam /
tatpūjānte muniśreṣṭha homaṃ kuryādyathāvidhi

homānte kumudādīnāmārabhya balimācaret /
yāvattīrthāvasānaṃ tu tāvadgrāmādivāstuṣu

anyathāvāhanabalirdhvajayāge kṛto bhavet /
dhvajayāgavināśena utsavo niṣphalo bhavet

utsavasya vināśena nityapūjā ca niṣphalā /
nityapūjāvināśastu sarvasaṃhārakāraṇam

tasmāt sarvaprayatnena āvāhanabaliṃ kuru /
ānīya garuḍaṃ veśma kṛtvā caiva pradakṣiṇam

smṛtvā kālavidhiṃ paścāt kṛtvā puṇyāhaghoṣaṇam /
pīṭhasya yāmyapārśve tu dhvajadaṇḍaṃ tu śāyayet

tadagraṃ dakṣiṇe sthāpya mūlamuttarato nyaset /
vimāne paścimadvāre 'pyuttare śāyayedguruḥ

dakṣiṇadvāramevaṃ cet(-ke cettu?)dhvajastambhaṃ mahāmune /
pīṭhasya pūrvapārśve tu śāyayedaindraśīrṣakam

tanmūlamavaṭe nyasya mūlamantramanusmaran /
uttaradvāramevaṃ syāt(?)taddhvajārohaṇaṃ prati

anyathā cenmahādoṣo grāmarājñoravṛddhikṛt /
dine dine muniśreṣṭha dharmamārgo vinaśyati

tasmāt sarvaprayatnena kārayedvidhicoditam /
mahākumbhasthatoyena stambhaṃ prakṣālya mantrataḥ

taddhvajaṃ tu samādāya prokṣayenmantravittamaḥ /
mūlamantreṇa matimān dhvajayaṣṭyā(-ṣṭiṃ?)tu bandhayet

niścalaṃ sthāpayitvā tu dhvajadaṇḍena coddharet /
yantreṇa coddharedvāpi rajjunā saha deśikaḥ

vediṃ kuryāttu pūrvoktāṃ lakṣaṇena samanvitām /
vedikāṃ tu samālipya kṛtvā ca svastivācanam

yaṣṭyagrāddaṇḍamūlāntaṃ darbhānāveṣṭya sādhakaḥ /
darbhamālādināveṣṭya daṇḍamūlāntameva hi

pādyācamanagandhaṃ ca puṣpaṃ dhūpaṃ tathaiva ca /
dīpaṃ caiva yathāyogaṃ ghaṇṭānādasamanvitam

arcayedgaruḍaṃ caiva caruṃ paścānnivedayet /
phalasaktusamopetaṃ mudgrānnaṃ ca ghṛtāplutam

pṛthak pātre tu saṃsthāpya garuḍāya nivedayet /
pānīyācamanaṃ datvā mukhavāsaṃ tathaiva ca

evamabhyarcya garuḍaṃ sarvadevapriyaṃ śubham /
dikpālāntamanādyantaṃ parivāramathārcayet

tatastu lokapālāṃstu pūjayedvedikādhare /
pūrvādikramayogena svanāmnā paripūjayet

evaṃ dine dine kuryāt sandhyayorubhayorapi /
niveditaṃ ca yaddravyamannaṃ puṣpaṃ phalaṃ tathā

tatpiṇḍamiti vijñeyaṃ strīṇāṃ caiva pradāpayet /
sumaṅgalī ca nārī ca satī śuddhā śubhavratā

tat prasādamiti smṛtvā snātvopoṣya śubhānanā /
prāśayedgaruḍaṃ dhyātvā vandhyā putraṃ prasūyate

rogārto mucyate rogāt baddho mucyet bandhanāt /
bhayānmucyeta āpannaḥ samyag jñānamavāpnuyāt

āvāhanārthaṃ devānāṃ garuḍaṃ tu paṭe nyaset /
tatpaṭe sarvadevāṃśca āhvayettu dine dine

lohaṃ dārumayaṃ bimbaṃ vinā vā sthāpyate dhvajam /
yadi dhvajapaṭe bimbaṃ garuḍasya kṛtaṃ bhavet

patākādhvajasaṃyuktaṃ kṛtvā citramapi dhvajam /
upari pratimāṃ kṛtvā sthāpayeddeśikottamaḥ

jhrsamāpte vaiṣṇave yāge snapanānte yathāvidhi /
rātrau bhūtabaliṃ kṛtvā kramādudvāsya pārṣadān

kārayet puṣpayāgaṃ tu yathāvidhipuraḥsaram /
(puṣpayāgavidhiḥ prokto mayā śakra vidhānake

tadvanmaṇḍalamālikhya tadvidhānena pūjayet) /
puṣpayāgavidhiṃ vakṣye samāsānmunipuṅgava

deveśayajanaṃ yattu maṇḍale puṣpapūrite /
puṣpayāga iti prokta utsavānte tu kārayet

prāsādāgre 'thavā yāmye vāruṇe saumyake 'thavā /
pūrvoktamaṇḍapaṃ kṛtvā maṇḍape tu samālikhet

vinodamaṇḍape vātha yatra vā ramate matiḥ /
maṇḍalaṃ tu mahānantaṃ cakrābjaṃ ca tathaiva ca

bhadrakaṃ vātha vidhivat sūtrapātaṃ tathā bhavet /
ekahastaṃ dvihastaṃ vā garbhagehasamaṃ tu vā

caturaśraṃ samaṃ kṛtvā sūtreṇaiva tu deśikaḥ /
ekaviṃśatisūtrāṇi prākpratyagdakṣiṇottaram

āsphālayedbhavantyatra koṣṭakāni catuḥśatam /
madhye ṣoḍaśakoṣṭhāni padmakṣetramudāhṛtam

bahiḥ paṅktiṃ visṛjyātha tripaṅktiṃ grāhayettataḥ /
pādagātrakabhedena vimṛjet paritaḥ krama t

antaḥ ṣaṭ ca bahiḥ ṣaṭ ca madhye tu caturaśrakam /
visṛjettu caturdikṣu gātrārthaṃ tu vicakṣaṇaḥ

antaḥ ṣaṭ ca bahiḥ pañca koṇapādārdhamācaret /
paṅktidvayaṃ tu tadbāhye vīthyarthaṃ parito mṛjet

dvārakaṇṭhopakaṇṭhaṃ ca śobhāṃ bāhyapadadvaye /
antardve caturo bāhye dvārārthaṃ tu caturdiśi

trīṇyantarbahirekaṃ syādviparyāsena mārjayet /
antareko bahiḥ pañca koṇeṣu parimārjayet

maṇḍalaṃ bhrāmayet kṣetraṃ padmārthaṃ tu puroditam /
padmakṣetrārdhamānaṃ tu bhāgaṃ dvādaśamaṃ (-kaṃ?) bahiḥ

visṛjya bhrāmayecchīrṣaṃ tvarakṣetraṃ tu vartalam /
prathamaṃ karṇikākṣetraṃ kesarāṇāṃ dvitīyakam

tṛtīyaṃ dalasandhīnāṃ dalāgrāṇāṃ caturthakam /
āsphalya koṇasūtrāṇi koṇadiṅmadhyamaṃ tataḥ

kesarāgreṣu saṃsthāpya dalāntaṃ bhrāmayettataḥ /
dalāntarālamānaṃ tu sandhau sūtraṃ tu vinyaset

dalāgraṃ bhramayettatra tasyāgrāṃ tadanantaram /
etat sādhāraṇaṃ proktaṃ cakrābjaṃ tu tataḥ śṛṇu

dviṣaṭkāṅgulamānena akṣakṣetraṃ paribhramet /
akṣakṣetrasamā nābhiḥ bāhyarekhādvayaṃ likhet

ekāṅgulapramāṇena arakṣetraṃ tato bahiḥ /
padmaṃ pūrvoktavat kuryāt karṇikākesarairyutam

arakṣetrasya vistāraṃ nābhyakṣakṣetrayoḥ samam /
nemikṣetrāntavalayamakṣakṣetrārdhakaṃ bhavet

arāṇi kārayettatra dvau dvau kuryāddalaṃ prati /
arakṣetraṃ tridhā kṛtvā guṇatrayavidhānataḥ

prathamaṃ sāttvikaṃ caiva dvitīyaṃ rājasaṃ bhavet /
tṛtīyaṃ tāmasaṃ caiva samaṃ kuryāddvijottama

sāttvikaṃ kalaśākāraṃ dūrvākāraṃ tu rājasam /
tāmasaṃ ko(kūr?)parākāraṃ pīṭhākāraṃ tathopari

pa(pī?)ṭhasya pṛṣṭhataścāpi maṇibandhavadācaret /
adhovaktraṃ tu kalaśaṃ nābhikṣetraṃ tu madhyamam

śikhākāramarāntaṃ syāccheṣamicchānurūpataḥ /
evameva prakāreṇa cakrabjaṃ paribhāṣitam

maṇḍalaṃ pūrayet puṣpaiḥ karṇikādi yathākramam /
pañcavarṇāni puṣpāṇi puṣpayāge śubhāni tu

śvetaṃ raktaṃ ca pītaṃ ca kṛṣṇaṃ haritameva ca /
śuddhavarṇāni caitāni miśritānyaparāṇi ca

puṣpeṣu puṣpavargeṣu chedayitvā vicakṣaṇaḥ /
pīteṣu karṇikāṃ pūrya raktaṃ vai kesarāṇi ca

karṇikāvalayaṃ raktaṃ haritaṃ vā dvijottama /
kesarānte ca valayaṃ śvetapuṣpeṇa pūrayet

daleṣu mūlabhāgeṣu śvetaraktavimiśritaiḥ /
dalāgrān raktapuṣpeṇa pūrayeddeśikottamaḥ

dalānāṃ sandhideśe tu śyāmapuṣpeṇa pūrayet /
dalāntarekhāṃ viprendra kusumairharitena ca

pūrayennābhirekhāṃ ca sitaiḥ puṣpairmanoramaiḥ /
madhyarekhāṃ muniśreṣṭha pītapuṣpeṇa pūrayet

antā rekhāstu mantrajñaḥ kusumai raktakaisatathā /
araṃ cottararekhāṃ vai haritai raktakaistathā

nemyādirekhāṃ kṛṣṇena nemyantaṃ(ntāṃ?)sitapuṣpakaiḥ /
nemiṃ raktena pūryātha pītapuṣpeṇa vā dvija

puṣpamaṇḍalamuddiṣṭaṃ puṣpayāge viśeṣataḥ /
evaṃ lakṣaṇasaṃyuktaṃ cakrābjaṃ kārayet sudhīḥ

dhvajārohādijīrthāntaṃ prāyaścittaṃ tu yadbhavet /
tasya doṣavighātārthaṃ puṣpayāgaṃ ca kārayet

prāsādasyāgrataḥ kuryāddakṣiṇe paścime 'pi vā /
uttare vā dvijaśreṣṭha maṇḍapaṃ pūrvavat kramāt

tasya madhye likhedvidvān cakrābjaṃ lakṣaṇānvitam /
dvāre dvāre tu ghaṭikā dve dve caiva tu vinyaset

śarāvaṃ vinyasettadvat pūrvādiṣu yathākramam /
aindrādyaiśānaparyantaṃ pālikā vinyaset kramāt

tatpārśve maṅgalān nyasya(?)śaṅkhādīṃśca yathākramam /
maṇḍalaṃ pūrayet puṣpaiḥ karṇikādi yathākramam

prācyādidikcatuṣkeṣu vāsudevādikān yajet /
śriyādīn koṇadeśeṣu nyaset padmopari kramāt

indrādiparivārāṃśca dikṣu caiva yathākramam /
viṣvaksenaṃ garutmantaṃ yajettatraiva saṃnidhau

ityevaṃ yogayedvidvān puṣpavinyāsamaṇḍale /
sa yāti viṣṇusālokyaṃ jñānayajñena saṃyajet

puṣpayāgavidhiḥ prokto mayā śakra vidhānake /
tanmaṇḍalaṃ samālikhya tadvidhānena pūjayet

ṭa bhūtakrūrabaliṃ kṛtvā kramādudvāsya pārṣadān /
snātvācamya śucirbhūtvā samabhyarcya khageśvaram

udvasayedyathāpūrvamāhūtāstatra devatāḥ /
nitye naimittike kāmye dhvajasaṃsthānaṃ matam