Viṣvaksenasaṃhitā · Chapter 21

iti śrīpāñcarātre viṣvaksenasaṃhitāyāṃ [pūjābhedakathanaṃ nāma] viṃśodhyāyaḥ ||
ekaviṃśo 'dhyāyaḥ
ekaviṃśo 'dhyāyaḥ nāradaḥ---
bhagavannanayārcanayā sadṛśaṃ paramāptikaraṃ na hi puṃsa iti /
aticāpalagadgadāpi (-dayāpi?) girā stutirasti kimabhiyat svaparām (?)

viṣvaksenaḥ---
śṛṇu nārada mūrtinutiṃ paramāṃ parameṇa mamābhihitāṃ guruṇā /
tava bhaktimataḥ kathayiṣyāmi (-yāmyadhunā?) iha (tviha?) tṛpyati ko hi śubheṣu naraḥ

vinatāsutavāhanamādarata- stridaśaṃ kanakāṅgadamaṣṭabhujam /
dhavalādrinibhaṃ dvipadaṃ sumukhaṃ paramātmaguruṃ praṇato 'smi sadā

jalajārigadāmbujahastadharaṃ sakalābharaṇaṃ tuhinādrimuṣam /
caturānanasevitapādayugaṃ paranāmadharaṃ praṇato 'smi sadā

taruṇārkanibhaṃ tridaśedhya (-ḍya?) padaṃ sukumāradṛśaṃ musalapraharam /
aruṇāmbaramapratimaṃ halinaṃ śaśivaktrasamaṃ praṇato 'smi sadā

caturaṅga(?)supīvaradīrghabhujaṃ harivarṇakṛtāñjalinopakṛtam (?) /
garuḍena ca dakṣiṇato 'mbuja- yottarataḥ praharaṃ praṇato 'smi sadā (?)

atra kaścidviśeṣo 'sti mūrtīnāmarcanāvidhau /
matsyādidaśamūrtīnāmiha loke phalaṃ labhet

tatphalaṃ te pravakṣyāmi adhunā śṛṇu nārada /
āyurārogyadaṃ(-kaṃ?) caiva sāyujyaṃ labhate dhruvam

uktakrameṇa(?)yo matsyaṃ bhaktipūrvaṃ samarcayet /
sarvān kāmānavāpnoti viṣṇulokaṃ sa gacchati

kūrmaṃ bhaktyā samārādhya naro nirdhūtakalmaṣaḥ /
sarvān kāmānanuprāpya viṣṇusāyujyamāpnuyāt

bhaktyā varāhamabhyarcya krameṇānena buddhimān /
pāparogavinirmuktaḥ sa yāti paramāṃ gatim

nārasiṃhaṃ samārādhya bhaktyā paramayā yutaḥ /
samastakāmasaṃsiddho jayalakṣmīṃ samṛcchati

bhaktyārcya vāmanaṃ jñānī viṣṇusālokyamaśnute /
bhārgavaṃ rāmamārādhya viṣṇusārūpyamāpnuyāt

arcya dāśarathiṃ rāmamāyuḥ kīrtiṃ sukhaṃ yaśaḥ /
avāpya kāmamakhilaṃ viṣṇuloke mahīyate

balarāmaṃ samārādhya balārogyadhanaṃ labhet /
kṛṣṇamabhyarcya sakalaṃ iṣṭamiṣṭaphalaṃ labhet

jñānamūrtiṃ ca kalkiṃ tu(?) lakṣmyāyuḥ kīrtimeva ca /
avāpya viṣṇusālokyaṃ modate viṣṇupārṣadaiḥ

daśamūrtyarcanaṃ puṇyaṃ guhyādguhyataraṃ mune /
sādhakānāṃ hitārthāya tava bhaktasya dhīmataḥ

phalaśrutirmayā proktā matsyādīnāṃ viśeṣataḥ /
tantrāṇāṃ paramaṃ guhyaṃ viniyogamataḥ śṛṇu

uktaṃ ca nopadeṣṭavyamabhaktāya kadācana /
na mānine ḍaṃbhine ca nāstikāya śaṭhāya ca

na cāśuśrūṣave dadyāt śucaye ca kṛpālave /
devatāgurubhaktāya na hi cedgurudoṣabhāk

jānakīṃ rukmiṇīṃ lakṣmyā puṣṭyā bhāmāṃ tu vidyayā /
lakṣmaṇaṃ bharataṃ vāpi śatrughnaṃ ca mahāmune

praṇavādisvanāmnaiva caturthyantaṃ namo 'yujā /
arcayeta municchando daivaṃ rāghavamantravit

sarveṣāṃ parivārāṇāṃ mantramevaṃ prayojayet /
ābhirhemaḥ prayoktavyaḥ svāhāntaṃ sakalaṃ mune

abhyantaropacāreṇa(-ṣu?) āgacchāntaṃ mukhīkṛtau /
kṣamasvāntaṃ visarge tu namo 'ntaṃ cānmakarmaṇi