Viṣvaksenasaṃhitā · Chapter 20

saphalaṃ sukṛtaṃ prāpya viṣṇusārūpyamṛcchati //
iti śrīpāñcarātre viṣvaksenasaṃhitāyāṃ [aṅganyāsādi- vidhirnāma] ekonaviṃśo 'dhyāyaḥ ||
viṃśo 'dhyāyaḥ
viṣvaksenaḥ---
śṛṇu nārada tattvena sādhakānāṃ hitāya vai /
pūjābhedaṃ pravakṣyāmi paramātmādimūrtiṣu

pūte manorame deśe vane puṇyatame 'pi vā /
tīrthe vā kṣetravarye vā grāme vā nagare 'pi vā

kharvaṭe kheṭake vāpi pattane vā taṭe taṭe(?) /
mahāgrāme viśeṣeṇa paścime madhyame 'pi vā

kārayenmandiraṃ samyak saumyaṃ sumanasāṃ prabhoḥ /
viṣṇoḥ pūrvoktamārgeṇa kalpayedbahuberakam

lakṣaṇaṃ pūrvamuktena tatra yadyekaberakam (?) /
rāmatrayādikānāṃ tu kalyayedbahuberakam

ātmārthaberamekaṃ vā svatantraparatantrayoḥ /
pūjābhedaḥ suramune kiñci(kaści?)dasti taducyate

āvāhanaṃ visargaṃ ca svatantre triṣu sandhiṣu /
agnikāryaṃ baliṃ caiva paratantreṣu tairvinā

ātmarthe phalakāyāṃ vā paṭe vālikhya yatnataḥ /
pūrvoktalakṣaṇopetaṃ pratiṣṭhāyāḥ krameṇa ca

saṃprokṣya navaratnānvā āvāhyabhyarcayeta vā /
sthaṇḍile pratimāyāṃ vā lauhyāmicchānurūpataḥ(?)

indranīlaṃ maratakaṃ sphaṭikaṃ vajrameva ca /
padmarāgaṃ pravālaṃ ca vaiḍūryaṃ muktameva ca

māṇikkamiti ratnāni nava teṣāṃ yathākramam /
kālaṃ vakṣye tathārcāyāḥ prātarmadhyāhna eva ca

sāyāhnaśca pradoṣaścāpyardharātramuṣastathā /
iti ṣaṭkaṃ parārthe tu pūjāyāmuttamaṃ smṛtam

madhyamārādhane sāyamuṣaśca parivarjayet /
adhame cārdharātraṃ ca sāyāhnaṃ ca vivarjayet

prātarmadhyapradoṣeṣu balibhramaṇamācaret /
nānyeṣūttamapūjāyāmapi vā madhyamārcane

balihīne tu kāle tu pūjābhedamatho śṛṇu /
āhvānamarghyapādyaṃ ca ācāmaṃ gandhapuṣpakam

dhūpo dīpo nivedyaṃ ca mukhavāsavisarjane /
iti karmottamādīnāṃ nāḍīkālaḥ pravakṣyate

prathamā saptanāḍī syāt madhyamā pañcanāḍikā /
kanīyasī trināḍī syāt iti śāstrasya niścayaḥ

divākarodayāt pūrvamācāryaḥ snānamācaret /
arkodaye muniśreṣṭha pūjākarma samācaret

snānapūrvāḥ kriyāḥsarvāḥ phalasaṃsiddhihetavaḥ /
atastān(-stat?)prathamaṃ vakṣye sādhakānāṃ hitāya vai

samudragāminyo vāpi hrade nadyāṃ jalādiṣu /
taṭāke nirjhare vāpi snānaṃ kurvīta sādhakaḥ

brāhme muhūrte cotthāya dharmamokṣārthacintakaḥ /
prāgudagdiśamāsādya sādhakaḥ snānamācaret

prācyuttare nīrarāśau snānaṃ kuryādvicakṣaṇaḥ /
vāyavye nairṛtāgneyyāṃ varuṇāyāṃ visarjayet

varjite deśanīre tu yo mohāt snānamācaret /
tat snānaṃ niṣphalaṃ yāti punaḥsnānaṃ samācaret

prātarutthāya mūrtīnāṃ yāṃ mūrtiṃ svayamarcati /
tanmūrtyarcanamantreṇa sādhakaḥ snānamācaret

viṣṇumantreṇa vā sāṅgamathavā mūlavidyayā /
avagāhya jale madhye trirācamya ca mantrataḥ

visṛjyārdrāmbaraṃ cānyat vastrayugmena veṣṭayet /
sapavitrakareṇaiva mantrācamanamācaret

suvārṇādyaṅgulīyaivā(-yaṃ vā?)dhārayeddakṣiṇe bhuje (kare?) /
āpohiṣṭheti mantreṇa prokṣayet svaśiropari

tarpayet svasvamantreṇa snānakarma samācaret /
aśaktaḥ punarācamya proktāṃ vidyāmanusmaran

saṃprokṣya snānakāryāṇi kṛtvā kāryaṃ viśedbudhaḥ /
praviśya kṛtasacchaucaḥ pūjāmantreṇa mantravit

kavāṭodghāṭanaṃ kṛtvā mantreṇādyena vā mune /
vāyumantreṇa vā dvāraṃ kavāṭoddhāṭanaṃ kramāt

taddvāraṃ tu dvidhā kṛtvā sādhako mantravittamaḥ /
sūtrasyottarapārśve tu pratiśeddakṣiṇāṅghriṇā

praṇamya sādhako mantraṃ ṣaḍakṣaramanusmaran /
nityadīpaṃ tato jvālya viṣṇumantreṇa mantravit

sūtrasya dakṣiṇe pārśve uttarābhimukhaḥ svayam /
same śucau pradeśe tu kṛṣṇājinakuśāstare

phalake vā samāsīnaḥ svasthāntaḥkaraṇaḥśuciḥ /
padmaṃ vā svastikaṃ vāpi baddhvā svecchānurūpataḥ

tena mantreṇa digbandhamaṣṭadikṣu niveśayet /
rakṣārthaṃ yāgadeśaṃ taditi tattvārthadarśinaḥ

evaṃ kṛtvā tu digbandhaṃ prāṇāyāmamathārabhet /
savyāhṛtiṃ sapraṇavāṃ gāyatrīṃ śirasā saha

prāṇānāyamya yastisraḥ prāṇāyāmottamaḥ smṛtaḥ /
pañcaviṃśatikṛtvāntaḥ prāṇānāyamya mānasaḥ

abhyāso 'ṣṭākṣarasyaikaḥ prāṇāyāmaḥ sa madhyamaḥ /
prāṇo vāyuḥ śarīrasthaḥ tasyāyāmo nirodhakaḥ

pūrakaṃ kumbhakaṃ caiva recakaṃ trividha smṛtam /
jānuṃ pradakṣiṇīkṛtya na drutaṃ na vilambitam

kriyate cāṅgulisphoṭaḥ sā(?)mātrā parikīrtitaḥ /
tathā dvādaśamātrābhiḥ pūrakaṃ kriyate kramāt

tasmāddviguṇamātrābhiḥ kumbhakaṃ kriyate budhaiḥ /
tathaiva recakaṃ kṛtvā budhāstattvārthadarśinaḥ

prāṇāyāmamidaṃ proktamadhamaṃ mutisattama /
tripradhāne vidhāne 'tra yathāsaṃbhavamācaret

prāṇāyāmatrayaṃ kṛtvā pañca vā sapta vāthavā /
prāṇāyāmaṃ prakurvīta prāṇāyāmavidāṃ vara

tatastu kāyaśuddhyarthaṃ varṇaṃ dhūmrādi vinyaset /
śabdaḥsparśaśca rūpaṃ ca raso gandhaśca pañcamaḥ

ahaṅkāramano buddhiyuktamātmānamānayet /
sadāviṣṇau tu saṃyojya dhātudehaṃ suśodhayet

yadbījaṃ nābhimadhyasthaṃ dhūmraṃ caṇḍānilātmakam /
viśoṣayedaśeṣaṃ tu dhyāyeddehasthakalmaṣam

kṣaumaṃ hṛtpadmamadhyasthaṃ bījaṃ tejomayaṃ smaret /
athordhvatiryagābhiśca jvālābhiḥ kalmaṣaṃ dahet

śaśāṅkākṛtivaddhāyannambarasthaṃ sudhāmbudhim /
hṛtpadmavyāpibhirdehaṃ svakarma bhrāmayet sudhīḥ

suṣumnā yogamārgeṇa sarvanāḍīvisarpibhiḥ(?) /
paścācchabdādiviṣayān yojayenmūrdhnimadhyame

evaṃ cāmṛtarūpaṃ tu mayā proktaṃ tu nārada /
yadbījaṃ tu nyasennābhau anāmikyā tu nārada

aṅguṣṭhānāmikābhyāṃ tu kṣaumabījaṃ hṛdi nyaset /
sarvāsāmaṅgulīnāṃ tu mūrdhnīmaṃ (?) bījamuttamam

yakārādi vakārāntaṃ dhūmramavyāruṇāsitam /
evaṃ saṃśodhya dehaṃ tu ūrdhvapuṇḍraṃ samācaret

ūrdhvapuṇḍravidhiṃ vakṣye śṛṇu nārada tattvataḥ /
sarvāghanāśanaṃ puṇyaṃ sarvatīrthaphalapradam

svamūrtyarcanamantreṇa lalāṭādi kakutparam /
candanaṃ śvetamṛd bilvatulasīmūlatoyakaiḥ

ūrdhvapuṇḍraṃ likhedvidvānanāmikyā tu sādhakaḥ /
dvādaśa (-śaiḥ ?) dvādaśairmāsairnāmabhirvā viśuddhaye

evaṃ pūto bhavedūrdhvapuṇḍrāṇāṃ dhāraṇānmune /
sṛṣṭisthityādivaśato hastāṅganyāsayordvayoḥ

vinābhya(-pyar?)cā phalavatī mūrtimantraprabhāvataḥ /
ārādhanakramaṃ vakṣye dvārapūjādi nārada

sādhakaḥsiddhasarvāṅgaḥ subhago rogavarjitaḥ /
kuṣṭhāpasmārarahito dvārapūjāṃ samācaret

caṇḍapracaṇḍagaruḍāḥ caturthyantaṃ namo 'ntakam /
dakṣiṇottarapūrve tu(-pūrveṣu?) dvāre ca praṇavaiḥ saha

caṇḍādhare tu cakraṃ syāt pracaṇḍasyādhare 'mbujam /
gandhapuppādibhirdvārapūjāmevaṃ samācaret

athavā dvārapūjāyāḥ kramaṃ śṛṇu mahāmune /
caṇḍādīn pūrvavat pūjya cakrādirahitena tu

dhātāraṃ pūjayedvāme vidhātāraṃ tu dakṣiṇe /
sūtrasya dakṣiṇe sthitvā ācāryo mantravitamaḥ

adhobhāge tu bhūmiḥ syāduparyaṅgaṃ pūjayecchriyam /
durgā gaṇapatī caiva kavāṭasthau prapūjayet

śaṅgapadmanidhī caiva śākhayormūladeśataḥ /
gaṅgāṃ ca yamunāṃ caiva kavāṭādhārake nyaset

utkarṣaṇīṃ karṣaṇīṃ ca antaryantre hyadhopari /
gandhapuṣpākṣatairdhūpaiḥ dīpādyairdvāramarcayet

atha caṇḍaṃ pracaṇḍaṃ ca garuḍāntaṃ(-ḍaṃ ca?)samarcayet /
praṇavādi snanāmnā ca mantramityabhidhīyate

pūrvavat pūjayeddvāradevāṃstantravicakṣaṇaḥ /
triprakāraṃ mayā proktaṃ yathāyogaṃ samācaret

praṇavādisvanāmnā ca pūjayediha nārada /
evaṃ saṃkṣepataḥ proktaḥ dvārapūjāvidhikramaḥ

kāṃsyaghaṇṭādhvaniṃ kṛtvā dvāramācchādya vāsasā /
praviśeddevapārśve tu sādhakaḥ saṃyatendriyaḥ

pūvoktamāsanaṃ kṛtvā devasyāsanamārabhet /
sauvarṇe rājate vātha tāmre vātha mahāmune

kuśena vātha puṣpeṇa kalpayedāsanaṃ hareḥ /
devasya purataḥ kṛtvā hyāsanaṃ saṃyatendriyaḥ

ādhāraḥ praṇavo jñeyaḥ śaktirvāgīśvarī tathā /
kandaṃ ca pṛthivīṃ smṛtya(-tvā?)nālamākāśarūpakam

nālasyāgre smaret padmaṃ hṛtpadmaṃ paramālayam /
ādhārādīni sarvāṇi hyāsanasya mahāmune

ajñānāt kalpayenmohāt niṣphalaṃ syānna saṃśayaḥ /
tasmāt sarvaprayatnena ādhārādīni kalpayet

ādhāraṃ prathamaṃ nyasya śaktiṃ caiva tataḥ param /
śaktyopari nyaseddhīmān kandaṃ caiva mahāmune

kandasyopari vinyasya nālamākāśarūpakam /
nālasyāgre tu vinyasya dharmādīni yathākramam

dharmādīnāṃ tu tanmadhye padmaṃ śvetāṣṭapatrakam /
dharmaṃ jñānaṃ ca vairāgyaṃ aiśvaryaṃ ca catuṣṭayam

catvāryetāni koṇeṣu āgneyādiṣu vinyaset /
madhye tu rudraṃ vinyasya nālamūlasya madhyame

adharmājñāna (-nā?) vairāgyānaiśvaryaṃ ca catuṣṭayam /
vinyasecca caturdikṣu pūrvādiṣu yathākramam

dharmādīni nyasedādau mantreṇādyena saṃyutam /
svanāmnā caiva sarveṣāṃ mantramityabhidhīyate

adharmādīni sarveṣāṃ svasvanāmnā ca sādhakaḥ /
vinyasecca caturdikṣu pūrvādikramayogataḥ

evaṃ nyāsaṃ kramāt kṛtvā hyādhārādi mahāmune /
nāradaḥ---
dharmajñānādirūpāṇi śrotumicchāmyahaṃ prabho

āyudhāni ca sarveṣāṃ yathāvadvaktumarhasi /
viṣvaksenaḥ---
śṛṇu nārada tattvajña viṣṇupādaparāyaṇa

dharmādīnāṃ svarūpāṇi pravakṣyāmyāyudhāni ca /
caturvaktraṃ caturbāhuṃ dvipādaṃ cāsitānanam

śaṅkhacakradharaṃ saumyaṃ pītāmbarasamanvitam /
jātipuṣpadalaprakhyaṃ sarvābharaṇabhūṣitam

dharmamūrtiriti khyātaṃ jñānamūrtiṃ bravīmi te /
dvipādaṃ ca caturbāhuṃ caturvaktraṃ sanātanam

nīlotpaladalaprakhyaṃ śaṅkacakragadādharam /
jñānamūrtiriti khyātaṃ vairāgyasya vadāmyaham

raktākṣitrayasaṃyuktaṃ caturvaktraṃ caturbhujam /
pītāmbaradharaṃ saumyaṃ śaṅkhacakradharaṃ sadā

karṇikāradalaprakhyaṃ vāyavyaṃ diśamāśritam /
vairāgyasye(-mi?)ti nirdiṣṭaṃ aiśvaryasya vadāmi te

raktotpaladalaprakhyaṃ caturvaktraṃ caturbhujam /
pītābhbadharaṃ saumyaṃ śaṅkhacakradharaṃ sadā

sitānanasamāyuktaṃ muktāhārasamanvitam /
aiśvaryasyeti nirdiṣṭamīśvarasya vadāmi te

kundendumukta(?)saṃkāśaṃ dvipādaṃ ca caturbhujam /
raktākṣitrayasaṃyuktaṃ jaṭāmakuṭadhāriṇam

pītāmbaradharaṃ saumyaṃ paraśuṃ(īśvaraṃ?)śūladhāriṇam /
sarvābharaṇasaṃyuktaṃ sarvaśobhitaśobhanam

itthaṃ harasya rūpaṃ tu devarṣe viddhi nārada /
evaṃ saṃkṣepataḥ proktaṃ dharmajñānādirūpakam

adharmādīni gātrāṇi (?) vakṣyāmi śṛṇu nārada /
raktavarṇaṃ mahākāyaṃ kambugrīvaṃ caturbhujam

ekavaktraṃ bṛhatkukṣiṃ netratrayasamanvitam /
raktāmbaradharaṃ raudraṃ khaṅgamudgaradhāriṇam

adharmasayaivamuktaṃ tu ajñānasya vadāmi te /
pītavarṇaṃ bṛhatkukṣiṃ mahākāyaṃ caturbhujam

śūlakhaṅgadharaṃ raudraṃ sarvābharaṇabhūṣitam /
etadajñānarūpaṃ syādavairāgyaṃ vadāmi te

dūrvāśyāmanibhaṃ brahman dvipādaṃ ca caturbhujam /
paraśupāśadharaṃ raudraṃ raktāmbaradharaṃ sadā

akṣitrayasamopetaṃ jaṭāmakuṭadhāriṇam (-dhārakam?) /
avairāgyasya rūpaṃ syāt anaiśvaryaṃ vadāmi te

dhūmrākāraṃ bṛhatkukṣiṃ caturbāhuṃ mahāhanum /
ekavaktraṃ mahākāyaṃ muktakeśasamanvitam

aśrīkaramasaumyaṃ ca akṣitrayasamanvitam /
anaiśvaryasya rūpaṃ tu nirdiṣṭamadhunā mune

dharmādipañcapādāni adharmādīni nārada /
teṣāṃ rūpaṃ smarennityaṃ nyasettasmin yathākramam

anyathā kalpayenmohāt ādhārādinirūpakam(?) /
tatpūjā niṣphalā yāti grāmasyāgnibhayaṃ bhavet

tasmāt sarvaprayatnena smaredrūpāṇi sādhakaḥ /
nyasedaṣṭadalaṃ padmaṃ teṣāmupari nārada

tatrārkasomavahnīṃśca uparyupari vanyiset /
vṛttākāraṃ tu raktābhamarkamaṇḍalakaṃ nyaset

tatropari nyaseddhyātvā śvetaṃ vṛttaṃ śaśāṅkakam /
agnimagninibhaṃ dhyātvā trikoṇaṃ maṇḍalopari

evaṃ rūpaṃ tu saṃcintya maṇḍalārkādi nārada /
maṇḍalopari vinyasya tāmasādi guṇatrayam

tāmasaṃ rājasaṃ caiva sātvikaṃ ca yathākramam /
tāmasaṃ kṛṣṇarūpaṃ tu rājasaṃ raktarūpakam

sātvikaṃ śvotavarṇaṃ tu varṇānyetāni saṃsmaret /
tatra tadvarṇakaṃ cintya maṇḍalopari vinyaset

tāmasādini vinyasya nyasedātmadvayaṃ budhaḥ /
ātmānaṃ cāntarātmānaṃ vāsudevaparāyaṇau

ātmā tu śvetavarṇaḥ syādantarātmā tathaiva ca /
ś teṣāṃ varṇaṃ tu saṃcintya nyasedātmāntarātmake

ādhārādyantarātmāntaṃ nyāsakramamatho śṛṇu /
ādhāraṃ prathamaṃ nyasya śvetavarṇaṃ trimūrtiyuk

śaktinyāsaṃ dvitīye tu kandanyāsamataḥ param /
nālamākāśarūpaṃ syāttamovarṇaṃ caturthakam

nālasyāgneyakoṇe tu dharmamūrtiṃ tu pañcamam /
ṣaṣṭhaṃ tu nairṛte nyasya jñānamūrtiṃ tu nārada

saptame tu nyasedvidvān vairāgyaṃ vāyugocare /
aiśvaryamaṣṭamaṃ nyasya īśāne tantravittamaḥ

navamaṃ nālamūle tu rudramūrtiṃ sadāśivam /
daśamaṃ nālasyāgre tu pūrve 'dharmaṃ tu vinyaset

ekādaśe tu vinyasya dakṣiṇe 'jñānarūpakam /
paścime tu nyaset paścādavairāgyaṃ tu nārada

udīcyāṃ vinyaseddevamanaiśvaryaṃ trayodaśa /
nālasyāgre smaredvidvān padmaṃ tatparamālayam

etat padmāsanaṃ proktaṃ tridaśaiḥ pūjitaṃ sadā /
tatropari nyaset paścāt maṇḍalārkādi nārada

guṇatrayaṃ nyasenmadhye tāmasādi yathākramam /
guṇamadhye nyaseddhīmānātmānaṃ cāntarātmakam

evaṃ saṃkṣepataḥ prokta āsanasya kramo mayā /
āsanasyārcanaṃ vakṣye saṃkṣepādvidhipūrvakam

ādhārādyantarātmāntaṃ mūrtīnāṃ munisattama /
vyastaiḥsaṃpūjayet sarvaṃ samastairvā samāhitaḥ

arcayedgandhapuṣpādyaiḥ pūjayettaṃ manoramaiḥ /
teṣāṃ svanāmakairmantrairdadyāt sarvaṃ yathākramam

etat kalpyaṃ muniśreṣṭha āhvānaṃ ca vadāmyaham /
svarṇādyanyatamaṃ pātraṃ kuḍubadvayapūritam

itthaṃ hi lakṣaṇaṃ proktaṃ sarvapātrāṇi nārada /
āvāhanādi pātraṃ tat pañcaṣaṭsapta eva vā

pūjakasyāgrataḥ sthāpya prokṣayenmūlavidyayā /
eteṣāmapyalābhe tu śaṅkhaśuktimathāpi vā

kṣālayet sarvapātrāṇi viṣṇugāyatriyā mune /
āḍhakadvayasaṃpūrṇāṃ pakvabimbaphalākṛtim

vardhanīṃ vāmapārśve tu vinyasyāpūrayedbudhaḥ /
gālitairudakairyasyāṃ gandhapuṣpayutāṃ nyaset

śeṣaṃ dakṣiṇapārśve tu parito vāgrato 'pi vā /
sthāpayettu krameṇaiva pūjādravyaṃ samastakam

tat pātreṣvekapātraṃ tu saṃgṛhya munisattama /
ṣaḍakṣareṇa mantreṇa saṃprokṣya tu punaḥ punaḥ

tatpātraṃ tu punaḥ prokṣya gandhodena prapūrayet /
tasmin śirasi (?) puṣpaṃ ca nyasettoyaṃ sapuṣpakam

uddhṛtya pūjāmantreṇa dhyātvātra mahāmune /
yadrūpaṃ cintitaṃ samyak tadrūpaṃ cintya(?) sādhakaḥ

avatīrṇaṃ mahāberādāgacchāntena mūrdhni ca /
prokṣya caivāsanaṃ dadyāt kevalena jagadguroḥ

prakṣipya vādamūle tu puṣpamuṣṭiṃ tataḥ param /
namaskṛtyāñjaliṃ paścāt darśayenmunisattama

ardhyaṃ pādyaṃ tathācāmaṃ datvā devāya mantravit /
tatastu parivārāṇi pātraśeṣeṇa kalpayet

parivārakramaṃ vakṣye yathātattvena (yathātathyena?) nārada /
āvāhanāṃśatoyena kalpeyattu yathākramam

pūrve tu vāsudevaṃ tu śuddhasphaṭikasaṃnibham /
śaṅkhacakragadāpāṇiṃ pītāmbaravibhūṣitam

saṃkarṣaṇaṃ nyasedyāmye śaśibālārkasaṃnibham /
śaṅkhacakrasamopetaṃ caturbāhuvirājitam

pradyumnaṃ paścime nyasya śātakumbhanibhaṃ mune /
śaṅkhacakragadāpāṇiṃ pītāmbaravibhūṣitam

aniruddhaṃ nyasettasminnuttare nīlarūpiṇam /
śaṅkhacakrasamāyuktaṃ pītavastraṃ caturbhujam

śriyaṃ suvarṇavarṇābhāṃ śvetarūpāṃ sarasvatīm /
raktavarṇāṃ ratiṃ paścāt śāntiṃ kuṅkumasaṃnibhām

āgneyādiṣu koṇeṣu vinyasecchaktirūpakam /
paiśāce tu nyaset paścāt śaṅkhādīnāṃ tu nārada

pūrve śaṅkha niyuñjīta śvetavarṇaṃ sa(ca?)nādayuk /
kālāgnisadṛśākāraṃ dakṣiṇe cakramuttamam

paścime tu gadāṃ nyasya haridrābhāmanuttamām /
raktavarṇanibhaṃ padmamuttare tu nyasedbudhaḥ

musalaṃ kṛṣṇavarṇaṃ tu āgneyyāṃ diśi vinyaset /
nairṛtāyāṃ nyasettatra khaṅgamākāśasaṃnibham

pañcavarṇa tathā śārṅgaṃ vāyavye tantravittamaḥ /
sarvavarṇamayākārāṃ vanamālāṃ tathaiśake

etaddbrijīyāvaraṇaṃ garbhāgāre prakīrtitam /
dvārasya dakṣiṇe caṇḍaṃ kṛṣṇavarṇaṃ caturbhujam

śaṅkhacakragadāpāṇiṃ triṇetraṃ raktalocanam /
evaṃ rūpaṃ tu saṃcintya pracaṇḍaṃ tu tataḥ śṛṇu

śaṅkhacakragadāpāṇiṃ raktavarṇaṃ caturbhujam /
dvārasyottarapārśve tu triṇetraṃ bhīmarūpiṇam

purato vainateyaṃ ca suvarṇābhaṃ kṛtāñjalim /
karaṇḍamakuṭaṃ nīlavāsasaṃ priyadarśanam

nīlāgranāsikāyuktaṃ nāgābharaṇabhūṣitam /
evaṃ tu garuḍaṃ cintya balarāmasya mūrtivat

yo bhaktyā devamabhyarcet tathaiva garuḍaṃ yajet /
bhagavatpramukhaṃ paścādgarutmantaṃ niyojayet

raktavarṇaṃ caturbāhuṃ dvibāhuṃ vā munīśvara /
sarvābharaṇasaṃyuktaṃ sarvaśobhanaśobhitam

kālāgnisadṛśākāraṃ cakradhṛṅmakuṭānvitam /
evaṃ cakrādhidaivaṃ tu pūjayeddvārapārśvake

śaṅkhābhaṃ saumyarūpaṃ tu sarvābharaṇabhūṣitam /
upavītayutaṃ śvetaṃ śaṅkhadhṛṅmakuṭānvitam

caturbāhuṃ dvibāhuṃ vā dhyāyeddvārasya vāmake /
dhātāraṃ pītavarṇaṃ vidhātāramaruṇaprabham

śyāmavarṇā tu bhūmiḥ syāt raktavarṇāṃ haripriyām /
durgāṃ ca komalaśyāmāṃ śvetarūpaṃ vināyakam

śaṅkhapadmanidhī caiva śvetaraktanibhau mune /
gaṅgāṃ ca yamunāṃ caiva śvetakṛṣṇanibhe mune

utkarṣaṇīṃ tu raktāṃ vai karṣaṇīṃ raktavarṇakām /
evaṃ dvāre tu saṃcintya trisandhyāyāṃ(-su?) prapūjayet

nārcayedupasandhyāyāṃ caṇḍādīn dvārapālakān /
ajñānādarcayenmohāt sthānanāśo bhaviṣyati

durbhikṣaṃ jāyate rāṣṭraṃ dhanadhānyavināśakṛt /
tasmāt sarvaprayatnena vidhinoktaṃ samācaret

vimānāgneyayāmye tu tanmadhye gaṇanāyakam /
pūrvavadvarṇakaṃ cintya hastivaktraṃ caturbhujam

vimāne dakṣiṇe kuryāt dakṣiṇāmūrtimīśvaram /
akṣamālādharaṃ devamaṣṭākṣaraparāyaṇam

triṇetraṃ śvetasaṃkāśaṃ saumyaṃ somārdhadhāriṇam /
nāradādyṛṣisaṃghaiśca sevitaṃ dakṣiṇāmukham

evaṃ rahasyarūpaṃ te saṃkṣepeṇa vidhīyate /
tasya dakṣiṇapāśve tu mātṝṇāmuttarāmukham

kalpayenmuniśārdūla sarvasaṃpatsukhāvaham /
ālayasyottare mātṝḥ kalpayedbā munīśvara

teṣāṃ nāma kramādguhyaṃ śṛṇuṣvāvahito 'dhunā /
vāgīśvarīkriyākīrtiḥ lakṣmīsṛṣṭistathaiva ca

vidyākāntiśca saptaitāḥ kathitā viṣṇumātaraḥ /
uttare paścime caiva hayāsyaḥ śrīdharastathā

vīrabhadragaṇeśau vā mātṝṇāṃ dvārapālakau /
sādhakecchānurūpeṇa kalpayedviṣṇumātaraḥ

mātaraśca suvarṇābhāḥ śrīdharaḥ śyāma eva ca /
hayaśīrṣaḥsuvarṇābho varṇā etāḥ (-te?) prakīrtitāḥ

tathaiva vīrabhadrādi varṇaṃ tu paripaṭhyate /
vimānapṛṣṭhabhāge tu anantamatha sādhakaḥ

pañcāsyapannagordhve tu pañcavaktraiḥ(?)samāvṛtam /
caturbhujaṃ samāsīnaṃ śaṅkhacakragadādharam

itthaṃ hi lakṣaṇopetaṃ sarvadevairnamaskṛtam /
saumyāsyeśānayormadhye durgāṃ śyāmanibhāṃ yajet

tasyottare tu vinyasya mama rūpaṃ camūpateḥ /
śyāmalaṃ piṅgalākṣaṃ tu piṅgaśmaśruḥ sanātanam

śaṅkhacakragadāpāṇiṃ caturbāhuṃ kirīṭinam (?) /
pītāmbaradharaṃ saumyaṃ vivṛttākṣisamanvitam

tarjayan vāmatarjanyā nāsāgrāsannayā jagat /
evaṃ hi mama rūpaṃ te (tu?) paṭhyate munisattama

parivāravidhānoktamatha bāhyeṣu vinyaset /
dvārasya śaṅkhacakre tu dakṣiṇottarataḥ smaret

dakṣiṇe śaṅkhavarṇaṃ tu śaṅkhacakragadādharam /
caturbhujaṃ triṇetraṃ tu mūrdhni śaṅkhaṃ nyaset sadā

vāmapārśve nyaseccakramagnirūpaṃ caturbhujam /
triṇetraṃ bhīmasaṃkāśaṃ śaṅkhacakragadādharam

tanmūrdhni vinyaseccakraṃ nīlāmbarakirīṭinam /
evaṃ tu lakṣaṇaṃ proktaṃ śaṅcakrādirūpakam (?)

indrādīśānaparyantaṃ sveṣu sthāneṣu yojayet /
vajrahasttaṃ sahasrākṣaṃ saumyaṃ tu śyāmalākṛtim

saundaryamindradaivatyaṃ dhyāyedindraṃ kirīṭinam /
triśikhaṃ raktavarṇābhaṃ raktamālyairalaṃkṛtam

tripādaṃ cāṣṭabāhuṃ ca raktanetratrayaṃ mune /
raktakeśanakhaśmaśruvahnirūpaṃ saśaktikam

dharmarājaṃ tato dhyāyet sarvalakṣaṇalakṣitam /
kālameghanibhākāraṃ dvibhujaṃ daṃṇḍapāṇinam

kirīṭahārakeyūramakuṭādivibhūṣitam /
sarvapretādhināthasya lakṣaṇaṃ kathitaṃ mayā

tatastu rakṣasāmīśaṃ nirṛtiṃ raktamūrdhajam /
khaṅgabāhuṃ mahākāyaṃ raktavaktraṃ triṇetrakam

etattu lakṣaṇaṃ proktaṃ rākṣasādhipatestataḥ /
sarvalakṣaṇasaṃyuktaṃ sarvālaṃkārabhūṣitam

śyāmalaṃ pāśahastaṃ ca jaleśaṃ paṅkajāsanam /
dhūmravarṇanibhākāraṃ dhvajayuktaṃ mahābhujam

dvipādaṃ ca dvihastaṃ ca sarveṣāṃ prāṇasaṃjñitam /
itthaṃ te muniśārdūla lakṣaṇaṃ paripaṭhyate

dhyāyet saumye tu matimān yakṣeśvaramanuttamam /
taptahāṭakasaṃkāśaṃ sarvalakṣaṇalakṣitam

dvipādaṃ ca dvihastaṃ ca daṇḍapāṇiṃ dhaneśvaram /
śvetādriśikharākāraṃ dvipādaṃ ca caturbhujam

vṛṣadhvajaṃ triṇetraṃ ca śūlapāṇīndumaulinam /
evaṃ dhyāyet kramāt sarvān svanāmnā pūjayet pṛthak

etattṛtīyāvaraṇe dvārapārśvendusūryayoḥ /
raktavarṇaṃ mahākāyaṃ kambugrīvaṃ caturbhujam

śaṅkhacakragadāpāṇiṃ triṇetraṃ bhīmarūpiṇam /
cintaceddakṣiṇe pārśve tṛtīyadvārake ravim

kundapuṣpanibhākāraṃ śaṅkhacakragadādharam /
caturbhujaṃ triṇetraṃ ca pītavastraṃ ca cintayet

dvārasya vāmapārśve tu śaśāṅkākṛtimuttamam /
maulipṛṣṭhasya sūryādau cintayenmaṇḍalākṛtim

evaṃ śaśiṃ raviṃ dhyātvā tṛtīyadvārapārśvayoḥ /
kumudādīni sarvāṇi nyaset pūrvādiṣu kramāt

kumudaḥ kumudākṣaśca puṇḍarīko 'tha vāmanaḥ /
śaṅkukarṇaḥsarpanetraḥ sumukhaḥ supratiṣṭhitaḥ

eteṣāṃ lakṣaṇaṃ proktaṃ dhyāyedasmin mahotsave /
tadvat jñātvātra bhūteśān pūjayet sādhakottamaḥ

purataḥ sthāpayet sarvān viṣṇupāriṣadān bahūn /
sarvavarṇadharāḥsarve sarve śastrāstrapāṇayaḥ

mahāpīṭhe tu saṃsmṛtya sarvān bhūtagaṇānvitān /
pūjākāle tato dhyāyet svarūpaṃ pūjakaḥ kramāt

svanāmnā parivārāṇāṃ praṇavādinamontakam /
arghyapādyādibhirvāpi gandhādyairvā munīśvara

arcayennityapūjāyāṃ praṇavādimanusmaran /
asmin tantre mayā proktaṃ caṇḍādyāvaraṇārcanam

utsave parivārāṇāmarcanāvidhiruttamaḥ /
tathaivābhyarcya matimān parivārānatandritaḥ

evamabhyarcya bhūteśān paścāt pūjāṃ samācaret /
kṣālayet sarvapātrāṇi pūrvoktena vidhānataḥ

sarvadravyāṇi saṃprokṣya nirīkṣyādyena mantrataḥ /
āvāhanādibhiḥ sarvairupacārakrameṇa tu

devadevaṃ samabhyarcya sa yāti paramāṃ gatim /
upacārakramaṃ vakṣye yathāvadanupūrvaśaḥ

pūrvamāvāhanaṃ kuryāt punarāsanameva ca /
tṛtīyaṃ puṣpavikṣepaṃ turīyaṃ tu namaskṛtim

pañcamo 'ñjalimudrā ca (syāt?) ṣaṣṭhamardhyaṃ tathaiva ca /
pādyaṃ tu saptamaṃ kuryāt tathācamanamaṣṭamam

snapanaṃ navamaṃ vidyāddaśamo vasanaṃ bhavet /
ekādaśo bhūṣaṇaṃ syāt dvādaśastūpavītakam

trayodaśaścācamanaṃ gandhaścaiva caturdaśaḥ /
puṣpaṃ pañcadaśaścaiva ṣoḍaśo dhūpa eva ca

dīpaḥ saptadaśaścaiva mudrāṣṭādaśa ucyate /
havirekonaviṃśaśca pānīyaṃ viṃśakastathā

ekaviṃśastathācāmaḥ tāmbūlaṃ ca dvāviṃśakaḥ /
upacārastrayoviṃśa ācāmastadanantaram

mukhavāsaḥ pañcaviṃśaḥ ṣaḍviṃśo geyamucyate /
purāṇaṃ saptaviṃśaśca nṛttahomamataḥ param

balibhramaṇamekonatriṃśa ardhyamataḥ param /
puṣpaṃ vā muniśārdūla dadyādicchānurūpataḥ

ekatriṃśo mukhavāsaścodvāsanamataḥ param /
dvātriṃśadupacārāṇāmuktamevaṃ mahāmune

vakṣye kalopacārāṇi (-rāṃstu?) śṛṇuṣvāvahito bhava /
ādya āvāhanaṃ paścāt āsanaṃ tadanantaram

pādyaṃ tṛtīya ardhyaṃ syādācāmaṃ pañcamaḥ smṛtaḥ /
ṣaṣṭhaṃ tu snapanaṃ vidyāt saptamo vasanaṃ bhavet

aṣṭamastūpavītaṃ syānnavamaṃ gandha ucyate /
daśamaḥ puṣpavinyāsaḥ dhūpa ekādaśo bhavet

dīpastataḥ paraṃ vidyāt caruṇastu (caroścaiva?) nivedanam /
caturdaśyañjalimudrā pradakṣiṇamataḥ param

udvāsanaṃ ṣoḍaśaḥ syādityevamaparaḥkramaḥ /
evaṃ ṣoḍaśadhā proktā upacārāṇi(-rāṃstu?)nārada

ekādaśopacārāṇāṃ kramaṃ śṛṇu mahāmune /
āvāhanaṃ tu prathamaḥ dvitīyaścāsanaṃ bhavet

arghya cānantaraṃ vidyāt pādyaṃ caiva tataḥ param /
devasyācamanaṃ vidyāt pañcamaṃ tu vicakṣaṇaḥ

gandhaṃ cānantaraṃ vidyāt saptamaṃ puṣpameva ca /
dhūpaṃ tu cāṣṭamaṃ vidyāt dīpastu navamaḥ smṛtaḥ

daśamastu nivedyaṃ syādudvāsanamataḥ param /
mukhyagauṇakrameṇaiva viniyogaṃ tataḥ śṛṇu

yatra pūjottamā tatra kuryānmukhyopacārakam /
madhyamārādhanaṃ yattu trakṛdhyamaprayojayet

arcā kanīyasī yatra tatraivaikādaśena tu /
prayojyamiti śāstrasya niścayaḥ sādhakottamaiḥ

sarve sarvatra vā pūjā deśakālānurūpataḥ /
sādhakecchānurūpeṇa kuryādvā munipuṅgava

ani(āri?)rādhayiṣurmūtrā yadyadvai sādhakottamaḥ /
tattadvai mūrtimantreṇa kuryāt sarvopacārakam

snapane mantrabhedo 'sti mūrtīnāṃ munisattama /
nitye naimittike vāpi viṣṇornukamathāvapi

nārāyaṇopaniṣadaṃ dvādaśākṣarameva ca /
nārāyaṇaṃ brāhmaṇaṃ(?)vā ato devī(-ve?)ti vā punaḥ

sahasraśīrṣaṃ devamaṣṭākṣaramathāpi vā /
sahasraśīrṣā puruṣo mantraṃ vā parameṣṭhinaḥ

eteṣvanyatamaṃ vāpi snapanaṃ sādhakaḥ śuciḥ /
kurvan svarāṣṭramuddhṛtya viṣṇulokamavāpnuyāt

kevalaṃ mūlamantreṇa pūjakaḥ puruṣottama /
āvāhanādibhiḥ sarvairupacāraiḥ samarcayet

suguṇo vaṃśasaṃpanno nirdeṣo rogavarjitaḥ /
āvāhanādi karmāṇi sarvāṇyetāni sarvadā

aṣṭākṣareṇa vā kuryāt mūrtīnāṃ munisattama /
pūjakasyottamatvācca nirdeṣatvānmahāmune

kevalaṃ puṣpamātreṇa deveśastṛpyate 'tra tu /
sā pūjā saphalaṃ yāti vṛddhikṛt grāmarājyoḥ

evaṃ yaḥ kārayedbhaktyā sa yāti paramāṃ gatim /
yatirvā brahmacārī vā pūjako munisattama

dviguṇaṃ phalamāpnoti nātra kāryā vicāraṇā /
evaṃ saṃpūjayedbhaktyā viṣṇuṃ sakalamavyayam

iha loke śriyaṃ prāpya paraloke tathaiva ca /
sarvān kāmānavāpnoti sarvayajñaphalaṃ bhavet

viśeṣamatra vakṣyāmi ātmārthasya parasya ca /
upacārakramaṃ sarvaṃ sādhakānāṃ hitāya tu

arghyādimukhavāsantaṃ kramāddevāya kalpayet /
arghyaṃ pādyaṃ tathācāmaḥ madhuparkaḥ punaśca tat

tāmbūlaṃ gandhapuṣpaṃ ca akṣato dhūpa eva ca /
dīpo hyañjalimudrā tu nivedyaṃ tu mahāmune

pānīyācamanīyaṃ ca mukhavāsastathaiva ca /
evaṃ kramo muniśreṣṭha tatkrameṇāthavārcayet

kṣālayet sarvapātrāṇi pūrvavattantravittamaḥ /
tattat pātreṣu taddravyaṃ nikṣipyāpūrya puṣpakam

arghyatoyaṃ svamantreṇa mukhamālepayaddhareḥ /
pādyaṃ devasya pāde ca dīyate(dadyādvai?)svasvavidyayā

devasya dakṣiṇe haste hyācāmaṃ madhuparkakam /
punarācāmatāmbūlaṃ tathaiva ca punaḥ punaḥ

jātiśrīkaṇṭha(-khaṇḍa?)mādāya peṣayet piṣṭhapaṅkavat /
karpūreṇa samāyuktaṃ kuḍubadvayapūritam

kevalaṃ candanaṃ vāpi gandhaṃ ṣaṇmuṣṭimātrakam /
puṣpaprasthacatuṣkaistu mūrtīnāṃ tu pṛthakpṛthak

dāpayettu prayatnena sādhakaḥ paramārthavit /
dhūpaṃ surabhiṇā vyāptaṃ prāptajvālocchritojjñitam

bahurekhamanāragnyaṃ daśamātraṃ pradāpeyat (?) /
dīpaṃ saptāṅgulotthānaṃ ghṛtakarpūradīpitam

dhūpaṃ tu dāpayedgandhaṃ nāsikāyāṃ tu dakṣiṇe /
dadyādyathākramaṃ sarvaṃ vāsudevāya bhaktitaḥ

kalamādīni (?) sarvāṇi śeṣāṅgaṃ mardayedbudhaḥ /
vāmahastena mantrajñaḥ puṣpaṃ gṛhya samāhitaḥ

dakṣiṇena kareṇaiva dadyāddevasya pādayoḥ /
muṣṭimātraṃ pradadyāttu trivāreṇa (-raṃ ca?) svavidyayā

madhyamānāmikāmadhye cāṅguṣṭhena samanvitam /
akṣataṃ tu tato dadyāt tathaiva ca punaḥ punaḥ

devasya vāmanāsau ca(-nāsāyāṃ?) dhūpaṃ dadyāt samāhitaḥ /
dakṣiṇe devadṛkpārśve dīpaṃ dadyāttu mantravit

trimātrakaṃ tu mudrāyā darśanaṃ dakṣiṇādṛśi /
kapilājyena saṃsrāvya hyannasuktena saṃspṛśet

pariṣicyādi mantreṇa pāṇiṃ dadyāttu pāṇinā (?) /
dadyāttaddakṣiṇe haste haviḥprāśanamudrayā

pānīyācamanīyaṃ ca mukhavāsaṃ tathaiva ca /
evaṃ ṣoḍaśadhā proktaṃ viśeṣeṇopacārakam

dadyādyathākramaṃ sarvaṃ bhaktipūtena cetasā /
tatastu sādhakaḥ samyak praṇamyāñjalimudrayā

devasya pādau hastābhyāṃ saṃspṛśettat samāhitaḥ /
tatastvatharvavede tu śaunakāyāṃ tu śākhayā

nārāyaṇopaniṣadaṃ uccārya ca punaḥ punaḥ /
tribhiḥ kāṇḍaiḥsamuccārya mantreṇaiva mahāmune

deveśastṛpyate caiva nātra kāryā vicāraṇā /
rājarāṣṭravivṛddhiḥ syāt grāmādiṣu tathaiva ca

arcayennānyathā mohādābhicārakaro bhavet /
sā pūjā niṣphalā caiva rogavṛddhirbhaviṣyati

tasmāt sarvaprayatnena tribhiḥ kāṇḍaiḥ samarcayet /
agnikāryaṃ tu pūrvoktaṃ kuryāttantravicakṣaṇaḥ

samidho mūlamantreṇa ājyamājyena mantrataḥ /
caruṃ puruṣasūktena pratyekaṃ ṣoḍaśāhutīḥ

hutvā hutvāgnimadhye tu sādhako mantravittamaḥ /
śeṣadravyāṇi sarvāṇi pūrvoktenaiva kārayet

agnikāryaṃ samāpyaivaṃ balidānamathocyate /
balidānakramaḥ sarvaḥ saṃkṣepādvakṣyate 'dhunā

nitye naimittike caiva sarvasaṃpat sukhāvaham /
svarṇādīnāṃ tu pātrāṇāṃ lakṣaṇaṃ kathyate 'dhunā

tālaṃ tu karṇikā proktaṃ tatpādārdhatalaṃ tathā /
pādaṃ tu tadbahiḥ kuryāt tadante valayaṃ bhavet

balipātraṃ samākhyātaṃ tāmrarājatahaimakam /
uttamādhamamadhyaṃ syāt vibhavasyānurūpataḥ

kārayedbalipātraṃ tu ekadravyeṇa śilpinā /
ācāryo 'laṃkṛtaḥ samyak pātramādāya maṇḍale

sādhitaṃ prokṣitaṃ paścāt gālitenodakena tu /
tasminmadhye tu kurvīta sudṛḍhaṃ haviṣāsanam

karṇikāraparīmāṇaṃ yattāvadvistāramucyate /
caturaṅgulamutsedhamannapīṭhasya nārada

lakṣaṇaṃ cātra saṃproktaṃ nityapūjotsavasya tu /
mahotsave na kurvīta cānnapīṭhasya copari

kārayecchibikādyeṣu balibhramaṇamuttamam /
kalpayet saparīvāramantarāvaraṇasthitam

tasmin pātropari nyasya svanāmnā munisattama /
annopari paṭaṃ nyasya puṣpairanyaiḥ prakīrya ca

vastrairābharaṇaiścitraiḥ gandhaiḥ puṣpairalaṃkṛtam /
suvarṇakusumaiścitraiḥ prabhāvāsitasaṃyutam (?)

vāsikādyābhirmālābhiḥ (?)bhūṣitaṃ sumanoramam /
sauvarṇaṃ rājataṃ vāpi tāmraṃ vātīva sundaram

tasmin tiṣṭhāpayedbimbaṃ svasvamūrtyanusārataḥ /
alābhe kāñcane vāpi rājataṃ tāmrameva vā

taṇḍulaṃ ca caruṃ puṣpaṃ prātarmadhyāhna eva ca /
pradoṣe ca baliṃ kuryāt yathāyogakrameṇa tu

arghyādi cāṣṭamaṃ dadyāt mukhavāsāntameva vā /
dīpāntaṃ vā pradātavyaṃ svena mantreṇa deśikaḥ

anyapātre tu mantrajñaḥ cānnaṃ toyasamanvitam /
gandhapuṣpasamāyuktaṃ svastivācanasaṃyutam

pīṭhe pīṭhe muniśreṣṭha balidānaṃ samācaret /
śaṅkhaghoṣasamāyuktaṃ dhūpadīpasamanvitam

vitānadhvajasaṃyuktaṃ chatracāmaraśobhitam /
tūryavāditraghoṣaiśca jayaśabdasamanvitam

śiṣyamabhyarcya gandhādyaiḥ garuḍaṃ saṃsmaret svayam /
vidyānāmādimantreṇa pātramutthāpayedguruḥ

sthāpayenmūrdhni śiṣyasya balipātramanuttamam /
tatpātre sthāpayeddevaṃ gacchamānaṃ (-ntaṃ ca?) prakalpayet

śanaiḥ śanairmuniśreṣṭha śaṅkhādyairgeyasaṃyutam /
balibhramaṇakāle tu bimbāgre balimācaret

yo mohādbimbahīne tu balikarmaṇi cenmune (?) /
tatsthānaṃ nidhanaṃ yāti tatrasthā narakaṃ vrajet

tasmāt sarvaprayatnena bimbāgre balimācaret /
pratimācāryayormadhye gamanaṃ varjayettataḥ

gamanaṃ yadi cettatra snapanaṃ pañcagavyakaiḥ /
tadante gandhatoyena snāpayettena mūrtinā (?)

puṇyāhaghoṣasaṃyuktaṃ svastisūktaravairyutam /
mantrāṇāmādimantreṇa mūrtimantreṇa vā mune

samidājyena caruṇā pratyekaikāhutiṃ kramāt /
hutvā sve sve tu juhuyāt svāhāntena yathākramam

paścāt pūrṇāhutiṃ hutvā śeṣakarma samācaret /
ādyaṃ pradakṣiṇaṃ kṛtvā nṛttageyasamanvitam

dvitīyaṃ ca paribhramya geyatūryasamanvitam /
tṛtīyaṃ tu paribhramya tūryairnānāvidhairyutam

caṇḍapracaṇḍaprabhṛti mahāpīṭhāntameva ca /
arghyapādyādinābhyarcya gandhādyairjalasaṃyutam

parivārān samabhyarcya yathāpūrvaṃ prakalpitam /
balibhramāntaṃ kṛtvā tu mahāpīṭhapradakṣiṇam

tṛtīyasavane gatvā punaḥ kuryāt pradakṣiṇam /
śaṅkhaśabdatrayaṃ kuryāt gopure niḥsvanaṃ gatā(?)

vimānadvāramāsādya ārghyaṃ vā puṣpameva vā /
datvā tanmūrtimantreṇa garbhāgāre(-raṃ?) praveśayet

pīṭhasya dakṣiṇe pārśve balibimbaṃ prasādayet /
pādyādi caturo dadyāt karmārcāyāṃ tathaiva ca

balipātrasthitaṃ puṣpaṃ mamāgre nikṣipedbudhaḥ /
annapīṭhaṃ satoyaṃ ca mahāpīṭhe vinikṣipet

prakṣālya pādau hastau ca ācamya vidhinā punaḥ /
nyāsaṃ kṛtvā vidhānena mūrtimantreṇa pūrvavat

kakudantaṃ lalāṭādi nyaseddehe yathākramam /
sahasraṃ vā śataṃ vāpi aṣṭāviṃśamathāpi vā

svena svena tu mantreṇa yathāśakti japet kramāt /
namaskāraṃ kramāt kṛtvā tanmūrtistutibhiḥ kramāt

japenmantrī svamantreṇa devadevasya saṃnidhau /
asmin kāle tu deveśastṛpyate(?)nātra saṃśayaḥ

sarvān kāmānavāpnoti grāmarājñośca vṛddhikṛt(?) /
anyathā devadeveśaḥ kupyate(?)nātra saṃśayaḥ

tasmāt sarvaprayatnena japenmūrtistutiṃ budhaḥ /
puṣpaṃ datvā namaskṛtya mūlabere nayeddharim

āvāhanaṃ yathāpūrvaṃ tadvadudvāsanaṃ kuru /
ālokya dattamityāhuḥ balidānottamaṃ param

saṃkṣepeṇa mayā proktaṃ vakṣye dattāvalokanam /
athavā parivārāṇāṃ balidānavidhikramam

pravakṣyāmi muniśreṣṭha guhyādguhyataraṃ śṛṇu /
jhallarīmaddalairyuktaṃ nānāvādyasamanvitam

nityotsavasya pūrve tu balidānaṃ samācaret /
sarvālaṃkārasaṃyuktaṃ vitānadhvajasaṃyutam

nṛttagītasamāyuktaṃ paścādbimbaṃ paribhramet(?) /
madhyamaṃ balidānaṃ taccaṇḍādibhyo hyatandritaḥ

dattāvalokyakaṃ(-kanaṃ?) nāma rājño rāṣṭrasya vṛddhikṛt /
evaṃ dine dine kuryāt parivārabalikramam

evaṃ saṃkṣepataḥ prokto nityotsavabalibhramaḥ /
viśeṣaṃ cātra vakṣyami parārthe balikarmaṇi

śṛṇuṣvāvahito bhūtvā guhyādguhyataraṃ mune /
indrādilokapālān vā kalyayet kramayogataḥ

ekāvaraṇamārgaṃ cet parivārabalikramam /
prathamāvaraṇe kuryāt vighneśādīn vivarjayet

caṇḍādiśarvaparyantaṃ saṃsthāpya balimācaret /
paścādbaliṃ mahāpīṭhe saṃsthāpya prathamaṃ mune

śaṅkhādigeyasaṃyuktaṃ dvitīyaṃ bhrāmayeddharim /
nānāvādyasamāyuktaṃ tṛtīyaṃ bhrāmayeddharim

paścāddevaṃ mahābhāgo nītvārghyādyaiḥsamarcayet /
śaṅkhādigeyasaṃyuktaṃ dvitīyaṃ bhrāmayeddharim

nānāvādyasamāyuktaṃ tṛtīyaṃ bhrāmayeddharim /
paścāddevaṃ mahābhāgo nītvārghyādyaiḥ samarcayet

pādyodakaṃ gṛhītvā tu bhaktān saṃprokṣya mantravit /
evaṃ balividhiḥ prokto ekāvaraṇapūjane

punaḥ prākāramatraiva kalpitaścenmunīśvara (?) /
caṇḍādīśāvasānaṃ tu prathamāvaraṇe nyaset

śeṣāṇi parivārāṇi dvitīye ca tṛtīyake /
indrādi supratiṣṭhāntaṃ punaḥsaṃsthāpya mantravit

pūrvoktena vidhānena balidānaṃ samācaret /
sā pūjā saphalā bhūtvā vardhate śrīrdine dine

rājño rāṣṭrasya vṛddhiḥ syāt ālayasya tathaiva ca /
evaṃ dine dine kuryāt tṛtīyāvaraṇāvṛtam(?)

evameva baliṃ kuryāt dvitīyāvaraṇālaye /
arghyāvasānaṃ pūvoktamārgeṇa prathame nyaset

vidhneśādi(?)muniśreṣṭha prathamaṃ(me?) balimācaret /
prathamāvaraṇe paścāt indrādīnāṃ baliṃ haret

tṛtīyāvaraṇe paścāt kumudādibaliṃ haret /
taṃ baliṃ madhyamamidaṃ pūrvā pūrvā garīyasī (?)

anyathāphalamāpnoti durbhikṣānarthadā bhavet /
tasmāt kuryāt prayatnena baliṃ viṇorvidhānataḥ

vṛkṣamūle 'drimūle vā kuḍye vātra guhāntare /
kiṃcidasmin viśeṣo 'sti tatkramaṃ śṛṇu nārada

devāgre pūrvavat kalpya maṇḍapaṃ saparicchadam /
tatropalipya vidhivat hastamātraṃ samaṃtataḥ

tanmadhye śaktimāvāhya pātre pādukasaṃyute /
arghyādisaptamaṃ datvā pṛthak pādyādibhiḥ kramāt

maṇḍapaṃ paritaḥ kalpya parivārān viśeṣataḥ /
ekāvaraṇamārgeṇa maṇḍapaṃ bhrāmayet kramāt

matsyādīnāṃ tu devarṣe evameva samācaret /
balidānaṃ muniśreṣṭha śeṣaṃ pūrvavadācaret

anyathāphalamāpnoti kartā bhartā ca naśyati /
kevalaṃ balidānaṃ tu pravakṣyāmi śṛṇu kramāt

homotsavavihīnaṃ cet sādhako munisattama /
pañcottaradaśān sarvān caṇḍādidvārapālakān

pūjayenmuniśārdūla gandhapuṣpādibhiḥ kramāt /
taddvāre balirityāhuradhamaḥ paripaṭhyate

uttame 'pyuttamaṃ kuryāt madhyame madhyamaṃ kuru /
adhame 'pyadhamaṃ kuryāt vibhavasyānurūpataḥ

nityotsavasya pūrve tu kārayettu viśeṣataḥ /
balidānaṃ muniśreṣṭha paścāddevaṃ paribhramet

adhamādhamamityāhuḥ parivāravihīnataḥ /
dattāvalokyakaṃ nāma tadgrāmasyaiva vṛddhikṛt

alaṃkārāṇi sarvāṇi cāsmin pūrvavadācaret /
ityuttamādi saṃprokto balikarmavidhirmayā

evaṃ sakṣepataḥ prokto nityotsavavidhirmune /
sādhakecchānurūpeṇa kārayedekadhātra tu

ātmārthaṃ vaidikenaiva tāntrikeṇaiva vā mune /
parārthe tāntrikeṇaiva miśritaṃ vā hariṃ param

arcayet pūrvavaddhīmān rājño rāṣṭrasya vardhanam /
parārthe vaidikenaiva na kuryāttu kathaṃcana

tasmāt sarvaprayatnena miśritaṃ tāntrikeṇa tu /
svārtha āvāhanaṃ kuryāt phalakādvā paṭādapi

sūryamaṇḍalamadhyādvā parārthe mūlaberakāt /
ekaberaṃ tu santyajyodvāsanāvāhanena tu

kuryāt svārthe parārthe ca śailabimbe viśeṣataḥ /
tathaiva bālagehasya bimbasya munisattama

āvāhanaṃ visargaṃ tu na smareccheṣamācaret /
aśakto 'nadhikārī vā svārthaṃ yaḥ kārayatyapi

pareṇa tatkulaṃ sarvaṃ svakulaṃ tārayiṣyati /
viṣṇorniveditaṃ sarvaṃ mamāpi priyameva ca

hastayoraṅgulīnāṃ tu svāṅguṣṭhānāmikena tu /
nirmālyaṃ mocayitvā tu prāṇānāyamya mānasaḥ(?)

tena(?) mālyaṃ ca taddravyaṃ mama prītikaraṃ śubham /
tanmālyaṃ caiva taddravyaṃ bhaktānāṃ caiva dāpayet

matpūjā tadvimāne tu vinā cenmunisattama /
sā pūjā niṣphalā bhūyāt grāmasyānarthakṛdbhavet

kākaśvānādi(?)jantūnāṃ pāṣaṇḍīnāṃ tathaiva ca /
vedavikrayakānāṃ ca vedanindakameva ca (?)

śūdrānnatatparāṇāṃ ca nāstikānāṃ viśeṣataḥ /
evamādīni jātīnāṃ(?) bhakṣaṇārthaṃ na dāpayet

avicāreṇa vā mohāt datvā rauravamāpnuyāt /
na laṅghayīta nirmālyaṃ mamāpi puruṣottama

yaścettu laṅghayet(-te?)mohāt mahān doṣo bhaviṣyati /
mahārauravamāyāgnau nimagnastatra doṣabhāk

dvijātyāditrivarṇāntaṃ vaiṣṇavānāṃ viśeṣataḥ /
tretāgnīnāṃ vratasthānaṃ yatīnāṃ śāntacetasām
dīkṣitānāṃ tapasvīnāṃ vandhyādiṣu tathaiva ca /
evamādīni bhaktānāṃ(?)dāpayeddevasaṃnidhau

tasmāt sarvaprayatnena varjitānāṃ na dāpayet /
evaṃ yaḥ kārayedbhaktyā viṣṇupūjāmanuttamām

mokṣadaṃ mokṣamicchūnāṃ dhanadaṃ dhanakāminām /
annadaṃ cānnamicchūnāṃ sarvakāmapradaṃ śubham