Viṣvaksenasaṃhitā · Chapter 16

bhaktyā guroraśeṣaṃ (?) syāt sa harirnātra saṃśayaḥ //
iti śrīpāñcarātre viṣvaksenasaṃhitāyāṃ jhrhomavidhirnāmaṭa pañcadaśo 'dhyāyaḥ ||
ṣoḍaśo 'dhyāyaḥ
viṣvaksenaḥ---
ataḥ paraṃ pravakṣyāmi pratiṣṭhālakṣaṇaṃ param /
sarvalakṣaṇasaṃyuktamalpakāyaṃ caturbhujam

tattanmūrtyanusāreṇa kārayet sumanoharam /
prathamaṃ ca dvitīyaṃ ca saṃkṣepācchṛṇu suvrata

pratiṣṭhāyāḥ kramaṃ cāsmin sādhakānāṃ hitāya tu /
kṛtvāṅkurārpaṇaṃ samyak pañcasaptadināt purā

jalādhivāsanaṃ kṛtvā yathā vai tatra coditam /
pūrvoktamaṇḍape madhye vediṃ kṛtvā yathāvidhi

kārayet sarvakarmāṇi śāstradṛṣṭyā samāhitaḥ /
tadalābhe muniśreṣṭha śṛṇu maṇḍapalakṣaṇam

pañcottaraśataṃ(?)vāpi hastadvādaśakaṃ tu vā /
caturdvārasamāyuktaṃ catustoraṇabhūṣitam

vitānavastrasaṃchannamalaṃkārairalaṃkṛtam /
kārpāsakairnavairvastraiḥ stambhān saṃpariveṣṭayet

toraṇān kalaśāṃścāpi madhye vediṃ tu kārayet /
daśatālastu vistāra ekahastasamucchrayaḥ

vedikāyāstu (-yāṃ tu?)paritaḥ caturdikṣu yathāvidhi /
kārayedagnikuṇḍāni caturaśrādi nārada

sthaṇḍile vāpyabhāve tu kārayet taruṇālaye /
jalādhivāsādutthāpya maṇḍape cānayeddharim

suvarṇasūcyā tatraiva netronmīlanamācaret /
taccakṣuriti vāmaṃ ca citraṃ deveti dakṣiṇam

dhenudvayaṃ darśayitvā tataḥ snapanamācaret /
ekāśītikrameṇaiva snapanaṃ tvadhamottamam

kalaśaiḥ pañcaviṃśairvā tataḥsaptadaśaistu vā /
dvādaśairnavakairvāpi yathāsaṃbhavamācaret

puṇyāhaṃ vācayitvaiva śayanaṃ kalpayettataḥ /
pañcabhārapramāṇaiśca śālīṃstatraiva vikṣipet

tadardhaṃ taṇḍulaṃ caiva śālyopari vinikṣipet /
tasyopari likhet padmamaṣṭapatraṃ sakarṇikam

tasya madhye tu tantrajñaḥ chādayet kambalena tu /
śayanaṃ trividhaṃ proktaṃ kṣaumaṃ kārpāsakaṃ tu vā

ūrṇāmayaṃ ca tatsarvaṃ vyāghracarmottaracchadam /
citravastratrayaṃ vāpi navavastratrayaṃ tu vā

yathāvittānusāreṇa(?)mārgeṇaikena kalpayet /
śiropadhānasaṃyuktaṃ pādagaṇḍūlasaṃyutam

vāmadakṣiṇabhāgābhyāṃ sukapolasthaladvayam /
śayanaṃ kalpayitvaivaṃ gandhapuṣpaiḥsamarcitam

vastrairābharaṇairmālyairalaṃkṛtya janārdanam /
ācāryo mūrtipaiḥsārdhaṃ svastivākyasamanvitam

chatracāmarasaṃyuktaṃ śayane saṃniveśayet /
dvādaśākṣaramantreṇa śāyayeddakṣiṇāśiraḥ

vaiṣṇavīkaraṇaṃ kuryāt pūrvaṃ mūrtidharo mune /
mantranyāsaṃ tataḥ kuryāt mūrtimantreṇa sādhakaḥ

nṛttagītasamāyuktaṃ vedādhyayanasaṃyutam /
prāṅmukhodaṅmukho bhūtvā vedikopari dakṣiṇe

prāṇāyāmān kramāt kṛtvā praṇavenaiva deśikaḥ /
sṛṣṭinyāsaṃ sthitinyāsaṃ saṃhṛtinyāsameva ca

tadbimbe muniśārdūla yathātathyena vinyaset /
pañcaviṃśatitattvāni pratimāyāṃ nyasettataḥ

pañcopaniṣadairnyasya praṇavaiḥsaha mantravit /
athavā devadevasya mantranyāsaṃ śṛṇu kramāt

caturabhyadhikaṃ viṃśat sūktaṃ nārāyaṇaṃ kramāt /
devasya pādau saṃspṛṣṭvā ācāryaḥ sūktamuccaran

tasyānte pauruṣaṃ brahman ṣoḍaṣaṃ sūktamuccaret /
tatastvatharvavede ca sṛṣṭyādipratipādakam

nārāyaṇopaniṣadaṃ triḥ paṭhet padasaṃspṛśet /
ātmā yādi(?) namontaṃ yanmantramaṣṭaśataṃ japet

pūjāyāmadhivāse ca pratiṣṭhāyāṃ ṣaḍakṣaram /
nyāsameṣu prakurvīta tadbimbahṛdi deśikaḥ

anyathā niṣphalaṃ sarvaṃ nātra kāryā vicāraṇā /
tasmāt sarvaprayatnena ṣaḍakṣarajapāntara(-ka?)m

yadyat proktaṃ muniśreṣṭha tattat kurvīta buddhimān /
evaṃ nyāsaṃ kramāt kṛtvā veṣṭayennavavastrakaiḥ

puṣpāñjalirnamaskṛtya pūjayet puruṣottamam /
śaṅkhadundubhinirghoṣaiḥ nṛttageyaiśca pūjayet

āvāhayet tato devaṃ mūrdhni mūlena mantravit /
śaṅkhacakragadāpāṇiṃ pītāmbaravibhūṣitam

tattanmūrtyanusāreṇa dhyāyeddevaṃ sanātanam /
pādyārghyācamanīyaṃ ca gandhapuṣpādibhiḥ kramāt

gaulyaṃ pāyasamudgānnaṃ sopadaṃśaṃ ghṛtāplutam /
nivedayitvāṃ devasya dādhikaṃ tu nivedayet

pānīyācamanīyaṃ ca mukhavāsaṃ nivedayet /
tatastu śāyayeddevaṃ namaskṛtya tu deśikaḥ

gandhatoyena saṃpūrṇān sūtratrayasuveṣṭitān /
aśvatthapallavairyuktān droṇena paripūritān

pakvabimbaphalākārān mṛdghaṭān lakṣaṇānvitān /
pañcaratnasamāyuktān hemapañcāyudhānvitān

sauvarṇaṃ cāpi śrīvatsaṃ sauvarṇagaruḍānvitam /
śaṅkhaṃ cakraṃ ca kūrmaṃ ca saṃsmarenmūlavidyayā

sakūrcaṃ sāpidhānaṃ ca vastrayugmena veṣṭitam /
devasya dakṣiṇe pārśve vinyaseddhānyarāśiṣu

pradhānakumbhamādāya prāṅmukho vāpyudaṅmukhaḥ /
pañcamūrtimanudhyāyet tatkumbhe 'vāhya nārada

brahmabījena tatkumbhaṃ gandhapuṣpaiḥ samarcayet /
karmārcā cotsavaṃ snānaṃ baliryātrā ca pañcamam

snāne pratiṣṭhādhivāse kālamekaṃ(?)tu kārayet /
devena saha saṃyojya devīnāṃ munisattama

vidyaśvarāṣṭakuṃbhāṃśca aṣṭadikṣvatha vinyaset /
hemaratnayutāṃścaiva vastrasaṃveṣṭitān śubhān

indrādīśānaparyantaṃ vārāhādīṃśca vinyaset /
svanāmnā pūjayettāṃśca śaṅkhādīn maṅgalān(?)nyaset

gandhapuṣpākṣatāṃścaiva vastreṇa pariveṣṭitān /
evaṃ kṛtvā vidhānena mūrtihomaṃ samācaret

ṛgādivedasaṃyuktaṃ dikṣu pūrvādiṣu dvija /
śaṅkhādighoṣasaṃyuktaṃ nṛttagītasamanvitam

vīṇāveṇusamāyuktaṃ homakarma samācaret /
vaiṣṇavāgniṃ samādāya kuṇḍeṣvagniṃ nidhāpayet

pālaśākhādiraṃ caiva bilvamaudumbaraṃ tathā /
samidaṣṭaśataṃ proktaṃ pṛthak pūrvādi kalpayet

pālāśakhādirābhāve bilvaireva tu kārayet /
bilvābhāve muniśreṣṭha audumbaramathācaret

pūrvādi cāgnikuṇḍeṣu samidhaḥ parikīrtitāḥ /
ājyaṃ caruvaduddiṣṭaṃ tatsaṃkhyā ca pṛthakpṛthak

agnimadhye tathā padmaṃ dhyāyet kesarapatrakam /
tatrasthā devatā dhyātvā homaṃ kuryādvicakṣaṇaḥ

juhuyuḥ prāṅmukhāḥ sarve sottarīyāḥ svalaṃkṛtāḥ /
bhojayedbrāhmaṇān rātrau bhaktān dvādaśa pāyasam

vedādhyayanamevātra caturdikṣu ca kārayet /
pāyasaṃ kṛsaraṃ gaulyaṃ haridrānnaṃ caturvidham

pūrvādi cottarāntaṃ tu yathāsaṃravyaṃ prakalpayet /
śāntihomaṃ tataḥ kṛtvā homānte ca yathākramam

madhunā payasā dadhnā hūyatena (juhuyācca?) ghṛtena ca /
pauruṣeṇa ca sūktena pratyekaṃ ṣoḍaśāhutīḥ

pūrvādi cottarāntaṃ tu kuṇḍe caiva yathākramam /
hutvā hutvā spṛśeyuste pratimāṃ mūlavidyayā

madhu hutvā spṛśet pādaṃ kṣīraṃ hutvodaraṃ spṛśet /
dadhi hutvā ca vadanaṃ hutvājyaṃ śirasi spṛśet

palāśaśākhayā prācyāṃ siñcettanmūrtidhārakaḥ /
dakṣiṇasyāṃ tataḥ siñcet khādirasya tu śākhayā

siñcettanmūrtidhārastu pratīcyāṃ bilvaśākhayā /
udumbareṇa codīcyāṃ siñcettanmūrtidhārakaḥ

ācāryaḥ koṇadeśe tu siñcedvetasaśākhayā /
puṣpāñjaliṃ(-liḥ?)namaskṛtya ācāryo mūlavidyayā

uttarāgnau tu juhuyāt ācāryo madhuratrayam /
gulājyamadhusaṃmiśraṃ madhuratrayamucyate

mūlamantreṇa juhuyāt pratyekāṣṭāhutīḥ kramāt /
nṛttageyaiśca vādyaiśca vedādhyayanasatkathām (-saṃyutaiḥ)

anirvāṇapradīpaiśca rātriśeṣaṃ samāpayet /
prabhātāyāṃ tu śarvaryāṃ snātvācāryaḥ prayatnavān

dvārasya dakṣiṇe pārśve sthaṇḍile caturaśrake /
kārayedvāstuhomaṃ tu samidājyacarūnapi

apāmārgasya samidhaḥ śamyāśca khadirasya ca /
yakṣarakṣaḥ piśācānāṃ śāntyarthaṃ juhuyāt pṛthak

praṇavādisvamantraiśca juhuyānmantravittamaḥ /
diśāhomāṃśca kurvīta prāsādasya samantataḥ

sthaṇḍileṣvevamevāgniṃ juhuyāddikpatīn kramāt /
dhyātvā dhyātvā svamantreṇa samidādi yathākramam

palāśakhadirāśvatthaplakṣanyagrodhabilvajāḥ /
udumbaraśca kāśmaryaḥ samidho 'ṣṭau prakīrtitāḥ

aindrādīśānaparyantaṃ samidājyacarūnapi /
evaṃ samāpya vidhivat vāstuhomādikān kramāt

kārayenmuniśārdvala paścāt pūrṇāhutiṃ hunet /
vauṣaḍantena mantreṇa ācāryaḥ paścime 'nale

dvādaśākṣaramantreṇa srucā pūrṇāhutiṃ hunet /
gandhapuṣpādinābhyarcya ghaṇṭāśabdasamanvitam

pūrṇāhutiṃ kramāt kṛtvā tridhā mantramanusmaran /
gomayena samālipya bālasthānaṃ samantataḥ

mūlasthānaṃ tu vā tatra mūlamantreṇa mantravit /
aṣṭadikṣu yathānyāyaṃ kārayedyatnato dhvajān

toraṇān śāstravihitān caturdikṣu niveśayet /
darbhamālādisaṃyuktaṃ muktādāmaira (-mādya?) laṃkṛtam

sarvālaṃkārasaṃyuktaṃ puṣpamālāvibhūṣitam /
puṇyāhaṃ vācayitvā tu pūjanīyāṃśca pūjayet

vastrābharaṇakaṃ samyagācāryaya pradāpayet /
ācāryamanasaḥ prītiratisaṃpattikāriṇī

sauvarṇaṃ brahmasūtraṃ tu sauvarṇaṃ karṇabhūṣaṇam /
aṅgulīvalayaṃ caiva prakoṣṭhavalayaṃ tathā

alaṃkṛtyaivamācāryaṃ dakṣiṇāṃ tasya dāpayet /
pañcaviṃśatiniṣkaṃ tu suvarṇaṃ dakṣiṇottamam

tadardhaṃ madhyamaṃ caiva tadardhamadhamaṃ bhavet /
evameva tu kartavya utsave dakṣiṇākramaḥ

uttamādikramāt proktā dakṣiṇā munisattama /
yathā (-dvai?)vittānusāreṇa dadyādvā(-dvai?)dakṣiṇāṃ mune

atropayuktaṃ yaddravyaṃ devatālaṃkṛtiṃ vinā /
ācāryāya pradātavyaṃ vastravrīhyādikaṃ tathā

ācāryadakṣiṇārdhāṃśatulyā sthāpakadakṣiṇā /
tadardhaṃ mūrtipānāṃ tu vāstuśāntikṛtastathā

hotṝṇāṃ dakṣiṇārdhaṃ syād adhyetṝṇāṃ tu dakṣiṇā /
sarveṣāṃ caiva dātavyaṃ vastrayugmaṃ navaṃ śubham

daivajñaṃ pūjayet paścāt sumuhūrtaprado hi saḥ /
geyanṛttakarāṃścaiva pūjayedvaiṣṇavāṃstataḥ

mūhūrte śobhane prāpte brāhmaṇānāmanujñayā /
sūryamaṇḍalamadhyasthaṃ devaṃ nārāyaṇaṃ prabhum

kumbhe pañcapratīke ca āvāhya praṇavena tu /
arghyapādyāpadinābhyarcya ekamūrtimanusmaret

pūjayitvā muniśreṣṭha svayaṃ tu vigataspṛhaḥ /
śriyaṃ puṣṭiṃ tathā kumbhamadhye saṃpūjayettataḥ

praṇavādi svanāmnā tu sādhako mantravittamaḥ /
tatkumbhāntargataṃ devaṃ sthāpayet sādhakottamaḥ

sthāpakaścoddharet kumbhamācāryo vā munīśvara /
uttaryoṣṇīṣasaṃyuktamuddharet kumbhamuttamam

tathaiva samalaṃkṛtya sthāpakaṃ munisattama /
ācāryo mūrtipairyuktaḥ pratimāmuddharet kramāt

maṅgalānu(-nyu?)ddhareyuśca diśāhomakarāstathā /
śaṅkhadundubhighoṣaiśca svastivācanasaṃyutam

nṛttageyasamāyuktaṃ dhūpadīpasamanvitam /
puṣpavṛṣṭisamāyuktaṃ vitānadhvajasaṃyutam

tatastu samalaṃkṛtya devāgre vaiṣṇavān śubhān /
gandhatoyena saṃpūrṇān sūtratrayasuveṣṭitān

aśvatthapallavairyuktān droṇena paripūritān /
vardhanīṃ gṛhya tantrajño devāgre 'cchinnadhārayā

gehaṃ pradakṣiṇaṃ kṛtvā bālasthānaṃ praveśayet /
pratimāṃ mūrtimantreṇa sthāpayenmantravittamaḥ

tataśca pañcamantrāṇāṃ (-ntrāṃśca?) sthāpayedvihitena ca /
tasyāgre sthāpayet kumbhamācāryastantravittamaḥ

tattoyaṃ pratimāmūrdhni mūlamantreṇa secayet /
śriyādīnāṃ(?)svamantraistu secayeddevavat kramāt

karmārcanādi mūrtīnāṃ(?) secayenmūlaberavat /
kumbhāccheṣodakaṃ gṛhya taccharāve niṣicya ca

śalākamātrayā caiva dhārayācchinnayā punaḥ /
paritaḥ pariṣekaṃ ca kuryānmūlena mantravit

añjaliṃ darśayitvā tu sarvamantrāṃśca(-mantraṃ ca?)saṃsmaret /
dvārasyottarapārśve tu nyāsahomaṃ svamantrataḥ

sthaṇḍile muniśārdūla pañcarātraviśāradaiḥ /
kārayet samidādyaistu pratyekaikāhutiṃ kramāt

mantranyāsaṃ tataḥ kuryāt pūrvavat sādhakottamaḥ /
tathaiva kārayettasmin sthāpako nyāsamuttamam

paścāddevaṃ samālambya pūjayet sādhakottamaḥ /
gandhapuṣpādinābhyarcya praṇamya ca janārdanam

saṃnidhānaṃ kuruṣveti praṇamet daṇḍavat kṣitau /
tasmin kāle mahāprājño vedādhyayanamācaret

puṣpāñjalirnamaskṛtya ācāryo mantramuccaret /
sarvaṃ nyūnātiriktaṃ ca mayā pūrvaṃ ca yatkṛtam

tatsarvaṃ devadeveśa kṣantumarhasi me prabho /
tatastu muniśārdūla prāsādaṃ prokṣayedbudhaḥ

kumbhodakādaśeṣaṃ tu bahirantaśca sarvaśaḥ /
pauruṣeṇaiva sūktena prokṣaṇādeva śuddhyati

pāyasaṃ kṛsaraṃ gaulyaṃ mudgānnaṃ ca nivedayet /
tāmbūlaṃ mukhavāsaṃ ca parivārāṃśca(?)kalpayet

homapūrveṇa mantrajño hyantarbahiranukramāt /
lokapālān muniśreṣṭha kalpayettu yathākramam

anyāvaraṇadevāṃśca bālagehe na kalpayet /
dine dine tu kartavyo homūparvo balikramaḥ

caṇḍādīśāvasānaṃ tu baliṃ dadyāt pṛthakpṛthak /
mahāpīṭhārdhamānaṃ tu vistarāyāmatādṛśam

bālagehasya pūrve tu kalpayet pīṭhamuttamam /
pīṭhopari mune padmamaṣṭapatraṃ sakarṇikam

pūrvavat pārṣadān sarvān tiṣṭhantau(-to?)balipīṭhakau(-ke?) /
baliśeṣaṃ nyaseddhīmān pūrvavanmantrasaṃyutam

utsavasnapanādīni kārayecchāstracoditam /
śeṣaṃ sādhāraṇaṃ kuryāt bālasthāne munīśvara

bālasthānaṃ vinā pūrvaṃ mūlasthānaṃ na kārayet /
yadi kuryānmahādoṣaḥ kartṛdeśavināśanaḥ

bālagehārcanābimbaṃ mūlāgāre na pūjayet /
pūjayedyadi tadbimbaṃ kartā rāṣṭraṃ ca naśyati

tasmāt sarvaprayatnena mūlāgāre na pūjayet /
pratiṣṭhānte muniśreṣṭha utsavaṃ kārayet kramāt

pañcasaptanavāhaṃ vā yathāvittānusārataḥ(?) /
dhvajaṃ caivotsavāraṃbhe sadyaḥ kuryāttu taddine

tīrthānte snapanaṃ kuryāt pūrvoktena vidhānataḥ /
puṣpayāgavidhānaṃ tu neṣyate 'smin mahāmune

iti saṃkṣepataḥ prokto bālasthānavidhirmune /
evameva dvitīyasya pratiṣṭhālakṣaṇaṃ param

viśeṣaṃ cātra vakṣyābhi dvitīyasya muhāmune /
pratiṣṭhārkṣasya pūrvedyuḥ madhyarātre 'lpagehake

sthaṇḍilaṃ caturaśraṃ ca hastamātraṃ samantataḥ /
kārayitvā muniśreṣṭha paścāddevaṃ nayedbudhaḥ

bimbāgre sthaṇḍile madhye mūlamantramanusmaran /
kumbhaṃ saṃsthāpya vidhivat tatkumbhe kalpayeddharim

ānayenmūrtimantreṇa gandhapuṣpādinārcayet /
kumbhasyāntargataṃ devaṃ ravimadhye nayet kṣaṇāt

paścāddevaṃ samāvāhya mahākumbhe mahāmune /
tatkumbhāntargataṃ devaṃ mūlabere nyedbudhaḥ

pūrvavat prokṣayenmūlasthānaṃ tantravicakṣaṇaḥ /
parivārānaśeṣāṃstu kalpayecchāstracoditam

digdevān vidhivat sthāpya pūjayettaddine dine /
viśeṣaścātra saṃproktaḥ śeṣaṃ sādhāraṇaṃ bhavet

yuktyā yuktiviśeṣeṇa kārayediha nārada /
prathame ca dvitīye ca kriyāsu munisattama

evaṃ kṛte tu vidhivat tadrājño rāṣṭravāsinām /
kartuḥ kārayituścaiva āyuḥ śrīścāpi vardhate