Viṣvaksenasaṃhitā · Chapter 15

iti śrīpāñcarātre viṣvaksenasaṃhitāyāṃ carupākavidhirnāma caturdaśo 'dhyāyaḥ ||
pañcadaśo 'dhyāyaḥ
nāradaḥ---
brūhi me hariseneśa mūlamantreṇa vistarāt /
homakramaṃ kṛpādhāra śuśrūṣorbhaktavatsala

viṣvaksenaḥ---
śṛṇu nārada tattvena pūrvabhāge yathāmune /
kuṇḍāni sruksruvaṃ (vau?)caiva praspaṣṭaṃ proktavānaham

tatkrameṇa vinā vāpi saha vā mūlavidyayā /
homaṃ kuryādyathāśakti siddhaṃ(ddhiṃ?)vindeta sarvathā

vaiṣṇavaiḥ karaṇairyuktamatastaṃ prathamaṃ śṛṇu /
pippalaṃ ca śamīgarbhamaraṇiṃ parikalpayet

mathitvā vaiṣṇavairagnimathavā ratnasaṃbhavam /
laukikaṃ vā samānīya prokṣayeddvādaśākṣaraiḥ

ācāryo 'gniṃ samādāya svātmanyevopasaṃharet /
tena bījena matimān tarjanyaṅguṣṭhayā mune

añjalimudrayā cāgniṃ namaskṛtya punaḥ punaḥ /
kuṇḍaṃ vā sthaṇḍilaṃ vāpi caturaśraṃ tu kārayet

vaiṣṇavīkaraṇārthāya agnerhasta(?)matandritaḥ /
caturaṅgulamānena khānayedavaṭaṃ dharām

khātāddhi dvyaṅgulaṃ hitvā mekhalāṃ parikalpayet /
caturaṅgulavistāramutsedhaṃ tu tathaiva ca

kāreyantamuniśārdūlada mekhalaikā samantataḥ /
ityekamekhalākuṇḍaṃ tantre 'smin parikīrtitam

vaiṣṇavānalakuṇḍasya valayaṃ yonikalpanam /
yathākāmaṃ prakartavyā yoniḥ pippalapatravat

karṣaṇādiṣu sarvāsu kriyāsu munisattama /
vaiṣṇavīkaraṇārthāya saṃproktaṃ kuṇḍalakṣaṇam

saṃprokṣyābhyukṣma śā(cā?) streṇa sādhako munasittama /
upalipyollikhedrekhāmargalāṃ(?) yajñanāmikām

saumyāgrāṃ prathamāṃ tasyā rekhe pūrvāgrike tayoḥ /
madhye tisrastathārūpāḥ dakṣiṇādikrameṇa tu

evamullikhya cābhyukṣya praṇavenaiva mantravit /
śayyāṃ tu cintayet pūrvaṃ kuṇḍamadhye tu deśikaḥ

dharmādipādaṃ(dān?)vinyasya tathādharmādikatrayam /
anantaṃ vinyasenmadhye tataḥ pāśāstrayo guṇāḥ

tataḥ proktavidhānena mūlamantreṇa sādhakaḥ /
pṛthivyādīni bhūtāni karaṇādīni kartṛke(?)

paristaraṇasaṃchannāṃ dhūpāmodasudhūpitām (?) /
dhyāyecca lakṣmīṃ tanmadhye prakṛtiṃ triguṇātmikām

tasmin śayanamadhye tu saṃprāptanavayauvanām /
atīva rūpasaṃmpannāṃ madaghūrṇitalocanām

sargaśaktisamopetāṃ vaiṣṇavīṃ śubhavigrahām /
divyamālyāmbaradharāṃ divyaratnavirājitām

divyagandhānuliptāṅgīṃ divyābharaṇabhūṣitām /
sābhilāṣāmṛtusnātāṃ prārthayantīṃ hariṃ prati

evaṃ rūpāṃ ca saṃcintya devīṃ paṅkajadhāriṇīm /
gandhamālyodakādīni mukhavāsāntakāni ca

yāni krīḍopacārāṇi tāni dhyātvā samantataḥ /
atīva rūpasampannaṃ prathame vayasi sthitam

makuṭāṅgadacitrāṅgaṃ nīlakuñcitamūrdhajam /
divyamālyāmbaradharaṃ divyaratnavirājitam

śrīvatsenāṅkitoraskaṃ vanamālāvirājitam /
sarvaratnaprabhājālakaustubhena virājitam

annatāṃsaṃ mahoraskaṃ karṇāntāyatalocanam /
ājānubāhuṃ śrīmantaṃ saumyaṃ prahasitānanam

lāvaṇyāmṛtatoyena siñcantamiva sarvataḥ /
caturbhujamanudhyāyet śaṅkhacakragadādharam

evaṃ rūpaṃ tato dhyātvā devīṃ devaṃ tathaiva ca /
arcayedgandhapuṣpādyairupacārairmanoramaiḥ

saṃpūjayettato bhaktyā svayaṃ tu vigataspṛhaḥ /
ekaśayyāgatau dhyātvā samāliṅgya vyavasthitau

paścāttu grāmyadharmeṇa paraṃ harṣamupāgatau /
devasya śuklamadhyasthaṃ vahnibījaṃ tu sādhakaḥ

tena bījena matimān nyasedagnimanuttamam /
garbhaśayyāṃ pratiṣṭhāpya tadratnena samanvitam

devaṃ visarjayet paścāt garbhādhāne kṛte sati /
agniṃ samedhayet paścāt śuṣkakāṣṭhairanantaram

prādeśamātrāḥsamidhaḥ kṛtvādhānaṃ tataḥ punaḥ /
parisamūhya tato darbhaiḥ paristīrya tridhā tridhā

agrairācchādayedyadvat mūlaṃ pūrvāditaḥ kramāt /
pātrāṇyāsādayettasmin idhmabarhidvayaṃ tathā

sruksruvau ca praṇītena(ca?)kṣa(sthā?) payitvātra sādhakaḥ /
prokṣaṇī ca praṇīte dve ājyasthālīmukhaṃ(dvayaṃ) tathā

yugmaṃ yugmaṃ vyavasthāpya anyadapyupayogi yat /
tatsarvaṃ prokṣāyitvā tu gṛhītvā prokṣaṇīṃ tataḥ

adbhiḥ saṃpūrya cotpūya pavitrāntarhite kare /
avasthāpya ca tattoyaṃ prokṣayitvātra sādhakaḥ

prokṣaṇyāmeva tatkṛtvā dhyātvā jyotiṣamavyayam /
pūrvavat sthāpayedagneḥ(gniṃ?) saṃskṛtyāntarjalena tu

triḥsaṃprokṣya tataḥsarvaṃ idhmaṃ visrasya sādhakaḥ /
gandhapuṣpākṣatayutāṃ pavitrāntarjalena tu

praṇītāmagrataḥ kṛtvā tasyāṃ sāṅgaṃ nyaseddharim /
gandhādibhiḥsamabhyarcya sarvarakṣākaraṃ prabhum

dhyātvā nītvottare bhāge sthāpayitvārcayed budhaḥ /
ājyasthālīmathājyena saṃpūryāgre nidhāya tu

saṃplavotplavanābhyāṃ tu kuryādājyasya saṃskṛtim /
ākhaṇḍitāgrau nihatau kuśau prādeśamātrakau

tābhyāmuttānapāṇibhyāmaṅguṣṭhānāmikena tu /
tānantayostu saṃgṛhya trirnītvā trirathānayet

sruksruvau cāpi saṃmṛjya punaḥ prakṣālya caiva hi /
niṣṭapya sthāpayitvā tu praṇavenaiva sādhakaḥ

tena bījena matimān garbhādhānādi homayet /
garbhādhānaṃ puṃsavanaṃ sīmantonnayanaṃ tathā

jātakarmanāmakaraṇānnaprāśanameva ca /
caulaṃ tathopanayanaṃ prājāpatyaṃ tu somakam

vaiśvadevaṃ ca śukriyaṃ samāvartanameva ca /
vivāha iti vijñeyo mune 'taḥ parameva hi

saṃskārānukramaḥ proktastatkriyā vakṣyate 'dhunā /
agniṃ samarcya gandhādyaiḥ garbhādhānādi homayet

ācāryo 'nalajihvāsu saptasvevārabhenmune /
anyathākṛtatulyaṃ syāt viparītaphalapradam

nāradaḥ---
brūhi yatkathitaṃ pūrvaṃ śravaṇīyaṃ mayā yadi /
jihvā sapteti kiṃ nāma kiṃ padaṃ kiṃ guṇaṃ mune

viṣvaksenaḥ---
śṛṇu vakṣyāmyahaṃ samyak rahasyaṃ paramaṃ mune /
jihvākhyāṃ sthānarūpe ca viniyogamataḥ param

jihvāgneḥ prathamā kālī karālī tadanantarā /
manojavā yā tṛtīyā tu turyā lohitā bhavet

sudhūmrā pañcamī ṣaṣṭha sphaliṅginyabhiśabditā /
saptamī viśvarūpākhyā saptajihvāḥ prakīrtitāḥ

kālyāstu madhyamaṃ sthānaṃ karālyāḥ pūrvadig bhavet /
manojavāyāḥ kīnāśaṃ vāruṇī(-ṇaṃ?) lohitāpadam

sūdhūmrā somanīlāya (-nilayā?)sphuliṅginyanalālayā /
viśvarūpī(-pe?)śavasatirevaṃ sthānaṃ kramānmune

āsāṃ kālyāṃ vivāhāntaṃ garbhādhānādi kārayet /
vaiṣṇavānalarūpe tu praṇevana huned ghṛtam

ekaikamaṣṭāhutibhiḥ saṃskārāṇi viśeṣataḥ /
smaraṃstattadbhāvanayā sādhakaḥ prauḍhamānasaḥ

ṣoḍaśedhmān samādāya sakṛt praṇavamuccaran /
juhuyāt kuṇḍamadhye tu kālyāṃ cānnāvasānake(kam?)

punarājyāhutiṃ hutvā praṇavenāṣṭadhātra tu /
caruṃ hutvākṣamātreṇa pratyekaikāhutiṃ kramāt

aṣṭākṣareṇa mantreṇa a(-ṇāpya?)ṣṭāviṃśatisaṃkhyayā /
pūrṇāhutiṃ tato hutvā srucā mūlena sādhakaḥ

vauṣaḍantena mantreṇa plutaṃ praṇavamuccaret /
gandhapuṣpādinābhyarcya namaskṛtyāgnimantrataḥ

kuṇḍādagniṃ samādāya pūrvakuṇḍe niyojayet /
tatastu dakṣiṇe nyasya paścime tadanantaram

uttare 'gniṃ vinikṣipya mūlamantreṇa sādhakaḥ /
athavātra muniśreṣṭha sarvaṃ vai prathamena tu

kuṇḍe kuṇḍe vinikṣipya pāvakaṃ paramārthavit /
evaṃ saṃskṛtya vidhinā pāvakaṃ pāvanaṃ hareḥ

evaṃ tathāgnisaṃskāraṃ sarvayāgeṣu kīrtitam /
vaiṣṇavīkaraṇe caivaṃ vaiṣṇavāgnistato bhavet

paridhiprabhṛtīn dagdhvā praṇavena tu sādhakaḥ /
etatkrameṇa cotpādya vaiṣṇavāgniṃ tu nārada

kārayedvidhivat sarvaṃ karṣaṇādikriyādiṣu /
athavā muniśārdūla pūrvakuṇḍe tu kārayet

vaiṣṇavīkaraṇaṃ sarvaṃ śeṣaṃ sādhāraṇaṃ bhavet /
kuṇḍe vā sthaṇḍile vāpi vaiṣṇavīkaraṇaṃ kura1

anyadeśe tu yo mohādagnimutpādayedyadi /
tatkriyā niṣphalā jñeyā sasyādinidhanaṃ bhavet

tasmāt sarvaprayatnena kārayedvidhicoditam /
caturaśrādikuṇḍāni saṃprokṣyāstreṇa mantrataḥ

vinyasennyāsamārgeṇa śaśāṅkādyakṣaraiḥ kramāt /
tatra nyāsakramaṃ vakṣye śṛṇu kuṇḍeṣu nārada

kuṇḍe vā sthaṇḍile vāpi praṇavābhyukṣaṇe kṛte /
prokṣayedvasusūtreṇa dakṣiṇādyuttarāntakam

paścimādīndraparyantaṃ koṣṭhaṃ kṛtvā vibhajya ca /
tanmadhyakoṣṭhaṃ prastīrya śālinā kuḍubena ca

taṇḍulenākṣatenātra candramaṇḍalamālikhet /
tanmadhye bījamālikhya pūrvādaṣṭākṣaraṃ likhet

tadbahirvasukoṣṭheṣu āṛkārāntamālikhet /
indrādīśānaparyantaṃ tadbahiḥ svarakoṣṭhake (?)

pūrvādīndreśaparyantaṃ jāntaraprabhṛtīn nyaset /
tadbahistattvakoṣṭheṣu jhādisāntamatho likhet

pūrvādyuttarapūrvāntaṃ tato vai mekhalāsu ca /
pūrvādisomaparyantaṃ paṭhantaṃ ca sudarśanam

yonimadhye tu viprendra viṣṇubījamanuttamam /
vinyaset pañcadhā tasminnanāmikyā tu sādhakaḥ

evaṃ nyāsaṃ kramāt kṛtvā sādhakānāṃ hitāya tu /
nyāsahīne 'gnikāryaṃ syāt tatkriyā niṣphalā bhavet

tadgrāmo nidhanaṃ yāti tatsthānāṃ nidhanaṃ bhavet /
tasmāt sarvaprayatnena nyāsaṃ kuryādvicakṣaṇaḥ

kuṇḍe kuṇḍe muniśreṣṭha sthaṇḍile vāpyatandritaḥ /
gandhādidīpaparyantamabhyarcyāñjalimudrikām

darśayitvā yathānyāyaṃ kuryāt pañcaśataṃ (?) kramāt /
tathaiva mekhalāyāṃ tu pūjayedyonimeva ca

ataḥ paraṃ pravakṣyāmi homānukramamuttamam /
karṣaṇādiṣu sarvāsu kriyāsu munisattama

ācāryaḥ prakrameddhomaṃ barhiṃṣi samidhastathā /
paridhisruksruvānnaṃ cāpyājyaṃ lājaṃ tilaṃ tathā

tadindhanabalidravyaṃ gandhaṃ puṣpaṃ sudhūpakam /
dīpaṃ vardhanīṃ gandhodaṃ prokṣaṇīpātrakaṃ tathā

praṇītājyamathānyacca hastamutsṛjya vinyaset /
uttareṇānilasthānāt yugmaṃ yugmena sādhakaḥ

prokṣaṇyāṃ vardhanīnīramāsicya prokṣya vidyayā /
mūlayā sādhanadravyamāhūyāgniṃ tato mune

analaṃ pūrvavat prokṣya a(cā?)gnimūrtimanusmaret /
agniṃ prokṣyāvaṭasthaṃ taṃ sānusvāre tu bījake

hastābhyāmanalaṃ sthāpya pūrvoktena vidhānataḥ /
edhāṃsi jvālayitvokṣya paristīryāgnimadhyame

padmamaṣṭadalaṃ dhyātvā tatra vai mūlaberataḥ /
āvāhayitvā deveśamarcayedvidhicoditam

atra kaścidviśeṣo 'sti homakarmaṇi nārada /
devaṃ śvetādrisaṃkāśaṃ tripādaṃ saptabāhukam

vedaśṛṅgaṃ dvivadanaṃ pītāmbaradharaṃ harim /
śaṅkhacakragadāpāṇiṃ saptajihvaṃ subhūṣaṇam

saumyaṃ[ca] sarvābharaṇairdivyaiḥ parivṛtaṃ budhaḥ /
agnau vahnisvarūpeṇa sthitamarcāmukhaṃ smaret

tasmādardhyādi datvā ca dakṣiṇe 'gnervidhiṃ nyaset /
taṃ pūjya vidhivat paścāt homadravyāṇi madhyame

praṇītābhājanaṃ nyasya tatra sāṅgaṃ nyaseddharim /
devamabhyarcya gandhādyaiḥ homakarma samācaret

nitye naimittike kāmye samidājyairyathākramam /
samit(?) pālāśakhadirabilvodumbarapippalāḥ

sadvṛkṣā viduṣā grāhyāstanmānaṃ dvādaśāṅgulam /
kaniṣṭhikāghanā vakragrandhinyāsānyavṛttataḥ

paridhirhastamātraḥsyāt sthaṇḍile kuṇḍa eva vā /
madhyamekhalayā tulyamaṅguṣṭhānāṃ ghanaṃ viduḥ(?)

devānāṃ paridhīn dikṣu catasṛṣvapi kārayet /
viṣṇuyāge viśeṣeṇa dvijānāmagnikarmaṇi

triṣveva tu mune buddhi homāntaṃ paścimādikam(?) /
viṣṇormakhe mahendrādidarbhān sarvāsu cobhayoḥ

niśācarāṇāṃ rakṣāyai viśeṣaṃ munisattama /
mahendraprabhṛtīnāṃ tu homadravyāpahāriṇām

evaṃ jñātvā muniśreṣṭha idhmādyairhemamācaret /
karālyāṃ samidho hutvā mūlamantreṇa mantravit

manojavāyāmājyena vedādyenaiva deśikaḥ /
lohitāyāṃ tathānnena juhuyānmūrtimantrataḥ

sudhūmrāyāṃ tathā lājān vidhāyātha dvitīyayā /
tṛtīyena tu mantreṇa sphuliṅginyāṃ tilaṃ tathā

viśvarūpyāṃ caturthena tattaddravyaṃ dine dine /
adhomukhāṅguṣṭhasahitānāmikā sahamadhyamā

āmadhyaparva gṛhṇāti kriyāṃ tenaiva kārayet /
homadravyeṇa homaṃ tu sarpiṣā śuktikāhutim

prāyaścittāhutiṃ pūrṇāṃ paridhyādi tathā (tataḥ?) param /
anuktasthānakaṃ sarvaṃ kālyāṃ tu juhuyāt punaḥ

samidāditilāntaṃ ca dravyamaṣṭottaraṃ śatam /
prāyaścittāhutiṃ kuryādekāṃ mūlena vidyayā

pūrṇāhutiṃ tato hutvā srucā mūlena sādhakaḥ /
vauṣaḍantena mantreṇa dvādaśākṣarasaṃjñayā

paridhiprabhṛtīn sarvān vauṣaḍantaṃ tathā hunet /
svāhāntaṃ mūlamantreṇa muṣṭyājyena ca pūraṇam

āhutīśca yathāśāstraṃ juhuyāt sādhakottamaḥ /
pūrṇāhutyavasāne tu mūlenāṣṭottaraṃ japet

paridhīnutsavānte ca dāhayedutsave mune /
nityāgnau ca yathākāmaṃ sarvaṃ naimittikaṃ tathā

utsavānutsavāgnau vā kuryānnaimittikaṃ budhaḥ /
ācāryebhyo yathākāmaṃ dakṣiṇāmādadettataḥ

dakṣiṇāhīnametaccet sarvaṃ niṣphalameva hi /
tasmādācāryatṛptyarthaṃ rājarāṣṭravivṛddhaye

ācāryaṃ pūjayecchiṣyaṃ bhūṣaṇācchādanairapi /
dhānyaiścaiva dhanaiścaiva yajamānena satkṛtaḥ

dakṣiṇāṃ gurave dadyāt yajamāno yathābalam /
anyathākṛtametaccet sarvaṃ rāṣṭraṃ vinaśyati

tasmāt sarvaprayatnena vidhānoktaṃ samācaret /
kuṇḍastha pūjayeddevamupacāreṇa yatnataḥ

anantaraṃ praviśyātha mudrāmañjalisaṃjñitām /
udvāsayettataḥ kuṇḍāt mūlabere vidhānavit

karṣaṇādyutsave kāle nityotsavavidhāvapi /
evamuktaprakāreṇa homaṃ kuryādvicakṣaṇaḥ

hareratipriyāśeṣalokān samavikārayet (?) /
nityahome tu paridhīn barhīṃṣi ca na dāhayet

etadrahasyaṃ kathitaṃ mune homavidhikramam /
hareratipriyakaraṃ yaḥ kuryāt kārayedapi