Viṣvaksenasaṃhitā · Chapter 17

iti śrīpāñcarātre viṣvaksenasaṃhitāyāṃ pratiṣṭhāvidhirnāma ṣoḍaśo 'dhyāyaḥ ||
saptadaśo 'dhyāyaḥ
saptadaśo 'dhyāyaḥ viṣvaksenaḥ---
athātaḥ saṃpravakṣyāmi jaṅgamasthāpanaṃ param /
apradhānaṃ ca bimbaṃ tu jaṅgamaṃ bimbamuttamam

pṛthak cet sarvakarmāṇi bimbaśuddhyarthameva ca /
kārayenmuniśārdūla snānādipratimākriyām

snānotsavādikāryārthaṃ kāle 'smin vartate sati (?) /
jalavāsaṃ kramāt kṛtvā maṇḍape cādhivāsanam

kṛtvā tu pūrvavaddhomaṃ tilahomaṃ vinā dvija /
snapanaṃ vidhivat kṛtvā ratnanyāsaṃ vinā mune

mantranyāsaṃ vinā tasmin tattvanyāsaṃ samācaret /
madhyasūtraṃ parityajya prāsāde parameṣṭhinā

pauruṣaṃ sūktamuccārya sthāpayenmatimān pṛthak /
mūrtīnāṃ sthānabhedastu bimbādhyāye pradarśitaḥ

tattatsthāne svamantreṇa saṃsthāpyārcādi nārada /
yadrupaṃ mūlaberasya yaccihnaiścihnitaṃ purā

yā mūrtiḥ sthāpitā pūrvaṃ mūlārceti mahātmabhiḥ /
yathā cāyudhavinyāsaḥ kathaṃ(kṛto?)buddhimatāṃ varaiḥ

karmārcādiṣu bereṣu tatsarvaṃ kārayettathā /
na vidhiḥ śayitasyaiṣaḥ sthāpanādi prakīrtitam

śayitasya tu karmārcā sthānakaṃ tvāsanaṃ tu vā /
saṃsthāpya vāsudevākhyaṃ na saṃkarṣaṇamiṣyate

tathā saṃkarṣaṇaṃ sthāpya pradyumnaṃ nārcayet sudhīḥ /
pradyumnasthāpanārcāyāṃ karmārcā nāniruddhakā

karmārcā sarvathā kāryā mūlabimbānusāriṇī /
viśeṣaścātra saṃproktaḥ śeṣaṃ pūrvavadācaret

evaṃ saṃkṣepataḥ proktaṃ jaṅgamasthāpanaṃ mune /
dhanyaṃ yaśasyamāyuṣyaṃ sarvakāmaphalapradam

sthāpanaṃ saṃpravakṣyāmi citrābhāsārdhacitrake /
ābhāsaṃ trividhaṃ proktaṃ bhittau ca phalake paṭe

ardhacitraṃ tathā bhittau śilāyāṃ dāruke 'pi ca(?) /
vidyate yadi karmārcāpyeteṣāṃ(syādeṣāṃ?)lohajākṛtiḥ

karmārcāyāṃ tu sakalāṃ kriyāṃ kṛtvā tu pūrvavat /
mūlārcāyāṃ tu kartavyo mantranyāso dvijottama

adhivāsanakumbhasthatoyena prokṣayedbudhaḥ /
tataḥ puruṣasūktena pañcopaniṣadairapi

atraiva ṣoḍaśanyāso neṣyate tantrapāragaiḥ /
phalake ca paṭe caiva viśeṣaṃ kathayāmyaham

maṇḍapaṃ pūrvavat kṛtvā vediṃ kṛtvā tu pūrvavat /
kṛtvā sulocane divye śayane saṃniveśayet

jalādhivāsanaṃ caiva neṣyate snapanaṃ budhaiḥ /
mūrtihomaṃ tataḥ kṛtvā diśāhomavivarjitam

vidyeśānapi saṃpūjya vedikākalaśeṣvatha /
pralayaṃ ca nisargaṃ ca kramāt kṛtvā tu deśikaḥ

prokṣayet svena mantreṇa brahmakumbhasthavāriṇā /
yuktyā yuktiviśeṣeṇa śeṣaṃ pūrvavadācaret

bhittisthapratimāyāṃ tu sthānaṃ kathayāmyaham /
bhittau samyakpaṭe citre varṇālaṃkārabhūṣite

ābhāse cārdhacitre vā paṭe samyaksulocane (?) /
devasya purataḥ kṛtvā maṇḍapaṃ saparicchadam

vedikāṃ tatra kurvīta pūrvoktena vidhānataḥ /
dvikarāṃ trikarāṃ vāpi śilpinā kuśalena tu

tatastu vedikāmadhye vinyasecchālisaṃcayam /
śālimadhye likhet padmamaṣṭapatraṃ sakarṇikam

tatastu droṇasaṃpūrṇaṃ brahmakumbhaṃ suvarcasam /
vastrapūtairjalaiḥ pūrṇaṃ sakūrcaṃ sāpidhānakam

sasūtraṃ vastrayugmena veṣṭitaṃ ratnasaṃyutam /
aṣṭaśaktisamopetaṃ sauvarṇāyudhapañcayuk

aśvatthapallavairyuktaṃ gandhapuṣpākṣatārcitam /
tatkumbhaṃ praṇavenaiva padmamadhye tu vinyaset

tataḥ padmadaleṣvaṣṭaghaṭāṃstu parito nyaset /
pūrvavattoyasaṃpūrṇān sahiraṇyān savastrakān

sapidhānān sakūrcāṃstu mukhe cāśvatthapallavān /
arcayedgandhapuṣpaiśca dīpairanyairvicitrakaiḥ

arcayenmūlamantreṇa nārāyaṇamanāmayam /
viśṇumakliṣṭakarmāṇaṃ paramaṃ madhyame ghaṭe

vāsudevaṃ nyaset pūrve saṃkarṣaṇaṃ tu dakṣiṇe /
pradyumnaṃ paścime nyasya aniruddhaṃ tu cottare

āgneyyāṃ vinyasellakṣmīṃ nairṛtyāṃ tu sarasvatīm /
vāyavye tu ratiṃ nyasya śāntimīśānagocare

evaṃ nyasya vidhānena gandhapuṣpādibhiryajet /
athavātra muniśreṣṭha paritaḥ kalaśān nyaset

tanmadhye cānayedaṣṭavidyeśān sādhakottamaḥ /
vārāhaṃ pūrvabhāge tu nārasiṃhaṃ tu dakṣiṇe

śrīdharaṃ paścime deśe uttare hayaśīrṣakam /
āgneye bhārgavaṃ rāmaṃ nairṛtyāṃ rāmameva ca

vāmanaṃ cāpi vāyavye vāsudevaṃ tatheśake /
svanāmnā pūjayitvaitān kalaśeṣu pṛthak pṛthak

evaṃ saṃpūjayitvā tu homakarma samācaret /
pūrvādi cottarāntaṃ tu kuṇḍāni parikalpayet

vāsudevaṃ yajet pūrvaṃ kuṇḍe tu caturaśrake /
ardhacandrāgniduṇḍe tu yāmya saṃkarṣaṇaṃ yajet

vāruṇe vṛttakuṇḍe tu pradyumnaṃ tu yajedbudhaḥ /
uttare padmakuṇḍe tu aniruddhamatho yajet

pālāśaṃ khādiraṃ caiva bailavamaudumbaraṃ tathā /
aṣṭottaraśata hutvā pūrvādi ca pṛthak kramāt

samidājyacarūn lājān juhuyurmūrtipāḥ kramāt /
athavātra muniśreṣṭha pūrvāgnau sādhakāttamaḥ

samidājyena caruṇā homamekena(?)cāpyalam /
kuṇḍe vā sthaṇḍile vāpi ācāryo juhuyādbudhaḥ

rātrau homaḥ prakartavyaḥ jalasaṃprokṣaṇaṃ divā /
na kuryāt prokṣaṇaṃ rātrau na divā homamācaret

tasmāt sarvaprayatnena rātrau homaṃ tu kārayet /
muhūrte samanuprāpte brāhmaṇānāmanujñayā

kumbhasthitena toyena prokṣayet parameṣṭhinā /
āvāhayettato devaṃ nārāyaṇamanāmayam

śaṅkhacakradharaṃ devaṃ pītāmbaradharaṃ harim /
yadrupaṃ cintitaṃ bhittau tathā dhyāyejjagadgurum

evaṃ kṛtvā mahāviṣṇuṃ prokṣayedgandhavāriṇā /
tataḥ puruṣasūktena prokṣayet pratimāṃ punaḥ

pūjayedarghyapādyaiśca carubhirvividhairapi /
yathāvittānusāreṇa(?) dadyādācāryadakṣiṇām

evaṃ saṃkṣepataḥ proktaṃ sthāpanaṃ bhittisaṃśritam /
tataḥsupīṭhikāṃ kṛtvā pīṭhasya(pīṭhaṃ ca?)paritaḥkramāt

saṃkalpya parivārāṃśca tatrāvāhya tu pūjayet /
dine dine muniśreṣṭha trisandhyaikamathāpi vā