Vishnudharmottara Purana · Chapter 3.76.80

3.76
vajra uvāca//
naranārāyaṇau kāryau kena rūpeṇa saṃyutau//
hariḥ kṛṣṇaśca kartavyaḥ kathaṃ vā bhṛgunandana

mārkaṇḍeya uvāca //
dūrvāśyāmo naraḥ kāryo dvibhujaśca mahābhuja //
nārāyaṇaścaturbāhurnīlotpaladalacchaviḥ

tayormadhye ca badarī kāryā phalavibhūṣaṇā ///
badaryāmanu tau kāryāvakṣamālādharāvubhau

aṣṭacakre sthitau yāne bhūtiyukte manohare //
kṛṣṇājinadharau dāntau jaṭāmaṇḍaladhāriṇau

pādena caikena rathasthitena pādena caikena ca jānugena //
kāryo hariścātra nareṇa tulyaḥ kṛṣṇo'pi nārāyaṇatulyamūrtiḥ

iti śrīvipṇudha०tṛ०kha०mā० saṃ० naranārāyaṇarūpanirmāṇo nāma ṣaṭsaptatitamo'dhyāyaḥ

3.77
vajra uvāca //
dharmasya rūpanirmāṇaṃ jānasya ca parantapa //
vairāgyasya va dharmajña tathaiśvaryasya me vada

mārkaṃḍeya uvāca //
caturvaktraścatuṣpādaścaturbāhussitāmbaraḥ //
sarvābharaṇavāñchveto dharmaḥ kāryo vijānatā

dakṣiṇe cākṣamālāṃ ca tasya vāme tu pustakam //
mūrtimānvyavasāyastu kāryo dakṣiṇabhāgagaḥ

vāmabhāgagataḥ kāryaḥ sukhaḥ parama rūpavān //
kāryau dharmakarau mūrdhni vinyastau ca tathā tayoḥ

akṣamālā smṛtaḥ kālaḥ pustakaṃ cāgamaṃ smṛtam //
yajñaḥ satyaṃ tapo dānaṃ tasya vaktracatuṣṭayam

deśakālau tathā śaucaṃ śuddhiścāsya bhujaḥ smṛtaḥ //
śrutiḥ smṛtiḥ sadācāraḥ svasya ca priyamātmanaḥ

tasya devasya dharmajña jñeyaṃ pādacatuṣṭayam //
sattvādhiktvācchuklastu jñānavāsaśca kīrtyate

athavā cāsya kartavyāḥ patnyaścaiva caturdaśa //
kīrtirlakṣmīrdhṛtirmedhā puṣṭiḥ śraddhā kriyā matiḥ

buddhirlajjā vapuḥ śāntiḥ siddhistuṣṭiścaturdaśī //
dvārāṇyetāni dharmasya sarvāṇi kathitāni te

kāryāḥ sarūpā dvibhujāśca sarvāstejonvitāstāśca subhūṣaṇāśca //
dharmaḥ sthitaḥ syādyadi caika eva bhāryānvitaścedatha copadiṣṭaḥ

iti śrīviṣṇudha० tṛ० kha० mā० saṃ० dharmarūpanirmāṇo nāma saptasaptatitamo'dhyāyaḥ

3.78
mārkaṇḍeya uvāca //
ya eva bhagavānviṣṇurnarasiṃha vapurdharaḥ //
dhyānavidbhiḥ sa evokto jñānaḥ palavarārdanaḥ

pīnaskandakaṭigrīvaḥ kṛśamadhyaḥ kṛśodaraḥ //
siṃhāsane nṛdehastu nīlavāsāḥ prabhānvitaḥ // ai //
ālīḍhasthānasaṃsthānaḥ sarvābharaṇabhūṣitaḥ //
jvālāmālākulamukho jvālākesaramaṇḍalaḥ

hiraṇyakaśiporvakṣaḥ pāṭayannakharaiḥ kharaiḥ //
nīlotpalābhaḥ kartavyo devajānugatastathā

hiraṇyakaśipurdaityastamajñānaṃ vidurbudhāḥ //
saṅkarṣaṇātmā bhagavānajñānasya vināśanaḥ

vāṅmanaḥkāyasambhūtaṃ trividhaṃ jagatāṃ malam //
etatsaṅkarṣaṇo devaḥ sadā pāṭayati dvija

hariḥ saṅkarṣaṇāṃśena narasiṃhavapurdharaḥ //
tamasastrividhasyāpi nāśano jagatāṃ hariḥ

hārddamūrtinibhastasya nānyo jagati vidyate //
nṛsiṃhamūrtirdevasya sarvājñānavināśinī

siṃhāsane sukhāsīnaḥ kāryo vā bhagavānhariḥ //
gadāmastakavinyastakaradvitayabhūṣaṇaḥ

jvālāmālākulavapuḥ śaṅkhapadmadharaḥ prabhuḥ //
mūrtimatpṛthivīhastanyastapādo'tha votthitaḥ

śaṅkhacakragadāpadmalāñchanaiḥ śobhitaḥ karaiḥ //
agnijvālākulāvartavibhūṣitatanūruhaḥ

narasiṃho'tha vā kāryaḥ prabhāmaṇḍaladurdṛśaḥ //
sarvābharaṇasampannaḥ kāryo bhūṣaṇavarjitaḥ

jñānaṃ nṛsiṃho jagatāmadhīśastejonivāsombarasannikāśaḥ //
rūpaṃ mayaitattrividhaṃ pradiṣṭaṃ tasyāprameyasya janārdanasya १३ //
iti śrīvi० dha० tṛ० kha० mā० saṃ० nṛsiṃharūpanirmāṇo nāmāṣṭasaptatitamo'dhyāyaḥ

3.79
// mārkaṃḍeya uvāca //
aiśvaryamaniruddhastu varāho bhagavānhariḥ //
aiśvaryaśaktyā daṃṣṭrāgrasamuddhṛtavasundharaḥ

nṛvarāho'tha vā kāryaḥ śeṣoparigataḥ prabhuḥ //
śeṣaścaturbhujaḥ kāryaścāruratnaphaṇānvitaḥ

āścaryotphullanayano devīvīkṣaṇatatparaḥ //
kartavyau sīramusalau karayostasya yādava

sarpabhūṣaśca kartavyastathaiva racitāñjaliḥ //
ālīḍhasthānasaṃsthānastatpṛṣṭhe bhagavānbhavet

savye'ratnigatā tasya yoṣidrūpā vasundharā //
namaskāraparā tasya kartavyā dvibhujā śubhā

yasminbhuje dharā devī tatra śaṅkhaḥ kare bhaveta //
anye tasya karāḥ kāryāḥ padmacakragadādharāḥ

hiraṇyākṣaśiracchedaścakrodyatakaro'tha vā //
śūlodyatahiraṇyākṣasammukho bhagavānbhavet

mūrtimantamanaiśvaryaṃ hiraṇyākṣaṃ vidurbudhāḥ //
aiśvaryeṇa varāheṇa sa nirasto'rimardanaḥ

nṛvarāho'tha vā kāryo dhyāne kapilavatsthitaḥ //
dvibhujastvatha vā kāryaḥ piṇḍanirvahaṇodyataḥ

samagrakroḍarūpo vā bahudānavamadhyagaḥ //
nṛvarāho varāho vā kartavyaḥ kṣmāvidhāṇe

aiśvaryayogoddhṛtasarvalokaḥ kāryo'niruddho bhagavānvarāhaḥ //
ruddhā na yasya kvacideva śaktiḥ samastapāpāpaharasya rājan

iti śrīvi० dha० tṛ० kha० mā० va० saṃ० varāharūpanirmāṇo nāmaikonāśītitamo'dhyāyaḥ

3.80
vajra uvāca //
athāśvaśiraso rūpaṃ viṣṇoramitatejasaḥ //
śrotumicchāmyanenaiva prasaṅgena mahābhuja

mārkaṃḍeya uvāca //
mūrtimatpṛthivīpāla hastapādasmitacchaviḥ //
nīlāmbaradharaḥ kāryo devo hayaśirodharaḥ

viddhi saṃṅkarṣaṇāṅgaṃ vai devaṃ hayaśirodharam //
kartavyo'ṣṭabhujo devastatkareṣu caturṣvatha

śaṅkhacakragadāpadmānsākārānkārayedbudhaḥ //
catvāraśca karā kāryā vedānāṃ dehadhāriṇām

devena mūrdhni vinyastā sarvā bharaṇadhāriṇā //
aśvagrīvena devena purā vedāḥ samuddhṛtāḥ

vedā hṛtā dānavapuṅgavābhyāṃ rasātalāddeva vareṇa tena//
samuddhṛtā yādavavaṃśamukhya turaṅgamūrdhnā puruṣottamena

iti śrīvi० dha० tṛ० kha० mā० va० saṃ० hayagrīvarūpanirmāṇo nāmāśītitamo'dhyāyaḥ