Vishnudharmottara Purana · Chapter 3.61.65

3.61
mārkaṇḍeya uvāca //
śukavarṇā mahī kāryā divyābharaṇabhūṣitā //
caturbhujā saumyavapuścandrāṃśusadṛśāmbarā

ratnapātraṃ sasyapātraṃ pātramoṣadhisaṃyutam //
padmaṃ kare ca kartavyaṃ bhuvo yādavanandana

diṅnāgānāṃ caturṇāṃ sā kāryā pṛṣṭhagatā tathā //
sarvauṣadhiyutā devī śuklavarṇā tataḥ smṛtā

dharmaṃ vastraṃ sitaṃ tasyāḥ padmamarthaṃ tathā kare

hetuśca śeṣo vidito budhānāmato mayā te kathito'dya rājan //
rūpaṃ tvarūpasya tu vacmyatohaṃ prakarṣitaṃ yadgaganasya siddhaiḥ

iti viṣṇudharmottare tṛtīyakhaṇḍe mārkaṇḍeyavajrasaṃvāde bhūmirūpanirmāṇo nāmaikaṣaṣṭitamo'dhyāyaḥ

3.62
mārkaṇḍeya uvāca //
nīlotpalābhaṃ gaganaṃ tadvarṇāmbaradhāriṇam //
candrārkahastaṃ kartavyaṃ dvibhujaṃ saumyadarśanam

etaddhi rūpaṃ gaganasya rājanproktaṃ mayā te parikalpitaṃ yata //
rūpaṃ pravakṣyāmyatha te nibodha pitāmahasyāpratimasya tasya

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde gaganarūpavarṇano nāma dviṣaṣṭitamo'dhyāyaḥ

mārkaṇḍeya uvāca //
padmapatrāsanasthastu brahmā kāryaścaturmukhaḥ //
sāvitrī tasya kartavyā vāmotsaṅgagatā tathā

ādityavarṇā dharmajña sākṣamālākarā tathā //
rūpaṃ pūrvoditaṃ kāryaṃ sarvamanyajjagatpate

etaddhi rūpaṃ varadasya kāryaṃ pitāmahasyāpratimasya saumya //
pūrvoditaṃ vā varadasya tasya lokaṃ samagraṃ vaśagaṃ hi yasya

iti śrīviṣṇudharmottare tṛtīya khaṇḍe mārkaṇḍeyavajrasaṃvāde brahmarūpanirmāṇo nāma triṣaṣṭitamo'dhyāyaḥ

3.64
mārkaṇḍeya uvāca //
devī sarasvatī kāryā sarvābharaṇabhūṣitā //
caturbhujā sā kartavyā tathaiva ca samutthitā

pustakaṃ cākṣamālāṃ ca tasyā dakṣiṇahastayoḥ //
vāmayośca tathā kāryā vaiṣṇavī ca kamaṇḍaluḥ

samapādapratiṣṭhā ca kāryā sāmamukhī tathā //
vedāstasya bhujā jñeyāḥ sarvaśāstrāṇi pustakam

sarvaśāstrāmṛtaraso devyā jñeyaḥ kamaṇḍaluḥ //
akṣamālā kare tasyāḥ kālo bhavati pārthiva

siddhirmūrtimatī jñeyā vaiṣṇavī nātra saṃśayaḥ //
sāvitrī vadanaṃ tasyāḥ sarvādyā parikīrtitā

candrārkalocanā jñeyā sā ca rājīvalocanā

sārasvataṃ te kathitaṃ mayaitadrūpaṃ pavitraṃ paramaṃ manojñam //
dhyeyaṃ ca kāryaṃ ca mahīpamukhya savārthasiddhiṃ samabhīpsamānaiḥ

iti viṣṇudharmottare tṛtīyakhaṇḍe mārkaṇḍeyavajrasaṃvāde sarasvatīrūpanirmāṇo nāma catuḥṣaṣṭi tamo'dhyāyaḥ

3.65
vajra uvāca //
ācakṣva rūpanirmāṇaṃ mamānantasya devaja //
viṣṇoramitavīryasya śeṣasya dharaṇībhṛtaḥ

mārkaṃḍeya uvāca //
kuryācchaśāṅkasaṅkāśaṃ ratnojjvalaphaṇānvitam//
nīlavastraṃ caturbāhuṃ sarvābharaṇadhāriṇam

phaṇāśca bahavaḥ kāryā yatphaṇaṃ tasya madhyamama//
tatra rūpavatī kāryā vasudhā yadunandana

padmaṃ samusalaṃ kāryaṃ devadakṣiṇahastayoḥ //
vāmayossīraśaṃkhe ca kare tasya surāmbudhiḥ

tālavṛkṣaṃ jagatsarvaṃ kathitaṃ tu mahābhuja //
vikhyātau sīramusalau pūrvameva mayā tava

vanamālā ca vikhyātā tathā yadukulodvaha //
pṛthivī dhāryate tena saśailavanakānanā

pṛthivī tena kartavyā phaṇe tasya tu madhyame

phaṇāvaliptasya tayā pratiṣṭhā kāmāstu te yādavavaṃśamukhya //
etaddhi rūpaṃ parameśvarasya viṣṇoracintyasya mayeritaṃ te

iti śrīviṣṇudhamottare tṛtīyakhaṇḍe mārkaṇḍeyavajrasaṃvāde'nantarūpanirūpaṇo nāma pañcaṣaṣṭitamo'dhyāyaḥ