Vishnudharmottara Purana · Chapter 3.306.310

3.306
haṃsa uvāca//
gāvaḥ pavitrā maṅgalyā goṣu lokāḥ pratiṣṭhitāḥ//
tāsvāyattāni yajñāni devatātithipūjanam

balantuṣṭiśca puṣṭiśca tathā śrāddhakriyā dvijāḥ//
nāsau sampannamaśnāti yasya dhenurna vidyate////
tasmātsarvapradānānāṃ gavāṃ dānamanuttamam //
hīnāṅgīṃ kṣīrapāṃ vṛddhāṃ dugdhadohāṃ nirindriyām

vyādhitāṃ viṣamāṃ vyālāṃ tathaiva prapalāyinīm //
mūlyaistathāpyasaṃśuddhairhṛtāśca dvijapuṅgavāt

na dātavyā smṛtā dhenurdattvā narakamāpnuyāt //
brāhmaṇo yastu kurute gorasānāṃ tu vikrayam

gavāṃ ca vikrayaṃ viprā viṣamo yastathā gavām//
apātradoṣayuktaśca na deyā tasya cāpyatha

naikā bahūnāṃ dātavyā na dvayordvijapuṅgavāḥ//
sā tu vikrayamāpannā dāturnarakadāyinī

ekaṃ pātramathāsādya deyāstu bahavaḥ smṛtāḥ //
gavāṃ pradāne yatnena parīkṣyo brāhmaṇo bhavet

yathākathañcid dattvā gāṃ dhenuṃ vā'dhenumeva vā //
arogāmaparikliṣṭāṃ dātā svarge mahīyate

dattvā vatsatarīṃ viprāḥ svargaloke mahīyate //
gurviṇīṃ ca tathā dattvā vasūnāṃ lokamaśnute

prasūyamānāṃ tāṃ dattvā bhūmidānaphalaṃ labhet //
sravaṃtyāṃ ca tathā dattvā nandane modate naraḥ

śvetāṃ dattvā somaloke raktāṃ dattvā vibhāvasoḥ //
kṛṣṇāṃ dattvā tathā yāmye nīlāṃ dattvā ca vāruṇe

indraloke tu śabalāmindraloke tu rohiṇīm //
vātareṇusavarṇāṃ tu vāyuloke mahīyate

dhūmravarṇāṃ tathā dattvā vasūnāṃ lokamaśnute //
āṣāḍhena savarṇāntu lokaṃ vāruṇamāpnuyāt

suvarṇavarṇāṃ kauberaṃ tāmrāmāṅgirasaṃ tathā //
palāladhūmravarṇābhāṃ pitṛlokaṃ tathaiva ca

śitikaṇṭhāpradānena vaiśvadevamavāpnuyāt //
gaurīṃ dattvā bhṛgūṇāñca vairāṭābhāṃ prajāpateḥ

pāṇḍukambalavarṇābhāṃ rudrāṇāṃ lokamāpnuyāt //
śuklabinducitāṃ kṛṣṇāṃ gandharvaiḥ saha modate

(kapilāñca tathā dattvā yatheṣṭaṃ lokamāpnuyāt //)
gāvaḥ prakṛtivarṇāstu kapilāḥ parikīrtitāḥ

kṛtantu varṇavaicitryaṃ pūrvaṃ tāsāntu śambhunā //
yathā tu gaṅgā saritāṃ dhenūnāṃ kapilā tathā

sāyaṃ prātaśca satataṃ homakāle dvijottamāḥ //
gāvo dadati vai haumyamṛṣibhyo nātra saṃśayaḥ

duṣkṛtāni duriṣṭāni durgāṇi viṣamāṇi ca //
taranti caiva pāpebhyo dhenudānena mānavāḥ

ekāṃ gāṃ daśagurdadyāddaśa dadyācca gośatī //
śataṃ sahasragurdadyātsarve tulyaphalā hi te

śatavarṣasahasrāṇi tapastaptaṃ suduścaram //
gobhiḥ pūrvavisṛṣṭābhirgacchema śreṣṭhatāmiti

loke'smindakṣiṇānāñca sarvā gā vayasottarāḥ //
bhave tāni ca liṃpyema doṣeṇātiparantapāḥ

śakṛttāsāṃ pavitrārthaṃ kurvīrandevamānuṣāḥ //
tathā sarvāṇi bhūtāni sthāvarāṇi carāṇi ca //

pradātāraśca golokāngaccheyuriti mānadāḥ //
etaddhanaṃ dadau tāsāṃ sarvameva pitāmahaḥ

surabhirdevadhenuryā tasyāḥ putratvamāgatāḥ //
dharmo vṛṣabharūpeṇa mahādevadhvajaḥ smṛtaḥ

daśadhenupradānena yatheṣṭāṅgatimāpnuyāt //
śatañca dattvā dharmajñaḥ śakralokamupāgataḥ

kalpāvaśeṣaṃ sa sukhī modatyapsarasāṃ gaṇaiḥ //
dattvā sahasraṃ dhenūnāṃ sarvapāpairvimucyate

ukṣṇāṃ ca ye prayacchanti śatena saha yūthapam //
sarvapāpavinirmuktāste prayāntyamarāvatīm

kalpāvaśeṣaṃ tridive sukhamupya narottamāḥ //
mānuṣye dhanasaṃyuktā bhavanti sukhinastataḥ

sahasreṇa gavāṃ sārdhaṃ ye prayacchanti yūthapam //
alaṃkṛtaṃ yathāśaktyā golokaṃ yānti te narāḥ

ukṣāṇamindriyopetaṃ yastu dadyāddvijātaye //
daśadhenuphalaṃ tasya nātra kāryā vicāraṇā

goyugaṃ ye prayacchanti sīrayūpayutaṃ dvijāḥ //
sarvakāmasamṛddhasya prāpnuvanti phalaṃ narāḥ

gobhiścaturbhiḥ saṃyuktaṃ rathaṃ dattvā dvijātaye //
dhānyairvastrairyutaṃ śaktyā śakralokaṃ vrajanti te

mānuṣyamāsādya tathā bhavanti vasudhādhipāḥ //
śakaṭasya pradānantu vinā gobhirmahāphalam //

viśeṣeṇa mahābhāgāstasya gobhiryutasya ca //
sasasyaṃ śakaṭaṃ dattvā nākalokaṃ mahīyate

dattvā tu dhenuṃ homārthe brāhmaṇāyāhitāgnaye //
godānaphalamāpnoti homadānaphalaṃ tathā

snapanārthaṃ tathā dattvā dhenuṃ rudrasurālaye //
rudralokamavāpnoti kulañcaiva samuddharet //

dattvā sacailaṃ vṛṣabhaṃ mahādevālaye naraḥ //
rudralokamavāpnoti kulamuddharate tathā

dhenūnāṃ kapilā śreṣṭhā vṛṣabhaḥ śveta ucyate //
śvetantu vṛṣabhaṃ dattvā phalasyānantyamaśnute

dadhikṣīrahitārthāya vāsudevasurālaye //
dattvā gāṃ madhuparkārthaṃ cānantaṃ phalamāpnuyāt

/
gopradānaratā yānti golokaṃ mānavottamāḥ //
sahāpsarobhirmuditā vimānavaramāsthitāḥ

apāmadhastālloko yo tasyopari mahīdharāḥ //
nāgānāmupariṣṭādbhūḥ pṛthivyupari mānavāḥ

manuṣyalokādūrdhvantu khagānāṃ gatirucyate //
ākāśasyopari ravirdvāraṃ svargasya tatsmṛtam //

devalokaḥ parastasmādbrahmalokastataḥ param//
tatropari gavāṃ loko viṣṇulokastataḥ param

ekastvadho duṣkṛtināṃ karmiṇāṃ pṛthivī matā//
brāhme tapasi yuktānāṃ brahmalokaḥ sanātanaḥ

gavāmeva hi goloko durārohā hi sā gatiḥ //
ekāntino viṣṇubhaktā viṣṇulokaṃ vrajanti te / ४८ //
gopradānaratā yāṃti golokaṃ sarvakāmadam //
tatra kāmaphalā vṛkṣā nadyaḥ pāyasakardamāḥ

suvarṇasikatāścānyā vimalāmbuyutāḥ śubhāḥ //
yathākāmepsitāstatra bhavanti śubhakarmiṇām

deśā manoharāḥ śubhrā devārāmavibhūṣaṇāḥ //
divyena nṛtyagītena vāditreṇa manoharāḥ

tatrepsitānāṃ kāmānāmāptirbhavati nityadā //
hemaśṛṅgīṃ rūpyakhurāṃ muktālāṃgūlabhūṣaṇām

ahatāmbarasaṃvītāṃ tathā kāṃsyopadohinīm //
trirātraṃ sthaṃḍile suptvā trirātraṃ gorasāśanaḥ

tṛptāntu tarpite dattvā vāsasā saṃvṛtāṃ dvijāḥ //
sadakṣiṇāṃ mahābhāgāstrirātraṃ gorasaistataḥ

prāṇasaṃdhāraṇaṃ kṛtvā gavāṃ loke mahīyate //
yāvanti dhenuromāṇi tāvadvarṣāṇi mānavaḥ

dattaivaṃ kapilāṃ viprāḥ prāpnotyabhyadhikaṃ phalam //
sāyaṃ prātarmanuṣyāṇāmaśanaṃ devanirmitam

tatraikakālamaśnanto dvitīyādaśanānnaraḥ //
yathoktavidhinā dadyātkrītvā tu kapilāṃ naraḥ

sarvakāmasamṛddhasya yajñasya phalamaśnute //
gavāṃ lokamavāpnoti kulamuddharati svakam

alaṃkṛtāṃ tato dattvā godānaphalamāpnuyāt //
ajāmalaṃkṛtāṃ dattvā vahniloke mahīyate

tadeva lokamāpnoti dattvājaṃ vidhivannaraḥ //
vāruṇaṃ lokamāpnoti dattvā ca mahiṣīṃ naraḥ

mahiṣasya pradānena yāmye loke mahīyate //
vāruṇaṃ lokamāpnoti dattvorabhraṃ narottamaḥ // ६१/
avipradātā śatadhā tadeva phalamaśnute //
āraṇyapaśudānena vāyuloke mahīyate

etadeva phalaṃ proktaṃ pradānena ca pakṣiṇām //
śastrapiṇḍaki jālādirudakādānatastathā

gorasānāṃ pradānena tṛptimāpnotyanuttamām //
tatra vāśvayuje māse yastu dadyāddvijātiṣu

ārogyaṃ mahadāpnoti yatrayatrābhijāyate //
tathā dadhnaḥ pradānena maṅgalānyāpnute sadā

kṣīradastṛptimāpnoti sarvaduḥkhairvimucyate //
kṣīreṇa snapanaṃ kṛtvā harasya prayato naraḥ

mano'bhitāpanirmukto rudraloke mahīyate //
paramānnapradānena kāmānāpnoti śāśvatān

māsi māsi tu revatyāṃ brāhmaṇānghṛtapāyasam //
sadakṣiṇaṃ bhojayitvā rūpamāpnotyanuttamam

ājyantejaḥ samuddiṣṭaṃ cājyaṃ pāpaharaṃ param /
ājyaṃ surāṇāmāhāraścājye lokāḥ pratiṣṭhitāḥ

ājyena liṅgasnapanaṃ naraḥ kṛtvā tu śūlinaḥ //
sarvaduḥkhavinirmukto rudraloke mahīyate

alakṣmīśamanaṃ proktaṃ ghṛtasnānaṃ tathā dvijāḥ //
kalyamutthāya yo gavyaghṛte mukhamathātmanaḥ / ७१ //
paśyate sa jahātyeva kṛtvā pāpamaharniśam //
alakṣmīrnaśyate cāsya kṣiprameṣā karīṣiṇī

ghṛtadānānnaro yāti svargalokamasaṃśayam //
māse cāśvayuje nityaṃ ghṛtaṃ yastu prayacchati

kalyamutthāya viprebhyaḥ prīṇayecca tathāśvinau //
sa rūpaṃ mahadāpnoti tathā rogaiśca mucyate //
evaṃ mahāphalaṃ dānaṃ gorasānāṃ tathā gavām

prayacchate yaḥ kapilāṃ sacailāṃ kāṃsyopadohāṃ kanakāgraśṛṅgīm //
taistairguṇaiḥ kāmadughā ca bhūtvā naraṃ pradātāramupaiti sā gauḥ

yāvanti romāṇi bhavanti dhenvāstāvatphalaṃ prāpnute gopradātā //
putrāṃśca pautrāṃśca kulañca sarvamāsaptamaṃ tārayate paratra

iti śrīviṣṇudharmottare tṛtīye khaṇḍe mārkaṇḍeyavajrasaṃvāde munīnprati haṃsagītāsu godānaphalanirūpaṇo nāma ṣaḍadhikatriśatatamo'dhyāyaḥ

3.307
haṃsa uvāca //
ghṛtadhenupradānañca nibodhata dvijottamāḥ //
gavyasya sarpiṣaḥ kumbhaṃ pūrṇantu parikalpayet

kalaśañca tathā pūrṇantasyā vatsaṃ prakalpayet //
kāṃsyāpidhānasacchannasitavastrayutantathā

hiraṇyagarbhau kartavyāvanuliptau ca bāhyataḥ //
ikṣuyaṣṭimayānpādānkhurānrūpyamayām̐stathā

sauvarṇe cākṣiṇī kārye śṛṅge cāgurukāṣṭhaje //
saptadhānyaśca kartavye tasya pārśve pṛthakkṛte

tasya paṭṭaṃ ca kartavyaṃ kambalaṃ ca dvijottamāḥ //
kuryātturuṣkaraṃ dūre prāṇe hemamayāṃstanān

tadvaccharkarayā jihvāṃ guḍakṣīramayaṃ mukham ///
kṣaumasūtreṇa lāṃgūlaṃ romāṇi sitasarṣapaiḥ

tāmrapatramayaṃ pṛṣṭhaṃ kuryācchraddhāsamanvitaḥ //
etadviracanaṃ kṛtvā ghṛtakṣīrābhiṣecanaiḥ

harirghṛtārciṣetyevaṃ nāmnā sampūjayedvibhum //
tatastu gandhapuṣpānnadhūpavastrādibhirnaraḥ

ghṛtena dīpaṃ dadyācca tathaiva ca ghṛtaṃ diśaḥ //
homaṃ viprā yadā dhenuṃ dadyādviprāya śaktitaḥ

ghṛtācī prīyate vipraṃ kalpayitvā ghṛtārciṣam //
ekarātrañca tāṃ dattvā ghṛtāhārī bhavennaraḥ //

vimuktaḥ sarvapāpebhyo lokamāpnoti śāśvatam //
anena vidhinā snātvā sopavāso naraḥ śuciḥ

sarvakāmasamṛddhasya yajñasya phalamaśnute //
vimānenārkavarṇena gavāṃ loke mahīyate

ghṛtakṣīravahā sadyo yatra pāyasakardamāḥ //
yatra kāmaphalā vṛkṣā yatra siddhistu mānasī

gandharvāpsarasāṃ yatra satataṃ gītanartanam //
tatrāste suciraṃ loke yāvadindrāścaturdaśa

mānuṣyamāsādya bhavatyarogaḥ śīlena rūpeṇa dhanena yuktaḥ //
manobhirāmaḥ pramadāpriyaśca dhanānvitaḥ sarvasukhopapannaḥ

iti śrīviṣṇudharmottare tṛ० kha० mārkaṇḍeya vajrasaṃvāde munīnprati haṃsagītāsu ghṛtadhenukalpavarṇano nāma saptādhikatriśatatamo'dhyāyaḥ

3.308
// haṃsa uvāca //
tiladhenuṃ pravakṣyāmi sarvapāpabhayāpahām //
dhenvākārāntu tāṃ kuryādāvike kambale budhaḥ

tilaṣoḍaśabhiḥ prasthaiścaturbhirvatsameva tu //
tilaprasāraṇaṃ kuryāddhenvā dhenupramāṇataḥ

tatastu racayeddhenuṃ ratnairvakṣyāmyahaṃ dvijāḥ //
hemaśṛṅgīṃ rūpyakhurāṃ gandhaghrāṇavatīṃ śubhām

miṣṭānnajihvāṃ kurvīta guḍāsyāṃ sūtrakambalām //
ikṣupādāṃ tāmrapṛṣṭhāṃ kuryānmuktāphalekṣaṇām

praśastapatraśravaṇāṃ phaladantavatīṃ śubhām //
sragdāmapuṣpāṃ kurvīta navanītastanānvitām

phalaimarnoharairbhakṣyairmaṇimuktāphalānvitām //
śubhravastrayugacchannāṃ cārucchatrasamanvitām

kāṃsyopadohanāṃ kṛtvā vāsudevantu pūjayet //
gandhamālyanamaskāradhūpadīpānnasampadā

juhuyācca tilāneva nāmnā tasyaiva mānavaḥ //
tameva prīṇayeddadyāddhenuntāmāhitāgnaye

trirātraṃ yastilāhārastiladhenuṃ prayacchati //
dattvaikarātrañca punastilānatti dvijottamāḥ

cāndrāyaṇādabhyadhikaṃ śastantattilabhakṣaṇam //
sarvapāpavinirmuktaḥ pitaraṃ sapitāmaham

tasyāpi pitaraṃ caiva tārayed duṣkṛtānnaraḥ //
ātmānaṃ putrapautrāṃśca prapautramapi tārayet

suhṛdaṃ vāpyathoddiśya tiladhenuprado naraḥ //
tārayed duṣkṛtāttañca yamuddiśya prayacchati

yaśca gṛhṇāti vidhivaddīyamānāñca paśyati //
so'pi pāpavinirmuktaḥ svargaloke mahīyate

mahāpātakasaṃyukto yukto yaścopapātakaiḥ //
tiladhenupradānena so'pi pāvanamāpnuyāt

salokamāsādya naro vasūnāntatrāpi bhuktvā tridaśendrabhogān//
mānuṣyamāsādya bhavatyarogo dhanānvito rūpasukhopapannaḥ

iti śrīviṣṇudharmottare tṛ० kha० mārkaṇḍeyavajrasaṃvāde munīnprati haṃsagītāsu tiladhenudānavidhivarṇano nāmāṣṭottaratriśatatamo'dhyāyaḥ

3.309
haṃsa uvāca //
jaladhenuṃ pravakṣyāmi prītaye jalaśāyinaḥ //
jalakumbhaṃ dvijaśreṣṭhāḥ suvarṇarajatānvitam

kalpayedratnagarbhañca sthāpayettaṃ yavopari //
sarvadhānyaistathā grāmyaiḥ samantātparivārayet

sitavastrayugacchannaṃ dūrvāpallava śobhitam //
kuṣṭhamāṃsīmurośīravālukāmalakairyutam

priyaṅgupatrasahitaṃ sitayajñopavītinam //
sacchatropānahañcaiva soṣṇīṣaṃ parikalpayet

tilapātrairyutaṃ kṛtvā sahiraṇyaiścaturdiśam //
dadhyodanayutenātha pātreṇa sthagitaṃ mukhe

kalpayedevamevantu vāridhānīṃ tu vatsakam //
upoṣitaḥ samabhyarcya deveśaṃ jalaśāyinam

puṣpadhūpopahāraistu yathāvibhavamāśritaḥ //
ahatāmbaravītāya dadyādviprāya bhaktimān

jalaśāyī jagadyoniḥ prīyatāṃ mama keśavaḥ //
iti coccārya taṃ dadyātprīṇayecca dvijo'pi tam

ahorātroṣito dadyādyathāvidhi mayeritam //
apakvānnāśinā stheyamahorātramataḥ param

anena vidhinā dattvā jaladhenuṃ dvijottamān //
sarvāhlādamavāpnoti kāmānāpnoti śāśvatān

mokṣamāpnoti sarvebhyastapobhyaḥ sa tathā naraḥ //
saubhāgyaṃ mahadāpnoti rūpañca paramaṃ tathā

puruṣaḥ sa tathā yāti yasya yasya ca darśanam //
karoti paramāhlādaṃ tasya tasya dvijottamāḥ

nityābhitṛpto bhavati tathaiva ca nirāmayaḥ //
sarvabādhāpraśamanaṃ prāpnoti gatakalmaṣaḥ //

vāruṇaṃ lokamāpnoti sakṛddātā dvijottamaḥ //
dattvā tāmasakṛdviprā lokamāpnoti vaiṣṇavam

āhlādahetoḥ paramaṃ pavitraṃ dānaṃ mayedaṃ kathitaṃ dvijeṃdrāḥ //
dhanyaṃ yaśasyaṃ duritāpahāri kāmapradaṃ lokahitaṃ praśastam

iti śrīviṣṇudharmottare tṛ० kha० mārkaṇḍeyavajrasaṃvāde munīnprati haṃsagītāsu jaladhenuvarṇano nāma navottaratriśatatamo'dhyāyaḥ

3.310
haṃsa uvāca //
suvarṇamuttamaṃ ratnaṃ dhanānāmapi cottamam//
lohānāmuttamañcaiva sarveṣāmapi cottamam

agnerapatyaṃ prathamaṃ pavitraṃ maṅgalaṃ param//
dhāraṇātsarvapāpaghnaṃ dātustridaśalokadam

mukuṭaiḥ kuṇḍalairhāraiḥ keyūrairaṅgadaistathā//
dhāryate yatsadā devaiḥ pavitratvāddvijottamāḥ

jāmbūnadaṃ taddevānāmindragopakasannibham //
pitṝṇāñcandraraśmyābhaṃ daityānāṃ śabalopamam

nāgānāṃ tacchukābhaṃ syānnārīṇāṃ pītamucyate //
dattvā kṛṣṇalamātrantu naraḥ pāpātpramucyate

dattvā ca māṣakaṃ tasya puṇyaṃ phalamupāśnute //
suvarṇamāṣakaṃ dattvā sūryasyodayanaṃ prati

hutvāgniṃ sarvapāpebhyo mokṣamāpnotyasaṃśayam //
tretāgnivratametattu kīrtitaṃ tasya nityadā

dinamadhyagate sūrye hutvāgniṃ yaḥ prayacchati //
tasyāgninityadāne ca mahatphalamudāhṛtam

sūryasyāstamaye vahniṃ hutvā tadvai prayacchati //
puṇyaṃ mahatsamāpnoti nityadānena vai dvijāḥ

trisandhyaṃ kanakaṃ yastu hutvā vahniṃ prayacchati //
na sa lipyeta pāpena padmapatramivāmbhasā

sakṛtkṛṣṇaladānena svarge varṣaṃ sukhī vaset //
tathā ca pañcavarṣāṇi svarge dattvaiva māṣakam

yaḥ suvarṇaṃ suvarṇasya brāhmaṇāya prayacchati //
nirdoṣaḥ syātsa nāke tu modatyabdaśataṃ dhruvam

ātmatulyaṃ suvarṇasya yaḥ prayacchati vai dvijāḥ //
sarvapāpavinirmukto yatheṣṭāṅgatimāpnuyāt

brahmaghno vā surāpo vā steno vā gurutalpagaḥ //
sarvapātakayukto'pi tena dānena mucyate

śraddhānāmuttamañcaitaddānānāmuttamottamam //
rukmaṃ dattvā brāhmaṇāya sukhī sarvatra jāyate

cirānnākaparibhraṣṭo rūpasaubhāgyasaṃyutaḥ //
tāsāṃ kule tu susphīte guṇaiḥ sarvairyuto naraḥ

rukmapātrapradānena putrī bhavati mānavaḥ //
sarveṣāmeva kāmānāṃ yaśasastridivasya ca

rūpyado rūpamāpnoti bhogamāpnoti tāmradaḥ //
lohārakūṭayordānātkupyamāpnotyasaṃśayam

trapusīsakayordānādvahnivṛddhimavāpnuyāt //
yatheṣṭaṃ lohapātrañca yaḥ pradadyāddvijātaye

pātraṃ bhavati kāmānāṃ viśeṣaścāsya lohataḥ //
śilpabhāṇḍāni yo dadyāllohāni vidhivaddvijāḥ

vidyādānaphalaṃ tasya kathitaṃ nātra saṃśayaḥ //
carmadātā naro nityaṃ rakṣāṃ samadhigacchati

āyudhānāṃ pradānena ripunāśamavāpnuyāt //
rājaliṅgapradānena rājā bhavati bhūtale

ratnānāṃ ca pradānena rājaiveha prajāyate //
ratnadānasya yallokaṃ tadbhuktvā suciraṃ dvijāḥ

vajradaḥ śakralokantu padmarāgaprado raveḥ //
sadyo marakataṃ dattvā viṣṇuloke mahīyate

muktāphalapradānena vāruṇaṃ lokamaśnute //
vaidūryasya pradānena dvīpānāṃ sapta modate

ratnānyanyāni dattvā ca rājarājasya ca dvijāḥ //
sarveṣāmeva ratnānāṃ kanakaṃ śreṣṭhamucyate

dhāraṇaṃ kīrtanaṃ dānaṃ kanakasya praśasyate //
duḥsvapraśamanaṃ dānaṃ duriṣṭasya ca nāśanam

paraṃ pāpaharaṃ jñeyamalakṣmīśamanaṃ tathā //
dattvā suvarṇaṃ lokeṣu yatheṣṭeṣu ca modate

vimānenārkavarṇena haṃsayuktena bhāsvatā //
devarāmāgaṇāḍhyena kāmagena vihāyasā/////
bhuktvā divi ciraṃ bhogānmānuṣye sukhamāpnuyāt //
agnerapatyaṃ prathamaṃ suvarṇaṃ bhūrvaiṣṇavī brahmasutāśca gāvaḥ //
sarvaṃ hi dattaṃ bhavatīha tena yaḥ kāñcanaṃ gāñca mahīñca dadyāt

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde munīnprati haṃsagītāsu suvarṇadānavidhinirūpaṇo nāma daśādhikatriśatatamo'dhyāyaḥ