Vishnudharmottara Purana · Chapter 3.261.265

3.261
// haṃsa uvāca // //
yaśasā saṃyuto jantuḥ śreyaso bhājanaṃ bhavet //
yaśasā saṃyuto jantustridivaṃ pratipadyate

yaśasā saṃyuto jantuḥ sampadāmeti pātratām //
yaśasā saṃyuto jantuḥ sarvakāmānupāśnute

sa ekaḥ puruṣo loke yaśasā yo hi saṃyutaḥ //
yeṣāṃ sādhu samāvāpaṃ gīyate sumahadyaśaḥ

teṣāṃ yaśastathā puṇyaṃ nākapṛṣṭhe'pi gīyate //
devatā yaṃ vijānaṃti tasya nāke gatirdhruvā

kīrtyamānaṃ tathā sadbhiryaḥ śṛṇoti yaśaḥ svakam //
sukhamāpnoti dharmajñāḥ svargādapi paraṃ naraḥ

yaśaḥ śobhā manuṣyasya paramaṃ tasya maṇḍanam //
yaśasā varjitasyeha maṇḍanaṃ lāñchanaṃ param

yaśaḥ pradhānaṃ puruṣasya loke yaśaḥpradhānāstridivaṃ prayānti //
lokadvaye cāpi yaśo'nvitānāṃ bhavanti kāmā manasā tvabhīṣṭāḥ

iti śrīviṣṇudharmottare tṛ० kha० mārkaṇḍeyavajrasaṃvāde munīnprati haṃsagītāsu yaśaḥpraśaṃsāvaṇarno nāmaikaṣaṣṭyuttaradviśatatamo'dhyāyaḥ

3.262
haṃsa uvāca //
yajñena devā jīvanti yajñena pitarastathā //
devādhīnāḥ prajā sarvā yajñādhīnāśca devatāḥ

yajño hi bhagavānviṣṇuryatra sarvaṃ pratiṣṭhitam //
yajñārthaṃ paśavaḥ sṛṣṭā devāstvauṣadhayastathā

yajñārthaṃ puruṣāḥ sṛṣṭāḥ svayameva svayaṃbhuvā //
yajñaśca bhūtyai sarvasya tasmādyajñaparo bhavet

yajñaśiṣṭāśinaḥ santo mucyante sarvakilbiṣaiḥ //
dhanaṃ yadyajñaśīlānāṃ devasvaṃ taṃ vidurbudhāḥ

oṣadhīnāṃ paśūnāñca yajña eva parāyaṇam //
sayūthyaśca sakulyaśca nākapṛṣṭhe mahīyate

paśustu prokṣito yajñe tathevauṣadhayo dvijāḥ //
yajñopayuktā modante tridive nātra saṃśayaḥ

yajñena samyakpuruṣastu nāke samṛjyamānastridaśairmahātmā //
prāpnoti saukhyāni mahānubhāvāstasmātprayatnena yajeta yajñaiḥ

iti śrīviṣṇudharmottare tṛ० kha० mārkaṇḍeyavajrasaṃvāde munīnprati haṃsagītāsu yajñapraśaṃsāvarṇano nāma dviṣaṣṭyadhikadviśatatamo'dhyāyaḥ

2.263
haṃsa uvāca //
śīlaṃ pradhānaṃ loke'smiṃstasminsarvaṃ pratiṣṭhitam //
śīlena sarvamāpnoti yatkiñcinmanasecchati

kriyāḥ śīlavihīnasya bhavanti viphalāḥ kṛtāḥ //
tasmācchīlavatā bhāvyaṃ puruṣeṇa vijānatā

śīlena devarāṭchakraḥ suraiśvaryamavāptavān //
śīlena dharmarājo'pi dharmarājatvamāptavān

śīlena varuṇo devo rājarājatvamāptavān //
śīlena ca kubero'pi dhanādhyakṣatvamāptavān

śīlena sukhamāpnoti svargaṃ ca manujottamāḥ //
śīlena tadavāpnoti yatra gatvā na śocati

śīlaṃ samāsādya samastakāmānprāpnoti mukhyānpuruṣaḥ pradhānaḥ //
tasmātprayatnena nareṇa śīlaṃ samarjanīyaṃ sukhadaṃ sadaiva

iti śrīviṣṇudharmottare tṛ० kha० mārkaṇḍeyavajrasaṃvāde munīnprati haṃsagītāsu śīlapraśaṃsāvarṇano nāma triṣaṣṭyuttaradviśatatamo 'dhyāyaḥ

3.264
haṃsa uvāca //
damena yuktaḥ puruṣaḥ sarvānkāmānavāpnuyāt //
tasmātsarvaprayatnena damaḥ kāryo vijānatā

indriyāṇāṃ jayo loke dama ityabhidhīyate //
nādāntasya kriyāḥ kāścidbhavantīha dvijottamāḥ

nādāntaḥ siddhimāpnoti nādānto gatimīpsitām //
nādāntaḥ śriyamāpnoti nādāntaḥ kiñcideva tu

pañcendriyasya martyasya yadyekaṃ chidramindriyam //
tato'sya kṣarati prajñā dṛteḥ pātrādivodakam

puruṣārthaṃ parityajya svārthe ca satatotthitaḥ //
indriyāṇāṃ budhasteṣāṅkaḥ svārthe prayatennaraḥ

indriyāṇāṃ prasaṅgena gatiṃ gacchati dāruṇām //
vijitya tānyeva naraḥ sarvānkāmānavāpnuyāt

dāntaḥ pumānnākamanuprayāti dāntaḥ pumānmokṣapathaṃ prayāti //
dāntasya duḥkhaṃ na hi kiñcidasti dāntaḥ samāpnotyakhilānhi kāmān

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde munīnprati haṃsagītāsu damapraśaṃsāvarṇano nāma catuḥṣaṣṭyuttaradviśatatamo'dhyāyaḥ

haṃsa uvāca // //
satyameva paraṃ brahma satyameva paraṃ tapaḥ //
satyameva paro yajñaḥ satyameva paraṃ śrutam

satyaṃ vedeṣu jāgarti muktiḥ satyataroḥ phalam //
tapo yaśaśca puṇyaśca pitṛdevarṣipūjanam

ādyo vidhiśca vidyā ca sarvaṃ satye pratiṣṭhitam//
satyaṃ yajñāstathā vedā mantrā devī sarasvatī

vratacaryā tathā satyamoṅkāraḥ satyameva ca //
satyena vāyurabhyeti satyenābhāsate raviḥ

satyena cāgnirdahati svargaṃ satyena gacchati //
satyena cāpaḥ kṣipati parjanyaḥ pṛthivītale

pāraṇaṃ sarvavedānāṃ sarvatīrthāvagāhanam //
satyaṃ ca vadate loke samaṃ syātāṃ na vā samam

aśvamedhasahasraṃ tu satyaṃ ca tulayā dhṛtam //
aśvamedhasahasrāddhi satyameva viśiṣyate

satyena devāḥ prīyante pitaro brāhmaṇāstathā //
satyamāhuḥ paraṃ dharmaṃ tasmātsatyaṃ na lopayet

munayaḥ satyaniratāḥ satyasthāstridaśottamāḥ //
svarge satyaparā nityaṃ modante devatā iva

apsarogaṇasaṃkīrṇairvimānairupayānti ca //
vaktavyaṃ hi sadā satyaṃ na satyādvidyate param

agādhe vimale śuddhe satyatoye śucihrade //
snātavyaṃ mānase tīrthe snānaṃ tatparamaṃ smṛtam

ātmārthe vā parārthe vā putrārthe vā ripoḥ kṛte //
yenṛtaṃ nābhibhāṣante te narāḥ svargagāminaḥ

yadbhūtahitamatyantaṃ tatsatyamiti dhāraṇā //
hitaṃ syādyena bhūtānāṃ tattadvācyaṃ vijānatā

ādityacandrāvanilānalau ca dyaurbhūmirāpo hṛdayaṃ yamaśca //
ahaśca rātriśca śubhe ca sandhye dharmaśca jānāti narasya vṛttam

na sā sabhā yatra na santi vṛddhā vṛddhā na te ye na vadanti dharmam //
nāsau dharmo yatra no satyamasti na tatsatyaṃ yacchalenānuviddham

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde munīnprati haṃsagītāsu satyapraśaṃsāvarṇano nāma pañcaṣaṣṭyuttaradviśatatamo'dhyāyaḥ