Vishnudharmottara Purana · Chapter 3.256.260

3.256
haṃsa uvāca //
jñātavyā guruśuśrūṣā paramaṃ dharmakāraṇam //
guruśuśraṣayā vidyāṃ naraḥ samadhigacchati

vidyayā tadavāpnoti yatra gatvā na śocati //
suvarṇapuṣpāṃ pṛthivīṃ vicinvanti narāstrayaḥ

śūraśca kṛtavidyaśca yaśca jānāti sevitum //
sarvadharmavihīno'pi guruśuśrūṣaṇe rataḥ

svargalokamavāpnoti puruṣo'pi sudāruṇaḥ //
mātaraṃ piṃtaraṃ vāpi jyeṣṭhabhrātarameva ca

guruṃ vidyāpradaṃ vāpi yaśca śuśrūṣate naraḥ //
svargalokamavāpnoti yāvadindrāścaturdaśa

yadeva puṇyamāpnoti guruśuśrūṣayā dvijaḥ //
dvijaśuśrūṣayā śūdrastadeva phalamaśnute

prāpnoti puṇyaṃ paramaṃ ca sadhvī śuśruṣate yā patimapramattā //
śuśrūṣayā bhūmipateḥ prajānāṃ puṇyaṃ pradiṣṭaṃ paramaṃ nṛloke

iti śrīviṣṇudharmottare tṛ० kha० mārkaṇḍeyavajrasaṃvāde munīnprati haṃsagītāsu guruśuśrūṣāpraśaṃsāvarṇano nāma paṭpañcāśaduttara dviśatatamo'dhyāyaḥ

3.257
haṃsa uvāca //
svādhyāyasevākarttavyā nityameva vijānatā //
svādhyāyena tadāpnoti yatkiñcinmanasecchati

payasā madhunā dadhnā māṃsena ca yathākramam //
ṛco yajūṃṣi sāmāni tathaivātharvaṇaṃ paṭhet

pitṝṇāṃ tarpaṇaṃ kuryādvedāṅgena ca sarpiṣā //
upavedānapi paṭham̐starpayatyodanena tān

vinā sthānāni sarvāṇi svaireyeṇa tathā naraḥ //
sāṃkhyayogaṃ pāñcarātraṃ tathā pāśupataṃ paṭhan

kṣīreṇa madhumiśreṇa pitṛṃstarpayate tathā //
vākovākyaṃ purāṇaśca nārāśaṃsyo'tha gāthikāḥ

stotrāṇi ca paṭhannityaṃ dadhnā ca madhunā tathā //
tasmātsarva prayatnena dvijaḥ svādhyāyamācaret

svādhyāya eveha tapaḥ pavitraṃ svādhyāya eveha tathaiva yajñaḥ //
svādhyāyavāneva naraḥ prayāti triviṣṭapaṃ mokṣamathāpyabhīṣṭam

iti śrīviṣṇudharmottare tṛtīyakhaṇḍe mārkaṇḍeyavajrasaṃ० munīnprati haṃsagītāsu svādhyāyapraśaṃsāvarṇano nāma saptapañcāśaduttara dviśatatamo'dhyāyaḥ

3.258
haṃsa uvāca //
brahmacarye'bhisaṃyukto dvijaḥ svargamupāśnute //
brahmacaryaṃ paraṃ dhāma brahmacaryaṃ paraṃ tapaḥ

brahmacaryaṃ paraṃ yajño brahmacaryaṃ paraṃ yaśaḥ //
brahmacaryeṇa saṃyuktaḥ sarvānkāmānavāpnuyāt

adaivaṃ daivataṃ kuryāddaivataṃ cāpyadaivatam //
kuryāllokām̐stathaivānyānbrahmacaryeṇa mānavaḥ

kṛtānapi tathā pūrvānkṣiprameva praṇāśayet //
yathābhīṣṭamavāpnoni brahmacaryeṇa mānavaḥ

prajāpatīnāṃ yā śaktiḥ prajāḥ kartuṃ dvijottamāḥ //
sā jñeyā brahmacaryeṇa ṛṣīṇāmapi ca dvijāḥ

anekāni sahasrāṇi kumārabrahmacāriṇām //
divaṃ gatāni viprāṇāmakṛtvā kulasantatim

yo brahmacaryānna paricyutaḥ syātputreṇa hīno'pi divaṃ sa yāti //
paricyutā ye tanayairvihīnāsteṣāṃ na lokeṣu gatiḥ pradiṣṭā

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde haṃsagītāsu brahmacaryapraśaṃsāvarṇano nāmāṣṭapañcāśa duttaradviśatatamo'dhyāyaḥ

2.259
// haṃsa uvāca // //
brahmacaryāccyuto yastu narassantānavarjitaḥ //
sutaptatapasopyasya gatirloke na vidyate

putreṇa lokāñjayati pautreṇānantyamaśnute //
tathā putrasya pautreṇa bradhnasyāpnoti viṣṭapam

nākalokamavāpnoti duhitrā dvijasattamāḥ //
dauhitreṇa tathā lokānnaro yāti prajāpateḥ

punnāmno narakādyasmātpitaraṃ trāyate sutaḥ //
tasmātputra iti proktaḥ svayameva svayambhuvā

putradauhitrayorloke viśeṣo nopapadyate //
dauhitro'pi hyamutrainaṃ santārayati pautravat

tasmācchettā kulasya syātsa yāti narakaṃ dhruvam //
putrapautraiḥ parivṛto nākaloke mahīyate

santānavāneva narastu kīrtyā yuktastathā syātparayā dvijendrāḥ //
kīrtyā yutaḥ svargamatha prayāti santānavānyaḥ puruṣaḥ pradhānaḥ

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde haṃsagītāsu santānapraśaṃsā varṇano nāmaikonaṣaṣṭyuttaradviśatatamo'dhyāyaḥ

3.260
// haṃsa uvāca // //
kīrtipradhānaḥ puruṣaściraṃ svarge mahīyate //
kīrtiḥ śarīraṃ nirdiṣṭā mṛtasyāpi śarīriṇaḥ

kīrtiyuktaṃ na jānāti paratreha ca mānavaḥ //
kīrtiyuktā bhavantīha śreyaso bhājanaṃ param

divaṃ spṛśati bhūmiṃ ca śabdaḥ puṇyasya karmaṇaḥ //
yāvatsa śabdo bhavati tāvatpuruṣa ucyate

tāvadeva tathā lokānsarvakāmadugho'kṣayān //
puruṣaḥ samupāśnāti divi ceha ca śāśvatam

yasyākīrtirmanuṣyasya narakaṃ sa tu gacchati //
yāvallokeṣu dharmajñāstasya kīrtistu gīyate

tāvatsamaśnute svarge devabhogānanuttamān //
kīrtiḥ puṇyā puṇyaloke naiva pāpaṃ prayacchati //
kīrtyamānā manuṣyasya tasmātpuṇyaṃ samācaret

ye kīrtiyuktāḥ puruṣapradhānāste nākapṛṣṭhaṃ suciraṃ prayānti //
akīrtiyuktā narakaṃ vrajaṃti kīrtiḥ pradhānā puruṣasya tasmāt

iti śrīviṣṇudharmottare tṛtīya khaṇḍe mārkaṇḍeyavajrasaṃvāde haṃsagītāsu kīrtipraśaṃsāvarṇano nāma ṣaṣṭyuttaradviśatatamo'dhyāyaḥ