Vishnudharmottara Purana · Chapter 3.246.250

3.246
haṃsa uvāca //
krodha ekaḥ paraḥ śatruḥ krodha eko vināśakṛt //
krodhābhibhūtaḥ puruṣastvātmānamapi ghātayet

arthānarthau na jānāti kāryākāryau tathaiva ca //
naraḥ krodhasamāviṣṭo nānyaṃ mitramapi dvijān

gurūnākṣipati krodhānnainaṃ hi namate janaḥ //
anarthaiḥ saha saṃsargastasmātkrodhaṃ vivarjayet

krodhaṃ mūlamanarthānāṃ dvāraṃ hi narakasya ca //
āpadāmāspadaṃ ghorantaṃ prayatnena varjayet

krodhena vijito yastu kathamanyaṃ sa jeṣyati//
krodhe jite jitaṃ viddhi trailokyaṃ sacarācaram

anarthakāriṇaṃ krodhaṃ yadā tejasvitā matā //
krodhe doṣamataḥ kṛtvā jitaḥ krodho mahātmabhiḥ

yajñaśca dānāni tapaḥ pavitraṃ tīrthopasevā ca tathaiva vedāḥ //
krodhābhibhūtasya bhavanti mithyā narasya tasmātparivarjayettam

iti śrīviṣṇudharmottare tṛtīya khaṇḍe mārkaṇḍeyavajrasaṃvāde munīnprati haṃsagītāsu krodhadoṣavarṇano nāma ṣaṭcatvāriṃśaduttaradviśatatamo'dhyāyaḥ

3.247
// haṃsa uvāca // //
sarveṣāmeva pāpānāṃ nāstikyaṃ pātakaṃ param //
nāstikyāddhi paraṃ nāsti kiñcinpāpaṃ dvijottamāḥ

akāryamiti kāryāṇi kṛtvā kāryavaśānnaraḥ //
paścāttāpena saṃyuktaḥ kṣipraṃ pāpaṃ vyapohati

kāryabuddhyā tvakāryāṇi yaḥ karoti narādhamaḥ //
kathaṃ nivartanaṃ tebhyo jāyate tasya vai dvijāḥ

nāstikyasya tathā mūlaṃ tvasacchāstrāvagāhanam //
tasmātsarvaprayatnena tadvivarjyaṃ vijānatā

sarvo hi mānavo loke paralokanibandhanaḥ //
tatrāpi nirapekṣasya kinnu loke nibandhanam

ye tu vai nāstikā loke narā lokaṃ prati dvijāḥ //
narake te hi pacyante bahukālaṃ na saṃśayaḥ

nāstikyamekaṃ puruṣasya loke vināśanaṃ vipravarāḥ pradiṣṭam //
tasmātprayatnena vivarjanīyo nāstikyabhāvaḥ sukhamīpsamānaiḥ

iti śrīviṣṇudharmottare tṛ० kha० mārkaṇḍeyavajrasaṃvāde munīnprati haṃsagītāsu nāstikyadoṣavarṇano nāma saptacatvāriṃśaduttaradviśatatamo'dhyāyaḥ

3.248
haṃsa uvāca //
ahaṅkārātparaṃ nāsti loke kiñcidvināśanam //
ahaṅkāreṇa bhūpālāḥ śataśo nidhanaṅgatāḥ

ahaṃkṛtāstathā naṣṭā brāhmaṇāśca sahasraśaḥ //
mānyāmānyanna jānanti kāryākāryaṃ tvahaṃkṛtāḥ

ahaṃkṛtastathā loke na vidyāmadhigacchati //
vipannakāryaśca tathā na prājñānparipṛcchati

na śṛṇoti tathānyeṣāṃ darpapūrṇo vicakṣaṇaḥ //
pātādanyannabhaiṣajyaṃ darpānnāstyeha kīrtanam

balādhikaistathā vīrairgurubhiśca tathaiva ca //
maraṇe saṃnikṛṣṭepi maraṇasya vicakṣaṇaḥ

hetubhūtāni karmāṇi ninditāni niṣevate //
sthite sthitāṃstathā prājñānbhāṣamāṇānvinindati

ahaṃkṛtānāṃ narake pradiṣṭā gatirdhruvaṃ lokavininditānām //
prājñena tasmātparivarjanīyo darpo vināśaikakaraḥ sadaiva

iti śrīviṣṇudharmottare tṛ० kha० mārkaṇḍeyavajrasaṃvāde haṃsagītāsvahaṃkāradoṣavarṇano nāmāṣṭacatvāriṃśaduttaradviśatamo'dhyāyaḥ

3.249
haṃsa uvāca //
dattaṃ yacchaucahīnena na tadgṛhṇanti devatāḥ //
bubhutsavaśca dharmajñāḥ śucikāmāśca devatāḥ

yakṣaiśca rākṣasaiścaiva piśācaiśca niśācaraiḥ //
ḍākinībhiśca dharmajñāḥ śaucahīno'bhibhūyate

śaucahīnamathābhyeti svayaṃ nindati kaṃ dvijāḥ //
vyādhihīno hyaśaucaśca sarvairevābhibhūyate

vardhate ca tathānarthāḥ samarthāśca vrajanti ca //
śaucahīnasya ripavo yānti vṛddhiṃ parāṃ dvijāḥ

strīśaucamarthaśaucaṃ ca vākchaucamapi ca dvijāḥ //
etāni yasya śaucāni sa śuciḥ parikīrtitaḥ

yorthe śuciḥ sa hi śucirna mṛdvāriśuciḥ śuciḥ //
tataścāpyadhikaṃ śaucamahiṃsā parikīrtitā

śaucena hīnā narakaṃ vrajanti śaucena hīnā vibhajantyanarthān //
śaucena hīnāśca bhavanti nindyāstasmādaśaucaṃ parivarjanīyam

iti śrīviṣṇudharmottare tṛ० kha० mārkaṇḍeyavajrasaṃvāde munīnprati haṃsagītāsu śaucavarṇano nāmaikonapañcāśaduttaradviśatatamo'dhyāyaḥ

3.250
haṃsa uvāca //
ācārahīnāḥ puruṣā bhavantyalpāyuṣo dvijāḥ //
ācārahīnaśca tathā rākṣasairabhibhūyate

yakṣaiḥ piśācairgandharvaistathā cānyairniśācaraiḥ //
ḍākinībhiḥ surāṇāṃ ca tathā pārṣagaṇāḥ pṛthaka

dattamācārahīnena na pratīcchanti devatāḥ //
pitaraśca mahābhāga ṛṣayaśca tapodhanāḥ

sarvalakṣaṇayukto'pi narastvācāravarjitaḥ //
na prāpnoti tathā vidyāṃ na ca kiñcidabhīpsitam //
ācārahīnaḥ puruṣo narakaṃ pratipadyate

ācārahīnaṃ na punanti vedā yadyapyadhītāḥ saha ṣaḍbhiraṅgaiḥ //
ācārahīnena tu dharmakāryaṃ kṛtaṃ hi sarvaṃ bhavatīha mithyā

iti śrīviṣṇudharmottare tṛ० kha० mā rkaṇḍeyavajrasaṃvāde munīnprati haṃsagītāsvanācāradoṣavarṇano nāma pañcāśaduttaradviśatatamo'dhyāyaḥ