Vishnudharmottara Purana · Chapter 3.206.210

3.206
vajra uvāca//
bhagavankarmaṇā kena prajñāyukto bhavennaraḥ //
etadeva manuṣyāṇāṃ manuṣyatvamudāhṛtam

mārkaṇḍeya uvāca //
caitryāṃ tu samatītāyāṃ yāvanmāsaṃ dinedine //
pūrvavatpūjayeddevaṃ nṛsiṃhamaparājitam

homaṃ ca pratyahaṃ kuryāttathā siddhārthakairnṛpa //
brāhmaṇānbhojayeccātra tathā trimadhuraṃ sadā

vaiśākhyāṃ kanakaṃ dadyātrirātropoṣito naraḥ //
jñānāvāptipradaṃ hyetadvrataṃ buddhivivardhanam

kṛtvā vrataṃ māsamidaṃ mayoktamāsādya nākaṃ suciraṃ manuṣyaḥ //
mānuṣyamāsādya ca buddhiyukto jñānena yuktaśca tathā bhavettu

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde buddhyāvāptivratavarṇano nāma ṣaḍuttaradviśatatamo'dhyāyaḥ

3.207
vajra uvāca //
bhagavankarmaṇā kena vidyāvānpuruṣo bhavet //
suvidya eva vijñeyaḥ puruṣaḥ paśuranyathā

mārkaṇḍeya uvāca //
pauṣyāntu samatītāyāṃ pratipatprabhṛti kramāt //
prāgvatsaṃpūjayeddevaṃ turaṃgaśirasaṃ harim

tilām̐śca juhuyādvahnau tilairdevaṃ samarcayet//
trirātropoṣito māghyāṃ tilānkanakameva ca

dadyādbrāhmaṇamukhyāya samyakprayatamānasaḥ//
mukhyaṃ yajñopavītañca prabhūtamapi cendhanam

kṛtvā vrataṃ māsamidaṃ mayoktaṃ vidyānvitaḥ syātpuruṣaḥ sadaiva//
svarlokamāsādya sukhāni bhuktvā kāmānabhīṣṭānpuruṣośnute ca

iti śrīviṣṇudharmottare tṛtīyakhaṇḍe mā० vajrasaṃvāde vidyāvāptivratavarṇano nāma saptottaradviśatatamo'dhyāyaḥ

3.208
vajra uvāca//
bhagavankarmaṇā kena śīlavānpuruṣo bhavet //
kulajātiśrutibhyaśca śīlameva viśiṣyate

mārkaṇḍeya uvāca //
āgrāyaṇyāmatītāyāṃ māsamekaṃ dinedine //
pūrvavatpūjayeddevaṃ varāhamaparājitam

ghṛtena snāpayeddevaṃ ghṛtena juhuyāddhaviḥ //
ghṛtaṃ dvijebhyo dadyācca ghṛtameva nivedayet

trirātropoṣitaḥ pauṣyāṃ ghṛtapātreṇa ca dvijān //
pūjayetsasuvarṇena yathāśakti narādhipa

kṛtvā vrataṃ māsamidaṃ mayoktaṃ cāsādya nākaṃ suciraṃ manuṣyaḥ //
mānuṣyamāsādya ca śīlavānsyātprāpnoti puṣṭiṃ cirajīvitaṃ ca

iti śrīviṣṇudharmottare tṛ० kha० mārkaṇḍeyavajrasaṃvāde śīlāvāptivratavarṇano nāmāṣṭottaradviśatatamo'dhyāyaḥ

3.209
vajra uvāca //
bhagavankarmaṇā kena nityaṃ dharmaparo bhavet //
dharmmavicca mahārāja dharmmasā phalyakāraṇāt

mārkaṇḍeya uvāca //
āṣāḍhyāṃ samatītāyāṃ pratipatprabhṛti kramāt //
pūrvvavatpūjayeddevaṃ dharmmavigrahadhāriṇam

māsasya cānte nṛpa paurṇamāsyāṃ kṛtvā trirātraṃ kanakañca dadyāt //
vratottamaṃ dharmmakaraṃ tavoktaṃ sarvvārthadaṃ nātra vicāraṇāsti

iti śrīviṣṇudharmmottare tṛ० kha० mārkaṇḍeyavajrasaṃvāde dharmmaprāptivratavarṇano nāma navottaradviśatatamo'dhyāyaḥ

3.210
vajra uvāca //
bhagavankarmaṇā kena dhanavānpuruṣo bhavet //
dhanavāneva lokeṣu pūjyo bhavati mānavaḥ

mārkaṇḍeya uvāca //
śrāvaṇyāṃ samatītāyāṃ pratipatprabhṛti kramāt //
pūrvavatpūjayedviṣṇuṃ devaṃ saṅkarṣaṇaṃ prabhum

nīlotpalaistathā patrairnṛpa bhṛṃgirajasya ca //
ghṛtena paramānnena tathā bilvaiśca śaktitaḥ

trirātropoṣitaḥ samyak proṣṭhapadyāṃ tato naraḥ //
gāṃ ca dadyāddvijendrāya vratānte manujottamaḥ

kṛtvā vrataṃ māsamidaṃ yathoktaṃ cāsādya nākaṃ suciraṃ manuṣyaḥ //
mānuṣyamāsādya dhanānvitaḥ syādvratena cīrṇena narendrasiṃha

iti śrīviṣṇudharmottare tṛ० kha० mārkaṇḍeyavajrasaṃvāde dhanāvāptivratavarṇano nāma daśottara dviśatatamo'dhyāyaḥ