Vishnudharmottara Purana · Chapter 3.201.205

2.201
vajra uvāca //
bhagavankarmaṇā kena kule janma samaśnute //
etanme saṃśayaṃ chindhi tvaṃ hi sarvaviducyase

mārkaṇḍeya uvāca //
bṛhaddiśi tu saṃprāpya trirātropoṣito naraḥ //
mārgaśīrṣādathārabhya pūjayettu trivikramam

trivarṇaiḥ kusumairdevaṃ tribhiḥ prayatamānasaḥ //
trayo'nulepanā deyā trisāraṃ dhūpameva tu

baliṃ trimadhuraṃ dadyāttrīm̐śca dīpānnṛpottama //
yavaistilaistathā homaḥ kartavyaḥ sarṣapāyutaiḥ

dadyāttrilohaṃ ca tathā dvijebhyastāmraṃ suvarṇaṃ rajataṃ ca rājan //
na kevalaṃ satkuladaṃ vrataṃ tu yatheṣṭakāmāptikaraṃ pradiṣṭam

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde satkulāvāptivratavarṇano nāmaikottaradviśatatamo'dhyāyaḥ

3.202
vajra uvāca //
bhavankarmaṇā kena rūpavāñjāyate naraḥ //
etanme saṃśayaṃ chindhi tvaṃ hi sarvaviducyase

mārkaṇḍeya uvāca //
phālgunyāṃ samatītāyāṃ pratipatprabhṛti kramāt //
yāvaccaitrī mahārāja tāvatsnāto dinedine

bahiḥ sampūjayeddevaṃ keśavaṃ bhogaśāyinam //
ekabhaktāśano naktamadhaḥśāyī tathā bhaveta

trirātropoṣitaḥ kuryātpūjāṃ caitryāṃ tathaiva ca //
svaśaktyā rajataṃ dadyādvastrayugmaṃ tathaiva ca

rūpārthino māsamidaṃ mayoktaṃ vratottamaṃ nityamadīnasattva //
kṛtvā ca nākaṃ manujastvavāpya mānuṣyamāsādya ca rūpavānsyāt

iti śrīviṣṇu० dha० tṛ० kha० mā० va० saṃ० rūpāvāptivratavarṇano nāma dvyuttaradviśatatamo'dhyāyaḥ

3.203
vajra uvāca //
bhagavankarmaṇā kena naro lāvaṇyamāpnuyāt //
lāvaṇyarahitaṃ rūpaṃ niṣphalaṃ pratibhāti me

mārkaṇḍeya uvāca //
kārtikyāṃ samatītāyāṃ pratipatprabhṛti kramāt //
paṭe vā yadi vārcāyāṃ pradyumnaṃ pūjayetprabhum

bahiḥ snānaṃ sadā kuryānnaktamaśnīta vāgyataḥ //
ekabhuktaṃ mahārāja haviṣyaprayataḥ sadā

mārgaśīrṣaṃ tathā prāpya trirātropoṣitaḥ śuciḥ //
saṃpūjya deva pradyumnaṃ hutvāgnau ghṛtameva ca

bhojayedbrāhmaṇāṃścātra bhojanaṃ lavaṇotkaṭam //
cūrṇitasya tataḥ prasthaṃ lavaṇasya dvijātaye/५//
mahārajataraktaṃ ca vastrayugmaṃ tathā guroḥ //
dadyācca kanakaṃ rājankāṃsyapātraṃ rasairyutam

etaddhi lāvaṇyakaraṃ pradiṣṭaṃ vratottamaṃ nākagatipradaṃ ca //
na kevalaṃ yādavavīra kāmānnarāya dadyātpuruṣapradhānaḥ

iti śrīviṣṇudharmottare tṛtīyakāṇḍe mā० va० saṃ० lāvaṇyavratavarṇano nāma tryuttaradviśatatamo'dhyāyaḥ

3.204
vajra uvāca //
bhagavankarmaṇā kena saubhāgyaṃ mahadāpnuyāt//
lāvaṇyarūpe saubhāgyaṃ vinā jñeyaṃ nirarthakam

mārkaṇḍeya uvāca//
māghyāṃ tu samatītāyāṃ pratipatprabhṛti kramāt //
paṭe vā yadi vārcāyāṃ kṛṣṇaṃ sampūjayetsadā

pūrvoktaṃ sakalaṃ kuryāddhaviṣyaṃ ca dharādhipa //
nityaṃ samācaretsnānaṃ tathā gandhapriyaṅgunā

phālgunyāṃ tāṃ tato dadyāttrirāpoṣitaḥ śuciḥ

vastre ca deye nṛpa kuṃkumākte kṣaudrasya pātraṃ ca tathaiva kāṃsyam //
saubhāgyadaṃ caitadanuttamaṃ te vrataṃ mayaitatkathitaṃ nṛvīra

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde saubhāgyāvāptivratavarṇano nāma caturuttaradviśatatamo'dhyāyaḥ

3.205
vajra uvāca//
bhagavankarmaṇā kena narastvārogyamāpnuyāt//
rūpasaubhāgyalāvaṇyāḥ sarogasya nirarthakāḥ

// mārkaṇḍeya uvāca //
proṣṭhapadyāmatītāyāṃ pratipatprabhṛtikramāt //
paṭe vā yadi vārcāyāmaniruddhaṃ tu pūjayet

pūrvoktena vidhānena yāvadāśvayujī bhavet //
sārasairarcayeddevaṃ jātīpuṣpairdinedine

ghṛtena juhuyādvahniṃ ghṛtaṃ dadyāddvijātaye //
bhojanaṃ gorasaprāyaṃ tathā viprāṃśca bhojayet

trirātropoṣitaḥ samyagāśvayujyāṃ tato naraḥ //
saghṛtaṃ sasuvarṇaṃ ca kāṃsyapātraṃ dvijātaye

dadyānnṛpatiśārdūla narastvārogyavṛddhaye //
vratametadvinirdiṣṭaṃ svagarlokapradaṃ nṛṇām

na kevalaṃ rogaharaṃ pradiṣṭamājñākaraṃ rūpavivṛddhidaṃ ca //
vratottamaṃ te kathitaṃ nṛvīra tatheṣṭakāmāptikaraṃ nṛloke

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde ārogyavratavarṇano nāma pañcottaradviśatatamo' dhyāya