વિષ્ણુધર્મોત્તરપુરાણમ્ · અધ્યાય 3.206.210

3.206
વજ્ર ઉવાચ॥
ભગવન્કર્મણા કેન પ્રજ્ઞાયુક્તો ભવેન્નરઃ ॥
એતદેવ મનુષ્યાણાં મનુષ્યત્વમુદાહૃતમ્

માર્કણ્ડેય ઉવાચ ॥
ચૈત્ર્યાં તુ સમતીતાયાં યાવન્માસં દિનેદિને ॥
પૂર્વવત્પૂજયેદ્દેવં નૃસિંહમપરાજિતમ્

હોમં ચ પ્રત્યહં કુર્યાત્તથા સિદ્ધાર્થકૈર્નૃપ ॥
બ્રાહ્મણાન્ભોજયેચ્ચાત્ર તથા ત્રિમધુરં સદા

વૈશાખ્યાં કનકં દદ્યાત્રિરાત્રોપોષિતો નરઃ ॥
જ્ઞાનાવાપ્તિપ્રદં હ્યેતદ્વ્રતં બુદ્ધિવિવર્ધનમ્

કૃત્વા વ્રતં માસમિદં મયોક્તમાસાદ્ય નાકં સુચિરં મનુષ્યઃ ॥
માનુષ્યમાસાદ્ય ચ બુદ્ધિયુક્તો જ્ઞાનેન યુક્તશ્ચ તથા ભવેત્તુ

ઇતિ શ્રીવિષ્ણુધર્મોત્તરે તૃતીયખણ્ડે માર્કણ્ડેયવજ્રસંવાદે બુદ્ધ્યાવાપ્તિવ્રતવર્ણનો નામ ષડુત્તરદ્વિશતતમોઽધ્યાયઃ

3.207
વજ્ર ઉવાચ ॥
ભગવન્કર્મણા કેન વિદ્યાવાન્પુરુષો ભવેત્ ॥
સુવિદ્ય એવ વિજ્ઞેયઃ પુરુષઃ પશુરન્યથા

માર્કણ્ડેય ઉવાચ ॥
પૌષ્યાન્તુ સમતીતાયાં પ્રતિપત્પ્રભૃતિ ક્રમાત્ ॥
પ્રાગ્વત્સંપૂજયેદ્દેવં તુરંગશિરસં હરિમ્

તિલાઁશ્ચ જુહુયાદ્વહ્નૌ તિલૈર્દેવં સમર્ચયેત્॥
ત્રિરાત્રોપોષિતો માઘ્યાં તિલાન્કનકમેવ ચ

દદ્યાદ્બ્રાહ્મણમુખ્યાય સમ્યક્પ્રયતમાનસઃ॥
મુખ્યં યજ્ઞોપવીતઞ્ચ પ્રભૂતમપિ ચેન્ધનમ્

કૃત્વા વ્રતં માસમિદં મયોક્તં વિદ્યાન્વિતઃ સ્યાત્પુરુષઃ સદૈવ॥
સ્વર્લોકમાસાદ્ય સુખાનિ ભુક્ત્વા કામાનભીષ્ટાન્પુરુષોશ્નુતે ચ

ઇતિ શ્રીવિષ્ણુધર્મોત્તરે તૃતીયખણ્ડે મા૦ વજ્રસંવાદે વિદ્યાવાપ્તિવ્રતવર્ણનો નામ સપ્તોત્તરદ્વિશતતમોઽધ્યાયઃ

3.208
વજ્ર ઉવાચ॥
ભગવન્કર્મણા કેન શીલવાન્પુરુષો ભવેત્ ॥
કુલજાતિશ્રુતિભ્યશ્ચ શીલમેવ વિશિષ્યતે

માર્કણ્ડેય ઉવાચ ॥
આગ્રાયણ્યામતીતાયાં માસમેકં દિનેદિને ॥
પૂર્વવત્પૂજયેદ્દેવં વરાહમપરાજિતમ્

ઘૃતેન સ્નાપયેદ્દેવં ઘૃતેન જુહુયાદ્ધવિઃ ॥
ઘૃતં દ્વિજેભ્યો દદ્યાચ્ચ ઘૃતમેવ નિવેદયેત્

ત્રિરાત્રોપોષિતઃ પૌષ્યાં ઘૃતપાત્રેણ ચ દ્વિજાન્ ॥
પૂજયેત્સસુવર્ણેન યથાશક્તિ નરાધિપ

કૃત્વા વ્રતં માસમિદં મયોક્તં ચાસાદ્ય નાકં સુચિરં મનુષ્યઃ ॥
માનુષ્યમાસાદ્ય ચ શીલવાન્સ્યાત્પ્રાપ્નોતિ પુષ્ટિં ચિરજીવિતં ચ

ઇતિ શ્રીવિષ્ણુધર્મોત્તરે તૃ૦ ખ૦ માર્કણ્ડેયવજ્રસંવાદે શીલાવાપ્તિવ્રતવર્ણનો નામાષ્ટોત્તરદ્વિશતતમોઽધ્યાયઃ

3.209
વજ્ર ઉવાચ ॥
ભગવન્કર્મણા કેન નિત્યં ધર્મપરો ભવેત્ ॥
ધર્મ્મવિચ્ચ મહારાજ ધર્મ્મસા ફલ્યકારણાત્

માર્કણ્ડેય ઉવાચ ॥
આષાઢ્યાં સમતીતાયાં પ્રતિપત્પ્રભૃતિ ક્રમાત્ ॥
પૂર્વ્વવત્પૂજયેદ્દેવં ધર્મ્મવિગ્રહધારિણમ્

માસસ્ય ચાન્તે નૃપ પૌર્ણમાસ્યાં કૃત્વા ત્રિરાત્રં કનકઞ્ચ દદ્યાત્ ॥
વ્રતોત્તમં ધર્મ્મકરં તવોક્તં સર્વ્વાર્થદં નાત્ર વિચારણાસ્તિ

ઇતિ શ્રીવિષ્ણુધર્મ્મોત્તરે તૃ૦ ખ૦ માર્કણ્ડેયવજ્રસંવાદે ધર્મ્મપ્રાપ્તિવ્રતવર્ણનો નામ નવોત્તરદ્વિશતતમોઽધ્યાયઃ

3.210
વજ્ર ઉવાચ ॥
ભગવન્કર્મણા કેન ધનવાન્પુરુષો ભવેત્ ॥
ધનવાનેવ લોકેષુ પૂજ્યો ભવતિ માનવઃ

માર્કણ્ડેય ઉવાચ ॥
શ્રાવણ્યાં સમતીતાયાં પ્રતિપત્પ્રભૃતિ ક્રમાત્ ॥
પૂર્વવત્પૂજયેદ્વિષ્ણું દેવં સઙ્કર્ષણં પ્રભુમ્

નીલોત્પલૈસ્તથા પત્રૈર્નૃપ ભૃંગિરજસ્ય ચ ॥
ઘૃતેન પરમાન્નેન તથા બિલ્વૈશ્ચ શક્તિતઃ

ત્રિરાત્રોપોષિતઃ સમ્યક્ પ્રોષ્ઠપદ્યાં તતો નરઃ ॥
ગાં ચ દદ્યાદ્દ્વિજેન્દ્રાય વ્રતાન્તે મનુજોત્તમઃ

કૃત્વા વ્રતં માસમિદં યથોક્તં ચાસાદ્ય નાકં સુચિરં મનુષ્યઃ ॥
માનુષ્યમાસાદ્ય ધનાન્વિતઃ સ્યાદ્વ્રતેન ચીર્ણેન નરેન્દ્રસિંહ

ઇતિ શ્રીવિષ્ણુધર્મોત્તરે તૃ૦ ખ૦ માર્કણ્ડેયવજ્રસંવાદે ધનાવાપ્તિવ્રતવર્ણનો નામ દશોત્તર દ્વિશતતમોઽધ્યાયઃ