Vishnudharmottara Purana · Chapter 3.211.215

3.211
vajra uvāca //
śrīvihīnasya lokesminkiṃ dhanena mahādyute //
tasmādvrataṃ samācakṣva yena syācchrīyuto naraḥ.

mārkaṇḍeya uvāca //
vaiśākhyāṃ samatītāyāṃ pratipatprabhṛti kramāt //
pūrvavatpūjayeddevaṃ śrīsahāyaṃ dinedine

puṣpairmūlaiḥ phalaiścaiva juhuyādakṣatāṃstathā //
bilvāṃśca vahnau satataṃ gorasairbhojayeddvijān

trirātropoṣito jyeṣṭhe kanakaṃ pratipādayet //
vastrayugmaṃ ca rājendra tena sāphalyamaśnute

kṛtvā vrataṃ māsamidaṃ yathoktaṃ cāsādya nākaṃ suciraṃ manuṣyaḥ //
mānuṣyamāsādya vivṛddhatejā śriyā yutaḥ syājjagati pradhānaḥ

iti śrīviṣṇudharmottare tṛ०kha० mārkaṇḍeyavajrasaṃvāde śrīlabdhivratavarṇano nāmaikādaśottaradviśatatamo'dhyāyaḥ

3.212
vajra uvāca //
bhagavankarmaṇā kena bhogānāpnoti mānavaḥ //
kinnu bhogavihīnasya kāryamasti dhanairdvija

mārkaṇḍeya uvāca //
jyeṣṭhāyāṃ samatītāyāṃ pratipatprabhṛti kramāt//
pūrvavatpūjayeddevaṃ viśvarūpadharaṃ harim

kṛtvā vratānte ca tathā trirātraṃ dattvā suyuktaṃ śayanaṃ dvijāya//
svarlokamāsādya ciraṃ tathoṣya mānuṣyamāsādya ca bhogavānsyāt

iti śrīviṣṇudharmottare tṛ०kha० mārkaṇḍeyavajrasaṃvāde bhogāvāptivratavaṇarno nāma dvādaśottaradviśatatamo'dhyāyaḥ

3.213
vajra uvāca //
bhagavankarmaṇā kena sarvatra jayamāpnuyāt //
vyavahāre raṇe dyūte vivāde ca dvijottama

jayāvāpteḥ paraṃ nāsti saukhyaṃ lokeṣu sattama //
jayāvāptiḥ paraṃ saukhyaṃ tadāptivratamucyatām

mārkaṇḍeya uvāca //
āśvayujyāmatītāyāṃ pratipatprabhṛti kramāt //
pūrvavatpūjayedviṣṇuṃ devadevaṃ trivikramam

trirātrānte tu kārtikyāṃ dadyādukṣāṇamuttamam //
sarvasasyadharaṃ kṛtvā śaktyā ratnairalaṅkṛtam

kṛtvā vrataṃ māsamidaṃ yathoktaṃ prāpnoti nākaṃ suciraṃ nṛvīraḥ//
tatroṣya kālaṃ suciraṃ manuṣyaḥ prāpnoti sarvatra jayaṃ nṛloke

iti śrīviṣṇudharmottare tṛ० kha० mārkaṇḍeyavajrasaṃvāde jayāvāptivratavarṇano nāma trayodaśottaradviśatatamo'dhyāyaḥ

3.214
vajra uvāca //
vratānyanyāni me brūhi kāmyāni dvijapuṅgava //
nārīṇāṃ puruṣāṇāṃ vā sarvajñastvaṃ mato mama

mārkaṇḍeya uvāca //
kṛttikāsvarcayeddevaṃ kārtikīprabhṛtikramāt //
yāvatsyātkārtikaṃ bhūyo narasiṃhamupoṣitaḥ

anulepanapuṣpādyaiḥ sarvadoktaissadaiva tu //
vratāvasāne dattvā ca candanaṃ tagaraṃ dvije

carma caivāyudhaṃ mukhyaṃ vāsāṃsi vividhāni ca //
sarvatra jayamāpnoti yatrayatrābhijāyate

mārgaśīrṣādathārabhya mṛgaśīrṣe tathārcayet //
yāvadāgrāyaṇī bhūyo rāmaṃ daśarathātmajam

anulepanapuṣpādyaiḥ sarvaratnaiḥ sadaiva tu //
vratāvasāne dadyādgāṃ tathā śvetāṃ dvijātaye

śvetaṃ vastrayugaṃ caiva rajataṃ ca tathā nṛpa //
upoṣitaḥ sadā kṛtvā vrataṃ syācchatruvarjitaḥ

pauṣamāsādathārabhya puṣpairnityamupoṣitaḥ //
yāvatpauṣī bhavedbhūyo balabhadramathārcayet

anulepanapuṣpānnaiḥ sarvaratnaistathaiva ca //
vratāvasāne saghṛtaṃ kāṃsyaṃ kanakameva ca

dattvā viprāya bhavati nityaṃ puṣṭiyuto naraḥ //
māghamāsādathārabhya maghāsu satataṃ naraḥ

vārāhamarcayeddevaṃ tathā nityamupoṣitaḥ //
ghṛtābhyaṅgena vidhivaccandanena sugandhinā

tathā ca paramānnena ghṛtahomena cāpyatha //
dadyādvratāvasāne ca kṣitiṃ gāṃ vā narādhipa

pitṛprasādamāpnoti kṛtvaitadvratamuttamam //
phālgunāttu tathārabhya phālgunīṣu samarcayet

naranārāyaṇau devau yāvatsyātphālgunī punaḥ //
vratāvasāne śayanaṃ svāstīrṇe prati pādayeta

vratāvasāne nārī syātsubhartrā samalaṃkṛtā //
bhāryāṃ narastathāpnoti rūpadraviṇasaṃyutām

anukūlāṃ śriyaṃ nityaṃ tathā pakṣavatīṃ nṛpa //
aviyogamavaidhavyaṃ karotyetanmahāvratam

caitramāsādathārabhya nityaṃ citrāsvathārcayet //
vratāvasāne dadyācca citraṃ vastraṃ dvijanmane

vratenānena puruṣaḥ putrānāpnotyathepsitān//
nārī vā puruṣavyāghra nātra kāryā vicāraṇā

vaiśākhītastathārabhya viśākhāsu tathārcayet //
yāvadbhūyastu vaiśākhī sopavāsaḥ pṛthuṃ vibhum

dattvā vratānte kanakaṃ jñātiśraiṣṭhyamavāpnuyāt//
jyeṣṭhamāsādathārabhya jyeṣṭhāsu satataṃ naraḥ

arcayedbhārgavaṃ rāmaṃ yāvajjyeṣṭhaṃ punarbhavet //
vratāvasāne dadyācca cchatropānahameva ca

vratenānena bhavati sarvaśreṣṭho narottama //
āṣāḍhītastathārabhya dinadvayamupoṣitaḥ

āṣāḍhyāṃ tvarcayeddevaṃ pradyumnamaparājitam //
bhūyaḥ syādyāvadāṣāḍhī dadyācca śayanaṃ tataḥ

svāstīrṇaṃ tena cāpnoti nityaṃ rūpayutāḥ striyaḥ //
śrāvaṇītastathārabhya śravaṇe satataṃ harim

arcayetsopavāsaṃ taṃ yāvatsyācchrāvaṇī punaḥ //
vratāvasāne dadyācca kāṃsyaṃ rūpyaṃ ghṛtaṃ tathā

vratānyathaitāni mayā narendra proktāni te pāpaharāṇi nityam //
nākapradānyuttamapūryamāṇānkāmānpradātṝṇi yatheṣṭamatra

iti śrīviṣṇudharmottare tṛ०kha०mārkaṇḍeyavajrasaṃvāde dvādaśamāsarkṣavratavarṇano nāma catudarśottaradviśatatamo'dhyāyaḥ

3.215
vajra uvāca //
ārādhanārthaṃ devasya viṣṇoramitatejasaḥ //
vratānyanyāni me brūhi bhṛguvaṃśavivardhana

mārkaṇḍeya uvāca //
gaṅgādvāre sukhāsīnaḥ pulastyaṛṣisattamaḥ //
vratāni yāni dālbhyāya jagāda śṛṇu tāni me

dālbhya uvāca // ārādhanārthaṃ devasya viṣṇoramitatejasaḥ //
vratāni tvaṃ samācakṣva sarvadharmabhṛtāṃ vara

pulastya uvāca //
ekādaśyāṃ śuklapakṣe phālgune māsi yo naraḥ //
japankṛṣṇeti devasya nāma bhaktyā punaḥpunaḥ

devārcane cāṣṭaśataṃ kṛtvaitattu japecchuciḥ //
snātaḥ prasthānakāle ca utthāne skhalite kṣute

pāṣaṇḍānpatitāṃścaiva tathaivāntāvasāyinaḥ //
nālapeta tathā kṛṣṇamarcayecchraddhayānvitaḥ

idaṃ codāharetkṛṣṇe manaḥ sandhāya tatparaḥ //
kṛṣṇakṛṣṇa kṛpālustvamagatīnāṃ gatirbhava

saṃsārārṇavamagnānāṃ prasīda madhusūdana //
evaṃ prasādyopavasetkṛtvā niyatamānasaḥ

pūrvehni cānyedyuścāpi gavyaṃ saṃprāśya vai sakṛt //
snātorcayitvā kṛṣṇeti punarnāma prakīrtayet

vāridhārāvrate caiva vikṣipeddevapādayoḥ //
caitravaiśākhayoścaiva tadvajjyeṣṭhe ca pūjayet

martyaloke gatiṃ śreṣṭhāṃ dālbhya prāpnoti vai naraḥ //
utkrāntikāle kṛṣṇasya smaraṇaṃ ca tathāśnute

āṣāḍhe śrāvaṇe caiva māsi bhādrapade tathā //
tathaivāśvayuje māsi anena vidhinā naraḥ

upoṣya saṃpūjya tathā keśaveti ca pūjayet //
gomūtraprāśanātpūtaḥ svargalokagatiṃ vrajet

ārādhitasya jagatāmīśvarasyāvyayasya ca //
utkrāntikāle smaraṇaṃ keśavasya tathāpnuyāt

kṣīrasya prāśanaṃ yastu vidhiṃ cemaṃ yathoditam //
kārtikādi yathānyāyaṃ kuryānmāsacatuṣṭayam

tenaiva vidhinā brahmanvipṇornāma prakīrtayet //
sa yāti viṣṇusālokyaṃ viṣṇuṃ smarati cākṣayam

pratimāsaṃ dvijātibhyo dadyāddānaṃ yathāvidhi //
cāturmāsye ca saṃpūrṇe puṇyaśravaṇakīrtanam

atha vā vāsudevasya tadgītaṃ cāpi kārayet //
evameti gatiṃ śreṣṭhāṃ devamānuṣyakīrtanāt

kathitaṃ pāraṇaṃ yatte kāryaṃ māsacatuṣṭayam //
ādhipatyaṃ tathā bhogāṃstena prāpnoti cākṣayān

dvitīyena tathā bhogānaindrānāpnoti mānavaḥ //
viṣṇulokaṃ tṛtīyena pāraṇena tathāpnuyāt

evametatsamākhyātaṃ gatiprāpakamuttamam //
vidhānaṃ dvijaśārdūla kṛṣṇatuṣṭipradaṃ nṛṇām

sugatidvādaśīmetāṃ śraddadhānastu yo naraḥ //
upoṣyati tathā nārī prāpnoti vividhāṃ gatim

eṣā tithiḥ pāpaharātidhanyā nākapradā nākakarī tathoktā//
ārādhanārthaṃ tridaśeśvarasya devasya viṣṇordvijasaṃghapūjya

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde sugatidvādaśīvratavarṇano nāma pañcadaśottaradviśatatamo'dhyāyaḥ