Vishnudharmottara Purana · Chapter 3.196.200

3.196
// mārkaṇḍeya uvāca // //
aśvayuṅmāsi śukle tu paurṇamāsyāṃ naraḥ śuciḥ //
sopavāso narendrastu devaṃ sampūjayettathā

śacīmairāvataṃ vajraṃ mātaliṃ ca narādhipa //
gandhamālyanamaskāradhūpa dīpānnasaṃpadā

saṃvatsarānte kanakaṃ tu dattvā prāpnoti lokaṃ sa purandarasya //
mānuṣyamāsādya narendrapūjyo rājā bhavedvā dvijapuṅgavo vā

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde śakravratavarṇano nāma ṣaṇṇavatyuttaraśatatamo'dhyāyaḥ

mārkaṇḍeya uvāca // //
upoṣitaścaturdaśyāṃ paurṇamāsyāṃ narottamaḥ //
pañcagavyaṃ pibetpaścāddhaviṣyāśī tathā bhavet

saṃvatsaraṃ tathā kṛtvā māsapāpātpramucyate //
tasmātsarvaprayatnena māsimāsi samācaret

saṃvatsaraṃ prāpya narendralokaṃ tatroṣya rājansuciraṃ dvijendraḥ //
mānuṣyamāsādya narendrapūjyo rājā bhavedvā dvijapuṅgavo vā

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde brahmakūrcavarṇano nāma saptanavatyuttaraśatatamo'dhyāyaḥ

3.198
// mārkaṇḍeya uvāca // //
yogabhūtaṃ hariṃ devaṃ caturdaśyā mupoṣitaḥ //
arcayetpaurṇamāsyāṃ tu so'śvamedhaphalaṃ labhet

brahmabhūtamamāvasyāṃ paurṇamāsyāṃ tathaiva ca //
rājasūyamavāpnoti kulamuddharati svakam

brahmabhūtamamāvasyāṃ paurṇamāsyāṃ ca pūjayet //
yogabhūtaṃ paricarankeśavaṃ mahadāpnuyāt

atyarthaṃ prītimāyāti māsapakṣāntayoḥ sadā //
pūjitaḥ sopavāsena bhaktyā devavaro hariḥ

mahāvratamidaṃ khyātaṃ sarvakalmaṣanāśanam //
saṃvatsaramidaṃ kṛtvā nākapṛṣṭhe mahīyate

sarvapāpapraśamanaṃ vratametatprakīrtitam //
svavittaśaktirevātra sarvakarmasu kāraṇam

kṛtvā vrataṃ dvādaśavatsarāṇi prāpnoti lokaṃ puruṣottamasya //
tatroṣya rājansuciraṃ sukālaṃ prāpnoti mokṣaṃ puruṣastatonte

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde mahāvrataṃ nāmāṣṭa navatyuttaraśatatamo'dhyāyaḥ

3.199
vajra uvāca //
bhagavankarmaṇā kena tiryagyonau na jāyate //
mlecchadeśe ca puruṣastaṃ mamācakṣva pṛcchataḥ

mārkaṇḍeya uvāca //
meṣasaṃkramaṇe bhānoḥ sopavāso narottamaḥ //
pūjayedbhārgavaṃ rāmaṃ devaṃ śaktyā yathāvidhi

kanyāsaṃkramaṇe prāpte tathā kṛṣṇaṃ ca pūjayet //
tathā mithunasaṃkrāntau pūjayedbhogaśāyinam

tathā kulīrasaṃkrāntau varāhamaparājitam //
narasiṃhaṃ tathā devaṃ siṃhasaṃkramaṇe vibhum //
kanyāsaṃkramaṇe devaṃ strīrūpaṃ pūjayennaraḥ

tulāsaṃkramaṇe prāpte vāmanaṃ nṛpa pūjayet //
tathā vṛścikasaṃkrāntau devadevaṃ trivikramam

dhanuḥsaṃkramaṇe devaṃ tathāśvaśirasaṃ nṛpa //
tathā makarasaṃkrāntau rāmaṃ daśarathātmajam

kuṃbhasaṃkramaṇe rājanrāmaṃ yādavanandanam //
mīnasaṃkraṇe matsyaṃ vāsudevaṃ tu pūjayet

paṭe vā yadi vārcāyāṃ gandhamālyānnasaṃpadā //
prādurbhāvasya nāmnāśca homaṃ kurvīta pārthiva

vratānte jaladhenuṃ ca cchatropānatsamanvitām//
vastrayugmayutāṃ dadyātpratimāsaṃ ca kāñcanam //
rātrau ca dīpamālābhirdevadevaṃ tu pūjayet

kṛtvā vrataṃ vatsarametadiṣṭaṃ mleccheṣu tiryakṣu na cāpi janma //
prāpnotyavāpnoti ciraṃ ca nākaṃ kāmaṃ tathāpnoti manobhirāmam

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde sudeśajanmāvāptivratavarṇano nāma navanavatyuttaraśatatamo'dhyāyaḥ

3.200
vajra uvāca //
iṣṭāṃ jātimavāpnoti karmaṇā yena mānavaḥ //
tanmamācakṣva dharmajña tvaṃ hi sarvaviducyase

mārkaṇḍeya uvāca //
pauruṣeṣu sadā te vai trirātropoṣito naraḥ //
caitramāsādathārabhya kārtike pūjayeddharim

pauruṣeṇa ca sūktena ṛgbhiḥ puṣpaiḥ phalaistathā //
dhūpairdīpaistathānnena ghṛtāhutibhireva ca

dhenurvratānte dātavyā kṛtvā saṃvatsaraṃ vratam //
yatheṣṭāṃ jātimāpnoti nātra kāryā vicāraṇā

na kevalaṃ jātikaraṃ pradiṣṭaṃ vratottamaṃ yāvadadīnasattva //
kāmānabhīṣṭānpuruṣasya dadyānmokṣaṃ ca dadyātpuruṣapradhāna

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde iṣṭajātyavāptivratavarṇano nāma dviśatatamo'dhyāyaḥ