વિષ્ણુધર્મોત્તરપુરાણમ્ · અધ્યાય 3.196.200

3.196
॥ માર્કણ્ડેય ઉવાચ ॥ ॥
અશ્વયુઙ્માસિ શુક્લે તુ પૌર્ણમાસ્યાં નરઃ શુચિઃ ॥
સોપવાસો નરેન્દ્રસ્તુ દેવં સમ્પૂજયેત્તથા

શચીમૈરાવતં વજ્રં માતલિં ચ નરાધિપ ॥
ગન્ધમાલ્યનમસ્કારધૂપ દીપાન્નસંપદા

સંવત્સરાન્તે કનકં તુ દત્ત્વા પ્રાપ્નોતિ લોકં સ પુરન્દરસ્ય ॥
માનુષ્યમાસાદ્ય નરેન્દ્રપૂજ્યો રાજા ભવેદ્વા દ્વિજપુઙ્ગવો વા

ઇતિ શ્રીવિષ્ણુધર્મોત્તરે તૃતીયખણ્ડે માર્કણ્ડેયવજ્રસંવાદે શક્રવ્રતવર્ણનો નામ ષણ્ણવત્યુત્તરશતતમોઽધ્યાયઃ

માર્કણ્ડેય ઉવાચ ॥ ॥
ઉપોષિતશ્ચતુર્દશ્યાં પૌર્ણમાસ્યાં નરોત્તમઃ ॥
પઞ્ચગવ્યં પિબેત્પશ્ચાદ્ધવિષ્યાશી તથા ભવેત્

સંવત્સરં તથા કૃત્વા માસપાપાત્પ્રમુચ્યતે ॥
તસ્માત્સર્વપ્રયત્નેન માસિમાસિ સમાચરેત્

સંવત્સરં પ્રાપ્ય નરેન્દ્રલોકં તત્રોષ્ય રાજન્સુચિરં દ્વિજેન્દ્રઃ ॥
માનુષ્યમાસાદ્ય નરેન્દ્રપૂજ્યો રાજા ભવેદ્વા દ્વિજપુઙ્ગવો વા

ઇતિ શ્રીવિષ્ણુધર્મોત્તરે તૃતીયખણ્ડે માર્કણ્ડેયવજ્રસંવાદે બ્રહ્મકૂર્ચવર્ણનો નામ સપ્તનવત્યુત્તરશતતમોઽધ્યાયઃ

3.198
॥ માર્કણ્ડેય ઉવાચ ॥ ॥
યોગભૂતં હરિં દેવં ચતુર્દશ્યા મુપોષિતઃ ॥
અર્ચયેત્પૌર્ણમાસ્યાં તુ સોઽશ્વમેધફલં લભેત્

બ્રહ્મભૂતમમાવસ્યાં પૌર્ણમાસ્યાં તથૈવ ચ ॥
રાજસૂયમવાપ્નોતિ કુલમુદ્ધરતિ સ્વકમ્

બ્રહ્મભૂતમમાવસ્યાં પૌર્ણમાસ્યાં ચ પૂજયેત્ ॥
યોગભૂતં પરિચરન્કેશવં મહદાપ્નુયાત્

અત્યર્થં પ્રીતિમાયાતિ માસપક્ષાન્તયોઃ સદા ॥
પૂજિતઃ સોપવાસેન ભક્ત્યા દેવવરો હરિઃ

મહાવ્રતમિદં ખ્યાતં સર્વકલ્મષનાશનમ્ ॥
સંવત્સરમિદં કૃત્વા નાકપૃષ્ઠે મહીયતે

સર્વપાપપ્રશમનં વ્રતમેતત્પ્રકીર્તિતમ્ ॥
સ્વવિત્તશક્તિરેવાત્ર સર્વકર્મસુ કારણમ્

કૃત્વા વ્રતં દ્વાદશવત્સરાણિ પ્રાપ્નોતિ લોકં પુરુષોત્તમસ્ય ॥
તત્રોષ્ય રાજન્સુચિરં સુકાલં પ્રાપ્નોતિ મોક્ષં પુરુષસ્તતોન્તે

ઇતિ શ્રીવિષ્ણુધર્મોત્તરે તૃતીયખણ્ડે માર્કણ્ડેયવજ્રસંવાદે મહાવ્રતં નામાષ્ટ નવત્યુત્તરશતતમોઽધ્યાયઃ

3.199
વજ્ર ઉવાચ ॥
ભગવન્કર્મણા કેન તિર્યગ્યોનૌ ન જાયતે ॥
મ્લેચ્છદેશે ચ પુરુષસ્તં મમાચક્ષ્વ પૃચ્છતઃ

માર્કણ્ડેય ઉવાચ ॥
મેષસંક્રમણે ભાનોઃ સોપવાસો નરોત્તમઃ ॥
પૂજયેદ્ભાર્ગવં રામં દેવં શક્ત્યા યથાવિધિ

કન્યાસંક્રમણે પ્રાપ્તે તથા કૃષ્ણં ચ પૂજયેત્ ॥
તથા મિથુનસંક્રાન્તૌ પૂજયેદ્ભોગશાયિનમ્

તથા કુલીરસંક્રાન્તૌ વરાહમપરાજિતમ્ ॥
નરસિંહં તથા દેવં સિંહસંક્રમણે વિભુમ્ ॥
કન્યાસંક્રમણે દેવં સ્ત્રીરૂપં પૂજયેન્નરઃ

તુલાસંક્રમણે પ્રાપ્તે વામનં નૃપ પૂજયેત્ ॥
તથા વૃશ્ચિકસંક્રાન્તૌ દેવદેવં ત્રિવિક્રમમ્

ધનુઃસંક્રમણે દેવં તથાશ્વશિરસં નૃપ ॥
તથા મકરસંક્રાન્તૌ રામં દશરથાત્મજમ્

કુંભસંક્રમણે રાજન્રામં યાદવનન્દનમ્ ॥
મીનસંક્રણે મત્સ્યં વાસુદેવં તુ પૂજયેત્

પટે વા યદિ વાર્ચાયાં ગન્ધમાલ્યાન્નસંપદા ॥
પ્રાદુર્ભાવસ્ય નામ્નાશ્ચ હોમં કુર્વીત પાર્થિવ

વ્રતાન્તે જલધેનું ચ ચ્છત્રોપાનત્સમન્વિતામ્॥
વસ્ત્રયુગ્મયુતાં દદ્યાત્પ્રતિમાસં ચ કાઞ્ચનમ્ ॥
રાત્રૌ ચ દીપમાલાભિર્દેવદેવં તુ પૂજયેત્

કૃત્વા વ્રતં વત્સરમેતદિષ્ટં મ્લેચ્છેષુ તિર્યક્ષુ ન ચાપિ જન્મ ॥
પ્રાપ્નોત્યવાપ્નોતિ ચિરં ચ નાકં કામં તથાપ્નોતિ મનોભિરામમ્

ઇતિ શ્રીવિષ્ણુધર્મોત્તરે તૃતીયખણ્ડે માર્કણ્ડેયવજ્રસંવાદે સુદેશજન્માવાપ્તિવ્રતવર્ણનો નામ નવનવત્યુત્તરશતતમોઽધ્યાયઃ

3.200
વજ્ર ઉવાચ ॥
ઇષ્ટાં જાતિમવાપ્નોતિ કર્મણા યેન માનવઃ ॥
તન્મમાચક્ષ્વ ધર્મજ્ઞ ત્વં હિ સર્વવિદુચ્યસે

માર્કણ્ડેય ઉવાચ ॥
પૌરુષેષુ સદા તે વૈ ત્રિરાત્રોપોષિતો નરઃ ॥
ચૈત્રમાસાદથારભ્ય કાર્તિકે પૂજયેદ્ધરિમ્

પૌરુષેણ ચ સૂક્તેન ઋગ્ભિઃ પુષ્પૈઃ ફલૈસ્તથા ॥
ધૂપૈર્દીપૈસ્તથાન્નેન ઘૃતાહુતિભિરેવ ચ

ધેનુર્વ્રતાન્તે દાતવ્યા કૃત્વા સંવત્સરં વ્રતમ્ ॥
યથેષ્ટાં જાતિમાપ્નોતિ નાત્ર કાર્યા વિચારણા

ન કેવલં જાતિકરં પ્રદિષ્ટં વ્રતોત્તમં યાવદદીનસત્ત્વ ॥
કામાનભીષ્ટાન્પુરુષસ્ય દદ્યાન્મોક્ષં ચ દદ્યાત્પુરુષપ્રધાન

ઇતિ શ્રીવિષ્ણુધર્મોત્તરે તૃતીયખણ્ડે માર્કણ્ડેયવજ્રસંવાદે ઇષ્ટજાત્યવાપ્તિવ્રતવર્ણનો નામ દ્વિશતતમોઽધ્યાયઃ