Vishnudharmottara Purana · Chapter 3.191.195

3.191
mārkaṇḍeya uvāca //
amāvāsyāṃ tu velāyāṃ sopavāso narottama //
padmadvayaṃ pūjayeta caṃdrārkāvekarāśigau //

ādityamaṣṭakamale candraṃ ṣoḍaśake tathā //
ādityaṃ sarvaraktena candraṃ śuklena yādava

mālyādinā mahābhāga homayettilataṇḍulaiḥ //
ghṛtakṣīrayuto rājantayornāmnā yathāvidhi

vratānte brāhmaṇendrāya kanakaṃ pratipādayet //
rajataṃ ca mahābhāga ya icchedbhūtimātmanaḥ

kṛtvā vrataṃ vatmarametadiṣṭaṃ dattvā ca dīpānvidhivatprabhūtān //
cakṣuḥ paraṃ prāpya vivṛddhatejā dhanānvitaḥ syāttridivādihasthaḥ

iti śrīviṣṇudharmottare tṛ० kha० mārkaṇḍeyavajrasaṃvāde candravratavarṇano nāmaikanavatyadhikaśatatamo'dhyāyaḥ

3.192
mārkaṇḍeya uvāca //
kārtikāttu tathārabhya sampūrṇaśaśalakṣaṇam //
pūjayedudare rājansadā naktāśano bhavet

lāvaṇaṃ maṇḍalaṃ kṛtvā candanenānulepite //
daśanakṣatrasahitaṃ tatra somaṃ tu pūjayet

kṛttikārohiṇīyuktaṃ kārtike māsi pūjayet //
saumyārdrāsahitaṃ rājanmāsi saumye tathaiva ca

ādityapuṣyasahitaṃ māsi pauṣe ca yādava //
maghāsarpayutaṃ māghe phālgune śṛṇu pārthiva

aryamṇabhāgyasāvitraiḥ sahitaṃ pūjayedvibhum //
citrāsvātiyutaṃ caitraṃ vaiśākhe śṛṇu pārthiva

viśākhayā ca maitreṇa yutaṃ saṃpūjayettathā//
jyeṣṭhāmūlayutaṃ jyeṣṭhe āṣāḍhādyāmanantaram

śrāvaṇe śravaṇopetaṃ sahitaṃ ca śraviṣṭhayā //
tathā bhādrapade pauṣṇāmājāhirbudhnyasaṃyutam

aśvinībharaṇīyuktaṃ tathā cāśvayuje vibhum //
gandhamālyanamaskāradhūpadīpānnasaṃpadā

guḍena paramānnena lavaṇena ghṛtena ca//
ikṣuṇekṣuvikāraiśca payasā pāyasena ca

pūjyāścāvidhavānāryastathā tallakṣaṇaiḥ śubhaiḥ //
tato'nantaramaśnīyāddhaviṣyaṃ prayato naraḥ

brāhmaṇānāṃ vratānte tu mahārajataraṃjitam //
śaktyā ca vasanaṃ dadyānnārī vā yadi vā naraḥ

rūpasaubhāgyalāvaṇyadhanayukto bhavennaraḥ //
vratenānena cīrṇena svargalokaṃ ca gacchati

sopavāsastu yaḥ kuryādvratametadanuttamam //
aśvamedhasahasrasya phalaṃ prāpnoti mānavaḥ

saubhāgyādi ca yatproktaṃ tadāpnoti viśeṣavat //
manasā kāṃkṣitānkāmānsarvānprāpnotyasaṃśayam

janābhirāmaśca śaśāṅkavatsyāddhanādilābhaśca tathaiva lakṣmyā //
śakreṇa tulyaśca tathaiva śaktyā mānuṣyamāsādya bhavecca rājan

iti śrī viṣṇudharmottare tṛ० kha० mārkaṇḍeyavajrasaṃvāde māsarkṣapaurṇamāsīvratavarṇano nāma dvinavatyuttaraśatatamo'dhyāyaḥ

3.193
mārkaṇḍeya uvāca //
kārtike paurṇamāsyāṃ tu pūrṇaṃ śiśiradīdhitim//
padme ṣoḍaśapatreṣu karṇikāyāṃ tu pūjayet

kesare pūjayettatra nakṣatrāṇyaṣṭaviṃśatiḥ //
patreṣu tithidevāṃśca tathā jyotsnāṃ ca pūjayet

gandhamālyanamaskāradhūpadīpānnasaṃpadā //
guḍena paramānnena dadhnā ca lavaṇena ca

apūpaiśca mahābhāga phalaiḥ kālodbhavaistathā//
vratāvasāne dadyācca vāsoyugmaṃ dvijātaye

brāhmaṇyai ca mahābhāga mahārajatarañjitam //
pūjyau ca vidhinā śaktyā kālavidvācakāvubhau // ६ /
sopavāso'tha naktāśī vratametatsamācaret //
naktāśano vā dharmajña tathaiva ca haviṣyabhuk

saubhāgyadaṃ rūpavivardhanaṃ ca lāvaṇyadaṃ strīratibhogadaṃ ca //
kāryaṃ prayatnena narendra puṃsā kāryaṃ tathā strībhiradīnasattva

iti śrīviṣṇudharmottare tṛ० kha० mārkaṇḍeyavajrasaṃvāde paurṇamāsīvratavarṇano nāma trinavatyuttaraśatatamo'dhyāyaḥ

3.194
mārkaṇḍeya uvāca //
mārgaśīrṣādathārabhya candramaṇḍalake naraḥ //
sopavāsastu saṃpūjya pauṇḍarīkaphalaṃ labhet

kṛtvā vrataṃ vatsarametadiṣṭaṃ prāpnoti lokaṃ sa niśākarasya //
tatroṣya rājansuciraṃ ca kālaṃ sāyujyamāpnoti tataśca tasya

iti śrīviṣṇudharmottare tṛ०kha० mārkaṇḍeyavajrasaṃvāde candravratavarṇano nāma caturnavatyuttaraśatatamo 'dhyāyaḥ

3.195
mārkaṇḍeya uvāca //
proṣṭhapādādathārabhya saṃpūrṇe śaśalāñchane //
saṃpūjya varuṇaṃ devaṃ gandhamālyānnasaṃpadā

dattvā vratāvasāne tu jaladhenuṃ dvijātaye //
chatropānahasaṃyuktāṃ vāsoyugavibhūṣitām

prāpnoti lokaṃ varuṇasya rājaṃstatroṣya kālaṃ suciraṃ manuṣyaḥ //
mānuṣyamāsādya bhavatyarogī rūpānvito vittayutastathaiva

iti śrīviṣṇudharmottare tṛ० kha० mārkaṇḍeyavajrasaṃvāde varuṇavratavarṇano nāma pañcanavatyuttaraśatatamo'dhyāyaḥ