વિષ્ણુધર્મોત્તરપુરાણમ્ · અધ્યાય 3.191.195

3.191
માર્કણ્ડેય ઉવાચ ॥
અમાવાસ્યાં તુ વેલાયાં સોપવાસો નરોત્તમ ॥
પદ્મદ્વયં પૂજયેત ચંદ્રાર્કાવેકરાશિગૌ ॥

આદિત્યમષ્ટકમલે ચન્દ્રં ષોડશકે તથા ॥
આદિત્યં સર્વરક્તેન ચન્દ્રં શુક્લેન યાદવ

માલ્યાદિના મહાભાગ હોમયેત્તિલતણ્ડુલૈઃ ॥
ઘૃતક્ષીરયુતો રાજન્તયોર્નામ્ના યથાવિધિ

વ્રતાન્તે બ્રાહ્મણેન્દ્રાય કનકં પ્રતિપાદયેત્ ॥
રજતં ચ મહાભાગ ય ઇચ્છેદ્ભૂતિમાત્મનઃ

કૃત્વા વ્રતં વત્મરમેતદિષ્ટં દત્ત્વા ચ દીપાન્વિધિવત્પ્રભૂતાન્ ॥
ચક્ષુઃ પરં પ્રાપ્ય વિવૃદ્ધતેજા ધનાન્વિતઃ સ્યાત્ત્રિદિવાદિહસ્થઃ

ઇતિ શ્રીવિષ્ણુધર્મોત્તરે તૃ૦ ખ૦ માર્કણ્ડેયવજ્રસંવાદે ચન્દ્રવ્રતવર્ણનો નામૈકનવત્યધિકશતતમોઽધ્યાયઃ

3.192
માર્કણ્ડેય ઉવાચ ॥
કાર્તિકાત્તુ તથારભ્ય સમ્પૂર્ણશશલક્ષણમ્ ॥
પૂજયેદુદરે રાજન્સદા નક્તાશનો ભવેત્

લાવણં મણ્ડલં કૃત્વા ચન્દનેનાનુલેપિતે ॥
દશનક્ષત્રસહિતં તત્ર સોમં તુ પૂજયેત્

કૃત્તિકારોહિણીયુક્તં કાર્તિકે માસિ પૂજયેત્ ॥
સૌમ્યાર્દ્રાસહિતં રાજન્માસિ સૌમ્યે તથૈવ ચ

આદિત્યપુષ્યસહિતં માસિ પૌષે ચ યાદવ ॥
મઘાસર્પયુતં માઘે ફાલ્ગુને શૃણુ પાર્થિવ

અર્યમ્ણભાગ્યસાવિત્રૈઃ સહિતં પૂજયેદ્વિભુમ્ ॥
ચિત્રાસ્વાતિયુતં ચૈત્રં વૈશાખે શૃણુ પાર્થિવ

વિશાખયા ચ મૈત્રેણ યુતં સંપૂજયેત્તથા॥
જ્યેષ્ઠામૂલયુતં જ્યેષ્ઠે આષાઢાદ્યામનન્તરમ્

શ્રાવણે શ્રવણોપેતં સહિતં ચ શ્રવિષ્ઠયા ॥
તથા ભાદ્રપદે પૌષ્ણામાજાહિર્બુધ્ન્યસંયુતમ્

અશ્વિનીભરણીયુક્તં તથા ચાશ્વયુજે વિભુમ્ ॥
ગન્ધમાલ્યનમસ્કારધૂપદીપાન્નસંપદા

ગુડેન પરમાન્નેન લવણેન ઘૃતેન ચ॥
ઇક્ષુણેક્ષુવિકારૈશ્ચ પયસા પાયસેન ચ

પૂજ્યાશ્ચાવિધવાનાર્યસ્તથા તલ્લક્ષણૈઃ શુભૈઃ ॥
તતોઽનન્તરમશ્નીયાદ્ધવિષ્યં પ્રયતો નરઃ

બ્રાહ્મણાનાં વ્રતાન્તે તુ મહારજતરંજિતમ્ ॥
શક્ત્યા ચ વસનં દદ્યાન્નારી વા યદિ વા નરઃ

રૂપસૌભાગ્યલાવણ્યધનયુક્તો ભવેન્નરઃ ॥
વ્રતેનાનેન ચીર્ણેન સ્વર્ગલોકં ચ ગચ્છતિ

સોપવાસસ્તુ યઃ કુર્યાદ્વ્રતમેતદનુત્તમમ્ ॥
અશ્વમેધસહસ્રસ્ય ફલં પ્રાપ્નોતિ માનવઃ

સૌભાગ્યાદિ ચ યત્પ્રોક્તં તદાપ્નોતિ વિશેષવત્ ॥
મનસા કાંક્ષિતાન્કામાન્સર્વાન્પ્રાપ્નોત્યસંશયમ્

જનાભિરામશ્ચ શશાઙ્કવત્સ્યાદ્ધનાદિલાભશ્ચ તથૈવ લક્ષ્મ્યા ॥
શક્રેણ તુલ્યશ્ચ તથૈવ શક્ત્યા માનુષ્યમાસાદ્ય ભવેચ્ચ રાજન્

ઇતિ શ્રી વિષ્ણુધર્મોત્તરે તૃ૦ ખ૦ માર્કણ્ડેયવજ્રસંવાદે માસર્ક્ષપૌર્ણમાસીવ્રતવર્ણનો નામ દ્વિનવત્યુત્તરશતતમોઽધ્યાયઃ

3.193
માર્કણ્ડેય ઉવાચ ॥
કાર્તિકે પૌર્ણમાસ્યાં તુ પૂર્ણં શિશિરદીધિતિમ્॥
પદ્મે ષોડશપત્રેષુ કર્ણિકાયાં તુ પૂજયેત્

કેસરે પૂજયેત્તત્ર નક્ષત્રાણ્યષ્ટવિંશતિઃ ॥
પત્રેષુ તિથિદેવાંશ્ચ તથા જ્યોત્સ્નાં ચ પૂજયેત્

ગન્ધમાલ્યનમસ્કારધૂપદીપાન્નસંપદા ॥
ગુડેન પરમાન્નેન દધ્ના ચ લવણેન ચ

અપૂપૈશ્ચ મહાભાગ ફલૈઃ કાલોદ્ભવૈસ્તથા॥
વ્રતાવસાને દદ્યાચ્ચ વાસોયુગ્મં દ્વિજાતયે

બ્રાહ્મણ્યૈ ચ મહાભાગ મહારજતરઞ્જિતમ્ ॥
પૂજ્યૌ ચ વિધિના શક્ત્યા કાલવિદ્વાચકાવુભૌ ॥ ૬ ।
સોપવાસોઽથ નક્તાશી વ્રતમેતત્સમાચરેત્ ॥
નક્તાશનો વા ધર્મજ્ઞ તથૈવ ચ હવિષ્યભુક્

સૌભાગ્યદં રૂપવિવર્ધનં ચ લાવણ્યદં સ્ત્રીરતિભોગદં ચ ॥
કાર્યં પ્રયત્નેન નરેન્દ્ર પુંસા કાર્યં તથા સ્ત્રીભિરદીનસત્ત્વ

ઇતિ શ્રીવિષ્ણુધર્મોત્તરે તૃ૦ ખ૦ માર્કણ્ડેયવજ્રસંવાદે પૌર્ણમાસીવ્રતવર્ણનો નામ ત્રિનવત્યુત્તરશતતમોઽધ્યાયઃ

3.194
માર્કણ્ડેય ઉવાચ ॥
માર્ગશીર્ષાદથારભ્ય ચન્દ્રમણ્ડલકે નરઃ ॥
સોપવાસસ્તુ સંપૂજ્ય પૌણ્ડરીકફલં લભેત્

કૃત્વા વ્રતં વત્સરમેતદિષ્ટં પ્રાપ્નોતિ લોકં સ નિશાકરસ્ય ॥
તત્રોષ્ય રાજન્સુચિરં ચ કાલં સાયુજ્યમાપ્નોતિ તતશ્ચ તસ્ય

ઇતિ શ્રીવિષ્ણુધર્મોત્તરે તૃ૦ખ૦ માર્કણ્ડેયવજ્રસંવાદે ચન્દ્રવ્રતવર્ણનો નામ ચતુર્નવત્યુત્તરશતતમો ઽધ્યાયઃ

3.195
માર્કણ્ડેય ઉવાચ ॥
પ્રોષ્ઠપાદાદથારભ્ય સંપૂર્ણે શશલાઞ્છને ॥
સંપૂજ્ય વરુણં દેવં ગન્ધમાલ્યાન્નસંપદા

દત્ત્વા વ્રતાવસાને તુ જલધેનું દ્વિજાતયે ॥
છત્રોપાનહસંયુક્તાં વાસોયુગવિભૂષિતામ્

પ્રાપ્નોતિ લોકં વરુણસ્ય રાજંસ્તત્રોષ્ય કાલં સુચિરં મનુષ્યઃ ॥
માનુષ્યમાસાદ્ય ભવત્યરોગી રૂપાન્વિતો વિત્તયુતસ્તથૈવ

ઇતિ શ્રીવિષ્ણુધર્મોત્તરે તૃ૦ ખ૦ માર્કણ્ડેયવજ્રસંવાદે વરુણવ્રતવર્ણનો નામ પઞ્ચનવત્યુત્તરશતતમોઽધ્યાયઃ