Vishnudharmottara Purana · Chapter 3.186.190

3.186
mārkaṇḍeya uvāca //
kṛṣṇapakṣacaturdaśyāṃ virūpākṣaṃ tu pūjayet//
pauṣamāsādathārabhya yāvatsaṃvatsaraṃ vratam //
gandhamālyanamaskāradhūpadīpānnasampadā//
uṣṭraṃ dvijātaye dadyādvratānte ca parantapa

kṛtvā vrataṃ vatsarametadiṣṭaṃ bhayaṃ na cāpnoti sa rākṣasebhyaḥ //
kāmānavāpnoti bhavatyarogo bhayaṃ ca rājanna ca vetti kiṃcit

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde virūpākṣavratavarṇano nāma ṣaḍaśītyuttaraśatatamo'dhyāyaḥ

3.187
mārkaṇḍeya uvāca //
yatra kvacana nadyāṃ ca yatra kṛṣṇacatudarśī //
anarkābhyudite kāle devaṃ saṃpūjayedyamam

dhūmrorṇaṃ citraguptaṃ ca kālapāśau ca yādava //
mṛtyuṃ svargaṃ ca dharmajñaṃ gandhamālyānnasampadā

yamo dadhāra ityarcāṃ tilām̐śca juhuyāttataḥ //
namo yamāyeti tathā strīśūdrasya vidhīyate

kṛsaraṃ bhojanaṃ viprānyathā śakti narottama //
dadyādvratānte viprāya tathaiva ca payasvinīm

kṛtvā vrataṃ vatsarametadiṣṭaṃ na yāti rājannarakaṃ manuṣyaḥ //
prāṇakṣayaṃ prāpya sa yāti nākaṃ mānuṣyamāsādya ca dharmavānsyāt

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde yamavratavarṇano nāma saptāśītyu ttaraśatatamo'dhyāyaḥ

3.188
śuklapakṣādathārabhya phālgunasya narādhipa //
pūjayettu caturdaśyāṃ sopavāso maheśvaram

gandhamālyanamaskāra dhūpadīpānnasaṃpadā //
vratānte gāṃ tathā dadyādagniṣṭomaphalaṃ labhet

etadeva vrataṃ kṛtvā śuklapakṣe tu vatsaram //
puṇḍarīkamavāpnoti kulamuddharati svakam

caturdaśīdvayaṃ caitatkṛtvā saṃvatsaraṃ naraḥ //
māsimāsi tathā bhaktyā sarvānkāmānavāpnuyāt

āsādya kāmāṃśca maheśvarasya tatroṣya kālaṃ suciraṃ ca rājan //
sāyujyamāyāti maheśvarasya sarveśvasyāpratimasya tasya // //
iti śrīviṣṇudharmottare tṛtīyakhaṇḍe mārkaṇḍeyavajrasaṃvāde maheśvaravratavarṇano nāmāṣṭāśītyuttara śatatamo'dhyāyaḥ

3.189
// mārkaṇḍeya uvāca //
prabhāsvarā barhiṣada agniṣvāttāstathaiva ca //
kravyādaścopahūtāśca ājyapāśca sukālinaḥ

pūjyāḥ pitṛgaṇā rājannupavāsena nityaśaḥ //
caitraśuklādathārabhya pañcadaśyāṃ narādhipa

śrāddhaṃ tadahni kurvīta yāvatsaṃvatsaraṃ bhavet //
gandhamālyanamaskāradhūpadīpānnasampadā

saṃvatsarānte dadyācca tathā dhenuṃ payasvinīm //
brāhmaṇāya mahābhāga pitṛbhaktāya bhaktitaḥ

kṛtvā vrataṃ vatsarametadiṣṭaṃ prāpnoti lokaṃ ca tathā sa teṣām //
tatroṣya rājansuciraṃ sukālaṃ prāpnoti mokṣaṃ puruṣapradhāna

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde pitṛvratavarṇano nāmaikonanavatyuttara śatatamo'dhyāyaḥ

3.190
mārkaṇḍeya uvāca //
kṛṣṇapakṣe pañcadaśyāṃ caitrādārabhya yādava //
vahnisampūjanaṃ kṛtvā gandhamālyānnasampadā

tilairhomastataḥ kuryānnāmnā vahnernarādhipa //
saṃvatsarānte dadyācca suvarṇaṃ brāhmaṇāya ca

kṛtvā vrataṃ vatsarametadiṣṭaṃ prāpnoti vittaṃ satataṃ yaśaśca //
dharme matiṃ rūpamanuttamaṃ ca kāmānyatheṣṭānpuruṣapradhāna

iti śrīviṣṇudharmottare tṛ० kha० mārkaṇḍeyavajrasaṃvāde vahnivratavarṇano nāma navatyuttaraśatatamo'dhyāyaḥ