વિષ્ણુધર્મોત્તરપુરાણમ્ · અધ્યાય 3.186.190

3.186
માર્કણ્ડેય ઉવાચ ॥
કૃષ્ણપક્ષચતુર્દશ્યાં વિરૂપાક્ષં તુ પૂજયેત્॥
પૌષમાસાદથારભ્ય યાવત્સંવત્સરં વ્રતમ્ ॥
ગન્ધમાલ્યનમસ્કારધૂપદીપાન્નસમ્પદા॥
ઉષ્ટ્રં દ્વિજાતયે દદ્યાદ્વ્રતાન્તે ચ પરન્તપ

કૃત્વા વ્રતં વત્સરમેતદિષ્ટં ભયં ન ચાપ્નોતિ સ રાક્ષસેભ્યઃ ॥
કામાનવાપ્નોતિ ભવત્યરોગો ભયં ચ રાજન્ન ચ વેત્તિ કિંચિત્

ઇતિ શ્રીવિષ્ણુધર્મોત્તરે તૃતીયખણ્ડે માર્કણ્ડેયવજ્રસંવાદે વિરૂપાક્ષવ્રતવર્ણનો નામ ષડશીત્યુત્તરશતતમોઽધ્યાયઃ

3.187
માર્કણ્ડેય ઉવાચ ॥
યત્ર ક્વચન નદ્યાં ચ યત્ર કૃષ્ણચતુદર્શી ॥
અનર્કાભ્યુદિતે કાલે દેવં સંપૂજયેદ્યમમ્

ધૂમ્રોર્ણં ચિત્રગુપ્તં ચ કાલપાશૌ ચ યાદવ ॥
મૃત્યું સ્વર્ગં ચ ધર્મજ્ઞં ગન્ધમાલ્યાન્નસમ્પદા

યમો દધાર ઇત્યર્ચાં તિલાઁશ્ચ જુહુયાત્તતઃ ॥
નમો યમાયેતિ તથા સ્ત્રીશૂદ્રસ્ય વિધીયતે

કૃસરં ભોજનં વિપ્રાન્યથા શક્તિ નરોત્તમ ॥
દદ્યાદ્વ્રતાન્તે વિપ્રાય તથૈવ ચ પયસ્વિનીમ્

કૃત્વા વ્રતં વત્સરમેતદિષ્ટં ન યાતિ રાજન્નરકં મનુષ્યઃ ॥
પ્રાણક્ષયં પ્રાપ્ય સ યાતિ નાકં માનુષ્યમાસાદ્ય ચ ધર્મવાન્સ્યાત્

ઇતિ શ્રીવિષ્ણુધર્મોત્તરે તૃતીયખણ્ડે માર્કણ્ડેયવજ્રસંવાદે યમવ્રતવર્ણનો નામ સપ્તાશીત્યુ ત્તરશતતમોઽધ્યાયઃ

3.188
શુક્લપક્ષાદથારભ્ય ફાલ્ગુનસ્ય નરાધિપ ॥
પૂજયેત્તુ ચતુર્દશ્યાં સોપવાસો મહેશ્વરમ્

ગન્ધમાલ્યનમસ્કાર ધૂપદીપાન્નસંપદા ॥
વ્રતાન્તે ગાં તથા દદ્યાદગ્નિષ્ટોમફલં લભેત્

એતદેવ વ્રતં કૃત્વા શુક્લપક્ષે તુ વત્સરમ્ ॥
પુણ્ડરીકમવાપ્નોતિ કુલમુદ્ધરતિ સ્વકમ્

ચતુર્દશીદ્વયં ચૈતત્કૃત્વા સંવત્સરં નરઃ ॥
માસિમાસિ તથા ભક્ત્યા સર્વાન્કામાનવાપ્નુયાત્

આસાદ્ય કામાંશ્ચ મહેશ્વરસ્ય તત્રોષ્ય કાલં સુચિરં ચ રાજન્ ॥
સાયુજ્યમાયાતિ મહેશ્વરસ્ય સર્વેશ્વસ્યાપ્રતિમસ્ય તસ્ય ॥ ॥
ઇતિ શ્રીવિષ્ણુધર્મોત્તરે તૃતીયખણ્ડે માર્કણ્ડેયવજ્રસંવાદે મહેશ્વરવ્રતવર્ણનો નામાષ્ટાશીત્યુત્તર શતતમોઽધ્યાયઃ

3.189
॥ માર્કણ્ડેય ઉવાચ ॥
પ્રભાસ્વરા બર્હિષદ અગ્નિષ્વાત્તાસ્તથૈવ ચ ॥
ક્રવ્યાદશ્ચોપહૂતાશ્ચ આજ્યપાશ્ચ સુકાલિનઃ

પૂજ્યાઃ પિતૃગણા રાજન્નુપવાસેન નિત્યશઃ ॥
ચૈત્રશુક્લાદથારભ્ય પઞ્ચદશ્યાં નરાધિપ

શ્રાદ્ધં તદહ્નિ કુર્વીત યાવત્સંવત્સરં ભવેત્ ॥
ગન્ધમાલ્યનમસ્કારધૂપદીપાન્નસમ્પદા

સંવત્સરાન્તે દદ્યાચ્ચ તથા ધેનું પયસ્વિનીમ્ ॥
બ્રાહ્મણાય મહાભાગ પિતૃભક્તાય ભક્તિતઃ

કૃત્વા વ્રતં વત્સરમેતદિષ્ટં પ્રાપ્નોતિ લોકં ચ તથા સ તેષામ્ ॥
તત્રોષ્ય રાજન્સુચિરં સુકાલં પ્રાપ્નોતિ મોક્ષં પુરુષપ્રધાન

ઇતિ શ્રીવિષ્ણુધર્મોત્તરે તૃતીયખણ્ડે માર્કણ્ડેયવજ્રસંવાદે પિતૃવ્રતવર્ણનો નામૈકોનનવત્યુત્તર શતતમોઽધ્યાયઃ

3.190
માર્કણ્ડેય ઉવાચ ॥
કૃષ્ણપક્ષે પઞ્ચદશ્યાં ચૈત્રાદારભ્ય યાદવ ॥
વહ્નિસમ્પૂજનં કૃત્વા ગન્ધમાલ્યાન્નસમ્પદા

તિલૈર્હોમસ્તતઃ કુર્યાન્નામ્ના વહ્નેર્નરાધિપ ॥
સંવત્સરાન્તે દદ્યાચ્ચ સુવર્ણં બ્રાહ્મણાય ચ

કૃત્વા વ્રતં વત્સરમેતદિષ્ટં પ્રાપ્નોતિ વિત્તં સતતં યશશ્ચ ॥
ધર્મે મતિં રૂપમનુત્તમં ચ કામાન્યથેષ્ટાન્પુરુષપ્રધાન

ઇતિ શ્રીવિષ્ણુધર્મોત્તરે તૃ૦ ખ૦ માર્કણ્ડેયવજ્રસંવાદે વહ્નિવ્રતવર્ણનો નામ નવત્યુત્તરશતતમોઽધ્યાયઃ