Vishnudharmottara Purana · Chapter 3.181.185

3.181
mārkaṇḍeya uvāca //
mano mantastathā prāṇo naro yānaśca vīryavān //
citirhayo nayaścaiva haṃso nārāyaṇastathā

vibhuścāpi prabhuścaiva sādhyā dvādaśa kīrtitāḥ //
pūjayecchuklalapakṣe tāndvādaśyāṃ mārgaśīrṣataḥ

kṛtvā vrataṃ vatsarametadiṣṭaṃ prāpnoti teṣāṃ tu salokameva //
tatroṣya kālaṃ suciraṃ narendra rājā bhavedbāhmaṇapuṅgavo vā

iti śrīviṣṇu०dha० tṛtīyakhaṇḍe mā०va०saṃ० sādhyavratavarṇano nāmaikāśītyuttara śatatamo'dhyāyaḥ

3.182
mārkaṇḍeya uvāca //
dhātā mitroryamā pūṣā śakreśo varuṇo bhagaḥ //
tvaṣṭā vivasvānsavitā viṣṇurdvādaśakastathā

pūjayeddvādaśādityāñchuklapakṣe hyupoṣitaḥ //
mārgaśīrṣādathārabhya gandhamālyānnasampadā

dattvā vratānte puruṣaḥ suvarṇamāpnoti lokānsaviturnṛvīra //
mānuṣyamāsādya bhavatyarogo jitendriyaścaiva dhanānvitaśca

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde kāmadeva vratavarṇano nāma dvyaśītyuttaraśatatamo'dhyāyaḥ

3.183
mārkaṇḍeya uvāca //
śuklapakṣe mahārāja trayodaśyāmupoṣitaḥ //
pūjayetkāmadevantu vaiśākhātprabhṛti prabho

gandhamālyanamaskāradhūpadīpānnasampadā //
dadyādvratānte viprāya gandhavastrayugaṃ tathā

kṛtvā vrataṃ vatsarametadiṣṭamāsādya lokaṃ suciraṃ manuṣyaḥ //
mānuṣyamāsādya bhavatyarogo sukhānvito rūpasarūpatā ca

iti śrī vi०dha० tu०kha० mā०va०saṃ० kāmadevavratavarṇano nāma tryaśītyuttaraśatatamodhyāyaḥ

3.184
mārkaṇḍeya uvāca //
śuklapakṣe mahārāja trayodaśyāmupoṣitaḥ //
phālgunāttu samārabhya nityaṃ saṃpūjayennaraḥ

gandhamālyanamaskāradhūpadīpānnasampadā //
suvarṇaṃ brāhmaṇendrāya vratānte pratipādayet

kṛtvā vrataṃ vatsarametadiṣṭaṃ yakṣeṣu rājansuciraṃ tathoṣya //
mānuṣyamāsādya dhanānvitaḥ syātsaubhāgyayuktaśca tathā virogaḥ

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde dhanavratavarṇano nāma caturaśītyuttaraśatatamo'dhyāyaḥ

3.185
śuklapakṣacaturdaśyāṃ jyeṣṭhā dārabhya yādava//
vāyuṃ saṃpūjayeddevaṃ sopavāso jitendriyaḥ

gandhamālyanamaskāradhūpadīpānnasaṃpadā//
saṃvatsarānte dātavyaṃ vastrayugmaṃ dvijātaye

kṛtvā vrataṃ vatsarametadiṣṭaṃ cāsādya lokaṃ marutāṃ manuṣyaḥ /
sukhāni bhuktvā suciraṃ mahīpa mānuṣyamāsādya bhavatyarogaḥ

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde vāyuvratavarṇano nāma pañcāśītyuttarāśītitamo'dhyāyaḥ