Vishnudharmottara Purana · Chapter 3.171.175

3.171
// mārkaṇḍeya uvāca // //
anena ca vidhānena pratimāsaṃ tu yo naraḥ //
saptamīdvitayaṃ kuryādyāvatsaṃvatsaro bhavet

sośvamedhamavāpnoti sūryalokaṃ ca gacchati //
kulamuddharate rājansarvānkāmānupāśnute

śiraso vapanaṃ kṛtvā yorcayettu divākaram //
tasyārkastoṣamāyāti vahniṣṭomaṃ ca vindati

apūpaiḥ saguḍairbhaktyā tathā ca lavaṇānvitaiḥ //
sahiraṇyaissamabhyarcya vahniṣṭomaphalaṃ labhet

sūryāhṇe yastu naktāśī saṃpūjayati bhāskaram //
iṣṭānkāmānavāpnoti sūryalokaṃ ca gacchati

arkodaye sadā yastu pūjayecca divākaram //
iṣṭānkāmānavāpnoti sūryalokaṃ ca gacchati

yathāyathā pūjayate tu sūryaṃ kāmāḥ samagrāḥ saphalā bhavanti //
ārogyamagryaṃ ca tathā nṛvīra bhūtasya lokaḥ savitustathaiva

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde sūryapūjāpraśaṃsāvarṇano nāmaikasaptatyuttaraśatatamo 'dhyāyaḥ

3.172
// mārkaṇḍeya uvāca // //
varo dhruvaśca somaśca āpaścaivānilonalaḥ //
pratyūṣaśca prabhāsaśca vasavoṣṭau prakīrtitāḥ

/
aṣṭātmā vāsudevo'yaṃ prabhavenāpyayena ca //
aṣṭamyāṃ pūjayedyastu sopavāso narādhipa

caitramāsādathārabhya śuklapakṣe ca yādava //
maṇḍaleṣvatha vārcāsu yathāvanmanujādhipa

gandhamālyanamaskāradhūpadīpānnasaṃpadā //
bahiḥsnānena rājendra tathādhaḥśayanena ca

vratānte ca tathā dadyāddhenuṃ viprāya bhaktitaḥ //
vratametannaraḥ kṛtvā sarvānkāmānupāśnute

puṇḍarīkamavāpnoti kulamuddharati svakam //
vasūnāṃ lokamāsādya modatemarasannibhaḥ

mānuṣyamāsādya bhavatyarogo jitendriyaḥ satyaparo vinītaḥ //
dhanena dhānyena tathanvitaḥ syātstrīṇāmabhīṣṭaśca tathā suveśaḥ

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde suvratavarṇano nāma dvisaptatyuttaraśatatamo'dhyāyaḥ

3.173
// mārkaṇḍeya uvāca // //
śuklapakṣādathārabhya somāṣṭamyāṃ narādhipa //
pūjayetsopavāsastu devadevaṃ trilocanam

liṅge vāpyatha vārcāyāṃ kamale yadi vā sthale //
ghṛtakṣīrābhiṣekeṇa snānena vividhena ca

gandhamālyanamaskāradhūpadīpānnasaṃpadā //
gītena nṛtyavādyena vahnisaṃtarpaṇena ca

brāhmaṇānāṃ ca pūjābhiryathāvanmanujottama //
vratāvasāne dadyācca tathā dhenuṃ payasvinīm

puṇḍarīkaphalāvāptiḥ svargalokaṃ ca gacchati //
kṛṣṇāṣṭamīṣu cāpyevaṃ pūjayitvā maheśvaram

//
vahniṣṭomamavāpnoti svargalokaṃ ca gacchati //
aṣṭamīdvitayaṃ kṛtvā tathā saṃvatsaraṃ naraḥ

prāpyāśvamedhasya phalaṃ yathāvadbhuktvā bhogānsuranāthasya loke //
lokānavāpyātha maheśvarasya sāyujyamāyātyacireṇa tasya

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde maheśvarāṣṭamīvratavarṇano nāma trisaptatyuttaraśatatamo'dhyāyaḥ

3.174
mārkaṇḍeya uvāca //
himavānhemakūṭaśca niṣadho nīla eva ca //
śvetaśca śṛṅgavānmerurmālyavāngandhamādanaḥ

navaitāñśailanṛpatīnnavamyāṃ pūjayennaraḥ //
uttarāḥ kuravaḥ puṇyā ramyo hairaṇvatastathā

bhadrāśvaḥ ketumālaśca tathaiva ca ilāvṛtaḥ //
harivarṣaḥ kiṃpuruṣo varṣo bhārata eva ca

pūjanīyāstathaivaite yathā saṃsthānato nṛpa //
śuklapakṣanavamyāṃ tu caitrādārabhya pārthiva

sopavāsena dharmajña gandhamālyānnasaṃpadā //
jambūdvīpasya saṃsthānaṃ vratānte rajataṃ naraḥ

tulāpramāṇaṃ dadyāttu sarvānkāmānupāśnute //
aśvamedhamavāpnoti svargalokaṃ ca gacchati

mānuṣyamāsādya tu cakravartī nṛpo bhaveddevagaṇābhirāmaḥ //
ciraṃ ca kālaṃ vasudhāṃ praśāsya lokānavāpnoti tatopi kāmān

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde parvatāṣṭamīvratavarṇano nāma catussaptatyuttaraśatatamo'dhyāyaḥ

3.175
mārkaṇḍeya uvāca //
navamyāṃ sopavāsastu bhadrakālīṃ tu pūjayet//
śuklapakṣe mahārāja kārtikaprabhṛti kramāt

gandhamālyanamaskāradhūpadīpānnasaṃpadā//
saṃvatsarānte saṃpūjya vratānte brāhmaṇāya ca

vastrayugmaṃ naro dattvā yatheṣṭaṃ kāmamāpnuyāt //
rogārto mucyate rogādbaddho mucyeta bandhanāt

rājakāryābhiyuktaśca mucyate mahato bhayāt //
na caurebhyo bhayaṃ tasya nāraṇyebhyaḥ kadācana

putrānavāpnoti dhanaṃ yatheṣṭaṃ striyaśca mukhyā vividhaṃ ca kupyam //
pūjāṃ tu kṛtvā vidhivadbhavānyā kāmānavāpnoti tathā yatheṣṭān

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde bhadrakālīpūjāvarṇano nāma pañcasaptatyuttaraśatatamo'dhyāyaḥ