Vishnudharmottara Purana · Chapter 3.176.180

3.176
mārkaṇḍeya uvāca //
kraturdakṣo ripuḥ satyaḥ kālakāmau dhvanistathā //
kulavānmanujo viśvo rocamānaśca te daśa

viśvedevā samākhyātā daśātmā keśavo vibhuḥ //
tasya saṃpūjanaṃ kāryaṃ sitapakṣe narādhipa

ārabhya kārtikānmāsāddaśamyāṃ nṛpapuṅgava //
maṇḍaleṣu ca mukhyeṣu yadi vārcāsu yādava

gandhamālyanamaskāradhūpadīpānnasaṃpadā //
vratānte kanakaṃ dadyādyathāśakti dvijātaye

kṛtvā vrataṃ vatsarametadiṣṭaṃ prāpnoti teṣāṃ suciraṃ ca lokān //
tatroṣya loke puruṣatvametya rājā bhavedbrāhmaṇapuṅgavo vā

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde viśvedevadaśamīpūjāvarṇano nāma ṣaṭsaptatyuttaraśatatamo'dhyāyaḥ

3.177
mārkaṇḍeya uvāca//
ātmā hyāyurmano dakṣo madaḥ prāṇastathaiva ca //
haviṣmāṃśca gatīṣṭaśca ṛtaḥ satyaśca te daśa

devastvaṅgiraso nāma daśamyāṃ pūjayennaraḥ//
sopavāsaḥ kṛṣṇapakṣe pūrvoktavidhinā naraḥ

kṛtvā vrataṃ vatsarametadiṣṭānprāpnoti teṣāṃ suciraṃ ca lokān //
tatroṣya loke puruṣatvametya rājā bhavedbrāhmaṇa puṅgavo vā

iti śrīviṣṇudharmottare tṛtīyakhaṇḍe mā० vajrasaṃvāde aṅgirāvratavarṇano nāma saptasaptatyuttaraśatatamo'dhyāyaḥ

3.178
mārkaṇḍeya uvāca //
śuklapakṣe daśamyāṃ tu sopavāsastathā naraḥ //
mārgaśīrṣādathārabhya nityametadarindama

gandhamālyanamaskāradhūpadīpānnasaṃpadā //
ghṛtena juhuyādvahniṃ brāhmaṇām̐ścātra ca pūjayet//२/
vratāvasāne dadyācca tathā dhenuṃ payasvinīm//
vratametadvinirdiṣṭamaśvamedhaphalapradam

kṛṣṇapakṣe tathāpyetatkṛtvā saṃvatsaraṃ vratam//
rājasūyamavāpnoti phalamuddharati svakam

kṛtvā pakṣadvayepyetadvrataṃ manujasattama//
rājasūyāśvamedhānāṃ phalaṃ prāpnotyasaṃśayam/५/
svargalokamavāpnoti kulamuddharati svakam//
dharme matirbhavettasya dharmamāpnotyasaṃśayam/६//
yatrayatrābhijāyeta tatra dharmaparo bhavet//
pradhānaṃ taṃ tayā rājanyatra dharmaparo bhavet

ārogyamāyuṣyakaraṃ yaśasyaṃ sthānapradaṃ pāpavināśakāri //
kartavyametatpuruṣairyathāvatpūjyo hi viṣṇurbhagavānsadharmaḥ

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde dharmavratavarṇano nāmāṣṭasaptatyuttaraśatatamo'dhyāyaḥ

3.179
mārkaṇḍeya uvāca // aṅgārakaṃ tathā sūryaṃ nirṛtiṃ vādyaśastathā //
havanaṃ ceśvaraṃ mṛtyuṃ kapālimatha kiṃkiṇam

tatra caikādaśāṃśaistu devāṃstribhuvaneśvarān //
ekādaśyāṃ sopavāsaḥ somaṃ saṃpūjayettathā

gandhamālyanamaskāradhūpadīpānnasampadā //
mārgaśīrṣādathārabhya yāvatsaṃvatsaraṃ bhavet

saṃvatsarānte dadyācca tathā dhenuṃ payasvinīm //
kṛtvā vrataṃ vatsarametadiṣṭaṃ bhadratvamāpnoti narastu rājan //
rudreṇa sārdha suciraṃ ramitvā kāmānavāpyātha manobhirāmān

iti śrīviṣṇudharmottare tṛ० kha० mā०va०saṃ० rudravratavarṇano nāmaikonāśītyuttaraśatatamo'dhyāyaḥ

3.180
mārkaṇḍeya uvāca //
bhuvano bhānavaścaiva sujanyaḥ sujanastathā //
kratuḥ sarvaśca mūrdhā ca tyājaśca vyamnakastathā

prasavaścāpyayaścaiva dakṣo dvādaśakastathā //
bhṛgavo nāma nirdiṣṭā devā dvādaśa yājñiyāḥ

teṣāṃ sampūjanaṃ kuryāddvādaśyāṃ nityameva tu //
mārgaśīrṣādathārabhya kṛṣṇapakṣe sadaiva tu

gandhamālyanamaskāradhūpadīpānnasampadā //
saṃvatsarānte dadyācca brāhmaṇāya payasvinīm

kṛtvā vrataṃ vatsarametadiṣṭaṃ prāpnoti teṣāṃ ca salokameva //
tatroṣya kālaṃ suciraṃ manuṣyo rājā bhavedvā dvijapuṅgavo vā

iti śrīviṣṇudharmottare tṛtīyakhaṇḍe mā० va० saṃ० bhṛguvratavarṇano nāmāśītyuttaraśatatamo'dhyāyaḥ /