વિષ્ણુધર્મોત્તરપુરાણમ્ · અધ્યાય 3.171.175

3.171
॥ માર્કણ્ડેય ઉવાચ ॥ ॥
અનેન ચ વિધાનેન પ્રતિમાસં તુ યો નરઃ ॥
સપ્તમીદ્વિતયં કુર્યાદ્યાવત્સંવત્સરો ભવેત્

સોશ્વમેધમવાપ્નોતિ સૂર્યલોકં ચ ગચ્છતિ ॥
કુલમુદ્ધરતે રાજન્સર્વાન્કામાનુપાશ્નુતે

શિરસો વપનં કૃત્વા યોર્ચયેત્તુ દિવાકરમ્ ॥
તસ્યાર્કસ્તોષમાયાતિ વહ્નિષ્ટોમં ચ વિન્દતિ

અપૂપૈઃ સગુડૈર્ભક્ત્યા તથા ચ લવણાન્વિતૈઃ ॥
સહિરણ્યૈસ્સમભ્યર્ચ્ય વહ્નિષ્ટોમફલં લભેત્

સૂર્યાહ્ણે યસ્તુ નક્તાશી સંપૂજયતિ ભાસ્કરમ્ ॥
ઇષ્ટાન્કામાનવાપ્નોતિ સૂર્યલોકં ચ ગચ્છતિ

અર્કોદયે સદા યસ્તુ પૂજયેચ્ચ દિવાકરમ્ ॥
ઇષ્ટાન્કામાનવાપ્નોતિ સૂર્યલોકં ચ ગચ્છતિ

યથાયથા પૂજયતે તુ સૂર્યં કામાઃ સમગ્રાઃ સફલા ભવન્તિ ॥
આરોગ્યમગ્ર્યં ચ તથા નૃવીર ભૂતસ્ય લોકઃ સવિતુસ્તથૈવ

ઇતિ શ્રીવિષ્ણુધર્મોત્તરે તૃતીયખણ્ડે માર્કણ્ડેયવજ્રસંવાદે સૂર્યપૂજાપ્રશંસાવર્ણનો નામૈકસપ્તત્યુત્તરશતતમો ઽધ્યાયઃ

3.172
॥ માર્કણ્ડેય ઉવાચ ॥ ॥
વરો ધ્રુવશ્ચ સોમશ્ચ આપશ્ચૈવાનિલોનલઃ ॥
પ્રત્યૂષશ્ચ પ્રભાસશ્ચ વસવોષ્ટૌ પ્રકીર્તિતાઃ

।
અષ્ટાત્મા વાસુદેવોઽયં પ્રભવેનાપ્યયેન ચ ॥
અષ્ટમ્યાં પૂજયેદ્યસ્તુ સોપવાસો નરાધિપ

ચૈત્રમાસાદથારભ્ય શુક્લપક્ષે ચ યાદવ ॥
મણ્ડલેષ્વથ વાર્ચાસુ યથાવન્મનુજાધિપ

ગન્ધમાલ્યનમસ્કારધૂપદીપાન્નસંપદા ॥
બહિઃસ્નાનેન રાજેન્દ્ર તથાધઃશયનેન ચ

વ્રતાન્તે ચ તથા દદ્યાદ્ધેનું વિપ્રાય ભક્તિતઃ ॥
વ્રતમેતન્નરઃ કૃત્વા સર્વાન્કામાનુપાશ્નુતે

પુણ્ડરીકમવાપ્નોતિ કુલમુદ્ધરતિ સ્વકમ્ ॥
વસૂનાં લોકમાસાદ્ય મોદતેમરસન્નિભઃ

માનુષ્યમાસાદ્ય ભવત્યરોગો જિતેન્દ્રિયઃ સત્યપરો વિનીતઃ ॥
ધનેન ધાન્યેન તથન્વિતઃ સ્યાત્સ્ત્રીણામભીષ્ટશ્ચ તથા સુવેશઃ

ઇતિ શ્રીવિષ્ણુધર્મોત્તરે તૃતીયખણ્ડે માર્કણ્ડેયવજ્રસંવાદે સુવ્રતવર્ણનો નામ દ્વિસપ્તત્યુત્તરશતતમોઽધ્યાયઃ

3.173
॥ માર્કણ્ડેય ઉવાચ ॥ ॥
શુક્લપક્ષાદથારભ્ય સોમાષ્ટમ્યાં નરાધિપ ॥
પૂજયેત્સોપવાસસ્તુ દેવદેવં ત્રિલોચનમ્

લિઙ્ગે વાપ્યથ વાર્ચાયાં કમલે યદિ વા સ્થલે ॥
ઘૃતક્ષીરાભિષેકેણ સ્નાનેન વિવિધેન ચ

ગન્ધમાલ્યનમસ્કારધૂપદીપાન્નસંપદા ॥
ગીતેન નૃત્યવાદ્યેન વહ્નિસંતર્પણેન ચ

બ્રાહ્મણાનાં ચ પૂજાભિર્યથાવન્મનુજોત્તમ ॥
વ્રતાવસાને દદ્યાચ્ચ તથા ધેનું પયસ્વિનીમ્

પુણ્ડરીકફલાવાપ્તિઃ સ્વર્ગલોકં ચ ગચ્છતિ ॥
કૃષ્ણાષ્ટમીષુ ચાપ્યેવં પૂજયિત્વા મહેશ્વરમ્

॥
વહ્નિષ્ટોમમવાપ્નોતિ સ્વર્ગલોકં ચ ગચ્છતિ ॥
અષ્ટમીદ્વિતયં કૃત્વા તથા સંવત્સરં નરઃ

પ્રાપ્યાશ્વમેધસ્ય ફલં યથાવદ્ભુક્ત્વા ભોગાન્સુરનાથસ્ય લોકે ॥
લોકાનવાપ્યાથ મહેશ્વરસ્ય સાયુજ્યમાયાત્યચિરેણ તસ્ય

ઇતિ શ્રીવિષ્ણુધર્મોત્તરે તૃતીયખણ્ડે માર્કણ્ડેયવજ્રસંવાદે મહેશ્વરાષ્ટમીવ્રતવર્ણનો નામ ત્રિસપ્તત્યુત્તરશતતમોઽધ્યાયઃ

3.174
માર્કણ્ડેય ઉવાચ ॥
હિમવાન્હેમકૂટશ્ચ નિષધો નીલ એવ ચ ॥
શ્વેતશ્ચ શૃઙ્ગવાન્મેરુર્માલ્યવાન્ગન્ધમાદનઃ

નવૈતાઞ્શૈલનૃપતીન્નવમ્યાં પૂજયેન્નરઃ ॥
ઉત્તરાઃ કુરવઃ પુણ્યા રમ્યો હૈરણ્વતસ્તથા

ભદ્રાશ્વઃ કેતુમાલશ્ચ તથૈવ ચ ઇલાવૃતઃ ॥
હરિવર્ષઃ કિંપુરુષો વર્ષો ભારત એવ ચ

પૂજનીયાસ્તથૈવૈતે યથા સંસ્થાનતો નૃપ ॥
શુક્લપક્ષનવમ્યાં તુ ચૈત્રાદારભ્ય પાર્થિવ

સોપવાસેન ધર્મજ્ઞ ગન્ધમાલ્યાન્નસંપદા ॥
જમ્બૂદ્વીપસ્ય સંસ્થાનં વ્રતાન્તે રજતં નરઃ

તુલાપ્રમાણં દદ્યાત્તુ સર્વાન્કામાનુપાશ્નુતે ॥
અશ્વમેધમવાપ્નોતિ સ્વર્ગલોકં ચ ગચ્છતિ

માનુષ્યમાસાદ્ય તુ ચક્રવર્તી નૃપો ભવેદ્દેવગણાભિરામઃ ॥
ચિરં ચ કાલં વસુધાં પ્રશાસ્ય લોકાનવાપ્નોતિ તતોપિ કામાન્

ઇતિ શ્રીવિષ્ણુધર્મોત્તરે તૃતીયખણ્ડે માર્કણ્ડેયવજ્રસંવાદે પર્વતાષ્ટમીવ્રતવર્ણનો નામ ચતુસ્સપ્તત્યુત્તરશતતમોઽધ્યાયઃ

3.175
માર્કણ્ડેય ઉવાચ ॥
નવમ્યાં સોપવાસસ્તુ ભદ્રકાલીં તુ પૂજયેત્॥
શુક્લપક્ષે મહારાજ કાર્તિકપ્રભૃતિ ક્રમાત્

ગન્ધમાલ્યનમસ્કારધૂપદીપાન્નસંપદા॥
સંવત્સરાન્તે સંપૂજ્ય વ્રતાન્તે બ્રાહ્મણાય ચ

વસ્ત્રયુગ્મં નરો દત્ત્વા યથેષ્ટં કામમાપ્નુયાત્ ॥
રોગાર્તો મુચ્યતે રોગાદ્બદ્ધો મુચ્યેત બન્ધનાત્

રાજકાર્યાભિયુક્તશ્ચ મુચ્યતે મહતો ભયાત્ ॥
ન ચૌરેભ્યો ભયં તસ્ય નારણ્યેભ્યઃ કદાચન

પુત્રાનવાપ્નોતિ ધનં યથેષ્ટં સ્ત્રિયશ્ચ મુખ્યા વિવિધં ચ કુપ્યમ્ ॥
પૂજાં તુ કૃત્વા વિધિવદ્ભવાન્યા કામાનવાપ્નોતિ તથા યથેષ્ટાન્

ઇતિ શ્રીવિષ્ણુધર્મોત્તરે તૃતીયખણ્ડે માર્કણ્ડેયવજ્રસંવાદે ભદ્રકાલીપૂજાવર્ણનો નામ પઞ્ચસપ્તત્યુત્તરશતતમોઽધ્યાયઃ