Vishnudharmottara Purana · Chapter 3.161.165

3.161
mārkaṇḍeya uvāca //
athātaḥ saṃpravakṣyāmi tava śailavrataṃ śubham //
mahendro malayaḥ sahyaḥ śuktimānṛkṣavānapi

vindhyaśca pāriyātraśca saptaite kulaparvatāḥ //
caitraśuklasamārambhātpratyahaṃ dinasaptakam

teṣāṃ saṃpūjanaṃ kuryādbahiḥ snānaṃ samācaret //
gandhamālyanamaskāradhūpadīpānnasaṃpadā

yavairhomastathā kāryo dadyādvipreṣu dakṣiṇām //
naktaṃ yavānnamaśnīyātkuryātsaṃvatsaraṃ vratam

vratāvasāne dadyācca yavasthālīśca viṃśatim //
vācakāya dvijendrāya suvarṇaṃ gāṃ ca tasya tu

dratenānena cīrṇena sarvāṃ sāgaramekhalām //
bhunakti vasudhāṃ rājā vaśīkṛtvā ripūnnṛpa

bhogāṃśca bhuktvā tridive ca rājanmānuṣyamāsādya yathoktametat //
prāpnoti sarvaṃ hi mayeritaṃ yajjanmāntarāṇyeva narendra sapta

iti śrīviṣṇudharmottare tṛ० kha० mārkaṇḍeyavajrasaṃvāde saptaśailavratavarṇano nāmaikaṣaṣṭyuttaraśatatamo'dhyāyaḥ

3.162
mārkaṇḍeya uvāca //
ataḥ paraṃ pravakṣyāmi tava lokavrataṃ śubham //
yāstu vyāhatayaḥ sapta trailokyāṃ tu prakīrtitāḥ //

ācaretpratyahaṃ snānaṃ bahirnityamatandritaḥ //
caitraśuklādathārabhya krameṇa dinasaptakam

gomūtraṃ gomayaṃ kṣīraṃ dadhi sarpiḥ kuśodakam //
ekarātropavāsaśca krameṇaivaṃ samācaret

mahāvyāhatibhirhomastilaiḥ kāryo dinedine //
saṃvatsarānte dadyācca tathā vipreṣu dakṣiṇām

suvarṇamahataṃ vāsaḥ kāṃsyaṃ dhenuṃ payasvinīm //
saṃvatsaramidaṃ kṛtvā vrataṃ puruṣasattama

sarva lokacaraḥ śrīmānsvecchayā syānnarādhipa //
yāvatkalpāvasānaṃ tu kalpādau pārthivo bhavet

sa cakravartī nṛpavaryapūjyaḥ surāsurāṇāmadhikaprabhāvaḥ //
saṃvatsarāṇāmayutaṃ śatānāṃ sampāti pṛthvīṃ sakalābhirāmaḥ

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde saptavyāhṛti saptalokavratavarṇano nāma dvāṣaṣṭyuttaraśatatamo'dhyāyaḥ

3.163
// mārkaṇḍeya uvāca // //
caitraśuklādathārabhya pratyahaṃ dinasaptakam //
hlādinīṃ hrādinīṃ caiva pāvanīṃ caiva pūjayet

sītāṃ rāmaṃ tathā sindhuṃ tathā bhāgīrathīṃ kramāt //
bahiḥsnānaṃ tataḥ kuryānnityaṃ naktāśano bhavet

jale tu juhuyātkṣīraṃ tāsāṃ nāmnā dinedine //
kṣīrapūrṇā ca dātavyā vāridhānyo dvijātiṣu

kṣīrāśanastu tiṣṭhettu tattathā dinasaptakam //
evaṃ saṃvatsaraṃ kṛtvā pūrṇe saṃvatsare naraḥ

dvijātiṣu tato dadyādrajatasya palaṃpalam //
phālgunasya site pakṣe saptamyāṃ divasa kramāt

tallokamāpnoti naro yatra pāyasakardamam //
nadyaḥ kṣīravahā divyāḥ sarvakāmaphalapradāḥ

tatroṣya kālaṃ suciraṃ mahātmā mānuṣyamāsādya bhavatyarogaḥ//
rūpeṇa śīlena dhanena yukto rājātha vā brāhmaṇapuṅgavaśca

iti śrīviṣṇudharmettare tṛtīyakhaṇḍe mārkaṇḍeyavajrasaṃvāde nadīvratavarṇanonāma triṣaṣṭyuttaraśatatamo'dhyāyaḥ

3.164
// mārkaṇḍeya uvāca // //
caitraśuklādathārabhya pratyahaṃ dinasaptakam //
suprabhāṃ kāñcanākṣīṃ ca viśālāṃ mānasaṃ hradam

tāṃ trinādāṃ suveṇuṃ ca tathaiva vimalodakām //
nityaṃ saṃpūjayedbhaktyā bahiḥ snānaṃ samācaret

tāsāṃ ca pratyahaṃ nāmnā dadhnā homaṃ samācaret //
brāhmaṇānbhojayeccātra dadhnā miśraṃ ca bhojanam

ghṛtaudanaṃ tathāśnīyātsakṛdeva tathā niśi //
evaṃ saṃvatsaraṃ kṛtvā pūrṇe saṃvatsare naraḥ

phālgunāmalapakṣe tu pratyahaṃ divasakramāt //
vastrāṇāṃ saptakaṃ dadyāttīrthasnāte dvijottame

evaṃ saṃvatsaraṃ kṛtvā vrataṃ sārasvataṃ japet //
tatroṣya suciraṃ kālaṃ manuṣyo jāyate tadā

tadā narendro vijitāripakṣo dvijottamo vā bahu yajñayājī //
rūpeṇa śīlena dhanena yuktaḥ śrutānvitaḥ syācca janābhirāmaḥ

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde sārasvata vratavarṇanonāma catuḥṣaṣṭyuttaraśatatamo'dhyāyaḥ

3.165
// mārkaṇḍeya uvāca // //
caitraśuklādathārabhya pratyahaṃ dinasaptakam //
marīcimatryaṅgirasau pulastyaṃ pulahaṃ kratum

vasiṣṭhaṃ ca mahābhāga pūjayeddivasakramāt //
kālodbhavaiḥ phalaiḥ puṣpairgorasaiśca pṛthakpṛthak

ācaretpratyahaṃ snānaṃ bahirnaktāśano bhavet //
mahāvyāhṛtibhirhomaṃ phalairmūlaiḥ sagorasaiḥ

vāridhānyaśca dātavyāḥ kṣīrapūrṇā dvijātiṣu //
evaṃ saṃvatsaraṃ kṛtvā vratānte cāhitāgnaye

dadyātkṛṣṇājinaṃ rājanyathāpūrvaṃ mayeritam //
vratametannaraḥ kṛtvā mokṣopāyaṃ ca vindati

mokṣopāyaṃ samāsādya mokṣaṃ prāpnotyasaṃśayam

prāpnoti lokaṃ yadi vā munīnāṃ devasya viṣṇoryadi veśvarasya //
pitāmahasyāpratimasya vāpi vratena cīrṇena mahānubhāva

iti śrīviṣṇudharmottare tṛtīyakhaṇḍe mārkaṇḍeyavajrasaṃvāde saptarṣivratavarṇano nāma pañcaṣaṣṭyuttaraśatatamo'dhyāyaḥ